ܨܠܽܘܬܳܐ ܕܫܽܘܪܳܝܳܐ

ܠܐܴ ܡܳܝܽܘܬܳܐ ܐܰܠܳܗܳܐ ܕܡܺܝܬ ܒܰܒܣܰܪ ܘܰܐܚܺܝ ܠܓܶܢܣܳܐ ܐ̱ܢܳܫܳܝܳܐ ܘܡܳܝܽܘܬܳܐ: ܘܰܒܫܽܘܒܚܳܐ ܪܰܒܳܐ ܩܳܡ ܡܶܢ ܩܰܒܪܳܐ ܘܠܰܟܝܳܢܰܢ ܚܰܕܶܬ ܡܶܢ ܬܶܫܒ̈ܚܳܬܳܟ ܒܦܽܘ̈ܡܰܝܢ: ܘܬܰܘܕ̈ܝܳܬܳܟ ܒܠܶܫܳܢܰܝ̈ܢ: ܘܣܰܒܪܳܐ ܕܰܩܝܳܡܬܳܟ ܐܰܨܡܰܚ ܒܢܰܦ̈ܫܳܬܰܢ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘܡܝܽܘܢ ܡܰܢܛܺܝܩܳܝܳܐ

ܐܰܡܝ̣ܪ ܠܣܰܥܝ̣ܕ ܒܰܪ ܨܰܒܽܘܢܺܝ ܚܰܣܝܳܐ ܕܡܺܝܠܺܝܛܺܝܢܺܝ ܕܩܰܛܠ̣ܶܗ ܓܰܒܪܺܐܝܶܠ ܐܺܝܓܡܽܘܢܳܐ ܝܰܘܢܳܝܳܐ ܒܳܬܰܪ ܕܐܶܬܬܰܣܪܰܚ

ܫܽܘܒܚܳܐ ܘܺܐܝܩܳܪܳܐ ܘܣܶܓܕܬܳܐ ܘܪܰܒܽܘܬ ܝܳܐܝܽܘܬܳܐ ܢܶܫܬܘܶܐ ܕܰܢܩܰܪܶܒ: ܠܗܰܘ ܕܺܐܝܬܰܘܗܝ ܘܢܶܗܘܶܐ ܐܝ̣ܬܰܘܗ̱ܝ: ܡܫܰܪܝܳܢܳܐ ܘܰܡܫܰܠܡܳܢܳܐ: ܕܫܽܘܪܳܝܳܐ ܘܫܽܘܠܳܡܳܐ ܠܐܴ ܚܳܒܶܫ ܠܶܗ: ܫܶܠܝܳܐ ܘܰܒܗܺܝܠܐܴ ܘܠܐܴ ܡܶܬܕܰܪܟܳܢܳܐ ܕܰܐܚܺܝܕ ܐܰܬܪܳܐ ܘܰܐܬܪܳܐ ܕܢܰܦܫܶܗ ܕܟܽܠ ܠܘܳܬܶܗ ܗ̣ܽܘ ܡܶܬܬܙܺܝܥ ܐܰܝܟ ܩܺܝܢܛܪܽܘܢ ܕܚܽܘܓܬܳܐ: ܘܥܶܠܬܳܐ ܩܰܕܡܳܝܬܳܐ ܟܰܕ ܗ̣ܽܘ ܠܘܳܬ ܡܶܕܶܡ ܠܐܴ ܡܶܬܬܙܺܝܥ ܕܣܰܩܽܘܒܠܐܴ ܠܨܶܒܝܳܢܶܗ ܘܕܰܠܩܽܘܒܠܐܴ ܠܰܝܬ ܕܺܐܝܬܽܘܬܶܗ: ܕܟܽܠ ܡܶܕܶܡ ܕܰܗ̣ܘܳܐ ܘܰܕܗܳܘܶܐ ܒܨܶܒܝܳܢܶܗ ܐܶܬܬܟܺܝܢ ܘܡܶܬܟܰܝܰܢ: ܘܰܐܝܟ ܕܰܨܒ̣ܳܐ ܘܰܐܝܟܰܢܳܐ ܕܨܳܒܶܐ ܕܰܠܟܽܠ ܗ̣ܽܘ ܩܰܪܺܝܒ: ܘܟܽܠ ܠܶܗ ܩܳܪܶܒ: ܕܠܶܗ ܡܶܕܶܡ ܠܐܴ ܣܳܦܶܩ: ܐܳܚܶܕ ܘܠܐܴ ܡܶܬܬܚܶܕ: ܘܰܠܪܰܒܽܘܬܶܗ ܣܳܟܳܐ ܠܐܴ ܡܬܰܚܰܡ: ܐܰܠܳܗ ܐܰܠܳܗ̈ܺܝܢ ܘܡܳܪܶܐ ܡܳܪ̈ܰܘܳܢ ܕܡܶܢܶܗ ܕܡܶܫܬܰܡܗܳܐ ܟܽܠ ܐܰܒܳܗܽܘܬܳܐ ܕܒܰܫܡܰܝܳܐ ܘܒܰܐܪܥܳܐ: ܐܰܒܳܐ ܕܠܐܴ ܐܰܒܳܐ: ܒܪܳܐ ܕܶܝܢ ܕܠܐܴ ܒܪܳܐ: ܪܽܘܚܳܐ ܕܶܝܢ ܕܠܐܴ ܐܰܒܳܐ ܐܳܦܠܐܴ ܒܪܳܐ: ܕܰܫܘܶܝܢ ܘܰܣܕܺܝܩܺܝܢ ܘܰܐܘܶܝܢ ܘܰܡܫܰܚܠܦܺܝܢ ܘܠܐܴ ܚܒܺܝܟܺܝܢ: ܘܡܶܫܬܰܒܚ̈ܳܢܶܐ ܘܠܰܘ ܡܫܰܒܚ̈ܳܢܶܐ: ܡܶܣܬܰܓܕܳܢ̈ܶܐ ܘܠܰܘ ܣܳܓܽܘ̈ܕܶܐ: ܚܰܕ ܟܝܳܢܳܐ ܓܢܺܝܙܳܐ ܘܠܐܴ ܡܶܬܕܰܪܟܳܢܳܐ: ܕܦܽܘ̈ܡܶܐ ܡܠܺܝ̣̈ܠܐܷ ܘܟܽܠܗܽܘܢ ܒܪ̈ܰܝܳܐ ܘܰܥܒܺܝ̣̈ܕܶܐ ܗܳܠܶܝܢ ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ ܙܳܝܥܺܝܢ ܘܪܳܥܠܺܝܢ ܬܳܡܗܺܝܢ ܘܡܶܬܒܰܠܗܺܝܢ ܡܶܢ ܬܶܫܒܽܘܚܬܶܗ: ܠܶܗ ܬܶܫܒ̈ܚܳܬܳܐ ܣܒܺܝ̣̈ܣܳܬܳܐ ܒܝܽܘ̈ܒܳܒܶܐ ܡܨ̈ܰܠܠܐܷ: ܒܩܺܝ̣̈ܢܳܬܳܐ ܕܰܟܝ̈ܳܬܳܐ ܘܫܰܦ̈ܝܳܬܳܐ ܘܰܒܢܶܥ̈ܡܳܬܳܐ ܚܰܠܝ̈ܳܬܳܐ ܡܫܰܒܚܺܝܢ ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܐܰܠܳܗ ܐܰܠܳܗܺܝ̈ܢ ܡܳܪܶܐ ܡܳܪ̈ܰܘܳܢ ܡܳܪܝܳܐ ܫܡܳܟ: ܡܶܠܬܳܐ ܡܝܰܩܢܰܬ݀ ܟܽܠ ܦܽܘܡܳܐ ܠܐܴ ܓܫܺܝܡܳܐ: ܡܡܰܠܠܳܢܳܐ ܘܠܐܴ ܡܶܬܡܰܠܠܳܢܳܐ ܕܐܰܠܳܗܳܐ ܐܰܒܳܐ: ܚܶܟܡܰܬ݀ ܐܰܠܳܗܺܝ̈ܢ: ܘܝܳܗܒܰܬ݀ ܣܟܽܘܠܝܽܘܢ ܠܟܽܠ ܚܰܟܺܝ̈ܡܶܐ: ܕܶܐܬܪܕܺܝܘ ܒܚܶܟܡܬܳܐ ܐܰܠܳܗܳܝܬܳܐ: ܘܰܡܡܰܕܟܳܐ ܠܪ̈ܳܕܝܰܝ ܒܣܽܘܟܳܠܐܴ: ܚܰܝܠܐܴ ܡܬܽܘܡܳܝܳܐ ܕܰܩܢܽܘܡܳܐ ܕܡܶܢ ܚܰܝܠܬܳܢܽܘܬܳܐ ܩܢܽܘܡܳܝܬܳܐ ܘܝܳܗܶܒ ܬܽܘܩܦܳܐ ܠܟܽܠ ܚܰܝܠܬܳܢ̈ܶܐ: ܚܰܝܳܐ ܘܰܡܠܺܝܠܐܴ ܘܠܐܴ ܡܳܝܽܘܬܳܐ ܘܕܰܠܥܶܠ ܡܶܢ ܚܰܝ̈ܶܐ ܡܶܢ ܕܟܽܠ ܚܰܝܽܘܬܳܢܳܝ̈ܶܐ ܡܠܺܝ̣̈ܠܐܷ ܡܰܢ ܠܐܴ ܡܠܺܝ̣̈ܠܐܷ: ܘܰܬܚܶܝܬ ܚܰܝܽܘܬܳܐ ܡܩܰܛܪܓܺܝܢ ܗܰܘ ܕܰܒܝܰܕ ܡܶܬܝܰܠܕܳܢܽܘܬܳܟ ܠܐܴ ܙܰܒܢܳܝܬܳܐ: ܘܠܐܴ ܐܰܬܪܳܢܳܝܬܳܐ ܘܠܐܴ ܕܽܘܟܬܳܢܳܝܬܳܐ: ܗ̣ܘܳܐ ܢܽܘܗܪܳܐ ܘܶܐܬܟܰܝܢܰܬ݀ ܠܐܴ ܗܽܘܠܳܢܳܝܬܳܐ: ܘܕܰܠܥܶܠ ܡܶܢ ܗܽܘ̈ܠܐܷ: ܘܠܰܚܕܳܐ ܚܕܳܐ ܡܶܢܗܶܝܢ ܐܰܬܰܪ ܕܰܨܒ̣ܰܝܬ ܣܰܬܶܬܬ: ܘܰܒܠܐܴ ܓܫܺܝܡܬܳܐ ܟܰܣܝܽܘܬܳܐ ܫܰܒܰܚ̣ܬ ܒܠܐܴ ܗܽܘܠܳܢܳܝܬܳܐ ܓܰܢ̱ܒܳܪܽܘܬܳܟ ܐܰܘܕܰܥ̣ܬ ܟܰܕ ܐܰܣܗ̣ܶܕܬ ܘܶܐܡ̣ܰܪܬ: ܐܳܘ ܫܒܺܝܚ ܒܰܓܢܺܝܙܽܘܬܳܐ ܡܳܪܝܳܐ: ܕܡܶܢ ܦܽܘܡ ܥܶܠܳܝܳܐ ܢܶܦܩܶܬ ܘܰܠܟܽܠܶܗ ܕܰܬܚܶܝܬ ܫܡܰܝܳܐ ܟܰܣܺܝܬ: ܘܒܰܡܪ̈ܰܘܡܶܐ ܪ̈ܳܡܶܐ ܡܰܫܟܰܢܝ̱ ܢܶܩܫܶܬ: ܘܰܒܥܽܘ̈ܡܩܰܝ ܬܗܽܘܡܳܐ ܐܽܘܪܚܝ̱ ܣܳܡܶܬ: ܘܥܰܠ ܥܰܡܽܘ̈ܕܰܝ ܥܢ̈ܳܢܶܐ ܬܪܽܘܢܺܝܳܘܢ ܕܥܽܘܫܢܝ̱ ܐܰܘܬܒܶܬ: ܘܰܒܣܰܘ̈ܦܰܝ ܬܺܐܒܶܝܠ ܥܳܡܰܪܬܳܐ ܬܽܘܩܦܝ̱ ܐܰܘܕܥܶܬ: ܘܒܰܫܡ̈ܰܝ ܫܡܰܝܳܐ ܥܰܡ ܝܳܠܽܘܕܝ̱ ܐ̱ܢܳܐ: ܘܒܰܡܨܰܥܬܳܗ̇ ܕܰܐܪܥܳܐ ܐܶܥܒܶܕ ܦܽܘܪܩܳܢܝ̱: ܟܰܕ ܕܶܝܢ ܓܰܡܰܪܬ݀ ܘܫܰܡܠܺܝܬ ܠܗܰܘ̈ܢܶܐ ܡܰܢ ܘܰܠܢܰܗܺܝܪ̈ܶܐ ܗܳܢܘܢ̇ ܥܶܠܳܝ̈ܶܐ: ܘܰܠܟܽܘܟܺܝܬܳܐ ܗܳܝ ܬܽܘܗܽܘܒܽܘܗܢܳܝܬܳܐ ܡܶܢ ܐܰܦ̈ܰܝ ܐܳܕܰܡܬܳܐ ܕܚ݂ܰܝܬ ܐܳܦ ܓܰܠ̣ܶܓܬ: ܗܳܝܕܶܝܢ ܥܒܳܕ ܐܺܝܕܰܝ̈ܟ ܠܳܟ ܫܦ̣ܰܪ ܘܛܰܒܥܳܐ ܫܰܦܺܝܪܳܐ ܝܰܩ̣ܶܢܬ ܕܡܽܘܬ ܨܰܠܡܳܟ ܚܰܝܳܐ ܕܒܶܗ ܐܶܬܝܰܕܥܰܬ݀ ܪܰܒܽܘܬ ܪܰܒܽܘܬܳܟ: ܘܟܰܕ ܥܰܡ ܗܽܘ̈ܠܶܐ ܡܶܕܪܳܢܳܝܬܳܐ ܘܕܳܝܽܘܒܬܳܐ: ܐܳܦ ܪܒܺܝܥܳܝܰܬ݀ ܐܶܣܛܽܘ̈ܟܣܶܐ ܚܰܝܶܕܬܳܝܗ̱ܝ ܘܳܐܕܳܡ ܟܰܢܺܝܬ ܘܫܰܡܰܗܬܳܝܗ̱ܝ: ܘܫܰܡܳܫܳܐ ܘܦܰܠܳܚܳܐ ܕܟܰܪܡܳܐ ܠܐܴ ܗܽܘܠܳܢܳܝܳܐ ܐܰܣܪܰܚܬܳܝܗ̱ܝ: ܘܒܰܪ̱ܬ݀ ܨܰܘܒܳܐ ܥܰܡܶܗ ܣܳܡ̣ܬ ܐܰܝܟ ܕܰܠܚܰܒܪܽܘܬܶܗ: ܘܫܰܘܬܳܦܬܳܐ ܕܦܰܪܫܰܓܢܳܐ ܢܳܡܽܘܣܳܝܳܐ: ܒܳܚܽܘܪܳܐ ܕܚܺܐܪܽܘܬܶܗ ܡܶܢܳܟ ܐܶܬܬܣܺܝܡ ܥܠܰܘܗ̱ܝ: ܗ̣ܽܘ ܕܶܝܢ ܫܳܛܝܳܐ ܘܥܶܨܝܳܝܳܐ ܐܶܬܚܙܺܝ ܗ̱ܘܳܐ: ܒܢܰܩܺܝܦܽܘܬܳܐ ܕܺܝܠܶܗ ܕܰܠܥܶܕܪܶܗ: ܒܕܰܐܘܫܶܛ ܐܺܝܕܶܗ ܘܰܡ̣ܪܰܛ ܦܺܐܪ ܡܰܘܬܳܐ: ܒܳܬܰܪܟܶܢ ܐܶܣܬܰܪܰܩ ܡܶܢ ܫܽܘܒܚܶܗ ܘܫܽܘܦܪܶܗ ܫܠ̣ܰܚ: ܘܝܳܐܝܽܘܬܶܗ ܒܰܠܺܝ: ܘܡܺܝܙܳܪ̈ܢܶܐ ܚܶܣܕܳܢܳܝ̈ܶܐ ܐܶܬܟܒܶܢ ܘܶܐܫܬܠܶܡ ܠܰܥܪܳܕܳܐ ܘܶܐܬܕܰܡܺܝ ܠܳܗ̇: ܘܰܒܪܶܥܝܳܐ ܚܳܢܽܘܩܳܐ ܩܕܳܠܶܗ ܐܰܪܬܰܥ ܗ̱ܘܳܐ: ܘܥܳܝ̈ܳܬܳܐ ܟܽܘܒܳܢܳܝ̈ܳܬܳܐ ܪܳܥܶܐ ܗ̱ܘܳܐ ܘܡܰܝ̈ܳܐ ܡܰܘܪ̈ܬܳܢܳܝܶܐ ܠܐܴܝܰܥ ܗ̱ܘܳܐ ܗ̣ܽܘ ܘܟܽܠ ܕܰܐܦܪܺܝ: ܘܟܰܕ ܚ̣ܙܰܝܬ ܐܳܘ ܒܪܳܐ ܘܡܶܠܬܳܐ ܐܰܠܳܗܳܐ ܠܥܰܒܕܳܟ ܕܡܶܢ ܡܳܪ̈ܰܝܳܐ ܥܳܫܽܘ̈ܡܶܐ ܘܩܳܝܽܘ̈ܡܶܐ ܙܥܺܝ̈ܦܶܐ ܐܶܬܥܰܒܕܰܕ ܒܳܬܰܪ ܗܳܠܶܝܢ ܡܝܰܬܪ̈ܳܬܳܐ ܕܫܰܟ̣ܶܢܬ ܠܶܗ ܐܶܬܬܘܺܝܬ ܥܠܰܘܗ̱ܝ ܘܗܳܝ ܕܢܺܚܶܐ ܦܰܪܢܶܣ̣ܬ ܠܶܗ: ܘܰܒܕܰܨܠܰܝܬ ܫܡܰܝܳܐ ܘܰܢܚ̣ܶܬܬ: ܘܥܰܪ̈ܦܶܠܐܷ ܪܟܶܒ̣ܬ ܘܰܐܬܰܪ ܕܰܨܒ̣ܰܝܬ ܢܛܰܚ̣ܬ ܘܶܐܡ̣ܰܪܬ ܕܡܶܢ ܩܕܳܡ ܥܳܠܡ̈ܶܐ ܐܶܢܳܐ ܐܝ̣ܬܝ: ܘܒܺܐܝܣܪܳܐܝܶܠ ܐܶܫܪܶܐ: ܘܡܶܢ ܝܰܥܩܽܘܒ ܠܥܳܠܡܺܝܢ ܥܽܘܗܕܳܢܝ̱ ܠܐܴ ܢܶܥܢܰܕ: ܘܰܡܫܰܚ̣ܬ ܩܢܽܘܡܳܝܬܳܟ ܒܒܶܣܪܳܐ ܡܢܰܦܫܳܐ ܘܰܡܡܰܕܥܳܐ ܕܠܶܗ ܐܰܬܚ̣ܰܝܰܕܬ ܒܰܩܪܺܝܬܳܐ ܕܡܶܢܳܗ̇ ܐܶܬܺܝܠܶܕܬ ܡܰܘܠܳܕܳܐ ܬܪܰܝܳܢܳܐ: ܒܙܰܒܢܳܐ ܘܰܒܕܽܘܟܬܳܐ ܘܒܰܐܬܪܳܐ ܟܰܕ ܠܐܴ ܣܳܟ ܥܳܐܶܠ ܐܰܢ̱ܬ ܒܝܰܕ ܒܽܘܪܢܳܫܳܟ ܬܚܶܝܬ ܐܰܪܺܝܬܡܰܛܺܝܩܺܝ ܣܒܺܝܣܰܬ݀ ܒܡܶܢܝܳܢܳܐ ܕܰܟܬܳܒ̈ܶܐ ܘܕܰܟܝܳܢܳܐ ܘܳܐܦܠܐܴ ܒܰܡܢܰܘ̈ܳܬܳܐ ܕܒܰܐܥܦܳܐ ܘܦܶܠܓܳܐ ܐܝ̣ܬܝܟ ܘܳܐܦܠܐܴ ܐ̱ܚܪܺܢܳܐ ܘܰܐܚܪܳܢܝܳܐܝ̣ܬ: ܐܶܠܐܴ ܚܰܕ ܐܰܠܳܗܳܐ ܕܡܶܢ ܐܰܒܳܐ: ܩܕܳܡ ܨܰܦܪܳܐ ܘܦܳܢܝܳܐ: ܘܚܰܕ ܡܫܺܝܚܳܐ ܡܶܢ ܡܰܪܝܰܡ ܒܪܰܡܫܳܐ ܐܶܬܚܙܰܝܬ: ܟܰܕ ܠܗܰܠ ܡܶܢ ܪܰܡܫܳܐ ܘܫܽܘܠܳܡܳܐ ܐܝ̣ܬܝܟ ܘܰܠܥܳܠܰܡ ܥܳܠܡܺܝܢ: ܕܰܒܥܰܡ̱̈ܡܶܐ ܪ̈ܰܚܺܝܩܶܐ ܐܶܬܚܰܘܺܝ ܫܽܘܠܛܳܢܳܐ ܕܺܝܠܳܟ: ܘܒܶܐܡܘ̈ܳܬܳܐ ܩܰܪ̈ܺܝܒܳܬܳܐ ܦܽܘܪܩܳܢܳܟ: ܡܶܢ ܡܶܨܪܶܝܢ ܐܰܒܳܐ ܚܰܕ ܒܪܳܐ ܩܪܳܟ ܣܳܗܕܳܐ ܠܐܴ ܡܶܬܕܰܓܠܳܢܳܐ: ܒܢܳܨܪܰܬ݀ ܓܙܽܘܪܬܳܐ ܢܳܡܽܘܣܳܝܬܳܐ ܫܰܡܠܺܝܬ: ܘܥܰܠ ܕܪ̈ܳܥܶܐ ܡܰܪ̈ܫܠܐܷ ܒܗܰܝܟܠܐܴ ܐܶܙܕܰܝܰܚܬ ܘܩܽܘܪ̈ܒܳܢܶܐ ܚܠܳܦܰܝܟ ܩܰܪܶܒ̣ܬ: ܘܩܰܒܶܠ̣ܬ ܠܰܗܡܰܝܪ̈ܶܐ ܡܠܺܝ̣̈ܠܐܷ ܕܺܐܝܪܽܘܕܝܰܢܽܘ: ܛܰܠܝܽܘܣܳܐ ܒܨܶܗܝܽܘܢ ܐܶܬܟܰܢܺܝܬ: ܘܥܰܡ ܝܽܘܢܶܣ̈ܩܶܐ ܕܽܐܘܪܫܠܶܡ ܠܰܓܠܶܓܬ ܘܰܒܥܰܡܳܐ ܝܰܩܺܝܪܳܐ ܐܶܬܓܰܕܘܰܕܬ: ܘܰܐܝܟ ܐܰܪ̈ܙܶܐ ܕܠܶܒܢܳܢ ܐܶܬܥܰܠܰܡ̣ܬ: ܘܰܐܝܟ ܐܺܝܠܳܢܳܐ ܕܡܶܫܚܳܐ ܕܰܒܣܳܢܺܝܪ ܫܶܘܚܰܬ݀ ܩܰܘܡܬܳܟ ܘܰܐܝܟ ܕܽܘܠܒܳܐ ܡܥܰܠܝܳܐ ܥܰܠ ܣܦܳܪ̈ܰܝ ܝܽܘܪܕܢܳܢ ܐܶܬܚܙܰܝܬ ܘܰܥܡ̣ܰܕܬ ܘܚܰܠܶܠܬܳܝܗ̱ܝ ܠܗܰܘ ܨܰܚܢܳܐ ܗܰܘ ܕܒܰܣܝܳܢܳܐ ܐܶܨܛܰܥܨܰܥ ܗ̱ܘܳܐ: ܘܰܐܝܟ ܙܰܝܬܳܐ ܥܰܒܺܝܛ ܫܽܘܒܚܳܐ ܪܕܰܝܬ ܒܰܦܩܰܥܬܳܐ ܘܰܒܨܰܘܡܳܐ ܐܰܪܒܥܺܝܢܳܝܳܐ ܫܰܚܺܝܬ (ܐܰܡܚܶܠܬ) ܘܫܰܦ̣ܶܠܬ ܠܰܡܢܰܣܝܳܢܳܟ ܘܟܰܕ ܒܩܺܝܢܽܘܡܽܘܢ (ܐܳܕܫܰܐ ܗ̱ܘ ܕܗܶܪ̈ܘ̣ܡܶܐ) ܘܰܒܡܽܘ̣ܪܽܘܢ ܒܰܣܺܝܡ ܪܺܝܚܳܐ ܣܰܡܣ̣ܶܡܬ ܠܣܰܪܝܽܘܬܳܐ ܫܽܘܚܢܳܢܳܝܬܳܐ ܕܰܐܝܠܶܝܢ ܕܠܐܴ ܪܥ̣ܰܘ ܒܥܽܘܕܪ̈ܳܢܰܝܟ: ܘܡܶܢ ܗܰܝܟܠܳܟ ܪܺܝܫܳܝܳܐ ܘܡܶܢ ܠܘܳܬ ܚܰܕܝܽܘܟ ܒܒܶܣ̈ܡܶܐ ܡܶܢ ܐܺܝ̈ܕܰܝ ܙܳܢܝ̣ܬܳܐ ܐܶܬܡܫܰܚ̣ܬ: ܘܡܰܘܒܠܐܴ ܚܛܺܝܬܳܢܳܝܬܳܐ ܡܶܢ ܦܳܪܩܰܬ݀ ܢܰܦܫܳܗ̇ ܫ̣ܪܰܝܬ: ܘܰܠܠܶܒܰܘ̈ܳܬܳܐ ܕܚܰܛܳܝ̈ܶܐ ܣܰܒܪܳܐ ܪܰܒܳܐ ܕܰܬܝܳܒܽܘܬܳܐ ܡܠ̣ܰܝܬ: ܥܺܝܠܐܴ ܕܶܝܢ ܒܰܣܝܳܐ ܘܫܺܝܛܳܐ ܪܟܶܒ̣ܬ ܘܡܶܢ ܡܨܰܥܨ̈ܥܶܐ (ܠܳܐ ܡܟܰܬܡ̈ܶܐ) ܒܫܽܘ̈ܩܰܝ ܨܶܗܝܽܘܢ ܐܶܫܬܰܒܰܚܬ: ܠܛܽܘܪܳܐ ܕܬܳܒܽܘܪ ܥܰܡ ܬܰܠܡܺܝ̈ܕܰܝܟ ܣܠܶܩ̣ܬ ܘܒܶܨܪܳܐ ܙܥܽܘܪܳܐ ܡܶܢ ܫܽܘܒܚܶܗ ܕܰܐܒܽܘܟ ܠܬܰܠܡܺܝ̈ܕܰܝܟ ܚܰܘܺܝܬ: ܘܚܰܫ̣ܬ ܒܶܗ ܒܒܽܘܪܢܳܫܳܟ ܕܰܚܠܳܦܰܝܢ ܟܰܕ ܠܥܶܠ ܡܶܢ ܚܰܫ̈ܶܐ ܐܝ̣ܬܝܟ: ܘܶܐܬܩܒ̣ܰܥܬ ܒܓܳܓܽܘܠܬܳܐ ܒܕܽܘܟܬܳܐ ܥܦܺܝܦܬܳܐ ܘܰܐܫܠܶܡ̣ܬ ܪܽܘܚܳܟ ܒܺܐܝ̈ܕܰܝ ܐܰܒܽܘܟ: ܘܒܰܙܩܽܘܪܳܐ ܟܶܬܳܢܳܝܳܐ ܐܶܬܟ̣ܰܪܰܟܬ: ܘܰܒܚܽܘܢܛܬܳܐ ܢܺܝܩܽܘܕܺܝܡܳܣܳܝܬܳܐ: ܒܩܰܒܪܳܐ ܢܩܺܝܪ ܒܓܰܢܬܳܐ ܕܺܝܠܶܗ ܕܝܰܘܣܶܦ ܒܽܘܠܽܘܛܺܝ ܐܶܬܥܰܦܺܝܬ: ܘܰܬܚܶܝܬ ܟܺܐܦܳܐ ܕܛܺܝܛܠܳܘܣ (ܠܘ̣ܚܳܐ) ܐܶܬܬܣܺܝܡܬ: ܗܳܝܕܶܝܢ ܩܛܺܝܠܐܴ ܨܰܦܪܳܝܳܐ ܚܕܺܝ ܕܶܐܫܬܰܘܕܥܳܟ: ܘܥܰܢܺܝܕܳܐ ܦܳܢܝܳܝܳܐ ܪܘܰܙ ܕܰܚ̣ܙܳܟ: ܡܺܝ̈ܬܰܝ ܥܳܠܰܡ ܐܰܪܥܽܘܟ: ܘܰܫܟܺܝ̣̈ܒܰܝ ܕܳܪܕܳܪ̈ܝ̣ܢ ܐܰܩܒܠܽܘܟ: ܥܳܡܪ̈ܰܝ ܚܶܦܪܳܐ ܗܰܠܠܽܘܟ: ܘܰܚܒܺܝ̣̈ܫܰܝ ܕܳܪܕܳܪ̈ܺܝܢ ܐܰܟܪܙܽܘܟ ܘܒܰܩܝܳܡܬܳܟ ܡܫܰܒܰܚܬܳܐ ܕܡܶܢ ܒܶܝܬ ܡܺܝ̈ܬܶܐ ܩܳܡ̣ܘ̱: ܘܠܳܟ ܒܶܝܬ ܚܰܝ̈ܶܐ ܣܗܶܕܘ̱ ܘܣܰܒܪܽܘܟ: ܐܶܬܡܰܠܰܠ ܒܡܰܘܬܳܐ ܕܽܘܟܪܳܢܳܟ: ܘܒܰܫܝܽܘܠ ܐܶܬܟܪܶܙ ܛܶܒ ܢܽܘܚܳܡܳܟ: ܘܩܳܡ̣ܬ ܬܠܺܝܬܳܝ ܝܰܘ̈ܡܶܐ ܘܦܶܪܚܰܬ݀ ܣܒܰܪܬܳܟ ܡܥܰܠܰܝܬܳܐ ܘܰܩܝܳܡܬܳܢܳܝܬܳܐ (ܣܒܰܪܬܳܐ ܕܰܩܝܳܡܬܳܐ) ܕܟܽܠ ܥܰܡ̱̈ܡܝ̣ܢ: ܘܰܣܠ̣ܶܩܬ ܠܘܳܬ ܐܰܒܽܘܟ: ܘܥܰܡ ܪܽܘܚܳܟ ܩܰܕܺܝܫܳܐ ܡܶܬܓܰܐܶܐ ܐܰܢ̱ܬ: ܘܫܳܐܠܺܝܢܰܢ ܗܳܟܺܝܠ ܘܒܳܥܶܝܢܰܢ ܡܶܢܳܟ ܕܠܐܴ ܬܶܛܥܶܐ ܡܳܪܝܳܐ ܠܡܶܬܕܰܟܪܳܢܽܘܬܳܐ ܕܰܙܒܺܝܢܰܬ݀ ܣܽܘܪܳܩܳܐ ܕܺܝܠܳܟ ܨܶܒܝܳܢܳܝܳܐ: ܘܠܐܴ ܢܶܬܕܰܓܰܠ ܫܽܘܘܕܳܝ ܡܶܠܰܝ̈ܟ ܕܰܠܘܳܬܳܗ̇: ܕܰܐܝܟ ܕܪܽܘܕܽܘܕܰܦܢܳܐ (ܙܢܳܐ ܕܘܰܪܕܳܐ) ܐܶܩܽܘܫ ܥܶܩܳܪܶܟܝ̱: ܣܰܘ̈ܟܰܝܟܝ̱ ܣܰܘ̈ܟܰܝ ܙܰܝܬܳܐ: ܘܳܐܦ ܓܦܶܬܳܐ ܝܳܐܝܰܬ݀ ܥܽܘܫܢܳܐ ܐܶܨܒܶܟܝ̱: ܢܽܘܪ̈ܒܰܝܟܝ̱ ܢܽܘܪ̈ܒܰܝ ܬܶܫܒܽܘܚܬܳܐ: ܘܰܒܢܰܝ̈ܟܝ̱ ܢܶܣܛܽܘܢ ܠܘܳܬܶܟܝ̱: ܘܡܶܢ ܦܳܬܽܘܪܶܟܝ̱ ܢܶܬܒܰܣܡܽܘܢ ܡܶܢ ܫܽܘܡܢܶܟܝ̱ ܪܽܘܚܳܢܳܝܳܐ ܢܶܫܬܽܘܢ ܘܢܶܪܘܽܘܢ: ܠܕܰܘܩܳܐ (ܢܳܛܘ̣ܪܳܐ) ܕܰܒܡܰܓܕܠܰܝ̈ܟܝ̱ ܕܳܐܶܩ (ܢܳܛܰܪ) ܒܒ̈ܳܒܳܬܳܐ ܠܐܴ ܛܺܝܛܳܢܳܝ̈ܳܬܳܐ ܕܥܰܝ̈ܢܶܐ ܠܐܴ ܟܰܡܗܳܢܳܝ̈ܳܬܳܐ (ܠܳܐ ܚܶܫܘ̣̈ܟܳܬܳܐ) ܗܰܒ ܕܢܶܫܬܰܘܕܰܥ: ܘܠܐܱܝܠܶܝܢ ܕܒܰܟܡܺܐܢ̈ܶܐ (ܕܢܶܟ̈ܠܶܐ) ܫܰܩܽܘܪ̈ܘܳܬܳܐ ܘܥܽܘ̈ܢܳܬܶܐ ܥܠܶܝܗ̇ ܪܳܢܶܝܢ: ܠܐܱܚܺܝ̣̈ܕܰܝ ܬܰܩܕܳܐ ܕܺܝܠܳܗ̇ ܚܽܘܛܪܳܐ ܕܩܰܝܣܽܘܬܳܐ ܐܰܘܚܶܕ: ܘܡܰܫܪ̈ܽܘܩܝܳܬܳܐ ܪ̈ܽܘܚܳܢܳܝܳܬܳܐ ܐܰܠܒܶܟ: ܐܰܝܟܰܢܳܐ ܕܰܒܝܰܕ ܩܛܳܝ̈ܶܐ ܕܺܝܠܗܽܘܢ ܢܕܰܘܕܽܘܢ ܠܕܺܐܒ̈ܶܐ ܕܨܳܒܶܝܢ ܠܰܡܡܰܥܳܣܽܘ ܠܐܷܡܪ̈ܶܐ ܕܰܓܙܳܪܳܗ̇ ܠܰܕܥܰܠ ܫܽܘܪ̈ܶܝܗ̇ ܡܰܛܪ̈ܳܬܳܐ ܠܺܠܝ̈ܳܬܳܐ ܢܳܛܪܺܝܢ ܘܡܶܬܟܰܪܟܺܝܢ: ܗܰܘܢܳܐ ܥܺܝܪܳܐ ܘܰܕܠܐܴ ܡܶܬܥܠܶܒ ܡܶܢ ܡܰܕܡܟܳܐ ܡܙܰܡܶܢ ܚܽܘܠܳܨܳܐ ܕܡܰܘܬܳܐ ܫܰܟܶܢ: ܠܦܰܐܦܽܘܪܰܣ(ܠܰܚ̈ܣܰܝܳܐ ܘܰܠܟܳܗ̈ܢܶܐ) ܕܒܳܗ̇ ܐܰܦܽܘܩܪܰܐܣܺܝܢ (ܐܶܣܛܠܷ̈ـܐ) ܡܩܰܒ̈ܠܳܬܳܐ ܐܰܥܛܶܦ: ܐܰܝܟܰܢܳܐ ܕܰܠܪܶܒܺܝܬܳܐ ܕܟܰܟܪ̈ܰܝܗܽܘܢ ܐܰܥܦܳܐ ܢܰܝܬܽܘܢ: ܘܰܒܝܰܕ ܙܥܳܩ̈ܳܬܗܽܘܢ ܫܰܘ̈ܝܳܬܳܐ ܠܛܰܪ̈ܦܳܢܣܰܘܗ̱ܝ(ܫܶܪ̈ܝܳܢܶܐ ܕܰܩܪܳܒܳܐ) ܕܒܶܠܶܐܝܰܪ (ܕܒܝ̣ܫܳܐ) ܡܶܬܝܰܕܥܳܢܳܐ ܢܩܰܠܩܠܽܘܢ: ܘܰܐܝܟ ܕܠܐܴ ܐܝ̣ܬܝܗܽܘܢ ܢܶܗܘܽܘܢ: ܘܰܠܕܺܝܰܩܳܢܽܘ ܕܕܺܝܰܐܪ̈ܽܘܢܺܝܣܶܐ (ܘܰܠܕܰܝܪܳܐ ܕܕܰܝܪ̈ܳܝܶܐ) ܙܰܒܢܳܝ̈ܶܐ ܥܳܡܪܺܝܢ ܒܳܗ̇: ܐܰܦܽܘܕܳܐ ܛܰܟܣܳܢܳܝܬܳܐ ܙܩܺܝܪܰܬ ܒܢܰܘܠܐܴ (ܓܘ̣ܡܬܳܐ) ܩܽܘܫܬܺܝܢܳܝܳܐ ܘܰܡܬܰܠܦܰܬ݀ ܒܣܺܝܪܶܣ(ܒܚܘ̣ܛܳܐ) ܠܐܴ ܡܶܣܬܰܕܩܳܢܳܐ ܐܰܠܒܶܫ ܐܰܝܟܰܢܳܐ ܕܟܰܕ ܡܶܢ ܗܳܪܟܳܐ ܢܫܰܢܽܘܢ: ܒܗܳܝ ܕܰܠܥܶܠ ܢܶܫܬܘܽܘܢ ܕܰܢܫܰܡܫܽܘܢ: ܘܚܰܟܶܡ ܠܰܡܙܰܡܪ̈ܳܢܶܐ ܕܒܳܗ̇: ܐܰܝܟܰܢܳܐ ܕܰܒܝܰܕ ܐܰܒܽܘ̈ܒܶܐ ܐܽܘܪ̈ܓܰܢܳܝܶܐ ܢܒܰܣܡܽܘܢ ܒܝܰܕ ܢܶܥ̈ܡܳܬܗܽܘܢ ܫܰܦܺܝܪ̈ܳܬܳܐ: ܒܢ̈ܳܬ ܩ̈ܳܠܐܷ ܬܡܺܝܢܳܝܰܬ݀ ܩܺܝ̣̈ܢܳܬܳܐ ܠܳܟ ܡܩܰܒܠܳܢܳܐ ܕܩܽܘ̣̈ܕܳܫܶܐ ܢܝܰܒܒܽܘܢ: ܗܳܟܘܳܬ ܘܰܠܟܽܠ ܕܒܰܛܝܳܪܶܗ ܚܒܺܝܫ ܛܰܪ ܘܰܐܫܘܳܐ: ܘܕܰܠܥܶܠ ܡܶܢ ܢܽܘܟ̈ܬܳܬܳܐ ܓܳܪ̈ܣܳܢܳܝܳܬܳܐ ܐܳܦ ܕܽܘܒܨ̈ܳܬܳܐ ܥܶܩܰܪ̈ܒܳܢܝܳܬܳܐ ܢܕܽܘܫܽܘܢ ܠܰܦܬܳܢܳܐ (ܠܚܶܘܝܳܐ) ܡܰܪܺܝܪܳܐ ܕܥܰܠ ܫܒܺܝܠ ܝܰܠܕܶܝ̈ܗ̇ ܪܰܒܺܝܥ: ܘܰܠܥܶܩܒܳܐ ܕܺܝܠܗܽܘܢ ܠܡܶܡܚܳܐ ܒܳܥܶܐ: ܒܩܽܘܢܛܳܪ(ܒܡܘ̣ܪܳܢܝ̣ܬܳܐ،ܚܘ̣ܛܪܳܐ) ܕܰܨܠܺܝܒܳܟ ܢܶܦܥܽܘܢ ܪܺܝܫܶܗ: ܘܢܶܗܘܶܐ ܠܬܰܗܠܰܠܬܳܐ ܘܰܠܣܽܘܠܳܢܽܘܬܳܐ: ܘܶܐܡܰܬܝ̱ ܕܨܳܦܰܚܬܳܐ ܩܶܨܳܢܳܝܬܳܐ ܠܡܰܪܕܺܝܬܳܐ ܩܳܛܥܳܐ ܘܙܰܘܥܳܐ ܥܬܺܝܕܳܐ ܕܡܶܐܬܝܳܐ ܬܪܰܝܳܢܳܐ ܕܦܽܘܪܥܳܢ ܕܳܪ̈ܶܐ ܘܫܰܪ̈ܒܳܬܳܐ ܥܳܒܶܕ ܐܰܢ̱ܬ: ܢܶܫܬܘܶܐ ܚܢܰܢ ܘܰܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܟܽܠܗܽܘܢ ܡܗܰܝ̈ܡܢܶܐ: ܐܰܝܟܰܢܳܐ ܕܰܒܥܰܝ̈ܢܶܐ ܠܐܴ ܢܳܝ̈ܡܳܢ ܘܰܒܬܶܡܪ̈ܶܐ ܕܠܐܴ ܥܳܡܨܺܝܢ: ܘܒܰܓܒܺܝ̣̈ܢܶܐ ܕܠܐܴ ܡܬܺܝܚ ܥܠܰܝܗܽܘܢ ܫܶܢܰܬ݀ ܡܰܘܬܳܐ ܬܶܢܝܳܢܳܐ: ܐܶܠܐܴ ܟܰܕ ܐܰܣܺܝܪܺܝܢ ܚܰܨܰܝ̈ܢ: ܘܢܳܗܪܺܝܢ ܠܰܡܦܺܐܕܰܝ̈ܢ ܘܡܰܨܡܚܺܝܢ ܩܶܪ̈ܝܽܘܢܰܝܢ ܒܡܶܫܚܳܐ ܡܒܰܣܡܳܐ ܕܙܰܕܺܝܩܽܘܬܳܐ: ܐܰܝܟܰܢܳܐ ܕܰܒܦܺܝܪܽܘܦܽܘܪ̈ܺܝܰܐ (ܕܰܒܡܰܦܰܩܒܪܘ̣ܚܳܐ) ܗܳܝ ܕܰܡܪܰܝܡܽܘܬܳܐ ܕܺܝܠܳܟ ܪܒܰܘ̱ ܘܺܝܪܶܒܘ̱ ܟܰܕ ܢܶܬܬܕܺܝܢ: ܘܢܶܐܪܽܘܥ ܦܰܪܨܽܘܦܳܟ ܡܫܰܝܢܳܐ ܘܰܫܒܺܝܚ ܡܶܢ ܟܽܠ: ܢܰܣܓܶܐ ܠܶܒܰܢ ܫܘ̣ܒܚܳܟ: ܘܢܰܦܪܶܐ ܦܽܘܡܰܢ ܬܶܫܒܽܘܚܬܳܐ: ܘܰܢܡܰܠܶܠ ܠܶܫܳܢܰܢ ܬܰܘܕܺܝܬܳܐ ܕܩܽܘܠܳܣܰܝ̈ܟ: ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ܀

ܥܶܛܪܳܐ

ܠܳܟ ܒܪܳܐ ܕܐܰܠܳܗܳܐ ܘܝܰܠܕܳܐ ܡܬܽܘܡܳܝܳܐ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܡܩܰܪܒܺܝܢܰܢ: ܠܒܶܣ̈ܡܶܐ ܗܳܠܶܝܢ ܒܚܰܓܳܐ ܛܘ̣ܒܬܳܢܳܐ ܕܰܩܝܳܡܬܳܟ ܡܫܰܒܰܚܬܳܐ ܕܡܶܢ ܒܶܝܬ ܡܺܝ̈ܬܶܐ: ܐܰܝܟܰܢܳܐ ܕܒܰܣܺܝܡܳܐܝ̣ܬ ܢܶܬܩܰܒܰܠ ܦܺܝܪܡܰܢ ܩܕܳܡܰܝܟ ܠܪܺܝܚܳܐ ܒܰܣܺܝܡܳܐܝ̣ܬ ܘܟܰܕ ܗܳܠܶܝܢ ܫܳܐܠܺܝܢܰܢ ܡܶܢܳܟ ܪܶܚܡܰܬ݀ ܐ̱ܢܳܫܳܐܝ̣ܬ: ܕܰܬܫܰܟܶܢ ܠܰܢ ܕܢܶܫܬܘܶܐ ܠܒܶܣܡ̈ܳܢܰܝܟ ܛܳܒ̈ܶܐ ܘܰܠܫܽܘ̈ܟܳܢܰܝܟ ܪ̈ܽܘܚܳܢܳܝܶܐ ܘܰܠܚܰܓܰܝ̈ܟ ܐܰܠܳܗܳܝ̈ܶܐ ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀

ܚܽܘܬܳܡܳܐ

ܐܰܥܬܰܪ ܠܰܢ ܡܳܪܝܳܐ ܐܰܠܳܗܳܐ ܒܥܽܘܬܪ̈ܶܐ ܟܣܰܝ̈ܳܐ ܕܰܩܝܳܡܬܳܟ ܕܡܶܢ ܒܶܝܬ ܡܺܝ̈ܬܶܐ: ܘܚܰܕܳܐ ܠܰܢ ܒܝܽܘܡ ܢܽܘܚܳܡܳܟ: ܘܫܰܪܰܪ ܠܰܢ ܒܣܰܒܪܳܐ ܒܪܺܝܟܳܐ ܕܚܰܕܽܘܬܳܐ ܕܺܝܠܳܟ: ܘܰܒܝܰܘܡܳܐ ܕܡܶܐܬܺܝܬܳܟ ܢܶܐܪܽܘܥ ܓܶܠܝܳܢܳܟ ܫܒܺܝܚܳܐ: ܘܰܚܢܰܢ ܘܥܰܢܺܝ̣̈ܕܱܰܝܢ ܢܶܚܕܶܐ ܒܳܟ ܠܐܴ ܣܰܒܥܳܐܝ̣ܬ ܘܰܢܙܰܡܰܪ ܫܽܘܒܚܳܐ ܠܐܴ ܡܶܫܬܰܬܩܳܢܳܐܝ̣ܬ ܡܳܪܰܢ ܘܰܐܠܳܗܰܢ܀