ܦܪܽܘܡܝܽܘܢ

ܠܗܰܘ ܝܰܠܕܳܐ ܠܐܴ ܙܰܒܢܳܝܳܐ: ܕܰܗܘܳܐ ܒܙܰܒܢܳܐ ܠܒܰܪ̱ܬ݀ ܐ̱ܢܳܫܳܐ: ܘܶܐܬܚܰܝܰܕ ܥܰܡ ܒܶܣܪܳܐ ܡܢܰܦܫܳܐ ܚܕܳܝܽܘܬܳܐ ܟܝܳܢܳܝܬܳܐ ܘܰܡܬܽܘܡܳܝܬܳܐ: ܘܰܒܦܰܓܪܳܐ ܗܳܢܳܐ ܡܳܝܽܘܬܳܐ ܘܡܶܬܚܰܒܠܳܢܳܐ ܣܥ̣ܰܪ ܚܰܝ̈ܠܐܷ ܘܳܐܬܘ̈ܳܬܳܐ ܬܡܺܝܗ̈ܳܬܳܐ ܒܰܒܪܺܝܬܳܐ: ܘܰܣܰܒ̣ܠ ܚܰܫ̈ܶܐ ܘܰܙܩܺܝܦܳܐ ܘܡܰܘܬܳܐ: ܘܰܩܝܳܡܬܳܐ ܡܫܰܒܰܚܬܳܐ ܬܠܺܝܬܳܝܰܬ݀ ܝܰܘ̈ܡܶܐ ܘܩܳܡ ܒܬܶܫܒܽܘܚܬܳܐ ܒܠܐܴ ܡܶܬܚܰܒܠܳܢܽܘܬܳܐ: ܘܶܐܬܥܰܠܺܝ ܠܰܫܡܰܝܳܐ ܒܳܬܰܪ ܫܽܘܡܠܳܝܳܐ ܕܰܡܕܰܒܪܳܢܽܘܬܳܐ ܕܺܝܠܶܗ ܦܳܪܽܘܩܳܝܬܳܐ: ܘܰܒܫܽܘ̈ܟܳܢܶܐ ܕܪܽܘܚܳܐ ܩܰܕܺܝܫܳܐ ܐܰܥܬܰܪ ܠܓܶܢܣܰܢ ܥܰܦܪ̈ܳܢܶܐ ܠܓܽܘܕܳܐ ܕܰܫܠܺܝܚܽܘܬܳܐ: ܐܳܦܶܢ ܐܶܬܚܙܺܝ ܒܫܺܝܛܽܘܬܳܐ ܘܶܐܬܺܝܕܰܥ ܠܶܗ ܒܡܰܟܺܝܟܽܘܬܳܐ: ܘܠܐܴ ܬܽܘܒ ܡܶܬܚܙܶܐ ܒܰܡܚܺܝܠܽܘܬܳܐ: ܐܶܠܐܴ ܡܶܛܽܠ ܕܰܠܒܶܫ ܥܽܘܫܢܳܐ ܘܓܰܐܝܽܘܬܳܐ ܡܶܬܚܙܶܐ ܠܶܗ ܒܬܶܫܒܽܘܚܬܳܐ ܐܰܝܟ ܕܰܦܐܶܐ ܠܐܱܠܳܗܽܘܬܶܗ ܡܫܰܒܰܚܬܳܐ ܕܠܶܗ ܝܳܐܶܐ ܫܽܘܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܰܬܠܳܬܫܳܥܝ̣̈ܢ܀

ܣܶܕܪܳܐ

ܡܰܠܟܳܐ ܕܚܰܝ̈ܶܐ ܘܦܳܪܽܘܩܳܐ ܕܟܽܠ ܝܶܫܽܘܥ ܡܫܺܝܚܳܐ: ܢܽܘܗܪܳܐ ܫܰܪܺܝܪܳܐ ܗܰܘ ܕܺܐܝܬܰܝܟ ܬܗܽܘܡܳܐ ܕܪ̈ܰܚܡܶܐ ܘܡܰܒܽܘܥܳܐ ܕܰܚܢܳܢܳܐ ܘܰܡܥܺܝܢܳܐ ܕܛܳܒܽܘܬܳܐ: ܝܰܡܳܐ ܕܠܐܴ ܓܳܐܶܙ: ܓܰܙܳܐ ܕܰܡܠܐܷ ܥܽܘܕܪ̈ܳܢܶܐ: ܟܰܕ ܗܳܟܺܝܠ ܒܡܶܬܢܰܚܬܳܢܽܘܬܳܟ ܕܰܠܘܳܬܰܢ ܒܥܰܝܢܳܐ ܕܬܰܪ̈ܥܝܳܬܰܢ ܡܰܨܕܺܝܢܰܢ: ܘܰܒܟܽܠܶܗ ܟܪܽܘܟܝܳܐ ܕܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܡܶܬܒܰܩܶܝܢܰܢ: ܝܺܕܺܝܥܳܐܝ̣ܬ ܕܶܝܢ ܒܰܩܒܽܘܪܬܳܟ ܡܰܠܝܰܬ݀ ܬܶܗܪܳܐ ܒܰܩܝܳܡܬܳܟ ܡܰܦܨܚܰܬ݀ ܠܟܽܠ ܥܰܡ̱̈ܡܝ̣ܢ ܕܳܫܢ̈ܶܐ ܕܫܽܘܒܚܳܐ ܘܦܺܐܪ̈ܶܐ ܕܬܰܘܕܺܝܬܳܐ ܘܩ̈ܳܠܐܷ ܡܰܠܝ̈ܰܝ ܩܽܘ̈ܠܳܣܶܐ ܠܡܳܪܽܘܬܳܟ ܡܰܣܩܺܝܢܰܢ ܘܪܽܘܡܪ̈ܳܡܶܐ ܚܠܰܝ̈ܳܐ ܘܗܰܢܺܝ̈ܰܐܝ ܪܺܝܚܳܐ ܠܪܰܒܽܘܬܳܟ ܡܩܰܪܒܺܝܢܰܢ ܟܰܕ ܐܳܡܪܺܝܢܰܢ: ܫܽܘܒܚܳܐ ܠܳܟ ܒܽܘܟܪܶܗ ܕܰܐܒܳܐ ܓܢܺܝܙܳܐ ܕܶܐܬܡܰܟܰܟܬ ܡܶܛܽܠ ܦܽܘܪܩܳܢܰܢ: ܒܪܝܟ ܐܺܝܩܳܪܳܟ ܡܶܢ ܐܰܬܪܳܟ ܪܺܝܫ ܟܳܗ̈ܢܶܐ ܕܬܰܘܕܺܝܬܰܢ ܝܶܫܽܘܥ ܡܫܺܝܚܳܐ: ܫܽܘܒܚܳܐ ܠܳܟ ܕܶܒܚܳܐ ܡܪܰܥܝܳܢܳܐ ܕܒܰܕܒܺܝܚܽܘܬܳܐ ܕܺܝܠܳܟ ܕܰܚܠܳܦܰܝܢ ܩܰܕܶܫܬܳܢ ܡܶܢ ܛܰܡܽܐܘ̣ܬܳܐ: ܒܪܺܝܟ ܗ̱ܘ̣ ܡܳܪܰܢ ܚܽܘܒܳܟ ܕܡܶܢ ܪ̈ܰܘܡܶܐ ܥܶܠܳܝ̈ܶܐ ܐܰܪܟܢܳܟ ܠܰܒܥܳܬܳܐ ܕܺܝܠܰܢ: ܫܽܘܒܚܳܐ ܠܳܟ ܢܽܘܗܪܳܐ ܫܰܪܺܝܪܳܐ ܕܰܐܢܗܰܪܬ ܠܥܰܝ̈ܢܶܐ ܕܬܰܪ̈ܥܝܳܬܰܢ: ܒܪܺܝܟ ܗ̱ܘ̣ ܡܳܪܝ̱ ܝܰܘܡܳܟ ܡܚܰܕܝܳܢܳܐ ܕܰܐܦܨܰܚ ܟܡܺܝܪܽܘܬܰܢ: ܫܽܘܒܚܳܐ ܠܳܟ ܠܐܴ ܡܳܝܽܘܬܳܐ ܕܰܢܚܶܬܬ ܠܒܶܝܬ ܡܺܝ̈ܬܶܐ ܕܰܠܡܺܝܬܽܘܬܰܢ ܬܰܚܶܐ: ܒܪܺܝܟ ܗ̱ܘ̣ ܚܰܝܠܳܟ ܚܰܣܺܝܢܳܐ ܕܰܐܩܺܝܡ ܠܰܢ ܡܶܢ ܡܰܦܽܘܠܬܰܢ: ܫܽܘܒܚܳܐ ܠܳܟ ܒܪܳܐ ܝܺܚܺܝܕܳܝܳܐ ܘܦܳܪܽܘܩܳܐ ܕܢܰܦ̈ܫܳܬܰܢ: ܒܪܺܝܟ ܗ̱ܘ̣ ܢܽܘܚܳܡܳܟ ܕܡܶܢ ܩܰܒܪܳܐ ܕܡܶܢ ܡܰܘܬܳܐ ܡܰܪܺܝܪܳܐ ܦܰܨܺܝܬ ܠܰܢ: ܫܽܘܒܚܳܐ ܠܳܟ ܒܳܪܽܘܝܳܐ ܕܥܳܠܡܳܐ ܕܶܐܬܰܝܬ ܠܚܽܘܕܳܬܰܢ: ܒܪܺܝܟ ܨܶܒܝܳܢܳܟ ܕܰܛܥܶܡܬ ܡܰܘܬܳܐ ܡܶܛܽܠܳܬܰܢ: ܫܽܘܒܚܳܐ ܠܳܟ ܡܶܠܬܳܐ ܡܬܽܘܡܳܝܳܐ: ܫܽܘܒܚܳܐ ܠܳܟ ܡܰܠܟܳܐ ܚܰܝܠܬܳܢܳܐ ܕܒܰܕܡܳܟ ܝܰܩܺܝܪܳܐ ܡܶܢ ܛܳܥܝܽܘܬܳܐ ܙܒܶܢܬ ܠܰܢ: ܒܪܺܝܟ ܗ̱ܘ̣ ܡܳܪܝ̱ ܚܽܘܒܳܟ ܕܥܰܕܰܪ ܡܚܺܝܠܽܘܬܰܢ ܫܽܘܒܚܳܐ ܠܳܟ ܪܳܥܝܳܐ ܛܳܒܳܐ ܕܰܣܥܰܪܬ ܘܟܰܢܶܫܬ ܐܰܒܺܝܕܽܘܬܰܢ: ܒܪܺܝܟ ܗ̣ܽܘ ܦܽܘܪܩܳܢܳܟ ܕܡܶܢ ܡܽܘ̈ܡܶܐ ܘܫܶܦ̈ܠܐܷ ܕܰܚܛܺܝܬܳܐ ܚܰܪܰܪܬ ܠܰܢ: ܫܽܘܒܚܳܐ ܠܳܟ ܢܶܒܥܳܐ ܕܚܰܠܝܽܘܬܳܐ ܕܦܰܝܶܓܬ ܡܰܪܺܝܪܽܘܬܳܐ ܕܨܰܗܝܽܘܬܰܢ: ܒܪܺܝܟ ܗ̱ܘ̣ ܓܰܙܳܟ ܡܠܐܷ ܪ̈ܰܚܡܶܐ ܕܣܰܒܰܥ ܘܬܰܪܣܺܝ ܟܰܦܢܽܘܬܰܢ: ܫܽܘܒܚܳܐ ܠܳܟ ܕܰܣܥܰܪܬ ܬܶܕܡܪ̈ܳܬܳܐ ܦܰܐܝ̈ܳܬܳܐ ܡܚܰܕܬܳܢܳܐ ܕܫܰܪ̈ܒܳܬܰܢ: ܘܰܒܪܺܝܟ ܗ̱ܘ̣ ܡܰܘܬܳܟ ܕܥܰܠ ܐܰܦܰܝ̈ܢ ܕܰܐܦܢܺܝܬ ܠܰܢ ܠܝܳܪܬܽܘܬܰܢ: ܫܽܘܒܚܳܐ ܠܳܟ ܙܰܪܥܳܐ ܒܪܺܝܟܳܐ ܕܰܙܪܰܥܬ ܦܰܓܪܳܟ ܘܰܕܡܳܟ ܩܰܕܺܝܫܳܐ ܒܢܰܦ̈ܫܳܬܰܢ: ܘܰܒܪܺܝܟ ܚܽܘܒܳܟ ܕܫܰܠܚܳܟ ܠܚܽܘܣܳܝܰܢ: ܫܽܘܒܚܳܐ ܠܳܟ ܕܶܐܬܢܰܚܰܡܬ ܘܫܰܪܰܪܬ ܢܽܘܚܳܡܳܐ ܕܥܰܦܪܳܢܽܘܬܰܢ: ܬܰܘܕܺܝ ܠܳܟ ܡܶܢ ܡܰܪܥܺܝܬܳܟ ܦܪܺܝܩܰܬ݀ ܒܰܨܠܺܝܒܳܟ: ܘܗܳܫܳܐ ܡܳܪܝܳܐ ܐܰܠܳܗܳܐ ܠܰܡܪܰܚܡܳܢܽܘܬܳܟ ܡܦܺܝܣܺܝܢܰܢ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܘܝܳܗܽܘܒܳܐ ܕܛܳܒ̈ܳܬܰܢ: ܕܬܰܫܘܶܐ ܠܰܢ ܒܰܚܢܳܢܳܟ ܕܥܰܡ ܡܰܠܐܱܟ̈ܶܐ ܩܰܕܺܝ̈ܫܶܐ ܒܰܠܒܽܘ̈ܫܶܐ ܚܶܘܳܪ̈ܶܐ ܡܰܦܪܓܺܝܢܰܢ: ܘܥܰܡ ܬܰܠܡܺܝ̈ܕܶܐ ܛܽܘܒܬܳܢ̈ܶܐ ܒܚܰܕܽܘܬܳܐ ܘܒܰܪܘܳܙܳܐ ܠܩܰܒܪܳܟ ܪܳܗܛܺܝܢܰܢ: ܘܥܰܡ ܢܶܫ̈ܶܐ ܢܰܟ̈ܦܳܬܳܐ ܗܶܪ̈ܽܘܡܶܐ ܠܐܻܝܩܳܪܳܟ ܡܛܰܝܒܺܝܢܰܢ: ܘܥܰܡ ܢܳܛܽܘܪ̈ܶܐ ܕܩܰܒܪܳܟ ܡܰܥܒܶܕ ܚܰܝ̈ܶܐ ܫܪܳܪܳܐ ܕܢܽܘܚܳܡܳܐ ܕܺܝܠܳܟ ܡܰܟܪܙܺܝܢܰܢ: ܘܰܒܫܰܝܢܳܐ ܐܰܡܺܝܢܳܐ ܕܰܠܘܳܬܳܟ ܚܳܐܶܝܢܰܢ: ܘܒܰܫܠܳܡܳܟ ܫܰܪܺܝܪܳܐ ܡܶܬܒܰܣܡܺܝܢܰܢ: ܘܰܠܪܰܘܡܳܐ ܪܳܡܳܐ ܕܰܫܡܰܝܳܐ ܥܰܡܳܟ ܐܰܣܶܩ ܠܰܢ: ܘܡܶܢ ܝܰܡܺܝܢܳܐ ܕܰܐܒܽܘܟ ܐܰܘܬܶܒ ܠܰܢ: ܘܰܠܘܳܬܳܟ ܒܰܦܨܺܝܚܽܘܬܳܐ ܩܰܪܶܒ ܠܰܢ: ܘܰܠܝܳܪܬܽܘܬܰܢ ܩܰܕܡܳܝܬܳܐ ܡܰܢܰܥ ܠܰܢ: ܘܒܰܓܢܽܘܢܳܟ ܡܠܐܷ ܚܰܝ̈ܶܐ ܚܰܕܳܐ ܠܰܢ: ܘܡܶܢ ܦܳܬܽܘܪܳܟ ܡܠܐܷ ܛܽܘ̈ܒܶܐ ܫܡܰܝ̈ܳܢܶܐ ܒܰܣܶܡ ܠܰܢ: ܘܬܰܡܳܢ ܚܢܰܢ ܘܥܰܢܺܝ̈ܕܰܝܢ ܡܗܰܝ̈ܡܢܶܐ ܢܰܘܕܶܐ ܘܢܶܣܓܽܘܕ ܠܳܟ ܡܫܺܝܚܳܐ ܐܰܠܳܗܳܐ ܕܺܝܠܰܢ ܘܠܐܱܒܽܘܟ ܡܒܰܪܟܳܐ ܘܛܽܘܒܬܳܢܳܐ ܕܫܰܠܚܳܟ ܠܦܽܘܪܩܳܢܰܢ: ܘܰܠܪܽܘܚܳܟ ܩܰܕܺܝܫܳܐ ܡܢܰܚܡܳܢܰܢ ܘܰܡܚܰܕܬܳܢܰܢ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀