ܨܠܽܘܬܳܐ ܕܫܽܘܪܳܝܳܐ

ܩܰܒܶܠ ܡܳܪܝ̱ ܡܚܺܝܠܽܘܬܳܐ ܕܬܰܟܫ̈ܦܳܬܳܐ ܕܥܰܒ̣ܕܰܝ̈ܟ ܥܰܡ ܐܰܬܠܺܝܣܽܘܬܳܐ ܕܰܪ̈ܚܽܘܡܰܝܟ ܓܒܰܝ̈ܳܐ ܘܡܶܬܝܰܕ̈ܥܳܢܶܐ ܥܒܶܕ ܠܰܢ ܡܳܪܝܳܐ ܒܓܽܘܕܰܝ̈ܗܽܘܢ ܒܝܰܘܡܳܟ ܪܰܒܳܐ: ܟܰܕ ܡܰܦܪܓܺܝܢܰܢ ܥܰܡܗܽܘܢ ܒܕܽܘܒܳܪ̈ܶܐ ܕܰܡܝܰܬܪܽܘܬܳܐ: ܘܰܒܡܶܫܚܳܐ ܕܙܰܕܺܝܩܽܘܬܳܐ ܡܰܢܗܪܺܝܢܰܢ ܘܡܰܙܠܓܺܝܢܰܢ: ܘܢܶܗܘܽܘܢ ܠܰܡܦܺܐܕ̈ܶܐ ܕܺܝܠܰܢ ܢܰܗܺܝܪ̈ܶܐ: ܘܥܰܡ ܚܰܝܠܰܘ̈ܳܬܳܐ ܪ̈ܳܡܰܝ ܡܶܢ ܪ̈ܶܓܫܶܐ ܒܫܽܘܒܚܳܐ ܕܠܐܴ ܦܳܛܰܪ ܢܩܰܠܣܳܟ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܛܳܒܳܐ ܘܛܽܘܒܬܳܢܳܐ ܕܰܒܩܰܕܺܝܫܽܘܬܳܐ ܕܩܰܕܺܝ̈ܫܰܘܗ̱ܝ ܡܶܬܩܰܕܰܫ ܘܰܒܗܽܘ̈ܠܳܠܐܷ ܘܰܒܙܽܘܡܳܪ̈ܶܐ ܘܪܽܘܡܪ̈ܳܡܶܐ ܕܙܰܕܺܝ̈ܩܰܘܗ̱ܝ ܡܶܬܗܰܕܰܪ: ܘܰܒܢܰܨܺܝܚܽܘܬܳܐ ܕܰܓܒܰܝ̈ܳܐ ܕܺܝܠܶܗ ܡܶܬܢܰܨܰܚ ܘܡܶܬܪܰܡܪܰܡ ܘܰܒܕܽܘܒܳܪ̈ܶܐ ܬܰܩ̈ܢܶܐ ܘܰܬܡܺܝ̈ܗܶܐ ܕܟܺܐܢ̈ܶܐ ܦܰܐܝܳܐܝ̣ܬ ܡܶܫܬܰܒܰܚ: ܠܗܰܘ ܡܥܰܠܝܳܐ ܫܰܠܺܝܛܳܐ ܕܰܒܕܽܘ̈ܥܬܶܐ ܘܥܰܡ̈ܠܶܐ ܪܰܘܪ̈ܒܶܐ ܕܥܰܒ̣ܕ̈ܰܘܗ̱ܝ ܡܶܬܩܰܠܰܣ: ܠܗܰܘ ܫܒܺܝܚܳܐ ܘܰܡܫܰܒܚܳܐ ܕܰܠܥܺܐܕܳܐ ܕܝܳܠܶܕܬܶܗ ܒܬܽܘܠܬܳܐ ܩܰܕܺܝܫܬܳܐ ܒܟܽܠ ܦܶܢ̈ܝܳܢ ܙܰܝܰܚ ܘܝܰܩܰܪ: ܘܒܰܨܠܰܘ̈ܳܬܳܐ ܘܒܳܥ̈ܘܳܬܳܐ ܘܰܒܬܰܟ̈ܫܦܳܬܳܐ ܘܰܒܬܶܫܒ̈ܚܳܬܳܐ ܕܡܰܚܒܳܢܰܘ̈ܗ̱ܝ ܡܶܬܢܰܨܰܪ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܠܰܩܕܳܡ ܬܪܳܘܢܳܘܣ ܕܪܰܒܽܘܬܶܗ ܥ̱ܽܘܗܕܳܢܳܐ ܛܳܒܳܐ ܩܕܳܡܰܘܗ̱ܝ ܡܰܝܬܶܐ: ܘܰܒܡܰܠܟܽܘܬܳܐ ܕܺܝܠܶܗ ܠܗܽܘܢ ܡܒܰܣܶܡ ܕܠܶܗ ܝܳܐܶܐ ܫܽܘܒܚܳܐ܀

ܣܶܕܪܳܐ

ܐܰܠܳܗܳܐ ܡܶܠܬܳܐ ܕܡܶܢ ܐܰܒܳܐ ܗܰܘܢܳܐ ܪܰܒܳܐ ܐܶܬܺܝܠܶܕ: ܗܰܘ ܡܬܽܘܡܳܝܳܐ ܕܡܶܢ ܠܐܴ ܙܰܒܢܳܝܳܐ ܨܡ̣ܰܚ ܓܢܺܝܙܳܐ ܕܡܶܢ ܠܐܴ ܡܶܬܕܰܪܟܳܢܳܐ ܘܠܐܴ ܡܶܬܚܰܙܝܳܢܳܐ ܐܶܬܺܝܕܰܥ: ܡܫܰܒܚܳܐ ܐܰܘܟܺܝܬ ܡܶܫܬܰܒܚܳܢܳܐ ܕܡܶܢ ܚܰܝܠܰܘ̈ܳܬܳܐ ܪ̈ܽܘܚܳܢܶܐ ܡܶܫܬܰܒܰܚ ܒܫܽܘ̈ܒܚܶܐ ܣܒܺܝ̣̈ܣܶܐ ܠܐܴ ܡܶܫܬܰܠܝ̈ܳܢܶܐ: ܪܳܡܳܐ ܘܰܡܥܰܠܝܳܐ ܐܝ̣ܬܝܟ ܡܳܪܝܳܐ ܕܰܡܥܰܠܐܷ ܐܰܢ̱ܬ ܘܡܰܘܪܶܒ ܐܰܢ̱ܬ ܒܶܝܬ ܡܰܠܐܱܟ̈ܶܐ ܠܗܳܠܶܝܢ ܕܡܰܘܪܒܺܝܢ ܠܳܟ ܒܶܝܬ ܒܢܰܝ̈ܢܳܫܳܐ : ܡܰܘܕܶܐ ܐܰܢ̱ܬ ܒܗܽܘܢ ܩܕܳܡ ܐܰܒܽܘܟ ܕܒܰܫܡܰܝܳܐ ܘܰܩܕܳܡ ܡܰܠܐܱܟܰܝ̈ܟ ܩܰܕܺܝ̈ܫܶܐ ܒܰܐܝܠܶܝܢ ܕܡܰܘܕܶܝܢ ܒܳܟ ܩܕܳܡ ܐ̱ܢܳܫ̈ܳܐ: ܘܝܳܗܶܒ ܐܰܢ̱ܬ ܚܠܳܦ ܗܳܠܶܝܢ ܕܰܬܢܳܢ ܦܽܘܪ̈ܥܳܢܶܐ ܪܰܘܪ̈ܒܶܐ ܠܐܱܝܠܶܝܢ ܕܪܳܚܡܺܝܢ ܘܡܰܚܒܺܝܢ ܡܶܠܬܳܟ: ܘܢܳܛܪܺܝܢ ܦܽܘܩܕܳܢܰܝ̈ܟ: ܘܰܡܛܰܝܶܒ ܐܰܢ̱ܬ ܦܽܘܪܥܳܢܳܐ ܕܥܰܡܠܰܝ̈ܗܽܘܢ: ܡܶܕܶܡ ܕܥܰܝܢܳܐ ܠܐܴ ܚܙܳܬ݀: ܘܶܐܕܢܳܐ ܠܐܴ ܫܶܡܥܰܬ݀ ܘܥܰܠ ܠܶܒܳܐ ܕܒܰܪܢܳܫܳܐ ܠܐܴ ܣܠ̣ܶܩ ܡܬܽܘܡ: ܒܰܫܪܳܪܳܐ ܓܶܝܪ ܐܰܢ̱ܬ ܐܝ̣ܬܝܟ ܟܝܳܢܳܐ ܛܽܘܒܬܳܢܳܐ ܘܥܳܡ̇ܪܰ ܒܢܽܘܗܪܳܐ ܠܐܴ ܡܶܬܩܰܪܒܳܢܳܐ: ܘܡܰܢܗܰܪ ܐܰܢ̱ܬ ܠܟܽܠ ܒܰܪܢܳܫܳܐ ܕܳܐܬܶܐ ܠܥܳܠܡܳܐ: ܘܡܰܥܬܰܪ ܐܰܢ̱ܬ ܒܛܽܘ̈ܒܶܐ ܗܳܢܘܢ̇ ܫܡܰܝ̈ܳܢܶܐ ܠܐܱܝܠܶܝܢ ܕܰܠܛܽܘܒܬܳܢܽܘܬܳܐ ܕܺܝܠܳܟ ܪܚܶܡ̣ܘ̱ ܘܒܳܬܰܪ ܡܘ̣ܠ̈ܟܳܢܰܝܟ ܫܰܪܝ̣ܪ̈ܶܐ ܪܗܶܛܘ̱ ܘܚܳܕܝܳܐܝ̣ܬ ܢܩ̣ܶܦܘ̱: ܗܰܘ ܕܰܠܡܶܣ̈ܟܺܢܰܝ ܒܪܽܘܚ ܛܽܘܒܳܐ ܡܠܰܟܬ ܘܦܽܘܪܥܳܢܳܐ ܘܡܰܠܟܽܘܬܳܐ ܕܰܫܡܰܝܳܐ ܐܶܫܬܰܘܕܺܝܬ: ܘܠܐܱܒܺܝ̣̈ܠܰܝ ܫܡܳܟ ܩܰܕܺܝܫܳܐ ܛܽܘܒܳܐ ܐܶܘܰܢܓܶܠܳܝܳܐ ܝܰܗ̣ܒܬ ܘܒܽܘܝܳܐܳܐ ܘܠܽܘܒܳܒܳܐ ܠܥܳܩ̈ܳܬܗܽܘܢ ܫܰܟ̣ܶܢܬ: ܬܽܘܒ ܠܡܰܟܺܝ̣̈ܟܰܝ ܪܽܘܚܳܐ ܕܡܶܛܽܠܳܬܳܟ ܠܶܗ ܟܰܕ ܠܶܗ ܠܛܽܘܒܳܐ ܝܰܗ̣ܒܬ ܘܰܐܪܥܳܐ ܗܳܝ ܫܡܰܝܳܢܺܝܬܳܐ ܕܡܰܘܪܶܬ ܐܰܢ̱ܬ ܠܗܽܘܢ ܬܰܚܶܡ̣ܬ: ܘܰܠܟܰܦ̈ܢܰܝ ܠܟܺܐܢܽܘܬܳܐ ܘܨܰܗ̈ܝܰܝ ܠܙܰܕܺܝܩܽܘܬܳܐ ܒܶܗ ܟܰܕ ܒܶܗ ܒܛܽܘܒܳܐ ܕܟܰܠ̣ܶܠܬ ܘܗ̣ܶܢܽܘܢ ܢܶܣܒܘܢ̇ ܡܶܢ ܛܳܒ̈ܳܬܳܟ: ܠܰܡܪ̈ܰܚܡܳܢܶܐ ܕܶܝܢ ܘܥܰܒ̣ܕܰܝ̈ܟ ܪ̈ܰܚܡܶܐ ܘܙܶܕ̈ܩܳܬܳܐ ܕܥܰܠ ܐܰܚܰܝ̈ܗܽܘܢ ܡܶܣ̈ܟܺܢܶܐ ܡܶܢܶܗ ܟܰܕ ܡܶܢܶܗ ܕܛܽܘܒܳܐ ܐܶܘܰܢܓܶܠܳܝܳܐ ܠܗܽܘܢ ܐܰܥ̣ܬܰܪܬ ܘܕܰܥܠܰܝܗܽܘܢ ܢܶܗܘܽܘܢ ܪ̈ܰܚܡܶܐ ܫܰܪܰܪܬ: ܘܠܰܕ̈ܟܰܝܳܐ ܒܠܶܒܰܘ̈ܳܬܳܐ ܒܶܗ ܒܛܽܘܒܳܐ ܡܠܺܝܟܳܐ ܠܗܽܘܢ ܒܰܣ̣ܶܡܬ: ܘܰܕܠܰܚܙܳܬܳܐ ܗܳܝ ܡܰܦܨܚܳܢܺܝܬܳܐ ܘܐܰܠܳܗܳܝܬܳܐ ܕܺܝܠܳܟ ܕܢܶܫܬܘܽܘܢ ܦܰܣܶܩ̣ܬ: ܬܽܘܒ ܘܰܠܥܳܒܕ̈ܰܝ ܫܠܳܡܳܐ ܒܢ̈ܰܝ ܛܽܘܒܳܐ ܥܬܺܝܕܳܐ ܕܰܐܡܺܝܪ ܩ̣ܪܰܝܬ: ܘܕܰܒܢܰܝ̈ܳܐ ܕܐܰܠܳܗܳܐ ܢܶܬܩܪܽܘܢ ܐܰܒܽܘܗ̱ܝ ܕܰܫܠܳܡܳܐ ܚܰܘܺܝܬ: ܘܠܐܱܝܠܶܝܢ ܕܡܶܛܽܠ ܟܺܐܢܽܘܬܳܐ ܡܶܬܪܰܕܦܺܝܢ: ܘܡܶܫܬܰܚܩܺܝܢ ܝܳܪ̈ܽܘܬܶܐ ܕܺܝܠܶܗ ܕܛܽܘܒܳܐ ܗܰܘ ܫܡܰܝܳܢܳܐ ܐܝ̣ܬܝܗܽܘܢ ܫܰܘܕܰܥ̣ܬ: ܘܠܳܗ̇ ܠܡܰܠܟܽܘܬܳܐ ܕܰܫܡܰܝܳܐ ܥܰܠܺܝܬ ܘܰܐܣܶܩ̣ܬ: ܘܠܐܱܝܠܶܝܢ ܕܡܶܛܽܠ ܫܡܳܟ ܣܓܺܝܕܳܐ ܡܰܚܘ̈ܳܬܳܐ ܘܰܪ̈ܕܽܘܦܝܶܐ ܘܟܽܠ ܡܶܠܐܴ ܒܺܝܫܳܐ ܕܰܥܠܰܝܗܽܘܢ ܡܶܬܰܐܡܪܳܐ ܚܳܐܫܺܝܢ ܒܶܗ ܒܛܽܘܒܳܐ ܩܰܕܡܳܝܳܐ ܫܰܘܬܶܦ̣ܬ: ܘܰܕܢܶܚܕܽܘܢ ܐܳܦ ܢܶܪܽܘܙܽܘܢ ܗܳܝܕܶܝܢ ܦܰܩ̣ܕܶܬ ܘܕܰܐܓܪܳܐ ܕܺܝܠܗܽܘܢ ܩܕܳܡܰܝܟ ܒܰܫܡܰܝܳܐ ܣܰܓܺܝ ܫܰܘܕܰܥ̣ܬ: ܚܠܳܦ ܛܽܘܪ̈ܳܦܶܐ ܘܰܫܚ̈ܳܩܶܐ ܕܰܣܒ̣ܰܠܘ ܬܢܳܢ ܒܥܳܠܡܳܐ ܥܬܺܝܕܳܐ ܡܶܬܦܰܪܥܺܝܢ ܚܰܕ̈ܘܳܬܳܐ ܘܒܽܘ̈ܣܳܡܶܐ ܟܰܕ ܓܳܚܟܝ̣ܢ ܘܡܶܬܦܰܨܚܝ̣ܢ ܘܢܳܩܘ̣̈ܦܶܐ ܘܢܳܛܽܘܪ̈ܶܐ ܠܦܽܘܩ̈ܕܳܢܰܝܟ ܩܰܕܺܝ̈ܫܶܐ ܘܰܡܬܰܠܡ̈ܕܰܝ ܠܡܰܠܟܽܘܬܳܟ: ܗܳܢܘܢ̇ ܕܝܰܘܡܳܢܳܐ ܠܥ̱ܽܘܗܕܳܢܳܐ ܕܺܝܠܗܽܘܢ ܡܫܰܡܠܶܝܢܰܢ ܥܰܡ ܩܽܘ̈ܠܳܣܶܐ ܕܪܽܘܚܳܐ ܘܰܙܡܺܝܪ̈ܳܬܳܐ ܘܬܶܫܒ̈ܚܳܬܳܐ ܠܥܺܐܕܳܐ ܗܳܢܳܐ ܕܺܝܠܗܽܘܢ ܡܚܰܓܶܝܢܰܢ: ܘܳܐܡܪܺܝܢܰܢ ܗܳܢܘܢ̇ ܕܡܶܛܽܠ ܡܰܠܟܽܘܬܳܟ ܐܶܬܡܰܣܟܰܢܘ̱ ܘܶܐܬܶܐܒܶܠܘ̱ ܒܥܶܠܰܬ݀ ܕܢܶܬܒܰܝܽܐܘܢ ܒܦܽܘܪܥܳܢܽܘܬܳܐ ܕܺܝܠܳܟ: ܘܰܟܦ̣ܶܢܘ̱ ܘܰܨܗܺܝܘ ܘܶܐܬܛܰܪܰܦܘ̱: ܐܰܝܟܰܢܳܐ ܕܢܶܣܒܥܽܘܢ ܒܦܽܘ̈ܛܳܡܶܐ ܕܡܰܠܟܽܘܬܳܟ: ܘܰܡܪ̈ܰܚܡܳܢܶܐ ܐܶܬܚܙܺܝܘ: ܡܶܛܽܠ ܕܢܶܫܟܚܽܘܢ ܪ̈ܰܚܡܶܐ ܩܕܳܡܰܝܟ ܒܕܺܝܢܳܐ ܬܪܺܝܨܳܐ ܕܟܺܐܢܽܘܬܳܟ: ܟܦ̣ܰܪܘ̱ ܗܳܪܟܳܐ ܒܟܽܠ ܡܶܕܶܡ ܐܰܝܟܰܢܳܐ ܕܠܳܟ ܠܗܰܠ ܢܶܩܢܽܘܢ ܚܠܳܦ ܟܽܠ ܡܶܕܶܡ: ܘܶܐܙܕܩܶܦܘ̱ ܠܥܳܠܡܳܐ ܘܠܰܪ̈ܓܺܝܓܳܬܶܗ ܐܰܝܟܰܢܳܐ ܕܰܠܘܳܬܳܟ ܕܠܐܴ ܥܽܘܘܳܟ ܢܶܪܗܛܽܘܢ ܘܒܳܟ ܢܕܽܘܨܽܘܢ: ܢܩܶܦܘ̱ ܘܶܐܬܰܘ ܒܳܬܪܳܟ ܘܰܣܢ̣ܰܘ ܠܥܳܠܡܳܐ ܘܰܠܟܽܠ ܕܒܶܗ ܘܠܳܟ ܪܚܶܡ̣ܘ̱ ܘܰܐܚܶܒ̣ܘ̱: ܘܒܰܣ̣ܰܪܘ̱ ܠܟܽܠ ܘܥܰܠ ܟܽܠ ܫܽܘܦܪܳܐ ܕܡܶܬܚܙܶܐ ܕܠܳܟ ܫܰܦܺܝܪ ܢܶܬܚܙܽܘܢ ܘܢܶܬܝܰܕܥܽܘܢ: ܫ̣ܳܛܘ ܠܰܪ̈ܓܺܝܓܳܬܳܐ ܕܒܶܣܪܳܐ ܘܰܕܪܽܘܚܳܐ: ܘܰܠܥܳܒܽܘܪ̈ܝܳܬܳܐ ܐܶܬܢܰܟܪܺܝܘ ܘܰܕܢܶܫܬܰܘܬܦܽܘܢ ܠܠܐܴ ܡܶܫܬܰܪ̈ܝܳܢܝܳܬܳܐ: ܐܰܗܡܺܝܘ ܒܗܳܠܶܝܢ ܕܡܶܬܚܰܙ̈ܝܳܢ ܕܢܺܐܪܬܽܘܢ ܠܗܳܠܶܝܢ ܕܠܐܴ ܡܶܬܚܰܙ̈ܝܳܢ ܢ̣ܓܰܕܘ ܥܰܡ̱̈ܡܶܐ ܠܣܶܓܕܬܳܟ: ܐܰܦܢܺܝܘ ܠܛܳܥܰܝ̈ܳܐ ܠܘܳܬܳܟ: ܐܰܗܦܶܟܘ ܐܰܒܺܝ̣̈ܕܶܐ ܠܕܶܚܠܬܳܟ: ܐܰܢܗܰܪܘ ܠܚܶܫܽܘ̈ܟܶܐ ܒܺܝܕܰܥܬܳܟ: ܟܰܢܶܫܘ ܢܽܘܟܪ̈ܳܝܶܐ ܠܰܛܝܳܪܳܟ: ܐܰܠܶܦܘ̱ ܠܠܐܴ ܣܦܺܝܪ̈ܶܐ ܫܪܳܪܳܟ: ܬܰܠܡܶܕܘ̱ ܠܟܽܠ ܥܰܡ̱̈ܡܝ̣ܢ ܠܰܣܒܰܪܬܳܟ: ܘܰܐܦܢܺܝܘ ܠܚܰܛܳܝ̈ܶܐ ܠܘܳܬܳܟ: ܚܰܟܶܡܘ̱ ܘܰܐܠܶܦܘ̱ ܠܥܰܘ̈ܳܠܐܷ ܩܪܰܘ ܘܒܰܝܬܺܝܘ ܘܰܩܢ̣ܰܘ ܠܩܰܪ̈ܺܝܒܶܐ ܠܺܝܕܰܥܬܳܟ: ܘܟܰܢܶܫܘ̱ ܘܰܐܝܬܺܝܘ ܘܨܰܝܶܒܘ̱ ܠܩܰܪ̈ܺܝܒܶܐ ܘܰܠܪ̈ܰܚܺܝܩܶܐ ܨܶܝܕ ܪܶܚܡܬܳܟ: ܨܳܕܘ̱ ܠܟܽܠܗܽܘܢ ܠܐܴ ܡܟܰܒ̈ܫܶܐ: ܘܰܠܠܐܴ ܡܫܰܥ̈ܒܕܶܐ ܘܰܚܒܰܫܘ̱ ܐܶܢܽܘܢ ܒܰܡܨܺܝܕܬܳܐ ܕܰܣܒܰܪܬܳܟ ܙܟܰܘ ܠܪܶܓܬܳܐ: ܟܰܒܶܫܘ̱ ܠܚܶܡܬܳܐ ܦܰܓܶܕܘ̱ ܠܡܶܠܬܳܐ: ܡܰܟܶܟܘ̱ ܠܪܳܡܽܘܬܳܐ ܫܰܢܶܩܘ̱ ܠܙܰܠܺܝܠܽܘܬܳܐ: ܘܬܽܘܒ ܐܶܬܕܰܟܰܪ ܠܐܱܝܠܶܝܢ ܕܶܐܬܥܰܢܘܺܝܘ ܒܡܰܟܺܝܟܽܘܬܳܐ ܘܰܪܚܶܡܘ̱ ܢܺܝܚܽܘܬܳܐ ܘܠܰܡܪܰܚܡܳܢܽܘܬܳܐ: ܐܰܚܶܒܘ̱ ܘܪܰܝܰܚܘ̱ ܠܪܰܓܽܘܙܬܳܢܽܘܬܳܐ ܐܶܬܪܰܥܺܝܘ ܒܡܶܣܟܺܢܽܘܬܳܐ: ܐܶܬܝܰܬܰܪܘ̱ ܘܶܐܨܛܒܺܝܘ ܒܕܽܘܒܳܪ̈ܶܐ ܕܰܡܣܰܪܩܽܘܬܳܐ: ܕܰܫܦ̣ܰܪܘ̱ ܠܳܟ ܒܟܽܠ ܡܝܰܬܪ̈ܳܬܳܐ ܘܪܰܥܝܽܘܟ ܒܟܽܠܗܶܝܢ ܫܰܦܺܝܪ̈ܳܬܳܐ: ܥܺܕܬܳܐ ܕܶܝܢ ܡܟܺܝܪܬܳܟ ܟܰܕ ܠܕܽܘܟܪܳܢܳܐ ܕܺܝܠܗܽܘܢ ܡܙܰܝܚܳܐ: ܘܠܳܟ ܡܦܺܝܣܳܐ ܘܡܶܬܟܰܫܦܳܐ ܕܬܶܬܶܠ ܠܳܗ̇ ܒܝܰܕ ܨܠܰܘ̈ܳܬܗܽܘܢ ܫܰܝܢܳܐ ܠܐܴ ܕܠܺܝܚܳܐ: ܘܰܫܠܳܡܳܐ ܠܐܴ ܫܓܺܝܫܳܐ: ܘܙܰܒ̈ܢܶܐ ܡܫܰܝ̈ܢܶܐ ܘܡܰܠܝ̈ܰܝ ܛܳܒ̈ܳܬܳܐ: ܘܰܐܘܝܽܘܬܳܐ ܕܠܐܴ ܦܠܺܝܓܽܘܬܳܐ: ܘܰܬܩܰܒܶܠ ܡܶܢ ܝܰܠܕ̈ܶܝܗ̇ ܒܰܨܠܽܘܬ ܐܶܡܳܐ ܕܺܝܠܶܕܬܳܟ ܒܩܰܕܺܝܫܽܘܬܳܐ ܣܶܕ̈ܩܶܐ ܘܚܶܪ̈ܝܳܢܶܐ: ܘܥܳܩ̈ܳܬܳܐ ܘܡܰܪ̈ܕܘܳܬܳܐ: ܘܬܶܠܚܶܐ ܘܬܰܥܒܰܪ ܘܬܶܫܒܽܘܩ ܟܽܠܗܶܝܢ ܣܰܟܠܘ̈ܳܬܳܐ ܘܫܳܪ̈ܥܳܬܳܐ ܕܝܰܠܕܶܝ̈ܗ̇: ܐܰܝܠܶܝܢ ܕܰܒܨܶܒܝܳܢܳܐ ܘܰܕܠܐܴ ܒܨܶܒܝܳܢܳܐ ܘܒܺܝܕܰܥܬܳܐ ܘܰܕܠܐܴ ܒܺܝܕܰܥܬܳܐ: ܘܰܐܢܺܝܚ ܐܶܢܽܘܢ ܒܰܐܘ̈ܳܢܶܐ ܕܢܽܘܗܪܳܐ ܘܰܒܡܰܫ̈ܟܢܶܐ ܕܰܢܝܳܚܳܐ ܠܦܰܓܪ̈ܶܐ ܘܢܰܦ̈ܫܳܬܳܐ ܘܪ̈ܽܘܚܳܬܳܐ ܕܰܫܟܺܝ̣̈ܒܰܝ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ ܕܬܰܣܶܩܝ̱ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܥܶܛܪܳܐ

ܦܺܝܪܡܳܐ ܕܚܽܘܣܳܝܳܐ ܘܪܺܝܚܳܐ ܕܬܰܪܥܽܘܬܳܐ ܘܥܶܛܪܳܐ ܒܰܣܺܝܡܳܐ ܕܗܰܢܺܝܽܐܘܬܳܐ: ܣܰܘܩܳܐ ܡܶܬܝܰܕܥܳܢܳܐ ܕܦܳܚ ܪܺܝܚܶܗ ܒܬܺܐܒܶܝܠ: ܘܰܡܚ̣ܳܐ ܪܺܝܚ ܣܘܳܬ ܥܶܛܪܗ ܒܥܳܡܰܪܬܳܐ ܘܣܳܩܶܗ ܡܰܘܬܳܐ ܡܚܰܒܶܠ ܛܽܘ̈ܗܡܶܐ ܘܰܒܟܽܠ ܫܰܪ̈ܒܳܬܳܐ: ܘܡܶܢ ܪܺܝܚ ܥܶܛܪܶܗ ܐܶܬܚܢܶܩ ܘܡܺܝܬ ܘܦܳܚ̣ ܪܺܝܚ ܪܽܘܡܬܳܢܳܝܽܘܬܶܗ ܒܓܰܘ ܫܝܽܘܠ: ܘܒܰܣܶܡ ܐܶܢܽܘܢ ܠܰܫܟܺܝ̣̈ܒܰܝ ܕܰܚܺܝܚܳܐ: ܘܰܣܓܶܕܘ̱ ܠܶܗ ܒܗܳܡܳܢ ܚܶܫܽܘܟܬܳܐ: ܐܰܢ̱ܬ ܡܳܪܝ̱ ܩܰܒܶܠ ܠܦܺܝܪܡܳܐ ܗܳܢܳܐ ܕܶܐܬܩܰܪܰܒ ܠܳܟ ܡܶܢ ܐܺܝܕܰܝ̈ܢ ܚܰܠܳܫ̈ܳܬܳܐ ܘܰܛܦܺܝ̣̈ܠܳܬܳܐ: ܠܪܺܝܚ ܢܝܳܚܳܐ ܕܐܰܠܳܗܽܘܬܳܟ ܒܥܺܐܕܳܐ ܗܳܢܳܐ ܕܰܡܕܰܒܪܳܢܽܘܬܳܟ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀