ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܫܒܺܝܚܳܐ ܘܰܡܫܰܒܚܳܐ ܕܗ̣ܽܘ ܐܰܘܪܶܒ ܕܽܘܟܪܳܢܳܐ ܕܝܳܠܶܕܬܶܗ ܒܬܽܘܠܬܳܐ ܩܰܕܺܝܫܬܳܐ ܒܰܫܡܰܝܳܐ ܘܒܰܐܪܥܳܐ: ܘܢܰܨܰܚ ܕܽܘܟܪܳܢܳܐ ܕܰܪ̈ܚܽܘܡܰܘܗ̱ܝ ܒܥܺܕܬܳܐ ܩܰܕܺܝܫܬܳܐ: ܘܙܰܝܰܚ ܠܰܟܠܺܝ̣̈ܠܰܝܗܽܘܢ ܕܡܰܐܚ̈ܒܳܢܰܘܗ̱ܝ ܕܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ: ܘܗܳܐ ܡܰܪܕܶܝܢ ܓܰܪ̈ܡܰܝܗܘܽܢ ܥܽܘܕܪ̈ܳܢܶܐ ܘܳܐܣܘ̈ܳܬܳܐ ܠܰܟܪ̈ܺܝܗܶܐ ܘܰܐܠܺܝ̣̈ܨܶܐ ܕܩܳܪܒܺܝܢ ܒܗܰܝܡܳܢܽܘܬܳܐ ܠܘܳܬ ܫܟܺܝ̣̈ܢܳܬܗܽܘܢ: ܘܢܳܣܒܺܝܢ ܚܽܘܠܡܳܢܳܐ ܠܟܽܘܪ̈ܗܳܢܰܝܗܽܘܢ: ܗ̣ܽܘ ܒܪ̈ܰܚܡܰܘܗ̱ܝ ܘܰܒܛܰܝܒܽܘܬܳܐ ܢܪܰܣܶܣ ܛܰܠܐܴ ܕܪ̈ܰܚܡܶܐ ܘܕܰܚܢܳܢܳܐ ܥܰܠ ܓܰܪ̈ܡܰܝܗܽܘܢ ܕܥܰܢܺܝ̈ܕܶܐ ܡܗܰܝ̈ܡܢܶܐ: ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܡܳܪܝܳܐ ܕܚܰܝܠܰܘ̈ܳܬܳܐ ܘܐܰܠܳܗܳܐ ܕܪ̈ܽܘܚܳܬܳܐ ܘܰܕܟܽܠ ܒܣܰܪ: ܗܰܘ ܕܝܰܩܺܝܪ ܒܥܰܝ̈ܢܰܘܗ̱ܝ ܡܰܘܬܳܐ ܕܰܓܒܰܝ̈ܳܐ ܕܺܝܠܶܗ: ܘܕܽܘܟܪܳܢܗܽܘܢ ܠܪܺܝܚܳܐ ܚܰܠܝܳܐ ܘܒܰܣܺܝܡܳܐ ܡܩܰܒܶܠ ܐܰܢ̱ܬ: ܐܶܬܕܰܟܰܪ ܡܳܪܝܳܐ ܒܥܶܕܳܢܳܐ ܗܳܢܳܐ ܥܰܠ ܦܺܝܪܡܳܐ ܗܳܢܳܐ ܕܰܡܩܰܪܒܳܐ ܒܨܺܝܪܽܘܬܰܢ ܩܕܳܡܰܝܟ ܠܟܽܠܗܽܘܢ ܩܰܕܺܝ̈ܫܰܝܟ ܐܰܝܠܶܝܢ ܕܰܠܪܶܗܛܗܽܘܢ ܫܰܡܠܺܝܘ ܘܰܓܡ̣ܰܪܘ̱ ܒܗܰܝܡܳܢܽܘܬܳܐ ܕܰܫܪܳܪܳܐ: ܘܒܶܗ ܒܦܽܘܠܚܳܢܳܐ ܕܰܥܒܳܕ̈ܶܐ ܛܳܒ̈ܶܐ ܠܐܱܒܳܗ̈ܳܬܳܐ ܩܰܕܺܝ̈ܫܶܐ: ܠܪ̈ܺܝܫܰܝ ܐܰܒܳܗ̈ܳܬܳܐ ܠܰܢܒܺܝ̈ܶܐ ܠܰܫܠܺܝ̈ܚܶܐ ܠܟܳܪ̈ܽܘܙܶܐ: ܘܠܐܷܘܰܢܓܶܠܺܝ̈ܣܛܶܐ ܠܣܳܗ̈ܕܶܐ ܠܡܰܘܕ̈ܝܳܢܶܐ ܠܡܰܠܦ̈ܰܝ ܐ̱ܪ̈ܳܙܶܐ ܘܰܡܟܰܗ̈ܢܳܢܶܐ ܕܰܫܪܳܪܳܐ: ܘܰܠܟܽܠ ܢܰܦ̈ܫܳܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ ܕܶܐܬܓܡ̣ܰܪܘ̱: ܬܽܘܒ ܕܶܝܢ ܝܰܬܺܝܪܳܐܝ̣ܬ ܠܩܰܕܺܝܫܬܳܐ ܘܰܡܫܰܒܰܚܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ: ܘܰܠܛܽܘܒܳܢܳܐ ܝܽܘܚܰܢܳܢ ܐܺܝܙܓܰܕܳܐ ܘܡܰܥܡܕܳܢܳܐ ܘܪܰܗܳܛܳܐ ܩܰܕܡܳܝܳܐ ܘܰܠܩܰܕܺܝܫܳܐ ܡܫܰܒܚܳܐ ܣܛܶܦܰܢܳܘܣ ܪܺܝܫܳܐ ܕܰܡܫܰܡ̈ܫܳܢܳܐ ܘܩܰܕܡܳܝܳܐ ܕܣܳܗ̈ܕܶܐ: ܘܰܠܗܳܢܘܢ̇ ܐܰܝܠܶܝܢ ܕܰܐܓܽܘ̈ܢܶܐ ܢܰܨܺܝ̈ܚܶܐ ܚܠܳܦ ܫܪܳܪܳܐ ܕܗܰܝܡܳܢܽܘܬܳܐ ܐܶܬܟܰܬܰܫܘ̱: ܘܰܐܢܗܰܪܘ̱ ܒܢܽܘܗܪܳܐ ܕܺܝܕܰܥܬܳܐ ܠܥܺܕ̈ܳܬܳܐ ܩܰܕܺܝ̈ܫܳܬܳܐ ܘܰܠܩܰܘ̈ܡܶܐ ܘܪ̈ܽܘܫܥܶܐ ܕܐܶܪ̈ܶܣܺܝܣ ܕܰܓ̈ܳܠܳܬܳܐ ܣܰܚ̣ܶܦܘ̱ ܘܒܰܛܶܠܘ̱: ܘܥܰܡܗܽܘܢ ܐܶܬܕܰܟܰܪ ܡܳܪܝܳܐ ܒܛܰܝܒܽܘܬܳܟ ܠܥܰܢܺܝ̈ܕܶܐ ܗܳܢܘܢ̇ ܝܰܘܡܳܢܳܐ ܕܽܘܟܪܳܢܗܽܘܢ ܡܫܰܡܠܶܝܢܰܢ: ܐܰܢܺܝܚ ܡܳܪܝܳܐ ܢܰܦ̈ܫܳܬܗܽܘܢ ܘܪ̈ܽܘܚܳܬܗܽܘܢ ܘܦܰܓܪ̈ܰܝܗܽܘܢ: ܛܰܟܶܣ ܐܶܢܽܘܢ ܒܓܽܘܕܰܝ̈ܗܽܘܢ ܩܰܕܺܝ̈ܫܳܬܳܐ: ܘܰܐܝܠܶܝܢ ܕܰܒܡܶܠܬܳܐ ܘܒܰܥܒܳܕܳܐ ܚ̣ܛܰܘ ܐܰܝܟ ܒܢܰܝ̈ܢܳܫܳܐ ܠܒܺܝ̣̈ܫܰܝ ܒܶܣܪܳܐ ܕܡܽܘܟܳܟܳܐ ܣܰܓܺܝ ܚܰܫ̈ܶܐ ܫܒܽܘܩ ܘܰܐܥܒ̣ܰܪ: ܐܰܢ̱ܬ ܓܶܝܪ ܝܳܕܰܥ ܐܰܢ̱ܬ ܡܚܺܝܠܽܘܬ ܟܝܳܢܰܢ ܘܰܕܠܺܝܠܽܘܬ ܫܳܪ̈ܥܳܬܳܐ ܕܺܝܠܰܢ: ܘܰܠܗܳܠܶܝܢ ܕܰܒܗܰܝܡܳܢܽܘܬܳܐ ܕܰܫܪܳܪܳܐ ܩܽܘܪ̈ܒܳܢܶܐ ܘܰܢܝܳܚ̈ܳܬܳܐ ܥܳܒܕܺܝܢ ܚܠܳܦܰܝܗܽܘܢ: ܘܰܒܟܽܠ ܡܰܝܬܳܝܽܘܬ ܦܺܐܪ̈ܶܐ ܕܰܥܒܳܕ̈ܶܐ ܛܳܒ̈ܶܐ ܬܽܘܒ ܡܶܬܚܰܫܚܺܝܢ ܩܰܒܶܠ ܡܳܪܝ̱ ܩܽܘܪ̈ܒܳܢܰܝܗܽܘܢ ܘܦܽܘܪ̈ܫܳܢܰܝܗܽܘܢ ܘܒܰܪܶܟ ܥܰܡܠܰܝ̈ܗܽܘܢ ܘܰܐܣܓܳܐ ܦܺܐܪ̈ܶܐ ܕܙܰܕܺܝܩܽܘܬܗܽܘܢ: ܘܰܠܚܰܝ̈ܶܐ ܕܺܝܠܰܢ ܙܰܒܢܳܝ̈ܶܐ ܘܰܬܥܺܝ̣̈ܫܶܐ ܢܰܛܰܪ ܡܶܢ ܟܽܠ ܢܶܣܝܽܘܢܳܐ ܘܡܰܟܝܳܢܽܘܬܳܐ ܕܒܺܝܫܳܐ ܡܳܪܽܘܕܳܐ: ܘܕܰܒܰܪ ܠܰܢ ܠܘܳܬ ܦܽܘܪܩܳܢܳܐ ܡܫܰܡܠܝܳܐ: ܘܠܰܢܝܳܚܬܳܐ ܕܚܰܝ̈ܶܐ ܕܰܥܬܺܝܕܺܝܢ ܒܝܰܘܡܳܐ ܕܒܶܗ ܡܶܬܓܠܐܷ ܐܰܢ̱ܬ ܒܫܽܘܒܚܳܐ ܪܰܒܳܐ ܕܡܰܠܟܽܘܬܳܟ: ܘܳܐܬܶܐ ܐܰܢ̱ܬ ܕܰܬܕܽܘܢ ܠܬܺܐܒܶܝܠ ܒܙܰܕܺܝܩܽܘܬܳܐ: ܘܢܶܫܬܘܶܐ ܕܢܶܥܽܘܠ ܠܰܓܢܽܘܢܳܟ: ܘܢܶܬܒܰܣܰܡ ܒܛܳܒ̈ܳܬܳܟ ܡܬܽܘܡܳܝ̈ܳܬܳܐ ܘܕܰܠܥܳܠܰܡ ܡܟܰܬܪ̈ܳܢ ܒܢܽܘܗܪܳܐ ܗܰܘ ܕܠܐܴ ܥܳܪܶܒ: ܘܰܐܟܚܕܳܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀