ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܪܳܡܳܐ ܘܰܡܥܰܠܝܳܐ ܕܶܐܬܬܰܚܬܺܝ ܘܠܐܴܕܳܡ ܨܰܠܡܳܐ ܕܪܰܒܽܘܬܶܗ ܡ̣ܶܢ ܓܰܘ ܣܝܳܢܳܐ ܕܰܠܺܝ: ܘܠܰܫܡܰܝܳܐ ܒܬܶܫܒܽܘܚܬܳܐ ܥܰܠܺܝ: ܠܗܰܘ ܠܰܚܡܳܐ ܕܚܰܝ̈ܶܐ ܕܰܒܚܰܪܰܬ݀ ܙܰܒ̈ܢܶܐ ܠܦܽܘܪܩܳܢܰܢ ܐܶܬܓܠܺܝ: ܘܡ̣ܶܢ ܡܰܪ̈ܳܚܶܐ ܒܩܰܝܣܳܐ ܐܶܬܬܠܺܝ: ܘܰܒܡܳܐܢ̈ܶܐ ܪ̈ܺܝܫܳܝܶܐ ܐܶܬܥܰܦܺܝ: ܘܡ̣ܶܢ ܟܽܠ ܐܰܠܳܗ ܒܰܪܢܳܫ ܐܶܬܬܰܘܕܺܝ: ܕܠܶܗ ܝܳܐܶܐ ܫܽܘܒܚܳܐ܀

ܣܶܕܪܳܐ

ܟܰܕ ܠܺܝܠܺܝܕܽܘܬܳܟ ܡܬܽܘܡܳܝܬܳܐ ܘܕܰܠܥܶܠ ܡ̣ܶܢ ܡܶܠܬܳܐ ܘܰܕܠܐܴ ܐܶܡܳܐ: ܘܰܠܗܳܝ ܦܰܓܪܳܢܳܝܬܳܐ ܕܠܐܴ ܐܰܒܳܐ ܘܰܕܠܐܴ ܪܶܕܝܳܐ ܘܚܰܫܳܐ ܥܰܠ ܠܽܘ̈ܚܶܐ ܕܠܶܒܰܘ̈ܳܬܰܢ ܟܳܬܒܺܝܢܰܢ: ܘܰܒܟܽܠܗܶܝܢ ܕܰܗܘ̈ܰܝ ܒܗܶܝܢ ܬܳܗܪܺܝܢܰܢ ܘܠܰܨܠܺܝܒܽܘܬܳܟ ܒܢܰܦ̈ܫܳܬܰܢ ܢܳܣܒܺܝܢܰܢ: ܒܰܥܒܺܝܕܬܳܐ ܢܽܘܚܳܝܬܳܐ ܠܰܩܪ̈ܳܒܶܐ ܡܶܬܛܰܝܒܺܝܢܰܢ: ܘܰܩܪܳܒܳܐ ܥܰܡ ܣܳܛܳܢܳܐ ܣܳܕܪܺܝܢܰܢ: ܘܰܠܥܺܕܬܳܐ ܗܳܝ ܟܶܐܘܶܝܠܳܝܬܳܐ ܥܳܐܠܺܝܢܰܢ ܒܡܰܕܢܚܳܐ ܡܶܬܚܰܙܝܳܢܳܐ ܟܽܠܰܢ ܡܶܣܬܰܟܠܺܝܢܰܢ: ܘܰܒܪܺܝܫ ܟܽܘܡܪ̈ܶܐ ܕܩܳܐܶܡ ܵ ܠܳܟ ܪܺܝܫ ܟܳܗ̈ܢܶܐ ܡܫܺܝܚܳܐ ܕܰܗܘܰܝܬ ܚܠܳܦܰܝܢ ܩܽܘܪܒܳܢܳܐ ܡܶܫܬܰܪܪܺܝܢܰܢ: ܠܠܰܚܡܳܐ ܘܚܰܡܪܳܐ ܦܰܓܪܳܟ ܘܰܕܡܳܟ ܗܰܘ ܕܡ̣ܶܢ ܒܬܽܘܠܬܳܐ ܡܰܪܝܰܡ ܝܳܕܥܺܝܢܰܢ: ܘܰܒܦܺܝܪܡܳܐ ܠܰܚܕܳܝܽܘܬܳܟ ܕܰܒܟܰܪܣܳܐ ܐܳܦ ܕܽܘܝܳܪܳܟ ܕܰܒܥܳܠܡܳܐ ܘܫܰܠܡܽܘܬܰܢ ܠܳܟ ܡܰܓܥܠܺܝܢܰܢ ܘܺܝ̣ܠܐܴ ܕܥܰܠ ܡܰܕܒܚܳܐ ܨܳܐܰܪ ܠܰܪܩܺܝܥܳܐ ܕܒܶܝܬ ܠܰܢ ܘܠܐܱܬܪܳܐ ܫܡܰܝܳܢܳܐ: ܘܩܰܢܕܺܝ̈ܠܐܷ ܠܙܰܠܓ̈ܶܐ ܪ̈ܽܘܚܳܢܳܝܶܐ ܘܒܺܐܡܰܐ ܠܥܶܠܺܝܬܳܐ: ܘܛܶܒܠܺܝܬܳܐ ܠܰܨܠܺܝܒܳܐ ܦܳܪܽܘܩܳܝܳܐ: ܘܰܬܪܽܘܢܳܘܣ ܠܩܰܒܪܳܐ ܡܳܪܳܢܳܝܳܐ: ܘܬܰܠܒܶܫܬܳܐ ܠܡܳܐܢ̈ܰܝ ܚܘ̣ܦܳܝܳܐ: ܘܶܐܣܳܪܳܐ ܠܣܽܘܕܳܪܳܐ: ܘܦܺܝܢܟܳܐ ܘܟܳܣܳܐ ܠܗܳܝ ܫܳܪܽܘܬܳܐ ܐ̱ܪܳܙܳܢܳܝܬܳܐ: ܘܫܽܘܫܶܦܳܐ ܘܦܶܕܬܳܐ ܠܟܺܐܦܳܐ ܩܰܒܪܳܢܳܝܬܳܐ: ܐܽܘܪܳܪܳܐ ܕܰܡܫܰܡܫܳܢܳܐ ܠܓܶܦ̈ܶܐ ܕܰܣܪ̈ܳܦܶܐ: ܟܽܘܬܺܝܢܳܐ ܓܠܺܝܠܬܳܐ ܘܚܶܘܳܪܬܳܐ ܠܚ̈ܰܝܶܐ ܠܐܴ ܦܠܺܝ̈ܓܶܐ: ܘܰܫܪܳܝܳܗ̇ ܠܚܽܘܪܳܪܳܐ ܕܡ̣ܶܢ ܒܥܶܠܕ̈ܒܳܒܶܐ: ܘܗܳܝ ܕܠܳܒܫܺܝܢ ܟܳܗ̈ܢܶܐ ܘܰܡܚܰܙܩܺܝܢ ܒܟܽܠ ܦܽܘܩ̈ܕܳܢܶܐ: ܦܶܕ̈ܝܳܬܳܐ ܓܠܺܝ̈ܠܳܬܳܐ ܠܫܽܘܪܳܪܳܐ ܕܢܳܛܽܘܪܽܘܬ ܢܳܡܽܘ̈ܣܶܐ: ܘܦܰܝܢܳܐ ܠܓܰܠܐܴ ܐܰܘܟܺܝܬ ܡܰܪܛܽܘܛܳܐ: ܘܰܓܠܺܝܠܽܘܬܶܗ ܠܚܰܝ̈ܶܐ ܠܐܴ ܣܕܺܝ̈ܩܶܐ: ܐܳܦ ܡܰܨܢܰܦܬܳܐ ܠܣܽܘܕܳܪܳܐ ܘܗ̣ܺܝ ܚܶܘܳܪܽܘܬܳܗ̇ ܠܕܰܟܝܽܘܬ ܚܽܘ̈ܫܳܒܶܐ: ܘܟܰܠܒܬܳܐ ܗܳܝ ܣܪܳܦܳܝܬܳܐ ܠܰܚܡܳܐ ܚܰܕܬܳܐ ܕܡܶܬܰܐܦܶܐ ܘܡܶܬܢܣܶܒ ܠܕܽܘܒܳܪ̈ܶܐ ܚܰܕ̈ܬܶܐ: ܘܚܰܕ ܕܚܰܕ ܐܝ̣ܬܝܟ ܡܶܠܬܳܐ ܕܶܐܬܒܰܣܰܪ: ܘܰܬܪܶܝܢ ܠܐܱܠܳܗܽܘܬܳܐ ܘܐ̱ܢܳܫܘ̣ܬܳܐ: ܘܚܰܕ ܒܪܳܐ ܠܳܟ ܝܳܕܥܺܝܢܰܢ: ܘܰܬܠܳܬܳܐ ܕܚܰܕ ܗ̣ܽܘ ܟܝܳܢܳܐ ܕܰܐܠܳܗܽܘܬܳܐ ܘܰܩܢܽܘ̈ܡܶܐ ܬܠܳܬܳܐ: ܟܳܣܳܐ ܕܡ̣ܶܢ ܝܰܡܺܝܢܳܐ ܐ̱ܪܳܙ ܟܰܒܕܳܐ ܐܶܡܳܐ ܕܰܕܡܳܐ ܕܰܒܓܰܒܳܐ ܝܰܡܺܝܢܳܝܳܐ: ܘܦܰܓܪܳܐ ܕܡ̣ܶܢ ܡܰܥܪܒܳܐ ܐ̱ܪܳܙ ܗܳܝ ܕܦܰܓܪܳܐ ܕܡܽܘܟܳܟܰܢ ܠܒܶܫܬ ܘܕܰܕܡܶܗ ܕܰܩܛܺܝܠܐܴ ܠܰܩܕܳܡܰܘܗܝ ܪܳܕܶܐ: ܫܠܳܡܳܐ ܕܝܳܗܒܺܝܢܰܢ ܠܰܫܠܳܡܳܐ ܥܶܠܺܝܬܳܢܳܝܳܐ: ܘܕܰܢܩܽܘܡ ܡܰܢ ܢܰܟܦܳܐܝ̣ܬ ܕܠܐܴ ܐܰܝܟ ܣܳܛܳܢܳܐ ܢܶܬܬܰܚܬܶܐ: ܘܓܰܠܝܽܘܬܳܐ ܕܐ̱ܪ̈ܳܙܶܐ ܠܢܽܘܚܳܡܳܟ: ܘܡܰܪ̈ܘܳܚܶܐ ܠܰܣܪ̈ܳܦܶܐ ܘܰܡܫܰܡ̈ܫܳܢܶܐ ܠܡܰܠܐܱܟ̈ܶܐ ܕܰܢܚܶܬܘ̱ ܨܶܝܕ ܩܰܒܪܳܟ ܘܩܳܡܘ̱ ܚܕܳܪ̈ܰܘܗ̱ܝ: ܩܨܳܝܬܳܐ ܗܳܝ ܠܐܴ ܣܕܺܝܩܬܳܐ ܠܰܩܨܳܝܬܳܐ ܙܩܺܝܦܳܢܳܝܬܳܐ ܕܠܐܴ ܐܶܬܦܰܪܫܰܬ ܐܰܠܳܗܽܘܬܳܟ ܠܐܴ ܡ̣ܶܢ ܢܰܦܫܳܟ ܘܠܐܴ ܡ̣ܶܢ ܦܰܓܪܳܟ: ܒܰܚܕܳܝܽܘܬܳܐ ܠܐܴ ܚܒܺܝܟܬܳܐ: ܒܽܘܪ̈ܟܳܬܳܐ ܥܰܡ ܩܽܘ̈ܕܳܫܶܐ ܕܠܰܚܡܳܐ ܘܚܰܡܪܳܐ ܠܦܰܓܪܳܐ ܘܰܕܡܳܐ ܕܡ̣ܶܢ ܒܬܽܘܠܬܳܐ: ܘܰܩܪܳܝܬܳܐ ܕܪܽܘܚܳܐ ܩܰܕܺܝܫܬܳܐ ܠܰܣܒܰܪܬܳܐ ܗܳܝ ܡܰܠܐܱܟܳܝܬܳܐ: ܘܡܶܬܕܰܟܪܳܢܽܘܬܳܐ ܕܚܰܝ̈ܶܐ ܘܡܺܝ̈ܬܶܐ ܐ̱ܢܳܫ̈ܳܐ ܓܒܰܝ̈ܳܐ ܠܰܡܡܰܪܝܳܢܽܘܬܳܐ ܕܰܒܥܶܩ̈ܒܳܬܗܽܘܢ: ܩܨܳܝܬܳܐ ܕܠܰܬܪܶܝܢ ܦܶܠܓܺܝ̈ܢ ܠܫܰܪܺܝܪܽܘܬ ܚܰܫܳܐ ܘܰܙܩܺܝܦܳܐ ܕܒܰܒܣܰܪ: ܘܰܡܢܳܬܳܐ ܕܡ̣ܶܢ ܦܰܓܪܳܐ ܒܰܛܡܳܫܬܳܐ ܕܡܳܢܳܝܬܳܐ ܘܰܚܬܳܡܳܐ ܕܥܰܠ ܦܰܓܪܳܐ ܠܰܕܩܰܪܬܳܐ ܕܰܦܢܳܝܬܳܐ: ܘܰܡܦܰܠܦܠܽܘܬܳܐ ܕܒܰܕܡܳܐ: ܡܰܝܬܝܽܘܬܳܐ ܕܡ̣ܶܢ ܕܡܳܐ ܘܰܪܫܳܡܳܐ ܥܰܠ ܦܰܓܪܳܐ ܩܰܕܺܝܫܳܐ ܒܛܽܘܦܣܳܐ ܕܰܨܠܺܝܒܳܐ ܠܗܳܝ ܕܰܚܕܳܝܽܘܬܳܐ ܕܢܰܦܫܳܐ ܥܰܡ ܦܰܓܪܳܐ: ܘܕܳܐܦܶܢ ܐܶܬܦܪܶܫܘ̱ ܐܶܠܐܴ ܐܠܰܗܽܘܬܳܐ ܩܰܘܝܰܬ݀ ܒܰܚܕܳܝܽܘܬܳܐ: ܚܽܘܝܳܕܳܐ ܕܦܶܠܓ̈ܶܐ ܠܰܚܕܳܝܽܘܬܳܐ ܟܰܪܣܳܢܳܝܬܳܐ ܘܠܰܝܬ ܦܽܘܠܳܓܳܐ ܠܰܬܪܰܝܳܢܽܘܬ ܟܝ̈ܳܢܶܐ: ܘܚܽܘܝܳܕ ܫܡܰܝܳܢ̈ܶܐ ܘܰܐܪ̈ܥܳܢܳܝܶܐ: ܟܪܽܘܟܝܳܐ ܚܽܘܕܪܳܢܳܝܳܐ ܘܝܰܡܺܝܢܳܝܳܐ ܠܰܕܒܺܝܚܽܘܬܳܐ ܕܰܚܠܳܦ ܟܽܠܳܗ̇ ܚܛܺܝܬܳܐ ܕܚܽܘܕܪܶܗ ܕܥܳܠܡܳܐ: ܘܗܳܝ ܕܰܒܗܶܦܟܳܐ ܡܰܢ ܠܦܽܘܢܳܝܳܐ ܕܡ̣ܶܢ ܕܽܘܒܳܪܳܐ ܣܶܡܳܠܳܝܳܐ ܠܝܰܡܺܝܢܳܝܳܐ: ܫܕܳܝܬܳܐ ܕܰܓܡܽܘܪܬܳܐ ܒܟܳܣܳܐ ܠܫܽܘܘܕܳܥܳܐ ܕܰܕܡܳܐ ܕܗܳܢܳܐ ܐܝ̣ܬܘܗ̱ܝ ܘܠܰܘ ܕܰܐ̱ܚܪܺܢܳܐ ܘܰܓܡܽܘܪ̈ܳܬܳܐ ܣܰܓܺܝ̈ܳܐܬܳܐ ܠܰܩܨܳܝܬܳܐ ܕܰܒܥܶܠܺܝܬܳܐ: ܨܠܽܘܬܳܐ ܡܳܪܳܢܳܝܬܳܐ ܕܰܠܡܶܬܬܰܪܣܝܳܢܘ̣ܬ ܢܰܦܫܳܐ ܘܦܰܓܪܳܐ ܘܙܽܘܝܳܚ ܐ̱ܪ̈ܳܙܶܐ ܠܣܽܘܠܳܩܳܐ ܕܡ̣ܶܢ ܐܰܪܥܳܐ ܠܰܫܡܰܝܳܐ: ܬܶܫܒܽܘܚܬܳܐ ܠܰܚܕܳܝܽܘܬܳܐ ܗܳܝ ܬܠܺܝܬܳܝܬܳܐ: ܚܽܘܦܳܝܳܐ ܠܟܺܐܦܳܐ ܕܩܰܒܪܳܐ: ܘܰܩܦܽܘܠܝܳܐ ܠܰܩܝܳܡܬܳܐ ܡܳܪܳܢܳܝܬܳܐ: ܫܰܘܬܳܦܽܘܬܳܐ ܩܰܕܡܳܝܬܳܐ ܠܗܳܝ ܩܰܕܡܳܝܬܳܐ: ܘܒܳܬܰܪܟܶܢ ܠܥܰܡܳܐ ܠܗܳܝ ܕܰܫܠܺܝܚܽܘܬܳܐ ܠܚܽܘܣܳܝܳܐ ܘܰܪܟܺܝܢܽܘܬ ܨܰܘܪܳܐ ܠܰܫܟܳܚܬܳܐ ܕܪ̈ܰܚܡܶܐ: ܘܒܽܘܪܟܬܳܐ ܠܗܳܝ ܥܶܡܰܐܘܳܣܳܝܬܳܐ: ܗܳܕܶܐ ܗܰܝܡܳܢܽܘܬܳܐ ܐܰܚܺܝܕܺܝܢܰܢ ܡܳܪܝܳܐ: ܘܗܳܟܰܢܳܐ ܡܗܰܝܡܢܺܝܢܰܢ ܟܰܕ ܫܳܐܠܺܝܢܰܢ ܘܒܳܥܶܝܢܰܢ ܩܶܢܝܳܢ ܢܰܦ̈ܫܳܬܰܢ: ܟܰܕ ܡܦܰܨܶܐ ܐܰܢ̱ܬ ܠܰܢ ܡ̣ܶܢ ܗܰܘ ܕܰܠܩܽܘܒܠܐܴ ܘܰܒܥܶܠܕܒܳܒܳܐ ܕܺܝܠܰܢ: ܘܥܳܒܶܕ ܐܰܢ̱ܬ ܪ̈ܰܚܡܶܐ ܥܰܠ ܢܰܦ̈ܫܳܬܰܢ: ܘܰܡܢܺܝܚ ܐܰܢ̱ܬ ܠܥܰܢܺܝ̈ܕܰܝܢ ܒܡܰܠܟܽܘܬܳܟ ܠܐܴ ܡܶܫܬܰܪܝܳܢܺܝܬܳܐ: ܕܰܚܢܰܢ ܐܳܦ ܗܶܢܽܘܢ̇ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ܀