ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܟܝܳܢܳܐ ܛܽܘܒܬܳܢܳܐ ܘܰܡܥܰܠܝܳܐ ܘܫܽܘܦܪ̈ܶܐ ܠܐܴ ܡܶܬܦܰܚܡܳܢܳܐ ܗܰܘ ܥܳܒܽܘܕܳܐ ܘܒܳܪܽܘܝܳܐ ܕܗܳܠܶܝܢ ܕܺܐܝܬܰܝܗܶܝܢ: ܘܢܽܘܗܪܳܐ ܠܐܴ ܡܶܬܚܰܙܝܳܢܳܐ ܘܝܰܕܽܘܥܬܳܢܳܐ ܗܰܘ ܠܐܴ ܡܶܬܕܰܪܟܳܢܳܐ ܒܺܐܝܬܽܘܬܶܗ ܗܳܝ ܛܳܒܽܘܬܳܐ ܕܠܐܴ ܚܣܳܡ: ܗܳܝ ܚܶܟܡܬܳܐ ܪܰܒܬܳܐ ܘܠܐܴ ܡܶܣܬܰܝܟܳܢܺܝܬܳܐ ܕܪܰܚܺܝܩܳܐ ܘܡܰܒܥܕܳܐ ܡܶܢܟܽܠ ܬܰܪܥܺܝܬܳܐ ܐ̱ܢܳܫܳܝܬܳܐ: ܗܰܘ ܕܰܫܟܺܝܚ ܘܩܰܪܺܝܒ: ܘܥܳܢܶܐ ܠܟܽܠܗܽܘܢ ܕܩܳܪܶܝܢ ܠܶܗ ܒܫܰܦܺܝܪܽܘܬ ܕܶܚܠܬܳܐ ܘܰܒܨܶܒܝܳܢܳܐ ܛܳܒܳܐ: ܗܰܘ ܒܳܪܽܘܝܳܐ ܘܓܳܒܽܘܠܐܴ ܕܟܽܠܗܽܘܢ ܗܘܰܝ̈ܳܐ ܗܰܘ ܕܠܶܗ ܦܰܐܝܳܐ ܬܶܫܒܽܘܚܬܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܪܰܝܳܢܳܐ ܕܠܺܠܝܳܐ܀

ܣܶܕܪܳܐ

ܡܳܪܰܢ ܝܶܫܽܘܥ ܡܫܺܝܚܳܐ ܡܰܠܟܳܐ ܕܡܰܠܟ̈ܶܐ ܐܰܠܳܗܳܐ ܫܰܪܺܝܪܳܐ ܡܳܪܝܳܐ ܡܪܰܝܡܳܐ ܘܰܡܥܰܠܝܳܐ: ܗܰܘ ܕܺܐܝܬܰܝܟ ܬܗܽܘܡܳܐ ܕܪ̈ܰܚܡܶܐ ܒܽܘܟܪܳܐ ܕܠܐܴ ܫܽܘܪܳܝ: ܘܢܽܘܗܪܳܐ ܠܚܽܘܕܳܝܳܐ ܘܰܓܢܺܝܙܳܐ ܘܺܝܚܺܝܕܳܝܳܐ ܕܰܐܒܳܐ: ܘܫܽܘܒܚܳܐ ܕܪܰܒܽܘܬܶܗ ܘܨܶܡܚܳܐ ܫܘܶܐ ܒܰܡܬܽܘܡܳܝܽܘܬܳܐ: ܣܰܒܪܳܐ ܘܰܩܝܳܡܬܳܐ ܘܪܺܝܫ ܡܰܐܠܗܳܢܽܘܬܳܐ ܕܺܝܠܰܢ: ܐܽܘܪܚܳܐ ܘܰܫܪܳܪܳܐ ܕܰܐܝܠܶܝܢ ܕܰܚܦܺܝܛܺܝܢ ܒܶܗ: ܟܰܕ ܗܳܟܺܝܠ ܒܡܶܬܢܰܚܬܳܢܽܘܬܳܟ ܗܳܝ ܕܰܠܘܳܬܰܢ ܒܥܰܝ̈ܢܶܐ ܕܪ̈ܶܥܝܳܢܰܝܢ ܡܰܨܕܺܝܢܰܢ ܘܰܒܟܽܠܶܗ ܡܽܘܠܳܝܳܐ ܕܰܡܕܰܒܪܳܢܽܘܬܳܟ ܘܣܽܘܪܳܩܳܟ ܨܶܒܝܳܢܳܝܳܐ ܕܰܚܠܳܦܰܝܢ ܡܶܬܒܰܩܶܝܢܰܢ: ܝܺܕܺܝܥܳܐܝ̣ܬ ܕܶܝܢ ܒܰܩܒܽܘܪܬܳܟ ܡܰܠܝܰܬ݀ ܟܽܠ ܬܶܗܪ̈ܺܝܢ ܘܰܩܝܳܡܬܳܟ ܘܕܶܢܚܳܐ ܕܺܝܠܳܟ ܫܒܺܝܚܳܐ ܕܡܶܢ ܩܰܒܪܳܐ ܒܬܶܫܒܽܘܚܬܳܐ ܕܠܐܴ ܡܶܬܕܰܪܟܳܐ: ܘܰܒܬܶܕܡܽܘܪܬܳܐ ܕܠܐܴ ܡܶܬܡܰܠܠܐܴ ܡܶܢ ܒܶܝܬ ܡܺܝ̈ܬܶܐ ܩܳܡܬ ܘܰܐܟܪܶܙܬ ܚܰܝ̈ܶܐ ܘܚܰܕܘ̈ܳܬܳܐ ܠܟܽܠܗܽܘܢ ܥܓܺܝ̈ܢܰܝ ܥܰܠ ܥܰܦܪܳܐ: ܘܟܰܕ ܣܳܡܬ ܐܰܦܰܝ̈ܟ ܐܰܝܟܰܢܳܐ ܕܬܶܣܥܽܘܪ ܠܟܺܐܢ̈ܶܐ ܘܙܰܕܺܝ̈ܩܶܐ ܗܳܢܽܘܢ ܕܰܪܒܺܝܚܺܝܢ ܗ̱ܘܰܘ ܒܫܶܢܬܳܐ ܝܰܩܺܝܪܬܳܐ ܕܡܰܘܬܳܐ: ܘܰܐܣܺܝܪܺܝܢ ܗ̱ܘܰܘ ܬܚܶܝܬ ܛܪܽܘܢܽܘܬܶܗ ܕܡܰܘܬܳܐ: ܠܐܴܕܳܡ ܗܰܘ ܨܰܠܡܳܐ ܡܰܠܟܳܝܳܐ ܕܰܐܠܳܗܽܘܬܳܟ ܗܰܘ ܕܰܒܚܰܫܳܐ ܪܰܒܳܐ ܡܒܰܓܶܢ ܗ̱ܘܳܐ ܡܶܢ ܓܰܘ ܐܰܪܥܳܐ: ܠܫܺܝܬ ܗܰܘ ܫܰܦܺܝܪܳܐ ܕܰܒܨܽܘܪܬܳܟ ܐܶܬܕܰܡܺܝ: ܠܢܽܘܚ ܗܰܘ ܬܰܡܺܝܡܳܐ ܘܟܺܐܢܳܐ ܘܙܰܕܺܝܩܳܐ ܗܰܘ ܕܚܰܡܶܫܡܳܐܐ ܫܢܺܝ̈ܢ ܢܛܰܪ ܒܬܽܘܠܽܘܬܳܐ ܘܰܫܚ̈ܳܩܶܐ ܥܰܡ ܛܽܘܪ̈ܳܦܶܐ ܣܒܰܠ ܡܶܢ ܒܢ̈ܰܝ ܕܳܪܶܗ: ܘܰܢܚܶܬܬ ܒܪ̈ܰܚܡܰܝܟ ܠܘܳܬ ܐܰܒܪܳܗܳܡ ܪܳܚܡܳܟ: ܕܰܠܘܳܬ ܐܺܝܣܚܳܩ ܘܝܰܥܩܽܘܒ ܚܰܒܺܝ̈ܒܰܝܟ: ܟܺܐܢ̈ܶܐ ܘܙܰܕܺܝ̈ܩܶܐ ܕܰܫܡܳܗ̈ܳܬܳܐ ܗܳܢܽܘܢ ܕܡܶܢ ܢܽܘܓܪܳܐ ܪܰܒܳܐ ܡܣܰܟܶܝܢ ܗ̱ܘܰܘ ܠܳܟ ܐܳܦ ܠܡܶܐܬܺܝܬܳܟ ܚܳܝܪܺܝܢ ܗ̱ܘܰܘ: ܡܽܘܫܶܐ ܘܐܺܠܺܝܳܐ ܥܰܠ ܛܽܘܪܳܐ ܕܬܳܒܽܘܪ ܠܘܳܬܳܟ ܐܶܬܛܰܝܰܒܘ ܗ̱ܘܰܘ: ܘܒܰܚܢܰܓܬܳܐ ܠܳܟ ܡܦܝ̣ܣܺܝܢ ܗ̱ܘܰܘ ܟܰܕ ܐܳܡܪܺܝܢ ܗ̱ܘܰܘ: ܕܫܰܦܝ̣ܪ ܠܳܟ ܡܳܪܝ̱ ܕܰܬܚܽܘܬ ܠܒܶܝܬ ܡܺܝ̈ܬܶܐ ܘܬܶܦܪܽܘܩ ܡܶܢ ܥܰܒܕܽܘܬܶܗ ܕܳܐܟܶܠܩܰܪܨܳܐ ܠܨܰܠܡܳܟ ܗܰܘ ܕܶܐܬܕܰܚܰܚ ܥܰܠ ܥܰܦܪܳܐ ܘܰܛܡܺܝܪ ܒܚ̈ܶܙܶܐ ܕܰܫܝܽܘܠ: ܘܶܐܢ ܐܰܢ̱ܬ ܡܳܪܝܳܐ ܠܐܴ ܬܶܦܪܩܺܝܘܗ̱ܝ ܗܳܐ ܡܰܗܶܠ ܒܶܗ ܡܰܘܬܳܐ ܝܰܥܢܳܐ ܒܥܽܘܡܪܳܗ̇ ܕܰܫܝܽܘܠ: ܘܟܰܕ ܩܳܡܬ ܡܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ ܘܚܰܝ̈ܶܐ ܘܢܽܘܚܳܡܳܐ ܪܰܣܶܣܬ ܥܰܠ ܓܰܪ̈ܡܰܝܗܽܘܢ ܕܥܰܒܕܰܝ̈ܟ ܗܳܢܘܢ̇ ܕܰܦܪܰܩܬ ܘܰܐܥܕܺܝܬ ܡܶܢ ܐܺܝ̈ܕܰܝ ܒܺܝܫܳܐ ܡܳܪܽܘܕܳܐ: ܘܒܰܕܓܽܘܢ ܟܰܕ ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܕܡܶܢ ܒܶܝܬ ܡܺܝ̈ܬܳܐ: ܐܳܬܘ̈ܳܬܳܐ ܘܰܓܒܰܪ̈ܘܳܬܳܐ ܚܰܘܺܝܬ: ܣܳܓܕܺܝܢܰܢ ܘܡܰܘܕܶܝܢܰܢ ܠܳܟ ܕܰܦܪܰܩܬܳܢ ܡܶܢ ܐܺܝ̈ܕܰܝ ܡܰܘܬܳܐ ܘܰܐܦܶܩܬܳܢ ܡܶܢ ܚܠܺܝ̈ܠܶܝܗ̇ ܕܰܐܪܥܳܐ: ܘܰܐܥܶܠܬܳܢ ܠܰܛܝܳܪܳܟ ܕܚܰܝ̈ܶܐ ܘܰܒܫܽܘܒܚܳܐ ܕܒܶܝܬ ܐܰܒܽܘܟ ܡܫܰܒܚܳܐ ܐܰܡܠܶܟܬܳܢ: ܘܡܶܛܽܠ ܗܳܕܶܐ ܡܦܺܝܣܺܝܢܰܢ ܠܪ̈ܰܚܡܰܝܟ: ܘܰܡܫܰܒܚܺܝܢܰܢ ܠܒܰܣܺܝܡܽܘܬܳܟ: ܘܡܶܬܟܰܫܦܺܝܢܰܢ ܠܳܟ ܡܳܪܝܳܐ ܕܬܶܣܥܽܘܪ ܠܰܢ ܒܣܳܥܽܘܪܽܘܬܳܐ ܕܡܶܢܳܟ: ܟܰܕ ܠܰܟܪ̈ܺܝܗܶܐ ܒܚܰܝܠܳܟ ܡܰܚܠܶܡ ܐܰܢ̱ܬ: ܘܠܐܱܠܺܝ̈ܨܶܐ ܪܘܳܚܬܳܐ ܘܰܢܦܺܐܫܳܐ ܡܫܰܪܰܪ ܐܰܢ̱ܬ: ܟܰܕ ܠܥܰܝܺܝ̈ܩܰܝ ܪܽܘܚܳܐ ܒܒܽܘ̈ܝܳܐܰܝܟ ܡܒܰܝܰܐܐ ܐܰܢ̱ܬ: ܘܠܐܱܝܠܶܝܢ ܕܰܐܠܺܝܨܺܝܢ ܘܰܡܛܰܪܦܺܝܢ ܡܶܢܟܽܠ ܙܢܺܝ̈ܢ ܕܢܶܣܝܽܘ̈ܢܶܐ ܡܶܬܢܰܘܠܺܝܢ ܘܡܶܫܬܰܚܩܺܝܢ ܣܡܽܘܟ ܐܶܢܽܘܢ ܒܪ̈ܰܚܡܰܝܟ ܣܰܓܺܝ̈ܶܐܐ: ܘܰܠܝܰܬܡ̈ܶܐ ܗܘܺܝ ܐܰܒܳܐ: ܘܠܐܱܪ̈ܡܠܳܬܳܐ ܩܳܝܽܘܡܳܐ: ܘܰܠܟܳܗ̈ܢܶܐ ܘܰܡܫܰܡ̈ܫܳܢܶܐ ܒܪܺܝܫ ܥܰܡܳܟ ܢܰܛܰܪ ܐܶܢܽܘܢ: ܠܚܰܛܳܝ̈ܶܐ ܗܘܺܝ ܡܳܪܝܳܐ ܡܚܰܣܝܳܢܳܐ ܘܰܡܩܺܝܡܳܢܳܐ ܠܥܰܢܺܝ̈ܕܶܐ ܡܗܰܝܡ̈ܢܶܐ ܕܡܶܢ ܓܰܒܳܐ ܝܰܡܺܝܢܳܝܳܐ: ܘܟܽܠܰܢ ܢܶܫܬܘܶܐ ܠܚܰܪܬܳܐ ܛܳܒܬܳܐ ܗܳܝ ܕܰܡܠܺܝܟܳܐ ܠܓܰܒܪ̈ܶܐ ܕܰܫܠܳܡܳܐ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܩܽܘܠܳܣܳܐ ܠܐܴ ܡܰܘܦܝܳܢܳܐ: ܘܠܐܱܒܽܘܟ ܡܒܰܪܟܳܐ: ܘܛܽܘܒܬܳܢܳܐ ܘܰܠܪܽܘܚܳܟ ܩܰܕܺܝܫܳܐ ܒܟܽܠܙܒܰܢ ܠܥܳܠܡܝ̣ܢ܀