ܨܠܽܘܬܳܐ ܕܫܽܘܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܬܠܝ̣ܬܳܐܝ̣ܬ ܢܶܫܬܰܪܰܪ ܒܢܰܦܫܳܐ ܘܰܒܦܰܓܪܳܐ ܘܰܒܪܘ̣ܚܳܐ ܢܶܬܡܠܶܐ: ܣܰܒܪܳܐ ܘܚܘ̣ܒܳܐ ܘܗܰܝܡܳܢܘ̣ܬܳܐ: ܘܢܶܥܘ̣ܠ ܠܡܰܩܕܫܰܝ̈ܟ ܩܰܕܺܝ̣̈ܫܶܐ ܒܫܘ̣ܒܚܳܐ: ܘܰܠܡܰܫܟܢܰܝ̈ܟ ܕܟܰܝ̈ܳܐ ܒܬܶܫܒܘ̣ܚܬܳܐ ܘܰܢܛܰܝܶܠ ܒܕܳܪ̈ܳܬܳܟ ܩܰܕܺܝ̈ܫܳܬܳܐ ܒܬܰܘܕܝ̣ܬܳܐ: ܘܢܶܬܡܠܶܐ ܦܘ̣ܡܰܢ ܫܘ̣ܒܚܳܟ ܘܠܶܫܳܢܰܢ ܢܰܦܪܶܐ ܬܰܘܕܝ̣ܬܳܐ: ܘܢܶܣܬܰܝܰܥ ܡܶܢ ܚܰܝܠܳܟ ܘܢܶܬܥܰܫܰܢ ܒܙܳܟܘ̣ܬܳܐ ܕܝܰܡܝ̣ܢܳܟ: ܘܢܰܣܶܩ ܠܳܟ ܫܘ̣ܒܚܳܐ ܘܬܰܘܕܺܝܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝ̣ܢ܀

ܦܪܽܘܡܝܽܘܢ

ܬܶܫܒܘ̣ܚܬܳܐ ܠܰܬܠܺܝ̣ܬܳܝܽܘ̣ܬܳܐ ܣܓܺܝ̣ܕܬܳܐ ܘܠܳܐ ܡܶܬܦܰܠܓܳܢܝ̣ܬܳܐ: ܚܕܳܐ ܐܰܠܳܗܘ̣ܬܳܐ ܕܠܳܐ ܡܶܬܕܰܪܟܳܐ ܘܠܳܐ ܡܶܬܒܰܨܝܳܐ ܘܠܳܐ ܡܰܕܪܶܟ ܠܳܗ̇ ܥܘ̣ܩܳܒܳܐ: ܠܗܰܘ ܬܠܝ̣ܬܳܝܳܐ ܘܰܠܚܘ̣ܕܳܝܳܐ ܕܒܰܬܠܳܬܳܐ ܫܡܳܗ̈ܶܐ ܡܶܬܝ̣ܕܰܥ ܘܡܶܬܬܰܘܕܶܐ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܚܰܕ ܡܳܪܝܳܐ ܫܰܪܺܝ̣ܪܳܐ: ܠܗܰܘ ܓܳܡܘ̣ܪܳܐ ܘܰܡܚܰܬܡܳܢܳܐ ܕܓܶܠ̈ܝܳܢܶܐ ܘܚܶܙܘ̈ܶܐ ܕܰܢܒܺܝ̈ܶܐ ܐܶܬܢܰܒܺܝ̣ܘ ܥܰܠ ܡܒܰܕܩܳܢܘ̣ܬ ܬܠܳܬܳܐ ܩܢܘ̣̈ܡܶܐ ܩܰܕܝ̣̈ܫܶܐ: ܕܒܰܬܠܝ̣ܬܳܝܽܘ̣ܬܳܐ ܩܰܕܝ̣ܫܬܳܐ ܡܶܬܗܰܝܡܰܢ: ܒܗܳܢܳܐ ܥܶܕܳܢܳܐ ܕܪܰܡܫܳܐ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܺܝ̣ܠܰܢ ܗܰܘ ܝܰܠܕܳܐ ܝ̣ܚܝ̣ܕܳܝܳܐ ܕܡܶܢ ܐܰܒܳܐ: ܗܰܘ ܕܰܬܠܝ̣ܬܳܐܝ̣ܬ ܥܰܡ ܐܰܒܘ̣ܗ̱ܝ ܘܪܘ̣ܚܶܗ ܩܰܕܺܝܫܳܐ ܡܶܫܬܰܒܰܚ: ܡܶܢ ܬܠܳܬ ܥܺܕ̈ܳܬܳܐ ܩܰܕܺܝ̣̈ܫܳܬܳܐ ܘܰܫܡܰܝܳܢܝ̈ܳܬܳܐ ܗܳܢܶܝܢ ܕܰܒܟܽܠ ܚܕܳܐ ܬܠܳܬܳܐ ܬܶܓ̈ܡܶܐ ܛܰܟܶܣ ܘܰܣܕܰܪ ܠܬܶܫܒܘ̣ܚܬܳܐ ܕܰܫܡܶܗ: ܟܰܕ ܒܝܰܘܡܳܐ ܬܠܝ̣ܬܳܝܳܐ ܦܰܩܶܕ ܠܡܰܝ̈ܳܐ ܘܐܶܬܟܰܢܰܫܘ̱ ܘܰܒܓܰܘ ܝܰܡ̱̈ܡܶܐ ܚܒܰܫܘ̱ ܐܶܢܘܢ̇: ܘܐܰܠܒܶܟ ܐܶܢܘܢ̇ ܪܶܗܛܳܐ ܥܝܳܕܳܝܳܐ ܠܡܶܣܥܰܪ ܐܰܪܥܳܐ ܘܐܶܬܬܓܝ̣ܠܰܬ݀ ܟܘ̣ܬܝ̣ܢ ܡܰܝ̈ܳܐ ܗܳܝ ܕܰܠܒܝ̣ܫܳܐ ܗ̱ܘܳܬ݀ ܒܝܰܘܡܳܐ ܬܠܝ̣ܬܳܝܳܐ: ܘܰܒܦܘ̣ܩܕܳܢܶܗ ܡܳܪܳܢܳܝܳܐ ܐܰܘܥܝ̣ ܐܝ̣ܠܴ̈ܢܶܐ ܘܙܰܪ̈ܥܶܐ ܘܥܶܣ̈ܒܶܐ ܘܟܽܠ ܓܶܢܣܝ̣̈ܢ ܕܰܛܥܳܡ̈ܳܬܳܐ: ܒܟܽܠ ܐܰܪܥܳܐ ܩܰܘ̈ܡܳܬܳܐ ܘܡܘ̣̈ܫܚܳܬܳܐ ܡܫܰܡܠ̈ܝܳܬܳܐ: ܡܶܢ ܗܰܘ̈ܢܶܐ ܬܪ̈ܰܝܳܢܶܐ ܘܠܳܐ ܓܫܝ̣̈ܡܶܐ ܪ̈ܒܝ̣ܥܳܝܰܝ ܐܶܣܛܘ̣̈ܟܣܶܐ ܐܰܬܩܶܢ ܒܚܰܝܠܳܐ ܕܥܳܒܘ̣ܕܘ̣ܬܶܗ: ܚܰܕ ܟܝܳܢܳܐ ܬܠܝ̣ܬܳܝ ܗܰܘ̈ܢܶܐ ܘܒܰܬܠܝ̣ܬܳܝܽܘ̣ܬܳܐ ܡܰܢ ܕܟܘ̣̈ܢܳܝܶܐ ܟܰܢܝܶܗ: ܗܰܘܢܳܐ ܘܢܰܦܫܳܐ ܘܪܘ̣ܚܳܐ ܘܒܰܬܠܳܬܳܐ ܫܡ̈ܳܗܶܐ ܫܰܡܗܶܗ ܐ̱ܢܳܫܳܐ ܘܒܰܪܢܳܫܳܐ ܘܐܳܕܳܡ: ܘܠܰܐܢܽܘܫ ܕܳܪܳܐ ܬܠܝ̣ܬܳܝܳܐ ܗܰܘ ܕܩܰܕܡܳܝܰܬ݀ ܫܰܪܝ̣ ܠܡܶܩܪܳܐ ܒܰܫܡܶܗ ܕܡܳܪܝܳܐ: ܘܕܰܕܚ̣ܶܠ ܡܶܢܶܗ ܦܪܰܫ ܢܰܦܫܶܗ ܡܶܢ ܒܶܝܬ ܩܳܐܝܶܢ: ܘܐܰܠܘ̣ܗܝ̣ܡ ܡܶܢ ܟܽܠܢܳܫ ܫܰܡܗܶܗ ܘܐܳܦ ܒܢܰܘ̈ܗ̱ܝ ܒܳܬܪܶܗ: ܬܠܝ̣ܬܳܐܝ̣ܬ ܐܶܬܦܩܶܕ ܢܽܘܚ ܙܰܕܝ̣ܩܳܐ ܕܰܢܪܰܟܶܒ ܠܩܺܒܘ̣ܬܳܐ: ܗܰܘ ܡܶܕܝܳܪܳܐ ܥܶܠܳܝܳܐ ܠܐ̱ܢ̈ܳܫܳܐ ܘܚܰܝܘ̈ܳܬܳܐ: ܘܡܶܨܥܳܝܳܐ ܠܦܳܪ̈ܚܳܬܳܐ: ܘܗܰܘ ܬܰܚܬܳܝܳܐ ܠܪ̈ܰܚܫܳܐ ܕܐܰܪܥܳܐ: ܘܰܒܟܽܠ ܝܰܘܡܳܐ ܬܠܝ̣ܬܳܐܝ̣ܬ ܐܶܬܦܩܶܕ ܕܢܶܩܘ̣ܫ ܢܳܩܘ̣ܫܐ ܒܨܰܦܪܳܐ ܠܰܡܩܳܡ ܐܘ̣̈ܡܳܢܶܐ ܠܰܥܒܳܕܳܐ ܘܰܒܛܰܗܪܳܐ ܠܫܳܪܘ̣ܬܳܐ ܘܰܒܥܶܕܳܢ ܪܰܡܫܳܐ ܠܰܢܝܳܚܬܳܐ: ܬܠܳܬ ܙܰܒܢܝ̣̈ܢ ܐܶܙܰܠ̱ܬ݀ ܝܰܘܢܳܐ ܕܬܶܚܙܶܐ ܕܐܶܢ ܩܰܠܘ̱ ܡܰܝ̈ܳܐ ܡܶܢ ܐܰܪܥܳܐ: ܟܰܕ ܒܩܰܕܡܳܝܬܳܐ ܠܳܐ ܐܶܫܟܚܰܬ݀ ܡܰܢ ܢܝܳܚܳܐ ܠܦܰܣܰܬ݀ ܪ̈ܶܓܠܶܝܗ̇ ܘܒܰܬܪܰܝܳܢܝ̣ܬܳܐ ܐܰܝܬܝܰܬ݀ ܛܰܪܦܳܐ ܘܒܰܬܠܝ̣ܬܳܝܬܳܐ ܐܶܙܠ̱ܬ݀ ܘܠܳܐ ܗܶܦܟܰܬ݀ ܟܰܕ ܫܰܘܕܥܰܬ݀ ܕܰܗܘܳܬ݀ ܢܝܳܚܬܳܐ ܠܥܳܡܰܪܬܳܐ: ܠܡܽܘܫܶܐ ܬܠܳܬ ܙܰܒܢܺܝ̣̈ܢ ܒܫܰܢ̱ܬܳܐ ܦܰܩܶܕ ܐܰܠܳܗܳܐ ܕܢܶܥܒܶܕ ܥܺܐܕ̈ܶܐ ܡܰܐ̱ܪܙܳܢܘ̣ܬܳܐ ܗܳܝ ܕܦܘ̣ܪܩܳܢܳܐ ܕܰܒܢܰܝ̈ ܥܰܡܶܗ: ܦܶܨܚܳܐ ܒܰܐܪ̈ܒܰܥܶܣܪܶܐ ܒܢܝ̣ܣܳܢ ܡܰܦܰܩܬܳܐ ܕܡܶܢ ܡܶܨܪܶܝܢ ܘܦܰܢܛܺܝ̣ܩܽܘ̣ܣܛܝ̣ ܘܰܡܛܰܠ̈ـܠܶܐ: ܘܟܰܕ ܒܦܶܨܚܳܐ ܚܰܫ ܘܡܝ̣ܬ ܘܩܳܡ: ܘܰܒܦܰܢܛܝ̣ܩܽܘܣܛܺܝ ܝܰܗܒ ܪܘ̣ܚܳܐ ܠܰܫܠܝ̣̈ܚܶܐ ܩܰܕܺܝ̈ܫܶܐ: ܘܰܒܛܘ̣ܪܳܐ ܕܬܳܒܘ̣ܪ ܫܰܪܰܪ ܠܰܫܠܝ̣̈ܚܶܐ ܫܶܡܥܽܘܢ ܘܝܰܥܩܘ̣ܒ ܘܝܽܘܚܰܢܳܢ ܕܗܽܘ̣ ܐܝ̣ܬܰܘܗ̱ܝ ܡܶܠܬܳܐ ܕܐܰܒܳܐ ܡܬܘ̣ܡܳܝܳܐ: ܬܠܳܬܳܐ ܪ̈ܰܗܒܘ̣ܢܶܐ ܐܶܬܝ̣ܗܶܒ ܠܬܳܡܳܪ ܚܘ̣ܛܪܳܐ ܘܥܶܙܰܩܬܳܐ ܘܫܘ̣ܫܶܦܳܐ: ܬܠܳܬ ܥܺܕ̈ܳܬܳܐ ܕܒܰܫܡܰܝܳܐ ܠܰܬܠܳܬܳܐ ܛܶܟ̈ܣܶܐ ܕܡܰܠܐܰܟ̈ܶܐ ܨܳܝܪܝ̣ܢ ܠܰܬܠܳܬܳܐ ܬܶܓܡܝ̣̈ܢ ܕܰܒܥܺܕܬܳܐ ܗܳܕܶܐ ܐܰܪܥܳܢܳܝܬܳܐ: ܒܦܰܪܕܰܝܣܳܐ ܕܕܝ̣ܢܳܐ ܕܰܙܩܰܪ ܐܰܝܟ ܬܪܶܥܣܰܪ ܟܺܐܦܝ̣̈ܢ ܘܰܠܗܳܠܶܝܢ ܨܳܪ ܣܳܡ ܒܣܶܕܪܳܐ ܩܰܕܡܳܝܳܐ: ܣܘ̣ܡܳܩܳܐ ܐܰܝܟ ܢܘ̣ܪܳܐ ܘܙܳܪܓ݂ܳܐ ܐܰܝܟ ܚܰܡܪܳܐ: ܘܝܘܪܳܩܳܐ ܐܰܝܟ ܣܶܠܩܳܐ: ܕܰܡܛܰܦܣܝ̣ܢ ܕܶܝܢ ܗܳܠܶܝܢ ܠܗܳܢܘܢ̇ ܕܰܒܥܺܕܬܳܐ ܥܶܠܳܝܬܳܐ: ܣܪ̈ܳܦܶܐ ܘܰܟܪ̈ܘ̣ܒܶܐ ܘܡܰܘ̈ܬܒܶܐ: ܬܠܳܬܳܐ ܣܶܕܪ̈ܶܐ ܒܥܺܕܬܳܐ ܬܪܰܝܳܢܝ̣ܬܳܐ ܨܰܕܝ̣ܕܳܐ ܐܰܝܟ ܟܶܚܠܳܐ ܘܣܰܦܝ̣ܠܳܐ ܓܘܰܢ ܫܡܰܝܳܐ ܘܰܢܩܰܥܬܳܐ ܓܘܰܢ ܕܶܒܫܳܐ ܕܰܡܦܰܚܡܝ̣ܢ ܒܥܺܕܬܳܐ ܡܶܨܥܳܝܬܳܐ ܡܳܪ̈ܰܘܳܬܳܐ ܚܰܝ̈ܠܰܘܳܬܳܐ ܘܫܘ̣ܠ̈ܛܳܢܶܐ: ܘܰܒܣܶܕܪܳܐ ܗܰܘ ܬܠܝ̣ܬܳܝܳܐ ܣܳܡ ܐ̱ܚܪ̈ܳܢܶܐ ܬܠܳܬܳܐ: ܩܳܢܟܶܢܽܘܢ ܓܘܰܢ ܩܺܐܪܘ̣ܬܐ: ܘܩܰܪܟܶܕܢܳܐ ܓܘܰܢ ܐܰܪ̈ܓܘܳܢܶܐ: ܘܥܝ̣ܢ ܥܶܓܠܳܐ ܕܰܗܒܳܢܳܝܳܐ ܕܰܡܕܰܡ̈ܝܳܢ ܒܰܬܠܳܬܳܐ ܛܶܟ̈ܣܶܐ ܕܰܒܥܺܕܬܳܐ ܬܠܝ̣ܬܳܝܬܳܐ ܪ̈ܝ̣ܫܳܢܘܳܬܳܐ ܘܡܰܠܐܰܟ̈ܶܐ ܘܪ̈ܰܒܰܝ ܡܰܠܐܰܟ̈ܶܐ: ܠܰܬܠܳܬ ܡܢܰܘ̈ܳܬܳܐ ܦܰܠܶܓ ܕܳܢܺܝ̣ܐܝܶܠ ܠܫܳܒܘ̣̈ܥܶܐ: ܫܳܒܘ̣̈ܥܶܐ ܫܰܒܥܳܐ ܵ ܘܫܳܒܘ̣̈ܥܶܐ ܫܬܝ̣ܢ ܘܫܳܒܘ̣ܥܳܐ ܚܰܕ ܘܦܶܠܓܘ̣ܬ ܫܳܒܘ̣ܥܳܐ: ܘܒܰܡܢܳܬܳܐ ܬܠܝ̣ܬܳܝܬܳܐ ܐܶܣܬܰܝܰܒ ܗܰܝܟܠܳܐ ܘܰܒܛܶܠܘ̱ ܕܶܒܚ̈ܶܐ ܘܐܶܫܬܰܠܰܛ ܚܒܳܠܳܐ: ܬܠܳܬܳܐ ܫܳܒܘ̣̈ܥܶܐ ܨܳܡ ܕܳܢܺܝ̣ܐܝܶܠ ܠܡܶܬܢܰܗܪܳܢܘ̣ܬܳܐ ܕܰܬܠܳܬܳܐ ܕܢܶܫܬܘܶܐ ܠܓܶܠܝܳܢܳܐ ܐܰܠܳܗܳܝܳܐ ܕܰܬܠܝ̣ܬܳܝܘ̣ܬܳܐ ܩܰܕܝ̣ܫܬܳܐ ܘܰܠܦܘ̣ܨܳܝܳܐ ܕܡܶܢ ܬܠܳܬܳܐ ܥܶܕ̈ܳܢܶܐ ܠܳܐ ܡܫܰܡ̈ܠܰܝܳܐ: ܟܰܕ ܠܡ̈ܶܠܶܐ ܢܒܺܝ̈ܳܝܳܬܳܐ ܘܰܢܦܝ̣̈ܚܳܬ ܒܪܘ̣ܚܳܐ ܩܰܕܝ̣ܫܳܐ ܥܰܠ ܕܶܢܚܶܗ ܐܰܠܳܗܳܝܳܐ ܨܒܳܐ ܕܢܶܓܡܘ̣ܪ ܕܶܝܢ ܠܚܰܝ̈ܠܶܐ ܐܰܠܳܗ̈ܳܝܶܐ ܘܣܳܥܘ̣ܪ̈ܘܳܬܳܐ ܬܡܝ̣̈ܗܳܬܳܐ ܬܠܝ̣ܬܳܐܝ̣ܬ ܥܒܰܕ: ܬܠܳܬ ܟܳܗ̈ܢܘܳܬܳܐ ܡܟܰܗ̈ܢܳܢܝܳܬܳܐ ܐܶܬܝ̣̈ܗܶܒܝ̱ ܠܥܶܠܴ̈ܝܶܐ ܘܰܠܬܰܚ̈ܬܳܝܶܐ: ܗܳܝ ܕܰܒܝܰܕ ܡܽܘܫܶܐ ܓܘ̣ܫܡܳܢܳܝܬܳܐ ܗ̱ܝ ܗܳܕܶܐ ܕܝ̣ܠܰܢ ܕܰܒܝܰܕ ܦܳܪܘ̣ܩܰܢ ܡܶܨܥܳܝܬܳܐ ܗ̱ܝ ܘܐܰܠܳܗܳܝܬܳܐ ܗ̱ܝ: ܬܠܝ̣ܬܳܐܝ̣ܬ ܝܰܗܒ ܦܳܪܘ̣ܩܰܢ ܪܘ̣ܚܳܐ ܩܰܕܝ̣ܫܳܐ ܠܰܫܠܝ̣̈ܚܶܐ ܠܫܘ̣ܪܳܪܳܐ ܕܰܢܒܺܝܘ̣ܬܳܐ ܟܰܕ ܫܰܕܰܪ ܐܶܢܘܢ̇ ܬܪܶܝܢ ܬܪܶܝܢ ܡܕܰܟ̈ܝܳܢܶܐ ܘܛܳܪ̈ܘ̣ܕܶܐ ܕܫܺܐܕ̈ܶܐ ܣܳܡ ܐܶܢܘܢ̇: ܘܟܰܕ ܫܰܟܶܢ ܠܗܘܢ̇ ܪܘ̣ܚܳܐ ܩܰܕܝ̣ܫܳܐ ܒܥܶܠܝ̣ܬܐ ܡܢܰܗܪ̈ܳܢܶܐ ܘܫܳܒܘ̣̈ܩܶܐ ܕܰܚܛܳܗ̈ܶܐ ܥܒܰܕ ܐܶܢܘܢ̇: ܘܟܰܕ ܪܰܚܶܦ ܥܠܰܝܗܘܢ̇ ܒܣܘ̣ܠܳܩܶܗ ܓܳܡܘ̣ܪ̈ܶܐ ܘܰܡܩܝ̣̈ܡܳܢܶܐ ܕܡܝ̣̈ܬܶܐ ܚܰܘܺܝ̣ ܐܶܢܽܘܢ̇: ܬܠܳܬܳܐ ܥܰܡ̱̈ܡܝ̣ܢ ܐܶܫܬܰܘܬܰܦܘ̱ ܒܚܰܫܶܗ ܕܰܒܪܳܐ ܝܘ̣̈ܕܳܝܶܐ ܘܪ̈ܘ̣ܡܳܝܶܐ ܘܝܰܘ̈ܢܳܝܶܐ: ܘܥܰܠܗܳܝ̇ ܒܰܬܠܳܬܳܐ ܠܶܫܳܢܝ̣̈ܢ ܐܶܬܟܬܶܒ ܛܝ̣ܛܠܘ̣ܣ(ܠܘ̣ܚܳܐ) ܕܰܬܠܝ̣ܬܳܐܝ̣ܬ ܢܶܫܬܰܪܰܪ ܕܡܰܠܟܰܐ ܗ̱ܘ̇ ܘܰܬܠܳܬܳܐ ܣܳܗ̈ܕܶܐ ܢܶܗܘܽܘܢ̇ ܠܶܗ: ܬܠܳܬܳܐ ܥܰܒ̈ܕܶܐ ܒܝ̣̈ܫܶܐ ܦܰܪܥܘ̣ܗ̱ܝ ܚܘ̣̈ܒܠܶܐ ܗܰܦܟ̈ܳܝܶܐ: ܝܘ̣ܕܳܐ ܕܙܰܒܢܶܗ ܘܐܰܫܠܡܶܗ ܠܩܶܛܠܳܐ ܘܚܰܢܳܢ ܕܦܰܟܪܶܗ ܘܫܰܩܦܶܗ ܘܩܰܝܳܦܳܐ ܕܪܰܩ ܒܰܐܦܰܘ̈ܗ̱ܝ ܘܰܠܕܝ̣ܢܳܐ ܕܡܰܘܬܳܐ ܐܰܫܠܡܶܗ: ܬܠܝ̣ܬܳܐܝ̣ܬ ܐܶܡ̣ܰܪ ܦܝ̣ܠܰܛܳܘܣ ܠܝܘ̣̈ܕܳܝܶܐ ܡܳܢܳܐ ܒܝ̣ܫܬܳܐ ܥܒܰܕ ܝܶܫܘ̣ܥ: ܘܗܶܢܘܢ̇ ܬܠܝ̣ܬܳܐܝ̣ܬ ܩܳܥܶܝܢ ܗ̱ܘܰܘ ܨܠܘ̣ܒܳܝܗ̱ܝ ܨܠܘ̣ܒܳܝܗ̱ܝ ܘܰܫܪܺܝ̣ ܠܰܢ ܠܒܰܪ ܐܰܿܒܰܐ: ܬܠܝ̣ܬܳܐܝ̣ܬ ܠܢܶܫ̈ܶܐ ܚܰܘܺܝ̣ ܢܘ̣ܚܳܡܶܗ ܒܪܰܡܫܳܐ ܘܰܒܫܰܦܪܳܐ ܘܟܰܕ ܕܢܰܚ ܫܶܡܫܳܐ: ܘܦܰܪܓܶܠ (ܦܰܩܶܕ) ܐܶܢܶܝܢ ܕܢܰܘ̈ܕܥܳܢ ܩܝܳܡܬܶܗ ܠܬܰܠ̈ܡܝ̣ܕܰܘܗ̱ܝ ܕܠܰܬܠܳܬܳܐ ܓܶܝܪ ܝܰܘܡܝ̣̈ܢ ܩܳܡ: ܘܰܬܠܝ̣ܬܳܐܝ̣ܬ ܟܰܪܟܘ̣ܗ̱ܝ ܠܩܰܒܪܳܐ ܩܰܕܝ̣ܫܳܐ ܡܰܠܐܰܟ̈ܶܐ ܘܰܫܠܝ̣̈ܚܶܐ ܘܢܰܟ̈ܦܳܬܳܐ: ܬܠܝ̣ܬܳܐܝ̣ܬ ܚܙܳܬܶܗ ܡܰܪܝܰܡ ܡܰܓܕܠܳܝܬܳܐ ܒܪܰܡܫܳܐ ܕܢܳܓܰܗ ܚܰܕ ܕܫܰܒ̈ܶܐ ܥܰܡ ܡܰܪܝܰܡ ܒܬܘ̣ܠܬܳܐ: ܘܰܒܨܰܦܪܳܐ ܟܰܕ ܕܰܡܝܰܬܶܗ ܠܓܰܢܳܢܳܐ: ܘܰܒܡܰܕ̈ܢܳܚܰܝ ܫܶܡܫܳܐ ܥܰܡ ܓܘ̣ܕܳܐ ܕܢܰܟ̈ܦܳܬܳܐ: ܬܠܳܬܳܐ ܝܰܘܡܝ̣̈ܢ ܡܶܢ ܕܐܝ̣ܬ ܠܶܗ ܕܡܰܓܰܣ ܒܗܳܡܳܢ ܐܶܡܰܪܘ̱ ܩܠܶܝܽܘܦܰܐ ܘܠܽܘܩܳܐ ܠܰܡܫܝ̣ܚܳܐ ܒܐܘ̣ܪܚܳܐ ܕܥܶܡܰܐܘܳܣ: ܘܰܚܢܰܢ ܣܳܒܪܝ̣ܢ ܗ̱ܘܰܝܢ ܕܗܽܘܝܽܘ ܦܳܪܘ̣ܩܳܐ ܘܠܰܬܠܳܬܳܐ ܝܰܘܡܝ̣̈ܢ ܩܳܐܶܡ ܐܰܝܟ ܕܐܶܫܬܰܘܕܝ̣: ܬܠܝ̣ܬܳܐܝ̣ܬ ܐܰܣܪܰܚ ܠܗܘܢ̇ ܫܠܳܡܳܐ ܟܰܕ ܐܳܡܰܪ ܠܗܘܢ̇ ܫܰܝܢܳܐ ܠܟܘܢ̇ ܘܐܰܝܟܰܢܳܐ ܕܫܰܕܪܰܢܝ̱ ܐܳܒܝ̱ ܐܳܦ ܐܶܢܳܐ ܡܫܰܕܰܪ ܐ̱ܢܳܐ ܠܟܘܢ̇: ܬܠܝ̣ܬܳܐܝ̣ܬ ܐܶܫܬܰܪܰܪ ܬܽܐܘܡܰܐ ܒܰܚܙܳܬܳܐ ܘܓܶܫܬܳܐ ܘܫܶܡܥܳܐ ܒܗܳܝ ܕܐܶܡܰܪ ܠܶܗ ܕܐܰܝܬܳܐ ܨܶܒܥܳܟ ܘܰܚܙܝ̣ ܐܝ̣̈ܕܰܝ ܘܐܰܪܡܳܐ ܐܝ̣ܕܰܝ̈ܟ ܒܕܰܦܢܳܐ ܕܝ̣ܠܝ̱ ܘܗܰܝܡܶܢ: ܬܠܳܬ ܬܡܝ̣̈ܗܳܬܳܐ ܣܥܰܪ ܦܳܪܘ̣ܩܰܢ ܕܥܳܒܪ̈ܳܢ ܠܗܰܘ̈ܢܶܐ ܕܒܳܨܘ̣̈ܝܶܐ: ܝ̣ܠܝ̣ܕܘ̣ܬܶܗ ܦܰܓܪܳܢܳܝܬܳܐ ܕܠܳܐ ܫܪܳܐ ܛܰܒ̈ܥܶܐ ܕܝܳܠܶܕܬܶܗ: ܐܳܦ ܢܘ̣ܚܳܡܶܗ ܕܡܶܢ ܩܰܒܪܳܐ ܕܠܳܐ ܫܪܳܐ ܚܬܳܡ̈ܶܐ ܘܛܰܒ̈ܥܶܐ ܕܢܳܛܘ̣ܪ̈ܶܐ: ܘܡܰܥܰܠܬܶܗ ܕܰܠܥܶܠܝ̣ܬܳܐ ܟܰܕ ܣܟܝ̣ܪܝ̣ܢ ܬܰܪ̈ܥܶܐ ܘܟܰܘ̈ܶܐ ܡܶܢ ܕܶܚܠܬܶܗ ܕܥܰܡܳܐ ܕܝܘ̣ܕ̈ܳܝܶܐ: ܬܠܝ̣ܬܳܐܝ̣ܬ ܠܰܫܠܝ̣̈ܚܶܐ ܘܰܡܣܰܒܪ̈ܳܢܶܐ ܐܶܬܚܙܝ̣ ܡܶܢ ܒܳܬܰܪ ܕܩܳܡ: ܒܥܶܠܝ̣ܬܳܐ ܘܥܰܠ ܗܰܘ ܛܘ̣ܪܳܐ ܕܰܓܠܝ̣ܠܳܐ ܘܰܠܚܰܡܶܫܡܳܐܐ ܐܰܚܝ̣̈ܢ ܘܰܠܟܽܠܗܘܢ̇ ܥܰܠ ܛܘ̣ܪܳܐ ܕܙܰܝ̈ܬܶܐ ܒܝܰܘܡܳܐ ܕܣܘ̣ܠܳܩܶܗ: ܘܒܰܕܓܘܢ̇ ܒܳܥܶܝܢܰܢ ܡܶܢܳܟ ܡܳܪܝܳܐ ܡܫܝ̣ܚܳܐ ܝ̣ܚܝ̣ܕܳܝܶܗ ܕܐܰܒܳܐ ܚܰܕ ܡܶܢ ܩܢܘ̣̈ܡܶܐ ܩܰܕܺܝ̈ܫܶܐ ܕܰܬܠܝ̣ܬܳܝܽܘ̣ܬܳܐ ܩܰܕܝ̣ܫܬܳܐ ܕܰܬܫܰܟܶܢ ܠܰܢ ܕܒܰܬܠܳܬ ܡܘ̣̈ܫܚܳܢ ܢܶܬܕܰܪܰܓ ܘܢܶܡܛܶܐ ܥܕܰܡܳܐ ܠܪܰܘܡܳܐ ܕܰܓܡܝ̣ܪܘ̣ܬܳܐ: ܟܰܕ ܕܳܚܶܩ ܐܰܢ̱ܬ ܡܶܢ ܨܶܝܕܰܝܢ ܠܰܬܠܳܬܳܐ ܚܰܫ̈ܶܐ ܕܢܰܦܫܳܐ: ܘܰܬܠܝ̣ܬܳܐܝ̣ܬ ܫܳܐܠܝ̣ܢܰܢ ܡܶܢܳܟ ܚܢܳܢܳܐ ܘܪ̈ܰܚܡܶܐ ܘܒܘ̣ܪ̈ܟܳܬܳܐ ܘܚܘ̣ܣܳܝܳܐ ܘܫܘ̣ܒܩܳܢܳܐ ܕܟܽܠ ܣܰܟܠ̈ܘܳܬܰܢ: ܘܰܬܠܝ̣ܬܳܐܝ̣ܬ ܢܰܛܰܪ ܠܰܢ ܡܳܪܝܳܐ ܡܶܢ ܦܰܚ̈ܶܐ ܣܰܩܘ̣̈ܒܠܳܝܶܐ ܕܒܝ̣ܫܳܐ ܘܡܰܘܬܳܐ ܘܣܳܛܳܢܳܐ: ܘܥܰܡ ܟܶܢ̈ܫܶܐ ܬܠܝ̣̈ܬܳܝܶܐ ܢܩܘ̣ܡ ܩܕܳܡܰܝܟ ܘܰܢܫܰܡܫܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝ̣ܢ܀

ܥܶܛܪܳܐ

ܫܰܪܰܪ ܠܰܢ ܡܳܪܝܳܐ ܒܣܰܒܪܳܐ ܘܚܽܘ̣ܒܳܐ ܘܗܰܝܡܳܢܘ̣ܬܳܐ ܬܠܝ̣ܬܳܐܝ̣ܬ: ܟܰܕ ܚܳܬܶܡ ܐܰܢ̱ܬ ܠܦܰܓܪ̈ܰܝܢ ܥܰܡ ܪ̈ܘ̣ܚܳܬܰܢ ܘܢܰܦܫ̈ܳܬܰܢ: ܘܩܰܒܶܠ ܒܰܚܢܳܢܳܟ ܥܶܛܪ̈ܶܐ ܘܦܝ̣ܪ̈ܡܶܐ ܘܒܶܣ̈ܡܶܐ ܒܨܝ̣ܪ̈ܳܬܳܐ ܕܡܶܢ ܥܶܩܳܪ̈ܶܐ ܕܰܒܪ̈ܰܝܳܐ ܩܰܪܶܒܢܰܢ ܠܳܟ: ܘܛܰܪ ܠܰܫܪܳܪܳܐ ܕܠܶܫܳܢܰܝ̈ܢ: ܘܰܠܩܰܕܝ̣ܫܘ̣ܬܳܐ ܕܦܰܓܪ̈ܰܝܢ: ܘܰܠܗܰܝܡܳܢܘ̣ܬܳܐ ܕܢܰܦܫ̈ܳܬܰܢ: ܘܚܘ̣ܣ ܥܰܠ ܟܽܠܰܢ ܘܪܰܚܶܡ ܥܠܰܝܢ: ܘܰܥܒܶܕ ܢܘ̣ܚܳܡܳܐ ܕܪ̈ܰܚܡܶܐ ܠܰܓܒܝ̣ܠܬܰܢ ܡܳܪܰܢ ܘܐܰܠܳܗܰܢ ܠܥܳܠܡܺܝ̣ܢ܀

ܚܽܘܬܳܡܳܐ

ܬܠܺܝ̣ܬܳܐܝ̣ܬ ܫܳܐܠܝ̣ܢܰܢ ܡܶܢܳܟ ܚܢܳܢܳܐ ܘܪ̈ܰܚܡܶܐ ܐܳܦ ܚܘ̣ܣܳܝܳܐ ܘܫܘ̣ܒܩܳܢܳܐ: ܟܰܕ ܡܗܰܝܡܢܝ̣ܢܰܢ ܕܚܰܕ ܡܶܢ ܩܢܘ̣̈ܡܶܐ ܕܰܬܠܝ̣ܬܳܝܽܘܬܳܐ ܣܓܝ̣ܕܬܳܐ ܐܝ̣ܬܰܝܟ ܕܠܳܐ ܡܘ̣ܙܳܓܳܐ ܘܒܘ̣ܠܒܳܠܳܐ: ܘܰܬܠܝ̣ܬܳܐܝ̣ܬ ܩܘ̣̈ܕܳܫܶܐ ܬܠܝ̈ܬܳܝܶܐ ܡܰܣܩܝ̣ܢܰܢ ܠܳܟ ܐܳܘ ܬܠܝ̣ܬܳܝܳܗ̇ ܕܐܰܠܳܗܘ̣ܬܳܐ: ܘܠܰܐܒܘ̣ܟ ܕܫܰܠܚܳܟ ܠܦܘ̣ܪܩܳܢ ܒܶܪ̈ܝܳܬܳܐ: ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܰܡ ܥܳܠܡܺܝ̣ܢ܀