ܦܪܽܘܡܝܽܘܢ

ܬܶܫܒܘ̣ܚܬܳܐ ܠܗܰܘ ܦܳܪܘ̣ܩܳܐ ܕܰܒܬܘ̣ܩܦܳܐ ܕܰܨܠܝ̣ܒܶܗ ܦܰܪܩܳܗ̇ ܠܥܺܕܬܶܗ: ܘܒܰܩܝܳܡܬܶܗ ܦܳܪܘ̣ܩܳܝܬܳܐ ܚܰܕܝ̣ ܠܡܰܪܥܝ̣ܬܶܗ: ܘܰܒܢܘ̣ܚܳܡܶܗ ܫܒܝ̣ܚܳܐ ܐܰܦܨܰܚ ܠܝܳܪܬܘ̣ܬܶܗ: ܘܒܰܫܠܳܡܶܗ ܩܰܕܝ̣ܫܳܐ ܫܰܝܶܢ ܠܬܰܠܡܝ̣̈ܕܰܘܗ̱ܝ: ܘܒܰܚܙܳܬܗ ܫܒܝ̣ܚܬܳܐ ܫܰܪܰܪ ܠܰܫܠܝ̣ܚ̈ܰܘܗ̱ܝ: ܘܰܒܝܰܕ ܓܶܫܬܶܗ ܕܬܽܐܘ̣ܡܰܐ ܫܠܝ̣ܚܳܐ ܐܰܪܝ̣ܡ ܠܦܘ̣ܠܳܓܳܐ ܡܶܢ ܠܶܒܰܘ̈ܳܬܳܐ ܕܬܰܠ̈ܡܝ̣ܕܰܘܗ̱ܝ: ܕܠܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܰܬܠܳܬܫܰܥ̈ܝ̣ܢ ܘܰܒܟܽܠܗܘܢ̇ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܘܢ̇ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܢܘ̣ܗܪܳܐ ܫܰܪܝ̣ܪܳܐ ܕܐܰܢܗܰܪ ܠܰܒܪܝ̣ܬܳܐ ܘܐܰܡܠܶܟ ܥܰܠ ܥܰܡ̱̈ܡܶܐ ܒܓܶܠܝܳܢܶܗ ܘܰܦܪܰܩ ܠܰܢ: ܠܳܐ ܡܳܝܘ̣ܬܳܐ ܒܡܶܐܬܝ̣ܬܶܗ ܟܰܣܝܳܐ ܕܐܶܬܳܐ ܕܢܶܦܪܩܰܢ ܒܰܩܝܳܡܬܶܗ: ܘܡܶܛܽܠ ܕܢܰܚܶܝܢ ܒܛܰܝܒܘ̣ܬܶܗ ܘܰܢܚܶܬ ܓܰܫ ܬܗܘ̣̈ܡܶܐ ܕܰܫܝܽܘܠ̇ ܘܐܰܣܶܩ ܠܳܐܕܳܡ ܨܰܠܡܳܐ ܕܪܰܒܘ̣ܬܶܗ: ܦܳܪܘ̣ܩܳܐ ܕܐܰܕܢܰܚ ܒܶܝܬ ܡܝ̣̈ܬܶܐ ܣܰܒܪܳܐ ܕܰܩܝܳܡܬܶܗ: ܘܚܰܕܝ̣ ܠܥܰܢܝ̣̈ܕܶܐ ܒܢܘ̣ܗܪܳܐ ܕܦܰܪܨܽܘܦܳܐ ܕܝ̣ܠܶܗ: ܚܰܝܳܐ ܕܐܰܚܺܝ̣ ܡܝ̣ܬܘ̣ܬܰܢ ܒܡܰܘܬܶܗ ܘܢܰܚܶܡ ܩܒܝ̣ܪܘ̣ܬܰܢ ܒܰܩܒܘ̣ܪܬܶܗ ܘܚܰܕܶܬ ܕܰܡܟܘ̣ܬܰܢ ܒܢܘ̣ܚܳܡܶܗ: ܘܐܰܩܝ̣ܡ ܡܰܦܘ̣ܠܬܰܢ ܒܙܳܟܘ̣ܬܶܗ: ܘܬܰܪܶܨ ܟܦܝ̣ܦܘ̣ܬܰܢ ܒܓܰܐܝܽܘ̣ܬܶܗ: ܓܰܢ̱ܒܳܪܳܐ ܕܝܰܡܝ̣ܢܶܗ ܚܰܝܠܬܳܢܝ̣ܬܳܐ ܣܡܰܟ݂ܬܗ: ܘܰܕܪܳܥܶܗ ܥܰܫܝ̣ܢܳܐ ܪܰܡܪܡܶܗ: ܘܐܶܬܬܥܝ̣ܪ ܐܰܝܟ ܕܰܡܟܳܐ ܡܶܢ ܩܰܒܪܳܐ ܘܐܰܝܟ ܓܰܒܪܳܐ ܕܢܰܦܨܶܗ ܚܰܡܪܶܗ: ܡܚ̣ܳܐ ܠܰܒܥܶܠ̈ܕܒܳܒܰܘܗ̱ܝ ܠܒܶܣܬܪܶܗ ܘܚܶܣܕܳܐ ܠܥܳܠܡܳܐ ܥܒܰܕ ܐܶܢܽܘܢ̇ ܒܰܩܝܳܡܬܶܗ: ܠܳܟ ܡܳܪܝܳܐ ܡܪܰܚܡܳܢܳܐ ܕܰܒܣܰܓܺܝܽܐܘ̣ܬ ܙܢܰܝ̈ܳܐ ܕܥܘ̣ܕܪ̈ܳܢܶܐ ܠܦܘ̣ܪܩܳܢܳܐ ܕܝ̣ܠܰܢ ܥܒܰܕܬ: ܒܒܰܪ̱ܬ ܩܳܠܳܐ ܕܫܘ̣ܒܚܳܐ ܡܶܬܟܰܫܦܝ̣ܢܰܢ ܠܳܟ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܕܬܶܦܪܘ̣ܩ ܘܰܬܫܰܘܙܶܒ ܠܰܢ ܡܶܢ ܟܽܠܗܘܢ̇ ܒܥܶܠ̈ܕܒܳܒܶܐ ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ ܗܳܢܘܢ̇ ܕܡܶܬܟܰܬܫܝ̣ܢ ܥܰܡܰܢ: ܘܦܰܨܳܐ ܠܰܢ ܡܶܢ ܟܽܠܗܶܝܢ ܡܥܝ̣̈ܩܳܢܝܳܬܰܢ ܘܰܡܣܰܓ̈ܦܳܢܝܳܬܳܐ ܕܢܰܦܫ̈ܳܬܰܢ: ܘܠܳܐ ܬܶܫܒܘ̣ܩ ܠܰܢ ܕܢܶܬܛܰܪܰܦ ܠܒܰܪ ܡܶܢ ܐܰܝܠܶܝܢ ܕܦܰܐܝ̈ܳܢ ܘܦܳܩܚ̈ܳܢ ܠܦܘ̣ܪܩܳܢܰܢ: ܘܐܳܦܠܳܐ ܕܢܶܦܶܠ ܒܢܶܣܝܽܘ̣̈ܢܶܐ ܘܰܒܓܘ̣̈ܡܳܨܶܐ ܕܒܝ̣ܫܳܐ ܢܳܟܘ̣ܠܰܢ: ܐܶܠܳܐ ܨܒܝ̣ ܒܪܶܚܡܰܬ݀ ܐ̱ܢܳܫܘ̣ܬܳܟ ܡܳܪܝܳܐ: ܘܰܥܒܶܕ ܠܪ̈ܶܓܠܰܝܢ ܐܰܝܟ ܕܐܰܝܠܳܐ ܘܥܰܠ ܪܰܘܡܳܐ ܕܙܳܟܘ̣ܬܳܐ ܐܰܩܝ̣ܡ ܠܰܢ: ܘܫܰܪܰܪ ܐܰܝܟ ܩܶܫܬܳܐ ܕܰܢܚܳܫܳܐ ܕܪ̈ܳܥܝܶܐ ܡܶܬܗܰܘ̈ܢܳܢܶܐ ܕܪ̈ܶܥܝܳܢܰܝܢ ܠܡܶܬܟܰܬܳܫܽܘ̣ ܠܘ̣ܩܒܰܠ ܒܥܶܠܕܒܳܒܳܐ ܕܚܰܝܰܝ̈ܢ: ܘܗܰܒܠܰܢ ܣܰܒܪܳܐ ܢܰܨܺܝـܚܬܳܐ ܕܦܘ̣ܪܩܳܢܳܐ ܨܠܝ̣ܒܳܐ ܩܰܕܝ̣ܫܳܐ: ܘܰܒܝܰܡܝ̣ܢܳܟ ܚܰܝܠܬܳܢܝ̣ܬܳܐ ܘܡܰܠܝܰܬ݀ ܥܘ̣ܕܪ̈ܳܢܶܐ ܢܰܛܰܪ ܠܰܢ: ܘܰܒܕܰܟܝܽܘ̣ܬܳܐ ܘܩܰܕܝ̣ܫܘ̣ܬܳܐ ܡܫܰܡܠܰܝܬܳܐ ܟܰܠܶܠ ܠܰܢ ܘܐܳܦ ܠܫܘ̣ܠܳܡܳܐ ܚܰܣܝܳܐ ܕܫܳܦܰܪ ܠܳܟ ܡܰܢܰܥ ܠܰܢ: ܘܰܠܥܰܢܝ̣̈ܕܶܐ ܡܗܰܝ̈ܡܢܶܐ ܕܩܰܕܶܡܘ̱ ܚܙܰܩܘ̱ ܘܰܠܘܳܬܳܟ ܡܰܢܰܥܘ̱ ܐܰܢܝ̣ܚ ܐܶܢܘܢ̇ ܒܰܐܘ̈ܳܢܶܐ ܛܘ̣ܒ̈ܬܳܢܶܐ ܘܰܒܡܰܫܟ̈ܢܶܐ ܕܟܺܐܢ̈ܶܐ: ܕܰܚܢܰܢ ܘܗܶܢܘܢ̇ ܢܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀