ܦܪܽܘ̣ܡܝܽܘܢ

ܠܗܰܘ ܫܶܡܫܳܐ ܡܶܬܝܰܕܥܳܢܳܐ ܕܒܶܠܥܳܕ ܨܶܡܚܳܐ ܠܳܐ ܡܶܬܺܝܕܰܥ ܢܽܘܗܪܳܐ: ܗܰܘ ܕܪ̈ܰܚܡܶܐ ܫܰܪܺܝܪܳܐܝ̣ܬ ܒܳܥܶܐ ܛܳܒ ܡ̣ܶܢ ܕܶܒ̈ܚܶܐ: ܘܡܶܬܬܰܘܝܳܢܽܘܬܳܐ ܕܶܝܢ ܕܰܠܘܳܬܶܗ ܝܰܬܺܝܪ ܡ̣ܶܢ ܝܰܩ̈ܕܶܐ ܢܳܡܽܘ̈ܣܳܝܶܐ: ܗܰܘ ܕܨܰܠܝ̈ܳܢ ܐܶܕܢܰܘ̈ܗ̱ܝ ܠܒܳܥ̈ܘܳܬܳܐ ܕܥܰܒ̈ܕܰܘܗ̱ܝ: ܘܬܰܪܥܶܗ ܦܬܺܝܚ ܠܫ̈ܶܐܠܳܬܳܐ ܕܰܪ̈ܚܘ̣ܡܰܘܗ̱ܝ: ܗܰܘ ܕܫܶܐܠ̈ܳܬܳܐ ܕܰܡܢܺܝܚܳܢܶܗ ܙܟܰܪܝܳܐ ܦܰܢܺܝ ܒܪܶܚܡܰܬ݀ ܐ̱ܢܳܫܽܘܬܶܗ: ܘܰܠܥܽܘ̈ܒܶܐ ܥܰܩܪ̈ܳܝܶܐ ܦܰܩ̣ܶܕ ܠܗܽܘܢ ܘܰܐܦܪܺܝܘ: ܕܠܶܗ ܝܳܐܶܐ܀

ܣܶܕܪܳܐ

ܠܳܟ ܫܽܘܒܚܳܐ ܝܰܠܕܳܐ ܫܰܪܺܝܪܳܐ ܒܪܶܗ ܕܰܐܒܳܐ ܠܳܐ ܡܶܬܡܰܠܠܳܢܳܐ: ܠܳܟ ܬܰܘܕܺܝܬܳܐ ܐܺܝܬܝܳܐ ܡܬܽܘܡܳܝܳܐ ܕܰܠܗܰܠ ܡ̣ܶܢ ܙܰܒ̈ܢܶܐ: ܕܡ̣ܶܢ ܥܽܘܒܶܗ ܕܰܐܒܳܐ ܠܳܐ ܡܶܬܡܰܠܠܳܢܳܐܝ̣ܬ ܘܠܳܐ ܡܶܬܥܰܩܒܳܢܳܐܝ̣ܬ ܐܶܬܺܝܠܶܕ: ܘܡ̣ܶܢ ܥܽܘܒܳܗ̇ ܕܡܰܪܝܰܡ ܠܳܐ ܡܶܬܕܰܪܟܳܢܳܐܝ̣ܬ ܐܶܬܒܰܪܢܰܫܬ ܡܶܛܽܠܳܬܰܢ ܚܰܛܳܝ̈ܶܐ: ܘܡܶܛܽܠ ܦܽܘܪܩܳܢܰܢ ܛܳܥܰܝ̈ܳܐ ܘܰܐܒܺܝ̈ܕܶܐ: ܐܰܝܟܰܢܳܐ ܕܠܰܟܝܳܢܰܢ ܡܚܺܝ̣ܠܳܐ ܕܶܐܬܓܠܶܙ ܡ̣ܶܢ ܡܝܰܬܪܽܘܬܳܐ ܬܚܰܝܶܠ: ܘܬܶܥܨܽܘܒ ܘܰܬܣܰܡܣܶܡ ܒܥܽܘܕܪ̈ܳܢܰܝܟ ܗܳܢܽܘܢ ܫܡܰܝ̈ܳܢܶܐ: ܩܕܳܡ ܓܶܠܝܳܢܳܟ ܕܡ̣ܶܢ ܒܬܽܘܠܬܳܐ ܥܺܝܪܳܐ ܕܢܽܘܪܳܐ ܐܺܝܙܓܰܕܳܐ ܫܰܕܰܪܬ ܠܘܳܬ ܟܳܗܢܳܐ ܙܟܰܪܝܳܐ ܠܒܶܝܬ ܩܽܘܕܫܳܐ ܕܰܢܣܰܒܪܶܗ ܥܰܠ ܦܺܐܪܳܐ: ܗܰܘ ܕܡܶܬܺܝܠܶܕ ܠܶܗ ܡ̣ܶܢ ܐܶܠܺܝܫܒܰܥ ܥܩܰܪܬܳܐ ܘܢܶܗܘܶܐ ܟܳܪܽܘܙܳܐ ܠܥܰܡ̱̈ܡܶܐ ܘܶܐܡܘ̈ܳܬܳܐ: ܘܡܰܦܢܝܳܢܳܐ ܕܛܳܥܰܝ̈ܳܐ ܠܺܝܕܰܥܬܳܐ ܕܰܫܪܳܪܳܐ ܘܟܰܕ ܗ̣ܽܘ ܙܟܰܪܝܳܐ ܒܶܣ̈ܡܶܐ ܡܰܥܛܰܪ ܗ̱ܘܳܐ: ܩܕܳܡ ܡܳܪܝܳܐ ܟܰܕ ܡܶܬܟܰܫܰܦ ܗ̱ܘܳܐ ܚܶܙܘܶܗ ܕܥܺܝܪܳܐ ܕܡܰܒܪܶܩ ܗ̱ܘܳܐ ܐܰܙܺܝܥܶܗ: ܘܙܺܝܘܶܗ ܕܢܽܘܪܳܢܳܐ ܕܰܕܚܺܝ̣ܠ ܐܰܪܗܒܶܗ ܘܩܳܠܶܗ ܕܰܡܣܰܒܰܪ ܫܠܳܡܳܐ ܠܰܒܒܶܗ: ܘܳܐܦ ܡܶܠܬܶܗ ܕܡܰܫܡܰܥ ܫܰܝܢܳܐ ܐܰܥܒܪܰܬ݀ ܕܶܚܠܬܶܗ: ܘܠܳܐ ܬܶܕܚܰܠ ܙܟܰܪܝܳܐ ܐܶܡ̣ܰܪ ܠܶܗ: ܨܠܽܘܬܳܟ ܐܶܫܬܰܡܥܰܬ݀ ܩܕܳܡ ܐܰܠܳܗܳܐ ܫܰܘܕܰܥ ܠܶܗ: ܘܶܐܠܺܝܫܒܰܥ ܐܰܢ̱ܬܬܳܟ ܝܳܠܕܳܐ ܠܳܟ ܒܪܳܐ ܓܳܠܶܐ ܠܶܗ: ܠܳܐ ܕܶܝܢ ܗܰܝܡܶܢ ܟܺܐܢܳܐ ܠܓܶܠܝܳܢܳܐ: ܐܶܠܳܐ ܠܒܰܟ ܕܪܳܫܳܐ ܕܚܽܘܣܪܳܢܳܐ: ܥܰܠ ܡܳܪܳܐ ܕܒܶܪ̈ܝܳܬܳܐ ܐܶܬܦܰܠܰܓ ܕܟܽܠܗܶܝܢ ܦܫܺܝ̈ܩܳܢ ܠܶܗ: ܘܰܕܢܶܒܨܶܐ ܗ̱ܘܳܐ ܒܝܰܕ ܫܽܘܐܳܠܶܗ ܐܶܬܦܰܪܰܣ: ܕܝܳܠܕܳܐ ܥܩܰܪܬܳܐ ܫܡ̣ܰܥ ܠܳܐ ܐܰܫܰܪ: ܐܶܠܘ̣ ܐܶܬܰܐܡܪܰܬ݀ ܠܶܗ ܕܝܳܠܕܳܐ ܒܬܽܘܠܬܳܐ ܐܰܝܟܰܢ ܡܗܰܝܡܶܢ ܗ̱ܘܳܐ: ܡܶܛܽܠ ܗܳܕܶܐ ܓܰܒܪܺܐܝܶܠ ܥܰܠ ܕܠܳܐ ܐܶܬܩܰܒܠܰܬ݀ ܣܒܰܪܬܶܗ: ܩܥܳܐ ܒܚܶܡܬܳܐ ܠܟܳܗܢܳܐ ܕܬܶܗܘܶܐ ܫܰܬܺܝܩ ܘܠܳܐ ܬܡܰܠܶܠ: ܗܳܠܶܝܢ ܟܽܠܗܽܘܢ ܒܽܘܕ̈ܳܩܶܐ ܥܰܠ ܓܶܠܝܳܢܶܗ ܕܡܶܠܬܳܐ ܡܶܬܡܰܠܠܺܝܢ ܗ̱ܘܰܘ ܕܟܰܕ ܥܩܰܪܬܳܐ ܝܳܠܕܳܐ ܒܣܰܝܒܽܘܬܳܗ̇: ܕܠܳܐ ܐ̱ܢܳܫ ܢܶܬܦܰܠܰܓ ܥܰܠ ܒܬܽܘܠܬܳܐ ܗܳܝ ܕܒܰܒܬܽܘܠܽܘܬܳܗ̇ ܝܳܠܕܳܐ: ܫܶܬܩܶܗ ܕܟܳܗܢܳܐ ܥܰܠ ܫܶܬܩܶܗ ܕܢܳܡܽܘܣܳܐ ܪܳܡܶܙ ܗ̱ܘܳܐ: ܘܰܦܟܺܝܪܽܘܬܳܐ ܕܦܽܘܡܶܗ ܘܰܕܡܶܠܬܶܗ ܥܰܠ ܦܟܳܪ̈ܶܐ ܕܰܐܪܡܺܝ ܡܳܪܰܢ ܥܰܠ ܟܳܗܢܽܘܬܳܐ ܕܠܶܘܳܝ̈ܶܐ ܪܳܫܡܳܐ ܗܘܳܬ݀ : ܠܳܟ ܣܳܥܰܪ ܬܶܕܡܪ̈ܳܬܳܐ ܡܫܺܝܚܳܐ ܡܳܪܰܢ ܡܶܬܟܰܫܦܺܝܢܰܢ ܕܰܬܫܰܟܶܢ ܕܶܝܢ ܠܢܰܦ̈ܫܳܬܰܢ ܣܰܒܪܳܐ ܘܚܽܘܒܳܐ ܥܰܡ ܗܰܝܡܳܢܘ̣ܬܳܐ: ܘܠܳܐ ܢܰܪܡܶܐ ܒܝ̣ܫܳܐ ܦܟܳܪ̈ܶܐ ܕܫܶܬܩܳܐ ܒܣܶܦ̈ܘܳܬܰܢ: ܘܡ̣ܶܢ ܬܶܫܒܽܘܚܬܳܐ ܗܳܝ ܡܪܰܝܰܡܬܳܐ ܢܶܓܠܽܘܙ ܠܰܢ: ܐܶܠܳܐ ܦܽܘ̈ܡܰܝܢ ܢܶܬܡܠܽܘܢ ܡ̣ܶܢ ܫܽܘܒܚܳܟ: ܘܠܶܒܰܘ̈ܳܬܰܢ ܢܶܫܬܰܪܪܽܘܢ ܒܣܰܒܪܳܟ: ܘܠܶܫܳܢܰܝ̈ܢ ܢܶܬܡܰܪܩܽܘܢ ܒܝܽܘܠܦܳܢܳܟ: ܘܣܶܦܘ̈ܳܬܰܢ ܢܶܪ̈ܥܡܳܢ ܬܰܘܕ̈ܝܳܬܳܟ: ܘܰܠܟܳܗ̈ܢܶܐ ܕܥܺܕܬܳܐ ܡܠܺܝ ܫܪܳܪܳܐ: ܘܠܰܡܫܰܡ̈ܫܳܢܶܐ ܕܶܝܢ ܕܡܰܕܒܚܳܟ ܩܰܕܶܫ ܒܕܰܟܝܽܘܬܳܐ: ܘܳܐܦ ܠܥܰܡܳܐ ܕܒܳܟ ܗܰܝܡܶܢ ܒܡܰܘܗܰܒܬܳܐ ܕܺܝܠܳܟ ܐܰܥܬܰܪ: ܐܰܣܪܰܚ ܚܽܘܣܳܝܳܐ ܠܡܰܪܥܺܝܬܳܟ: ܦܰܢܳܐ ܫ̈ܶܐܠܳܬܳܐ ܕܥܳܢ̈ܳܟ: ܘܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ: ܫܰܟܶܢ ܒܶܗ ܚܽܘܣܳܝܳܐ ܕܚܰܘ̈ܒܶܐ ܠܟܽܠܶܗ ܥܰܡܳܟ ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܠܩܰܘܡܳܐ ܕܡ̣ܶܢ ܝܰܡܺܝܢܳܟ ܘܳܐܦ ܠܒܽܘܣܳܡܳܐ ܕܥܰܡܳܟ: ܒܛܰܝܒܽܘܬܳܟ ܡܳܪܰܢ ܝܶܫܽܘܥ ܡܫܺܝܚܳܐ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ: ܗܳܫܳܐ܀