ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܡܳܪܝܳܐ ܡܳܪܰܢ
ܡܳܪܝܳܐ ܡܳܪܰܢ܇ ܐܰܝܟ ܠܰܡܦܺܝ̈ܕܶܐ ܢܰܗܺܝܪ̈ܶܐ

ܪܡܰܙ ܠܶܗ ܠܥܺܝܪܳܐ܆ ܓܢܺܝܙܳܐ ܕܰܟܣܶܐ ܡܶܢ ܥܺܝܪ̈ܶܐ܆ ܘܶܐܬܳܐ ܘܣܰܒܪܶܗ܆ ܠܰܙܟܰܪܝܳܐ ܘܶܐܡܰܪ܆ ܕܗܳܐ ܐܶܠܺܝܫܒܰܥ܆ ܣܳܒܬܳܐ ܕܥܶܬܩܰܬ ܝܳܠܕܳܐ ܠܳܟ܆ ܦܺܐܪܳܐ ܪܓܺܝܓܳܐ܆ ܕܢܰܟܪܶܙ ܥܰܠ ܡܳܪܶܗ܆ ܘܢܶܓܠܶܐ ܠܥܳܠܡܳܐ܆ ܥܰܠ ܫܶܡܫܳܐ ܕܙܰܕܺܝܩܽܘܬܳܐ܆ ܕܶܐܬܳܐ ܕܢܶܦܪܽܘܩ܆ ܠܟܽܠܗܶܝܢ ܒܶܪ̈ܝܳܬܳܐ܆ ܪܽܘܚܳܐ ܕܩܽܘܕܫܳܐ܆ ܢܶܬܡܠܶܐ ܥܰܕ ܗܽܘ ܒܓܰܘ ܟܰܪܣܳܐ܆ ܘܐ̱ܪ̈ܳܙܶܐ ܟܣܰܝ̈ܳܐ܆ ܒܺܐܝܕܰܘ̈ܗ̱ܝ ܢܶܫܬܰܡܫܽܘܢ܀

ܫܽܘܒܚܳܐ

ܬܗܰܪ ܗ̱ܘܳܐ ܙܟܰܪܝܳܐ܆ ܟܰܕ ܐܶܣܬܰܒܰܪ ܒܒܶܝܬ ܩܽܘܕܫܳܐ܆ ܥܰܠ ܡܰܘܠܳܕܶܗ܆ ܕܰܒܪܶܗ ܝܽܘܚܰܢܳܢ܆ ܘܠܽܘܩܒܰܠ ܥܺܝܪܳܐ܆ ܒܪܶܥܝܳܢܳܐ ܦܠܺܝܓܳܐ ܦܰܢܺܝ܆ ܕܰܐܝܟܰܢ ܬܶܗܘܶܐ܆ ܗܳܕܶܐ ܕܣܰܒܰܪܬܳܢܝ܆ ܘܶܐܡܰܪ ܥܺܝܪܳܐ܆ ܥܰܠ ܕܶܐܬܦܰܠܰܓܬ ܥܰܠ ܡܶܠܰܝ̈܆ ܕܡܶܢ ܐܰܠܳܗܳܐ܆ ܣܒܰܪܬܳܐ ܐܰܝܬܺܝܬ ܠܳܟ܆ ܡܶܟܺܝܠ ܗܳܫܳܐ܆ ܫܶܬܩܳܐ ܢܶܐܚܽܘܕ ܠܶܫܳܢܳܟ܆ ܥܕܰܡܳܐ ܠܝܰܘܡܳܐ܆ ܕܰܒܪܳܟ ܫܳܪܶܐ ܠܳܟ܀

ܡܰܕܪܳܫܳܐ

ܩܳܠܳܐ ܒܩ̄: ܐܶܬܩܰܛܰܠܘ ܗ̱ܘܰܘ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܫܰܕܰܪ ܓܰܒܪܺܐܶܝܠ ܘܠܰܙܟܰܪܝܳܐ ܒܡܰܕܒܚܳܐ ܣܰܒܰܪ.

ܓܰܒܪܺܐܶܝܠ ܪܺܝܫ ܡܰܠܰܐܟ̈ܶܐ܆ ܢܚܶܬ ܗ̱ܘܳܐ ܘܣܰܒܰܪ ܠܰܙܟܰܪܝܳܐ܆ ܥܰܠ ܡܰܘܠܳܕܶܗ ܕܟܳܪܽܘܙܳܟ܆ ܝܽܘܚܰܢܳܢ ܒܰܪ ܥܰܩܪܽܘܬܳܐ܆ ܘܰܕܠܳܐ ܗܰܝܡܶܢ ܗ̱ܘܳܐ ܙܟܰܪܝܳܐ܆ ܒܫܶܬܩܳܐ ܦܰܟܪܶܗ ܠܠܶܫܳܢܶܗ܆ ܒܪܺܝܟܽ ܗ̱ܘ ܡܳܪܝܳܐ ܡܪܰܚܡܳܢܳܐ܆ ܕܝܰܗ̱ܒ ܠܳܗ̇ ܦܺܐܪܳܐ ܠܰܥܩܰܪܬܳܐ܆ ܕܡܶܢ ܥܽܘܒܳܗ̇ ܕܰܒܬܽܘܠܽܘܬܳܐ܆ ܕܢܰܚ ܡܶܠܬܳܐ ܘܰܐܦܢܺܝ ܠܥܰܡ̱̈ܡܶܐ܀

ܙܟܰܪܝܳܐ ܚܙܳܐ ܗ̱ܘܳܐ ܠܡܰܠܰܐܟܳܐ܆ ܒܗܰܝܟܰܠ ܩܽܘܕܫܳܐ ܟܰܕ ܡܨܰܠܶܐ܆ ܘܡܰܠܶܠ ܥܰܡܶܗ ܪܽܘܚܳܢܳܐ܆ ܡ̈ܶܠܶܐ ܛܥܺܝ̈ܢܳܬ ܣܰܒܪ̈ܳܬܳܐ܆ ܕܰܐܢ̱ܬܬܳܟ ܝܳܠܕܳܐ ܝܰܠܽܘܕܳܐ܆ ܘܬܶܩܪܶܐ ܠܰܫܡܶܗ ܝܽܘܚܰܢܳܢ܆ ܒܪܺܝܟܽ ܗ̱ܘ ܡܶܠܬܳܐ ܕܡܶܢ ܐܰܒܳܐ܆ ܕܫܰܕܪܶܗ ܩܽܘܕܡܰܘܗ̱ܝ ܐܺܝܙܓܰܕܳܐ܆ ܕܢܰܦܢܶܐ ܠܥܰܡ̱̈ܡܶܐ ܛܳܥܰܝ̈ܳܐ܆ ܠܗܰܝܡܳܢܽܘܬܳܐ ܕܰܫܪܳܪܳܐ܀

ܣܽܘܓܺܝܬܳܐ

ܩܳܠܳܐ ܒܩ̄: ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ
ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܫܰܕܰܪ ܓܰܒܪܺܐܶܝܠ܆ ܘܣܰܒܰܪ ܗ̱ܘܳܐ ܠܰܙܟܰܪܝܳܐ ܟܳܗܢܳܐ.

ܒܐ̱ܪ̈ܳܙܶܐ ܟܣܰܝ̈ܳܐ ܕܟܳܗܢܽܘܬܳܐ܆ ܡܫܰܡܶܫ ܗ̱ܘܳܐ ܙܟܰܪܝܳܐ ܒܗܰܝܟܠܳܐ܆ ܘܕܶܒ̈ܚܶܐ ܘܩܽܘܪ̈ܒܳܢܶܐ܆ ܠܡܳܪܶܗ ܡܩܰܪܶܒ ܗ̱ܘܳܐ܆ ܘܕܰܚܙܳܐ ܛܳܒܳܐ ܨܶܒܝܳܢܶܗ܆ ܒܰܝܶܐܗ ܗ̱ܘܳܐ ܘܥܰܠ ܝܰܠܕܳܐ ܣܰܒܪܶܗ܀

ܕܚܺܝܠ ܗ̱ܘܳܐ ܐܰܬܪܳܐ ܕܣܰܒܪܶܗ ܗ̱ܘܳܐ܆ ܓܰܒܪܺܐܶܝܠ ܠܰܙܟܰܪܝܳܐ ܟܳܗܢܳܐ܆ ܕܣܳܒܳܐ ܠܳܐ ܬܶܕܚܰܠ ܕܰܒܪܳܐ ܗܳܘܶܐ ܠܳܟ܆ ܡܶܢ ܐܶܠܺܝܫܒܰܥ ܒܰܪ̱ܬ ܙܰܘܓܳܟ܆ ܘܡܶܬܟܰܢܶܐ ܩܳܠܶܗ ܕܰܡܪܰܝܡܳܐ܀

ܘܰܚܕܺܝ ܙܟܰܪܝܳܐ ܟܰܕ ܪܳܥܶܠ܆ ܒܣܰܝܒܽܘܬܶܗ ܡܶܢ ܚܶܙܘܳܐ ܕܰܚܙܳܐ܆ ܠܓܰܒܪܳܐ ܕܬܶܕܡܽܘܪܬܳܐ܆ ܘܪܺܝܫܳܐ ܕܡܰܠܰܐܟ̈ܶܐ܆ ܗܰܘ ܕܡܶܬܶܐܡܰܪ ܓܰܒܪܺܐܶܝܠ܆ ܕܡܶܬܦܰܫܰܩ ܓܰܒܪܳܐ ܕܰܐܠܳܗܳܐ܀

ܚܳܪ ܗ̱ܘܳܐ ܥܰܡܳܐ ܕܢܶܚܙܶܐ ܗ̱ܘܳܐ܆ ܠܰܙܟܰܪܝܳܐ ܕܢܳܦܶܩ ܡܶܢ ܡܰܕܒܚܳܐ܆ ܘܶܐܣܬܰܟܰܠܘ ܕܚܶܙܘܳܐ܆ ܚܙܳܐ ܗ̱ܘܳܐ ܕܬܶܕܡܽܘܪܬܳܐ܆ ܘܒܺܐܝܕܶܗ ܡܶܪܡܰܙ ܪܳܡܶܙ ܗ̱ܘܳܐ܆ ܘܠܳܐ ܐܶܫܟܰܚ ܒܦܽܘܡܶܗ ܕܰܢܡܰܠܶܠ܀

ܝܳܐܶܐ ܗ̱ܘܳܐ ܠܶܗ ܠܓܰܒܪܺܐܶܝܠ܆ ܕܠܰܙܟܰܪܝܳܐ ܚܰܕܽܘܬܳܐ ܢܣܰܒܪܶܗ܆ ܘܡܶܛܽܠ ܕܠܳܐ ܗܰܝܡܶܢ܆ ܟܳܗܢܳܐ ܠܡܰܠܰܐܟܳܐ܆ ܒܫܶܬܩܳܐ ܦܰܟܪܶܗ ܠܠܶܫܳܢܶܗ܆ ܕܠܳܐ ܐܰܫܰܪ ܡܶܠܬܳܐ ܕܶܐܡܰܪ ܠܶܗ܀

ܡܰܠܶܠ ܥܰܡܶܗ ܢܽܘܪܳܢܳܐ܆ ܩܰܫܝܳܐܺܝܬ ܘܗܳܟܰܢ ܐܶܡܰܪ ܠܶܗ܆ ܘܡܶܛܽܠ ܕܠܳܐ ܗܰܝܡܶܢܬ܆ ܣܒܰܪܬܳܐ ܕܣܰܒܰܪܬܳܟ܆ ܢܶܗܘܶܐ ܐܰܣܺܝܪ ܠܶܫܳܢܳܟ܆ ܘܰܬܩܰܘܶܐ ܟܰܕ ܫܰܬܺܝܩ ܘܰܚܪܶܫ܀

ܣܰܒܪܶܗ ܥܺܝܪܳܐ ܠܰܙܟܰܪܝܳܐ܆ ܕܶܐܠܺܝܫܒܰܥ ܝܳܠܕܳܐ ܠܶܗ ܛܰܠܝܳܐ܆ ܘܝܽܘܚܰܢܳܢ ܢܶܬܩܪܶܐ܆ ܕܚܳܐܶܢ ܠܰܐܒܳܗܰܘ̈ܗ̱ܝ܆ ܘܢܰܟܪܶܙ ܠܥܰܡ̱̈ܡܶܐ ܦܽܘܢܳܝܳܐ܆ ܕܡܶܢ ܛܽܘܥܝܰܝ ܠܺܝܕܰܥܬܳܐ ܕܚܰܝ̈ܶܐ܀

ܦܰܢܺܝ ܙܟܰܪܝܳܐ ܠܡܰܠܰܐܟܳܐ܆ ܕܰܐܝܟܰܢܳܐ ܬܶܗܘܶܐ ܗܳܕܶܐ܆ ܕܗܳܐ ܐܶܢܳܐ ܣܳܒܳܐ܆ ܐܰܟܡܳܐ ܕܚܳܙܶܐ ܐܰܢ̱ܬ܆ ܘܰܐܢ̱ܬܰܬܝ ܩܰܫܺܝܫܰܬ ܝܰܘ̈ܡܶܐ܆ ܘܰܥܩܰܪܬܳܐ ܕܡܶܡܬܽܘܡ ܠܳܐ ܝܶܠܕܰܬ܀

ܩܰܒܠܰܬ ܒܰܛܢܳܐ ܐܶܠܺܝܫܒܰܥ܆ ܗܰܘ ܡܶܕܶܡ ܕܡܰܠܰܐܟܳܐ ܣܰܒܪܳܗ̇܆ ܘܰܡܛܰܫܝܳܐ ܢܰܦܫܳܗ̇܆ ܐܰܝܟ ܝܰܪ̈ܚܶܐ ܚܰܡܫܳܐ܆ ܘܝܶܕܥܰܬ ܕܣܰܥܪܳܗ̇ ܐܰܠܳܗܳܐ܆ ܘܦܶܪܥܰܬ ܗ̱ܘܳܬ ܬܶܫܒܽܘܚܬܳܐ ܠܡܳܪܝܳܐ܀

ܫܽܘܒܚܳܐ ܠܰܒܪܳܐ ܕܰܓܒܳܐ ܠܶܗ܆ ܪܰܗܳܛܳܐ ܕܰܩܕܳܡܰܘܗ̱ܝ ܢܰܟܪܶܙ܆ ܘܢܺܐܙܰܠ ܘܰܢܣܰܒܰܪ܆ ܡܰܠܟܽܘܬܳܐ ܕܪܰܘܡܳܐ܆ ܘܰܠܚܰܛܳܝ̈ܶܐ ܦܽܘܢܳܝܳܐ܆ ܘܫܽܘܒܩܳܢܳܐ ܠܰܕܒܳܥܶܝܢ ܪ̈ܰܚܡܶܐ܀

ܬܰܘܕܶܐ ܥܺܕܬܳܐ ܥܰܡ ܝܰܠ̈ܕܶܝܗ̇܆ ܠܰܐܠܳܗܳܐ ܕܣܰܥܪܳܗ̇ ܠܰܓܒܺܝܠܬܶܗ. ܒܝܰܠܕܳܐ ܕܶܐܬܺܝܗܶܒ܆ ܠܣܳܒܬܳܐ ܐܶܠܺܝܫܒܰܥ܆ ܘܰܥܒܰܕ ܣܳܡܟܳܐ ܠܰܙܟܰܪܝܳܐ܆ ܘܦܽܘܪܩܳܢܳܐ ܠܥܰܡܳܐ ܕܠܶܗ ܡܶܫܬܡܰܥ܀

ܐ̱ܚܪܺܢܳܐ

ܟܰܕ ܨܒܳܐ ܐܰܒܳܐ ܡܬܽܘܡܳܝܳܐ: ܕܰܢܫܰܕܰܪ ܝܺܚܺܝܕܶܗ ܠܥܳܠܡܳܐ: ܐܺܝܙܓܰܕܳܐ ܕܫܰܝܢܳܐ: ܫܰܕܰܪ ܩܕܳܡ ܡܶܐܬܝܶܗ: ܕܢܰܬܩܶܢ ܐܽܘܪܚܳܐ ܠܒܰܪ ܡܰܠܟܳܐ: ܡܳܐ ܕܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܦܽܘܡܶܗ ܐܶܣܬܟܰܪ ܕܰܙܟܰܪܝܳܐ: ܘܰܒܠܳܡܳܐ ܥܰܠ ܣܶܦ̈ܘܳܬܶܗ ܢܦܰܠ: ܘܠܶܒܶܗ ܥܰܬܺܝܪ ܗ̱ܘܳܐ: ܘܚܳܙܶܐ ܒܪܽܘܚ ܩܽܘܕܫܳܐ: ܘܟܰܕ ܫܰܡܠܺܝ ܗ̱ܘܳܐ ܬܶܫܡܶܫܬܶܗ: ܐܶܙܰܠ ܗ̱ܘܳܐ ܠܒܰܝܬܶܗ ܟܰܕ ܫܰܬܺܝܩ܀

ܚܙܺܝ ܠܳܐ ܬܶܕܚܰܠ ܐܳܘ ܟܳܗܢܳܐ: ܕܗܳܐ ܨܠܽܘܬܳܟ ܩܕܳܡ ܡܳܪܝܳܐ ܥܶܠܰܬ: ܘܗܳܐ ܐܰܢ̱ܬܬܳܟ ܝܳܠܕܳܐ: ܝܰܠܕܳܐ ܕܬܶܗܪܳܐ ܡܠܶܐ: ܘܢܶܗܘܶܐ ܡܰܬܩܶܢ ܠܰܫܒܺܝܠܳܐ: ܠܒܰܪ ܡܰܠܟܳܐ ܕܳܐܬܶܐ ܠܥܳܠܡܳܐ܀

ܡܶܛܽܠ ܕܠܳܐ ܗܰܝܡܶܢܬ ܠܡܶܠܰܝ̈: ܕܡܰܠܶܠܬ ܠܳܟ ܐܳܘ ܙܟܰܪܝܳܐ ܟܳܗܢܳܐ: ܢܗܶܐ ܚܪܶܫ ܠܶܫܳܢܳܟ: ܥܕܰܡܳܐ ܕܗܽܘ ܢܶܫܪܶܝܟ: ܘܩܰܘܺܝ ܟܳܗܢܳܐ ܗܳܟܰܢܳܐ: ܥܰܕ ܝܶܠܕܰܬ ܣܳܒܬܳܐ ܠܝܽܘܚܰܢܳܢ܀

ܩܰܒܠܰܬ ܒܰܛܢܳܐ ܐܶܠܺܝܫܒܰܥ: ܐܰܝܟ ܡܶܠܬܶܗ ܕܡܰܠܰܐܟܶܐ ܕܣܰܒܰܪ: ܘܛܰܫܝܰܬ ܗ̱ܘܳܬ ܢܰܦܫܳܗ̇: ܐܰܝܟ ܝܰܪ̈ܚܶܐ ܚܰܡܫܳܐ: ܘܝܶܕܥܰܬ ܕܣܰܥܪܳܗ̇ ܐܰܠܳܗܳܐ: ܘܦܶܪܥܰܬ ܗ̱ܘܳܬ ܬܶܫܒܽܘܚܬܳܐ ܒܚܰܕܘܳܐ܀

ܣܳܒܳܐ ܙܟܰܪܝܳܐ ܛܥܳܐ ܗ̱ܘܳܐ ܠܶܗ: ܝܽܘܠܦܳܢܶܗ ܕܰܠܥܳܠܡܳܐ ܐܰܪܬܺܝ: ܟܰܕ ܡܶܫܬܰܘܕܶܐ ܗ̱ܘܳܐ: ܠܥܰܩܪ̈ܳܬܳܐ ܒܢܰܝ̈ܳܐ: ܘܡܶܢܗܶܝܢ ܢܶܕܪ̈ܶܐ ܡܩܰܒܶܠ ܗ̱ܘܳܐ: ܘܟܰܕ ܣܰܒܪܶܗ ܡܰܠܰܐܟܳܐ ܠܳܐ ܫܡܰܥ܀

ܫܽܘܒܚܳܐ ܠܰܐܒܳܐ ܕܰܓܒܳܐ ܠܶܗ܆ ܪܰܗܳܛܳܐ ܕܰܩܕܳܡܰܘܗ̱ܝ ܢܰܟܪܶܙ܆ ܘܥܰܒܕܶܗ ܟܳܪܽܘܙܳܐ܇ ܕܢܺܐܙܰܠ ܘܰܢܣܰܒܰܪ܆ ܡܰܠܟܽܘܬܳܐ ܕܪܰܘܡܳܐ ܠܬܰܝ̈ܳܒܶܐ܇ ܘܫܽܘܒܩܳܢܳܐ ܠܰܐܝܠܶܝܢ ܕܒܳܥܶܝܢ ܠܶܗ܀

ܬܰܘܕܶܐ ܥܺܕܬܳܐ ܥܰܡ ܝܰܠ̈ܕܶܝܗ̇܆ ܠܰܐܠܳܗܳܐ ܕܣܰܥܪܳܗ̇ ܠܰܓܒܺܝܠܬܶܗ. ܒܝܰܠܕܳܐ ܕܶܐܬܺܝܗܶܒ܆ ܠܣܳܒܬܳܐ ܐܶܠܺܝܫܒܰܥ܆ ܘܰܥܒܰܕ ܣܳܡܟܳܐ ܠܰܙܟܰܪܝܳܐ܆ ܘܦܽܘܪܩܳܢܳܐ ܠܥܰܡܳܐ ܕܠܶܗ ܫܡܰܥ܀

ܐ̱ܚܪܺܢܳܐ

ܩܳܠܳܐ ܒܩ̄: ܥܰܡܳܐ ܘܥܰܡ̱̈ܡܶܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܫܰܕܰܪ ܓܰܒܪܺܐܶܝܠ܆ ܘܣܰܒܰܪ ܗ̱ܘܳܐ ܠܰܙܟܰܪܝܳܐ ܟܳܗܢܳܐ.

ܠܟܳܗܢܳܐ ܙܟܰܪܝܳܐ ܕܡܶܠܬܰܢ ܥܠܰܘܗ̱ܝ܆ ܥܺܐܕܳܐ ܗܳܢܳܐ ܠܶܗ ܗܽܘ ܡܛܳܝܗ̱ܝ܆ ܕܠܰܩܕܽܘܫ ܩܽܘ̈ܕܫܺܝܢ ܢܶܥܽܘܠ ܗ̱ܘܳܐ܆ ܘܠܰܒ̈ܢܰܝ ܥܰܡܶܗ ܢܚܰܣܶܐ ܗ̱ܘܳܐ܀

ܒܗܰܘ ܥܶܕܳܢܳܐ ܙܟܰܪܝܳܐ ܚܙܳܐ܆ ܡܰܠܰܐܟ ܡܳܪܝܳܐ ܕܠܶܗ ܐܶܬܓܠܺܝ܆ ܘܡܶܢ ܝܰܡܺܝܢ ܡܰܕܒܚܳܐ ܚܙܳܝܗ̱ܝ ܗ̱ܘܳܐ܆ ܘܡܶܢ ܕܶܚܠܬܶܗ ܐܶܬܬܙܺܝܥ ܗ̱ܘܳܐ܀

ܠܳܐ ܠܰܡ ܬܶܕܚܰܠ ܐܳܘ ܙܟܰܪܝܳܐ܆ ܕܣܰܒܪܳܐ ܛܳܒܳܐ ܐܰܝܬܺܝܬ ܠܳܟ܆ ܨܠܽܘܬܳܟ ܥܶܠܰܬ ܩܕܳܡ ܡܳܪܝܳܐ܆ ܘܫܰܠܚܰܢܝ ܨܶܐܕܰܝܟ ܕܶܐܣܰܒܪܳܟ܀

ܚܰܡܪܳܐ ܘܫܰܟܪܳܐ ܠܳܐ ܢܶܫܬܶܐ܆ ܘܰܢܙܺܝܪܶܗ ܕܡܳܪܝܳܐ ܢܶܬܩܪܶܐ܆ ܘܪܽܘܚܳܐ ܕܩܽܘܕܫܳܐ ܒܓܰܘ ܟܰܪܣܳܐ܆ ܢܶܡܠܶܝܘܗ̱ܝ ܡܳܪܝܳܐ ܘܰܢܩܰܕܫܺܝܘܗ̱ܝ܀

ܗܳܠܶܝܢ ܡ̈ܶܠܶܐ ܕܶܐܬܡܰܠܰܠܝ̈܆ ܡܶܢ ܡܰܠܰܐܟܳܐ ܒܓܰܘ ܡܰܕܒܚܳܐ܆ ܫܡܰܥ ܗ̱ܘܳܐ ܙܟܰܪܝܳܐ ܐܳܦ ܐܺܬܬܙܺܝܥ܆ ܘܶܐܬܦܰܠܰܓ ܗ̱ܘܳܐ ܒܰܣܒܰܪܬܳܐ܀

ܫܡܰܥܰܝܢܝ ܙܟܰܪܝܳܐ ܘܰܠܩܳܠܝ ܨܽܘܬ܆ ܘܰܐܫܰܪ ܠܡܶܕܶܡ ܕܶܐܡܪܶܬ ܠܳܟ܆ ܠܳܐ ܓܶܝܪ ܥܰܛܠܳܐ ܩܕܳܡ ܡܳܪܝܳܐ܆ ܕܢܶܗܘܶܐ ܝܰܠܕܳܐ ܠܶܐܠܺܝܫܒܰܥ܀

ܒܰܐܝܕܳܐ ܦܠܺܝܓܰܬ ܘܠܳܐ ܡܰܫܪܰܬ܆ ܘܰܠܡܽܘܢ ܥܰܣܩܳܐ ܕܰܬܗܰܝܡܶܢ܆ ܡܳܛܝܳܐ ܒܺܐܝ̈ܕܰܝ ܐܰܠܳܗܳܐ܆ ܕܡܶܢ ܠܳܐ ܡܶܕܶܡ ܡܶܕܶܡ ܢܗܶܐ܀

ܓܠܺܝܬ ܠܳܟ ܐ̱ܪܳܙܳܐ ܕܡܳܪܝܳܐ ܨܒܳܐ܆ ܘܗܳܐ ܐܰܠܶܦܬܳܟ ܠܳܐ ܬܶܬܚܪܶܐ܆ ܘܶܐܢܗܽܘ ܕܬܶܬܚܪܶܐ ܘܠܳܐ ܬܗܰܝܡܶܢ܆ ܕܚܰܠ ܡܶܢ ܕܺܝܢܶܗ ܕܰܡܫܰܕܪܳܢܝ܀

ܕܰܥ ܐܳܘ ܙܟܰܪܝܳܐ ܕܰܟܡܳܐ ܛܥܰܝܬ܆ ܕܠܳܐ ܡܶܬܒܰܝܢܰܬ ܐܰܝܠܶܝܢ ܗܘܰܝ̈܆ ܣܰܒ ܠܳܟ ܣܶܦܪ̈ܶܐ ܘܰܩܪܺܝ ܒܗܽܘܢ܆ ܟܡܳܐ ܬܡܺܝ̈ܗܳܬܳܐ ܥܒܰܕ ܡܳܪܝܳܐ܀

ܫܽܘܒܚܳܐ ܠܡܶܠܬܳܐ ܕܦܰܓܪܳܐ ܠܒܶܫ܆ ܡܶܢ ܥܽܘܒܳܐ ܕܰܒܬܽܘܠܽܘܬܳܐ܆ ܘܝܰܗ̱ܒ ܗ̱ܘܳܐ ܦܺܐܪܳܐ ܠܥܰܩܪܽܘܬܳܐ܆ ܕܢܰܬܩܶܢ ܐܽܘܪܚܳܐ ܩܕܳܡ ܡܶܐܬܝܶܗ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܡܫܺܝܚܳܐ ܕܰܐܣܗܶܕܘ ܥܰܠ ܩܶܛܠܶܗ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܟܳܗܢܳܐ ܙܟܰܪܝܳܐ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܡܶܢ ܦܳܠܳܛܺܝܢ ܕܰܫܡܰܝܳܐ܆ ܛܳܣ ܘܰܦܪܰܚ ܪܺܝܫ ܡܰܠܰܐܟ̈ܶܐ܆ ܪܶܡܙܳܐ ܩܰܒܶܠ ܟܰܣܝܳܐܺܝܬ܆ ܕܠܰܙܟܰܪܝܳܐ ܢܰܝܬܶܐ ܣܒܰܪܬܳܐ܆ ܥܒܰܪ ܝܰܡܳܐ ܕܫܰܠܗܶܒܺܝܬܳܐ܆ ܘܕܳܫ ܥܰܠ ܓܽܘܡܪ̈ܶܐ ܕܓܰܘܙܰܠܬܳܐ܀

ܗܳܐ ܐܶܫܬܰܡܥܰܬ ܠܳܗ̇ ܨܠܽܘܬܳܟ܆ ܘܶܐܫܬܰܠܚܶܬ ܕܺܐܬܶܐ ܨܶܝܕܰܝܟ܆ ܬܺܐܠܰܕ ܐܰܢ̱ܬܬܳܟ ܝܰܠܽܘܕܳܐ܆ ܘܬܶܩܪܶܐ ܠܰܫܡܶܗ ܝܽܘܚܰܢܳܢ܆ ܘܪܽܘܚܳܐ ܩܰܕܺܝܫܳܐ ܢܶܬܡܠܶܐ܆ ܥܰܕ ܗ̱ܽܘ ܒܟܰܪܣܳܐ ܕܝܳܠܶܕܬܶܗ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܟܳܗܢܳܐ ܙܟܰܪܝܳܐ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀