ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ
ܡܶܢ ܐܰܒܳܐ ܡܳܪܳܐ ܕܢܰܚ ܠܰܢ

ܡܽܘܫܶܐ ܒܕܰܒܪܳܐ ܪܳܐܶܣ ܗ̱ܘܳܐ܆ ܕܡܳܐ ܕܚܰܝ̈ܘܳܬܳܐ ܥܰܠ ܡܰܕܒܚܳܐ܆ ܘܒܶܗܽ ܗ̱ܘ ܚܰܣܺܝ ܥܰܠ ܩܽܘܕܫܳܐ܆ ܡܶܢ ܥܰܘܠܶܗ ܕܥܰܡܳܐ܆ ܘܰܚܢܰܢ ܢܰܘܕܶܐ ܕܰܟܝܳܐܺܝܬ܆ ܠܗܰܘ ܕܰܐܫܦܰܥ ܕܡܶܗ ܥܰܠ ܐܰܦܰܝ̈ܢ܆ ܒܗܳܢܳܐ ܒܰܝܬܳܐ ܩܰܕܺܝܫܳܐ܆ ܕܰܒܢܳܐ ܠܺܐܝܩܳܪܶܗ܀

ܫܽܘܒܚܳܐ

ܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܝܰܒܶܒܝ ܩܳܠܰܝ̈ ܬܶܫܒܽܘܚܬܳܐ܆ ܠܚܰܬܢܳܐ ܩܛܺܝܠܳܐ ܕܰܒܡܰܘܬܶܗ܆ ܐܰܚܺܝ ܠܡܳܝܽܘ̈ܬܶܐ܆ ܘܚܰܪܰܪ ܠܳܐܕܳܡ ܘܰܠܝܰܠ̈ܕܰܘܗ̱ܝ܆ ܡܶܢ ܫܽܘܥܒܳܕܳܗ̇ ܕܰܚܛܺܝܬܳܐ܆ ܘܚܰܕܺܝ ܠܰܐܪܥܳܐ ܘܠܰܫܡܰܝܳܐ܆ ܫܽܘܒܚܳܐ ܠܫܳܠܽܘܚܶܗ܀

ܡܰܕܪܳܫܳܐ

ܩܳܠܳܐ ܒܩ̄: ܠܟܶܢܫܳܐ ܥܶܠܳܝܳܐ
ܬܰܘ ܢܺܐܡܰܪ ܛܽܘܒܶܝܗ̇ ܠܗܳܝ ܡܰܪܝܰܡ

ܥܽܘܢܺܝܬܳܐ: ܐܰܫܪܳܐ ܡܳܪܝ ܫܰܝܢܳܟ܆ ܒܥܺܕܬܳܟ ܒܟܽܠ ܦܶܢ̈ܝܳܢ܆ ܘܰܠܕܰܪܓܳܐ ܕܟܳܗ̈ܢܶܐ ܪܰܡܪܶܡ ܒܺܐܝܩܳܪܳܐ.

ܐܰܪܥܳܐ ܕܰܣܢܳܬܳܟ ܫܳܘܝܳܐ ܠܠܰܘ̈ܛܳܬܳܐ܆ ܡܕܺܝܢ̱ܬܳܐ ܕܰܙܩܰܦܬܳܟ ܐܰܝܟ ܣܕܽܘܡ ܗܳܐ ܝܳܬܒܳܐ܆ ܘܰܩܪܺܝܬܳܐ ܕܩܽܘ̈ܕܫܶܐ ܕܥܽܘܕܳܐ ܢܳܗܶܡ ܒܳܗ̇܆ ܕܓܰܙܺܝܬܳܗ̇ ܠܨܶܗܝܽܘܢ ܐܰܦܢܺܝܬܳܗ̇ ܠܥܺܕܬܳܐ܆ ܠܫܺܝܦܽܘܪܳܐ ܕܚܰܝ̈ܶܐ ܕܒܳܗ̇ ܢܩܺܝܫ܆ ܟܶܢܳܪܶܗ ܕܡܽܘܫܶܐ ܕܒܳܗ̇ ܪܥܶܡ܆ ܩܺܝܬܳܪܶܗ ܕܕܰܘܺܝܕ ܕܒܳܗ̇ ܙܡܰܪ܀

ܫܰܦܺܝܪ ܐܶܬܢܰܒܺܝ ܐܶܫܰܥܝܳܐ ܡܫܰܒܚܳܐ܆ ܢܒܺܝܳܐ ܕܓܶܠ̈ܝܳܢܶܐ ܘܥܰܬܺܝܪܳܐ ܒܐ̱ܪ̈ܳܙܶܐ܆ ܘܶܐܡܰܪ ܠܳܗ̇ ܠܥܺܕܬܳܐ ܘܰܐܙܥܶܩ ܒܚܰܕܽܘܬܳܐ܆ ܕܩܽܘܡܝ ܐܰܢܗܰܪܝ ܡܶܟܺܝܠ ܕܰܡܛܳܐ ܠܶܗ ܢܽܘܗܪܶܟܝ܆ ܠܶܟܝ ܢܺܐܬܽܘܢ ܡܰܠ̈ܟܶܐ ܘܥܰܡ̱̈ܡܶܐ܆ ܘܕܰܝܳܢ̈ܶܐ ܕܥܳܠܡܳܐ ܘܫܰܠܺܝ̈ܛܳܢܶܐ܆ ܢܒܰܪܟܽܘܢ ܘܢܶܣܓܕܽܘܢ ܠܡܳܪܝܳܐ ܕܒܶܟܝ ܫܪܶܐ܀

ܫܰܦܺܝܪܳܐ ܝܰܘܢܳܐ ܘܰܪܓܺܝܓ ܫܽܘܦܢܺܝܢܳܐ܆ ܘܠܳܥܙܳܐ ܣܢܽܘܢܺܝܬܳܐ ܒܩ̈ܳܠܶܐ ܕܢܽܘܨܪ̈ܳܬܳܗ̇܆ ܥܺܕܬܳܐ ܠܰܡ ܝܰܘܢܳܐ ܐܶܡܰܪ ܡܰܠܦܳܢܳܐ܆ ܘܝܽܘܚܰܢܳܢ ܓܰܒܝܳܐ ܒܰܕܡܽܘܬ ܫܽܘܦܢܺܝܢܳܐ܆ ܣܢܽܘܢܺܝܬܳܐ ܐܺܝܬܶܝܗ̇ ܒܬܽܘܠܬܳܐ ܡܰܪܝܰܡ܆ ܐܰܙܥܶܩ ܗ̱ܘܳܐ ܒܩܳܠܳܐ ܪܺܝܫ ܡܰܠܰܐܟ̈ܶܐ܆ ܕܰܒܥܽܘܒܶܟܝ ܫܳܪܶܐ ܚܰܝܠܶܗ ܕܥܶܠܳܝܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܘܕܰܘ ܥܰܡ̱̈ܡܶܐ
ܗܳܢܰܘ ܝܰܪܚܳܐ ܕܰܛܥܺܝܢ ܟܽܠܶܗ ܟܽܠ ܚܰܕܘ̈ܳܬܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܨܰܒܶܬ ܠܥܺܕܬܶܗ ܘܰܒܟܽܠ ܫܽܘܦܪ̈ܺܝܢ ܡܰܦܪܓܳܐ.

ܒܰܪ̱ܬ ܡܰܠܟܳܐ ܐ̱ܢܳܐ ܡܫܰܒܰܚܬܳܐ܆ ܐܶܡܰܪ ܠܺܝ ܕܰܘܺܝܕ ܒܰܪ ܐܺܝܫܰܝ܆ ܘܰܛܥܳܝ ܥܰܡܶܟܝ ܘܒܶܝܬ ܐܰܒܽܘܟܝ܆ ܕܶܐܬܪܰܓܪܰܓ ܡܰܠܟܳܐ ܠܫܽܘܦܪܶܟܝ܆ ܗܽܘܝܽܘ ܡܳܪܶܟܝ ܠܶܗ ܐܰܘܕܳܝ܆ ܒܰܪܶܟܝ ܘܫܰܒܰܚܝ ܘܰܣܓܽܘܕܝ ܠܶܗ܆ ܕܶܐܬܳܐ ܘܦܰܪܩܶܟܝ ܡܶܢ ܛܽܘܥܝܰܝ܀

ܐܰܝܟܳܐ ܚܙܶܐ ܠܟܽܘܢ ܟܰܠܬܳܐ܆ ܕܚܳܕܝܳܐ ܒܩܶܛܠܶܗ ܕܰܡܟܺܝܪܳܗ̇܆ ܕܳܐܟܠܳܐ ܦܰܓܪܶܗ ܘܪܳܘܙܳܐ܆ ܘܫܳܬܝܳܐ ܠܰܕܡܶܗ ܘܰܦܨܺܝܚܳܐ܆ ܬܠܶܐ ܒܩܰܝܣܳܐ ܘܩܰܪܒܰܬ ܠܶܗ ܣܶܓܕܬܳܐ܆ ܓܢܶܐ ܒܩܰܒܪܳܐ ܘܝܶܗܒܰܬ ܠܶܗ ܫܽܘܒܚܳܐ܆ ܘܟܰܕ ܩܳܡ ܒܫܽܘܒܚܳܐ ܡܠܳܗ̇ ܕܰܘܨܳܐ܀

ܐܰܝܟ ܪܽܘܡܝܳܢܳܐ ܝܰܗ̱ܒܘ ܗ̱ܘܰܘ ܠܳܗ̇܆ ܚܕܽܘ̈ܓܶܐ ܕܚܰܬܢܳܐ ܠܥܺܕܬܳܐ܆ ܕܡܳܐ ܕܨܰܘܪ̈ܰܝܗܽܘܢ ܚܰܣܝܳܐ܆ ܕܒܶܗܽ ܗ̱ܘ ܝܰܠ̈ܕܶܝܗ̇ ܢܶܬܢܰܛܪܽܘܢ܆ ܘܡܳܪܰܢ ܩܪܳܐ ܠܳܗ̇ ܠܥܺܕܬܶܗ܆ ܘܶܐܡܰܪ ܠܳܗ̇ ܬܳܝ ܐܶܬܒܰܣܡܝ܆ ܒܦܰܓܪܳܐ ܘܰܕܡܳܐ ܕܡܶܙܓܶܬ ܠܶܟܝ܀

ܥܺܐܕܰܐ ܗ̱ܘ ܪܰܒܳܐ ܝܰܘܡܳܢܳܐ܆ ܕܒܶܗܽ ܗ̱ܘ ܡܶܬܩܰܕܫܳܐ ܥܺܕܬܳܐ܆ ܟܽܠ ܐ̱ܢܳܫ ܢܚܰܘܰܪ ܠܒܽܘܫܶܗ܆ ܡܶܬܝܰܕܥܳܢܳܐ ܘܢܰܦܪܶܓ܆ ܢܩܰܕܶܫ ܢܰܦܫܶܗ ܘܦܰܓܪܶܗ܆ ܡܶܢ ܛܰܡܽܐܘܬܳܐ ܕܰܚܛܺܝܬܳܐ܆ ܒܪܺܝܟܽ ܗ̱ܘ ܡܩܰܕܶܫ ܠܥܺܕܬܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܦܰܪܕܰܝܣܳܐ
ܡܰܢܽܘ ܚܙܳܐ ܢܶܩܝܳܐ ܟܰܕ ܡܰܝܢܩܳܐ

ܥܽܘܢܺܝܬܳܐ: ܒܪܺܝܟ ܕܪܰܡܪܶܡ ܩܰܪܢܳܗ̇ ܕܥܺܕܬܳܐ ܩܰܕܺܝܫܬܳܐ܆ ܒܰܫܡܰܝܳܐ ܘܒܰܐܪܥܳܐ ܘܒܰܐܪܒܰܥ ܦܶܢ̈ܝܳܬܳܐ.

ܛܽܘܪ̈ܶܐ ܕܰܠܒܽܘܢܬܳܐ ܕܶܡܗܽܘܢ ܕܰܐܬܠܺܝܛܰܝ̈ܟܝ܆ ܘܰܐܝܟ ܟܽܘܪܟܡܳܐ ܘܢܰܪܕܺܝܢ ܥܒܺܝܕܺܝܢ ܒܶܣ̈ܡܳܢܰܝܟܝ܆ ܘܥܰܪܣܶܟܝ ܒܝܰܕ ܩܰܝ̈ܣܶܐ ܕܩܺܝܢܽܘܡܽܘܢ ܪܨܺܝܦܳܐ܆ ܘܒܰܐܪ̈ܓܘܳܢܶܐ ܛܳܒ̈ܶܐ ܡ݉ܫܰܘܝܳܐ܆ ܘܰܒܥܰܪ̈ܩܶܐ ܡܚܰܦܝܳܐ ܘܒܰܩܛܺܝܪ̈ܩܶܐ ܩܛܺܝܪܳܐ܆ ܘܰܕܪܺܝܫܳܐ ܐܽܘܪܚܳܐ ܕܚܰܫ̈ܶܐ ܕܠܳܐ ܚܳܫܺܝܢ܀

ܒܝܰܘܡܳܐ ܕܡܶܫܬܽܘܬܶܟܝ ܥܺܕܬܳܐ ܡܟܰܠܰܠܬܳܐ܆ ܡܟܺܝܪܶܟܝ ܗܽܘ ܨܰܒܬܶܟܝ ܒܟܽܠ ܫܽܘܦܪ̈ܺܝܢ ܗܕܺܝܪ̈ܶܐ܆ ܘܙܰܡܶܢ ܠܰܚܠܽܘܠܶܟܝ ܥܰܡ̱̈ܡܶܐ ܕܠܳܐ ܡܶܢܝܳܢ܆ ܐܰܠ̈ܦܶܐ ܘܪ̈ܶܒܘܳܬܳܐ ܘܣܽܘ݉ܓܳܐܐ܆ ܕܚܳܕܶܝܢ ܘܕܳܝܨܺܝܢ ܒܶܟܝ ܟܰܕ ܙܳܡܪܺܝܢ ܫܽܘܒܚܳܐ܆ ܠܚܰܬܢܳܐ ܫܡܰܝܳܢܳܐ ܕܰܩܢܳܟܝ ܠܶܗ ܟܰܠܬܳܐ܀

ܥܺܕܬܳܐ ܕܡܶܢ ܠܩܽܘܕܡܺܝܢ ܗܳܝ ܕܶܐܡܰܪ ܕܰܘܺܝܕ܆ ܐܶܬܕܰܟܪܳܗ̇ ܡܳܪܝܳܐ ܐܰܟܪܶܙ ܒܰܪ ܐܺܝܫܰܝ܆ ܒܩܰܝܣܳܐ ܪܰܛܺܝܒܳܐ ܦܰܪܩܳܗ̇ ܘܰܒܫܰܒܛܳܐ܆ ܘܝܰܗ̱ܒܠܳܗ̇ ܝܳܪܬܽܘܬܳܐ ܒܪܰܘ݉ܡܳܐ܆ ܘܰܐܬܩܢܳܗ̇ ܥܰܠ ܫܽܘܥܳܐ ܓܝܳܕܶܝ̈ܗ̇ ܒܓܰܘ ܡܰܝ̈ܳܐ܆ ܦܺܐܪ̈ܶܝܗ̇ ܬܰܘܕܺܝܬܳܐ ܡܽܘ̈ܠܟܳܢܶܝܗ̇ ܣܰܒܪܳܐ܀

ܪܳܡܺܝܢ ܒܶܢܝܳܢܰܝ̈ܟܝ ܗܕܺܝܪ̈ܺܝܢ ܬܽܘܩܳܢܰܝ̈ܟܝ܆ ܫܽܘܪ̈ܰܝܟܝ ܕܣܰܦܺܝܠܳܐ ܘܟܺܐܦܰܝ̈ܟܝ ܕܰܐܕܰܐܡܳܘܣ܆ ܫܶܬܶܐܣܰܝ̈ܟܝ ܢܒܺܝ̈ܶܐ ܘܰܫܠܺܝ̈ܚܶܐ ܓܒܰܝ̈ܳܐ܆ ܕܽܘܡ̈ܣܶܐ ܕܒܶܢܝܳܢܶܟܝ ܦܰܐܝܳــ݉ـܐ܆ ܣܳܗ̈ܕܶܐ ܥܰܡܽܘ̈ܕܰܝܟܝ ܘܡܰܠ̈ܦܳܢܶܐ ܕܩܽܘܫܬܳܐ܆ ܥܒܺܝܕܺܝܢ ܬܰܛܠܺܝ̈ܠܰܝܟܝ ܥܺܕܬܳܐ ܩܰܕܺܝܫܬܳܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܒܟܽܠ ܫܶܡ ܡܰܪܝܰܡ ܐܶܬܩܰܠܣܰܬ݀

ܡܳܪܰܢ ܐܶܬܪܰܚܰܡ ܥܠܰܝܢ ܒܗܳܢܳܐ ܥܺܐܕܳܐ ܩܰܕܺܝܫܳܐ܆

ܘܰܒܗܰܘ ܥܺܐܕܳܐ ܕܠܳܐ ܥܳܒܰܪ ܐܰܩܺܝܡ ܠܰܢ ܡܶܢ ܝܰܡܺܝܢܳܟ܀

ܫܰܠܝܳܐ ܗ̱ܘܰܝܬܝ ܐܳܦ ܕܰܡܺܝܟܳܐ܆ ܐܳܡܪܺܝܢ ܠܳܗ̇ ܣܳܗ̈ܕܶܐ ܠܥܺܕ̄ܬܳܐ܆ ܘܶܐܬܰܘ ܢܒܺܝ̈ܶܐ ܘܰܫܠܺܝܚ̈ܶܐ܆ ܘܰܒܩܳܠܰܝ̈ܗܽܘܢ ܐܰܥܺܝܪܽܘܟܝ܆ ܕܩܽܘܡܝ ܥܺܕܬܳܐ ܘܰܙܡܰܪܝ ܫܽܘܒܚܳܐ܆ ܠܡܰܠܟܳܐ ܡܫܺܝܚܳܐ ܕܗܽܘ ܦܰܪܩܶܟܝ܆ ܘܥܰܒܕܶܟܝ ܟܰܠܬܳܐ ܡܫܰܒܰܚܬܳܐ܆ ܘܟܽܠ ܛܽܘ̈ܒܺܝܢ ܐܶܫܬܰܘܕܺܝ ܠܶܟܝ܀

ܫܽܘܒܚܳܐ ܠܰܐܒܳܐ ܡܬܽܘܡܳܝܳܐ܆ ܕܰܡܟܰܪ ܥܺܕܬܳܐ ܠܺܝܚܺܝܕܶܗ܆ ܘܰܢܒܺܝ̈ܶܐ ܗܘܰܘ ܡܳܟܽܘܪ̈ܶܝܗ̇܆ ܒܝܰܕ ܡܽܘܫܶܐ ܥܰܠ ܛܽܘܪ ܣܺܝܢܰܝ܆ ܘܣܶܓܕܬܳܐ ܠܰܒܪܳܐ ܐܺܝܬܝܳܝܳܐ܆ ܕܒܰܫܠܺܝܚ̈ܶܐ ܢܰܛܰܪ ܝܰܠ̈ܕܶܝܗ̇܆ ܘܰܐܝܟ ܐܰܪ̈ܕܺܝܟܠܶܐ ܫܰܪܺܝܪ̈ܶܐ܆ ܥܒܰܕ ܐܶܢܽܘܢ ܥܰܠ ܒܶܢܝܳܢܳܗ̇܆ ܬܰܘܕܺܝ ܠܪܽܘܚܳܐ ܩܰܕܺܝܫܳܐ܆ ܕܢܳܚܶܬ ܠܳܗ̇ ܘܰܡܩܰܕܶܫ ܠܳܗ̇܆ ܘܣܳܥܰܪ ܠܳܗ̇ ܘܰܡܫܰܡܠܶܐ ܠܳܗ̇܆ ܒܫܽܘ̈ܟܳܢܶܐ ܐܰܠܳܗܳܝ̈ܶܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܗܳܢܳܐ ܥܺܐܕܳܐ ܩܰܕܺܝܫܳܐ܆

ܘܰܒܗܰܘ ܥܺܐܕܳܐ ܕܠܳܐ ܥܳܒܰܪ ܐܰܩܺܝܡ ܠܰܢ ܡܶܢ ܝܰܡܺܝܢܳܟ܀