ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܩܽܘܩܳܝܳܐ
ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ܆ ܘܰܢܝܳܚܳܐ

ܝܰܘܡܳܢܳܐ ܚܙܳܗ̇ ܗ̱ܘܳܐ ܢܒܺܝܳܐ ܠܪܳܚܶܝܠ ܟܰܕ ܒܳܟܝܳܐ܆ ܘܠܳܐ ܨܳܒܝܳܐ ܠܡܶܬܒܰܝܳܐܽܘ ܥܰܠ ܝܰܠ̈ܕܶܝܗ̇ ܕܶܐܬܩܛܶܠܘ܆ ܫܰܒܪ̈ܶܐ ܦܫܺܝ̈ܛܶܐ. ܘܝܰܠܽܘ̈ܕܶܐ ܪ̈ܚܺܝܡܶܐ܆ ܕܰܚܪܰܒ ܐܶܢܽܘܢ. ܣܰܝܦܶܗ ܕܗܶܪܳܘܕܶܣ܆ ܛܽܘܒܰܝܗܽܘܢ ܕܰܫܡܳܗܰܝ̈ܗܽܘܢ ܐܶܬܟܬܶܒܘ ܒܰܫܡܰܝܳܐ܆ ܬܰܘ ܢܶܩܥܶܐ ܒܕܽܘܟܪ̈ܳܢܰܝܗܽܘܢ ܠܳܟ ܫܽܘܒܚܳܐ ܡܳܪܝܳܐ܆ ܗ̄ ܨܠܽܘܬܗܽܘܢ ܬܥܰܕܰܪ ܠܰܢ܀

ܫܽܘܒܚܳܐ

ܐܺܝܢ ܪܳܚܶܝܠ ܥܰܠ ܡܽܘܢ ܒܳܟܝܰܬܝ ܘܕܶܡ̈ܥܰܝܟܝ ܠܡܽܘܢ ܫܓܺܝܪ̈ܳܢ܆ ܕܗܳܐ ܛܽܘܪ̈ܶܐ ܒܳܟܶܝܢ ܥܰܡܶܟܝ ܘܪ̈ܳܡܳܬܳܐ ܟܽܠܗܶܝܢ܆ ܒܳܟܝܳܐ ܐ̱ܢܳܐ ܡܳܪܝ܆ ܘܒܳܟܶܝܢ ܥܰܡܝ ܛܽܘܪ̈ܶܐ܆ ܡܶܛܽܠ ܥܰܘܠܳܐ. ܕܰܥܒܰܕ ܗܶܪܳܘܕܶܣ܆ ܩܛܰܠ ܝܰܠ̈ܕܰܝ ܒܰܕܡܽܘܬ ܐܶܡܪ̈ܶܐ ܒܣܰܝܦܳܐ ܕܪܽܘܓܙܳܐ܆ ܡܫܺܝܚܳܐ ܕܡܺܝܬܘ ܡܶܛܽܠܳܬܳܟ ܐܰܘܪܶܒ ܕܽܘܟܪܳܢܗܽܘܢ܆ ܗ̄ ܒܰܫܡܰܝܳܐ ܘܒܰܐܪܥܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܐܰܘܕܰܘ ܥܰܡ̱̈ܡܶܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܢܰܨܰܚ ܣܳܗ̈ܕܰܘܗ̱ܝ܆ ܘܰܐܘܪܶܒ ܫܶܡܗܽܘܢ ܒܥܳܠܡܳܐ.

ܡܰܠܟܳܐ ܕܰܢܚܶܬ ܠܰܐܪܥܳܐ܆ ܘܰܗܘܳܐ ܐ̱ܢܳܫܳܐ ܚܠܳܦܰܝܢ܆ ܘܡܶܛܽܠܳܬܶܗ ܐܶܬܢܟܶܣܘ܆ ܛܠܳܝ̈ܶܐ ܪ̈ܓܺܝܓܶܐ ܕܒܶܝܬ ܠܚܶܡ܆ ܗܰܒܠܺܝ ܡܶܠܬܳܐ ܕܶܐܨܽܘܪ܆ ܨܰܠܡܳܐ ܦܰܐܝܳܐ ܠܫܽܘܦܪ̈ܰܝܗܽܘܢ܆ ܒܪܺܝܟܽ ܗ̱ܘ ܕܢܰܨܰܚ ܠܫܰܒܪ̈ܶܐ܀

ܓܽܘܢܚܳܐ ܪܰܒܳܐ ܣܥܰܪ ܗ̱ܘܳܐ܆ ܡܰܠܟܳܐ ܚܰܢܦܳܐ ܝܰܘܡܳܢ܆ ܢܦܰܩܘ ܩܶܣܛܽܘܢܳܪ̈ܶܐ ܘܙܰܠܚܽܘܗ̇܆ ܠܰܐܪܥܳܐ ܒܰܕܡܳܐ ܥܠܺܝܒܳܐ܆ ܕܝܰܠܽܘ̈ܕܶܐ ܘܫܰܒܪ̈ܶܐ ܕܓܳܥܶܝܢ܆ ܘܩܳܠܰܝ̈ ܚܰܫܳܐ ܕܶܐܡ̈ܗܳܬܳܐ܆ ܒܪܺܝܟ ܕܥܰܠ ܣܰܒܪܶܗ ܐܶܬܢܟܶܣܘ܀

ܒܒܰܛܢܶܗ ܒܛܺܝ̈ܢܶܐ ܐܶܬܒܰܪܰܟܘ܆ ܐܰܝܟ ܝܽܘܚܰܢܳܢ ܒܓܰܘ ܟܰܪܣܳܐ܆ ܘܒܺܝܠܺܝܕܽܘܬܶܗ ܝܰܠܽܘ̈ܕܶܐ܆ ܗܘܰܘ ܩܽܘܪ̈ܒܳܢܶܐ ܫܰܪ̈ܘܳܝܶܐ܆ ܒܛܰܠܝܽܘܬܶܗ ܛܠܳܝ̈ܶܐ ܐܶܬܢܰܟܰܦܘ܆ ܘܒܰܥܠܰܝܡܽܘܬܶܗ ܝܰܠܽܘ̈ܕܶܐ܆ ܘܰܒܡܺܝܬܽܘܬܶܗ ܓܰܝܳܣܳܐ܀

ܛܽܘܒܰܘܗ̱ܝ ܠܰܐܝܢܳܐ ܕܥܳܒܶܕ܆ ܕܽܘܟܪܳܢܗܽܘܢ ܕܫܰܒܪ̈ܶܐ ܒܪܺܝܪ̈ܶܐ܆ ܕܗܶܢܽܘܢ ܒܳܥܶܝܢ ܚܠܳܦܰܘܗ̱ܝ܆ ܡܶܢ ܚܰܢܳܢܳܐ ܡܳܪܗܽܘܢ܆ ܕܰܢܩܰܒܶܠ ܫܰܗܪܶܗ ܘܥܰܡܠܶܗ܆ ܒܝܰܘܡܳܐ ܕܝܳܗܶܒ ܐܰܠܳܗܳܐ܆ ܐܰܓܪܳܐ ܛܳܒܳܐ ܠܦܰܠܳܚܰܘ̈ܗ̱ܝ܀

ܣܘܰܚܘ ܠܶܗ ܥܰܡ̱̈ܡܶܐ ܘܶܐܡ̈ܘܳܬܳܐ܆ ܘܟܽܠ ܫܰܪ̈ܒܳܬܳܐ ܕܥܰܠ ܐܰܪܥܳܐ܆ ܛܠܳܝ̈ܶܐ ܨܰܘܪ̈ܰܝܗܽܘܢ ܩܰܪܶܒܘ܆ ܐܰܝܟ ܪܽܘܡܝܳܢܳܐ ܠܡܰܠܟܳܐ܆ ܘܰܐܝܟ ܪ̈ܺܝܫܝܳܬܳܐ ܘܩܽܘܪ̈ܒܳܢܶܐ܆ ܒܣܶܡ ܠܰܡܫܺܝܚܳܐ ܡܰܘ̈ܬܰܝܗܽܘܢ܆ ܨܠܽܘܬܗܽܘܢ ܫܽܘܪܳܐ ܬܶܗܘܶܐ ܠܰܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܐܳܦܪܰܬ

ܥܽܘܢܺܝܬܳܐ: ܬܶܫܒ̈ܚܳܢ ܠܕܰܐܘܪܶܒ ܕܽܘܟܪܳܢ ܣܳܗ̈ܕܰܘܗ̱ܝ܆ ܠܥܶܠ ܒܰܫܡܰܝܳܐ ܘܒܰܐܪܒܰܥ ܦܶܢ̈ܝܳܢ.

ܛܽܘܒܳܐ ܪܰܒܳܐ. ܠܫܰܒܪ̈ܶܐ ܒܪܺܝܪ̈ܶܐ܆ ܕܡܶܛܽܠ ܡܳܪܰܢ ܐܶܬܩܰܛܰܠܘ ܗ̱ܘܰܘ܆ ܡܶܢ ܗܶܪܳܘܕܶܣ. ܡܰܠܟܳܐ ܚܰܢܦܳܐ܆ ܕܰܨܒܳܐ ܢܚܰܒܶܠ ܠܶܐܡܰܪ ܩܽܘܫܬܳܐ܆ ܗܳܐ ܟܠܺܝ̈ܠܰܝܗܽܘܢ ܢܳܨܚܺܝܢ ܒܰܥܕܶܢ܆ ܘܡܰܦܪܓܺܝܢ ܒܗܳܝ ܓܰܢܰܬ ܛܽܘ̈ܒܶܐ܆ ܘܥܺܕܰܬ ܩܽܘܕܫܳܐ܆ ܙܳܡܪܳܐ ܬܶܫܒܽܘܚܬܳܐ܆ ܒܝܰܘܡܳܐ ܕܕܽܘܟܪܳܢܗܽܘܢ܀

ܒܝܽܘܡ ܕܽܘܟܪܳܢܟܽܘܢ. ܐܳܘ ܝܰܠܽܘ̈ܕܶܐ܆ ܪܳܘܙܳܐ ܥܺܕܬܳܐ ܘܝܰܠ̈ܕܶܝܗ̇ ܒܓܰܘܳܗ̇܆ ܘܙܳܡܪܺܝܢ ܫܽܘܒܚܳܐ܆ ܠܚܰܬܢܳܐ ܩܛܺܝܠܳܐ܆ ܕܰܠܡܶܫܬܽܘܬܶܗ ܐܶܙܕܰܡܰܢܬܽܘܢ܆ ܠܟܽܘܢ ܛܽܘܒܳܐ ܕܰܗܘܰܝܬܽܘܢ ܕܶܒܚܳܐ܆ ܘܩܽܘܪܒܳܢܳܐ ܕܰܕܟܶܐ ܡܶܢ ܨܳܐܬܳܐ܆ ܨܠܽܘܬܟܽܘܢ ܬܶܗܘܶܐ. ܫܽܘܪܳܐ ܚܰܣܺܝܢܳܐ܆ ܠܥܺܕܬܳܐ ܡܗܰܝܡܰܢܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܬܩܰܛܰܠܘ ܗ̱ܘܰܘ

ܥܽܘܢܺܝܬܳܐ: ܠܳܟ ܫܽܘܒܚܳܐ ܡܶܢ ܟܽܠ ܦܽܘ̈ܡܺܝܢ܆ ܒܕܽܘܟܪܳܢܰܝ̈ܗܽܘܢ ܕܰܪ̈ܚܽܘܡܰܝܟ.

ܐܶܬܩܰܛܰܠܘ ܗ̱ܘܰܘ ܝܰܠܽܘ̈ܕܶܐ܆ ܡܶܛܽܠ ܝܰܠܕܳܟ ܡܰܚܶܐ ܟܽܠ܆ ܡܰܠܟܳܐ ܕܶܝܢ ܕܰܗܘܳܐ ܩܛܺܝܠܳܐ܆ ܡܳܪܰܢ ܡܳܪܳܐ ܕܡܰܠܟܽܘܬܳܐ܆ ܗܰܘ ܛܪܽܘܢܳܐ ܟܰܕ ܡܶܨܛܰܢܰܥ܆ ܗܡܰܝܪ̈ܶܐ ܩܛܺܝ̈ܠܶܐ ܩܰܪܶܒ ܠܶܗ܆ ܕܰܥܛܺܝܦܺܝܢ ܐ̱ܪ̈ܳܙܰܝ ܩܶܛܠܶܗ܆ ܕܰܪ̈ܓܶܐ ܫܡܰܝ̈ܳܢܶܐ ܩܰܒܶܠܘ܆ ܗܡܰܝܪ̈ܶܐ ܕܩܰܪܶܒܘ ܐܰܪ̈ܥܳܢܶܐ܆ ܒܪܺܝܟ ܡܳܪܝܳܐ ܕܟܰܠܶܠ ܐܶܢܽܘܢ܀

ܢܗܰܡ̈ܝ ܗ̱ܘܰܝ̈ ܝܰܘ̈ܢܶܐ ܕܒܶܝܬ ܠܚܶܡ܆ ܕܚܶܘܝܳܐ ܚܰܒܶܠ ܝܰܠ̈ܕܰܝܗܶܝܢ܆ ܢܶܫܪܳܐ ܠܡܶܨܪܶܝܢ ܐܰܫܩܶܠ ܗ̱ܘܳܐ܆ ܕܢܶܚܽܘܬ ܢܶܣܰܒ ܡܽܘܠܟܳܢܶܗ܆ ܚܶܕܝܰܬ ܒܶܗ ܡܶܨܪܶܝܢ ܕܰܗܘܳܐ܆ ܡܠܽܘܐܳܐ ܠܦܽܘܪܥܳܢ ܚܰܘ̈ܒܳܬܳܗ̇܆ ܕܠܰܒ̈ܢܰܝ ܝܰܘܣܶܦ ܩܶܛܠܰܬ ܗ̱ܘܳܬ܆ ܒܒܰܪ ܝܰܘܣܶܦ ܥܶܡܠܰܬ ܦܶܪܥܰܬ܆ ܚܰܘ̈ܒܳܬܳܐ ܕܰܒ̈ܢܰܝ ܝܰܘܣܶܦ܆ ܒܪܺܝܟܽ ܗ̱ܘ ܕܰܩܪܳܝܗ̱ܝ ܡܶܢ ܡܶܨܪܶܝܢ܀

ܚܳܪ ܗ̱ܘܳܐ ܛܪܽܘܢܳܐ ܒܰܡܓܽܘ̈ܫܶܐ܆ ܕܫܰܐܶܠܘ ܕܰܐܝܟܰܘ ܒܰܪ ܡܰܠܟܳܐ܆ ܘܟܰܕ ܠܶܒܶܗ ܕܰܟܡܺܝܪܳܐ ܗ̱ܘܳܐ܆ ܠܒܶܫ ܠܶܗ ܓܰܘܢܳܐ ܕܰܦܨܺܝ̈ܚܶܐ܆ ܥܰܡ ܥܶܪ̈ܒܶܐ ܕܺܐܒ̈ܶܐ ܫܰܕܰܪ܆ ܕܢܶܩܛܽܘܠ ܠܶܐܡܪܶܗ ܕܰܐܠܳܗܳܐ܆ ܐܶܡܪܳܐ ܠܡܶܨܪܶܝܢ ܐܶܙܰܠ ܗ̱ܘܳܐ܆ ܕܰܢܕܽܘܢ ܐܶܢܽܘܢ ܡܶܢ ܬܰܡܳܢ܆ ܕܰܦܪܰܩ ܐܶܢܽܘܢ ܡܶܢ ܦܶܪܥܽܘܢ܆ ܒܪܺܝܟ ܕܰܗܦܰܟ ܫܰܥܒܶܕ ܐܶܢܽܘܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܫܽܘܒܚܳܐ ܠܳܟ ܒܽܘܟܪܶܗ ܕܰܐܒܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܗܽܘܢ ܕܫܰܒܪ̈ܶܐ ܒܪܺܝܪ̈ܶܐ܆

ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܝܰܘܡܳܢܳܐ ܫܶܠܡܰܬ ܡܶܠܬܳܐ܆ ܗܳܝ ܕܶܐܬܢܰܒܺܝ ܐܶܪܰܡܝܳܐ܆ ܕܪܳܚܶܝܠ ܒܳܟܝܳܐ ܥܰܠ ܝܰܠ̈ܕܶܝܗ̇܆ ܘܠܳܐ ܨܳܒܝܳܐ ܠܡܶܬܒܰܝܳܐܽܘ܆ ܕܩܰܛܶܠ ܐܶܢܽܘܢ ܗܶܪܳܘܕܶܣ܆ ܒܰܚܣܳܡܳܐ ܥܰܘܳܠܳܐܺܝܬ܀

ܫܽܘܒܚܳܐ ܠܰܐܒܳܐ ܕܰܒܣܶܡ ܠܶܗ܆ ܪܺܝܚܳܐ ܚܰܠܝܳܐ ܕܩܶܛܠܰܝ̈ܗܽܘܢ܆ ܬܰܘܕܺܝܬܳܐ ܠܰܒܪܳܐ ܕܩܰܒܶܠ܆ ܕܶܡܗܽܘܢ ܐܰܝܟ ܥܶܛܪܳܐ ܓܰܒܝܳܐ܆ ܒܪܺܝܟ ܪܽܘܚܳܐ ܕܩܽܘܕܫܳܐ ܕܰܪܫܰܡ܆ ܢܶܨܚܳܢܗܽܘܢ ܒܰܣܦܰܪ ܚܰܝ̈ܶܐ܆ ܘܰܥܠܰܝܢ ܪ̈ܰܚܡܶܐ ܘܰܚܢܳܢܳܐ܆ ܒܰܨܠܽܘܬܗܽܘܢ ܐܰܡܺܝܢ ܘܰܐܡܺܝܢ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܗܽܘܢ ܕܫܰܒܪ̈ܶܐ ܒܪܺܝܪ̈ܶܐ܆

ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀