ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܗܰܒܠܳܗ̇ ܠܥܺܕܬܳܟ
ܫܽܘܒܚܳܐ ܠܗܰܘ ܩܳܠܳܐ ܕܶܐܡܰܪ ܡܳܪܰܢ

ܐܳܘ ܐܰܒܳܐ ܒܪܺܝܟܳܐ܆ ܦܫܽܘܛ ܝܰܡܺܝܢܳܟ ܟܰܣܝܳܐܺܝܬ܆ ܘܒܰܪܶܟ ܠܟܶܢܫܳܐ ܫܰܦܝܳܐ ܕܬܰܠܡܺܝ̈ܕܰܝܟ. ܕܰܡܫܰܡܫܺܝܢ ܩܽܘܕܡܰܝܟ܆ ܒܕܰܟܝܽܘܬܳܐ ܘܩܰܕܺܝܫܽܘܬܳܐ܆ ܘܰܒܙܰܗܝܽܘܬܳܐ ܒܠܺܠܝܳܐ ܘܒܺܐܝܡܳܡܳܐ ܀

ܫܽܘܒܚܳܐ

ܓܰܒܝܳܐ ܒܰܪܨܰܘܡܳܐ܆ ܪܳܚܡܶܗ ܕܚܰܬܢܳܐ ܫܡܰܝܳܢܳܐ܆ ܒܥܺܝ ܡܶܢ ܡܳܪܳܟ܆ ܫܰܝܢܳܐ ܥܰܠ ܥܳܠܡܳܐ܆ ܕܥܳܒܶܕ ܨܶܒܝܳܢܳܟ܆ ܘܠܳܐ ܟܳܠܶܐ ܠܳܟ ܫ̈ܶܐܠܳܬܳܟ܆ ܥܰܠ ܕܰܪܚܶܡܬܳܝܗ̱ܝ ܡܶܢ ܟܽܠܶܗ ܠܶܒܳܟ ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܨܠܽܘܬܳܟ ܥܰܡܰܢ ܡܳܪܝ ܒܰܪܨܰܘܡܳܐ ܨܠܽܘܬܳܟ ܥܰܡܰܢ܆

ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܗܳܢܳܐ ܕܰܗܘܳܐ ܒܟܽܠܗܽܘܢ ܝܰܘ̈ܡܰܘܗ̱ܝ ܥܰܡ ܐܰܠܳܗܳܐ܆ ܘܠܶܗܽ ܗ̱ܘ ܚܰܝ ܗ̱ܘܳܐ ܘܠܳܐ ܗ̱ܘܳܐ ܠܥܳܠܡܳܐ ܕܰܡܠܶܐ ܡܰܘܬܳܐ܆ ܗܳܢܳܐ ܕܰܗܘܳܐ ܒܰܕܡܽܘܬ ܫܶܡܫܳܐ ܥܰܙܺܝܙ ܕܰܠܩܳܐ܆ ܘܰܐܢܗܰܪ ܙܺܝܘܶܗ ܠܰܐܪܒܰܥ ܦܶܢ̈ܝܳܢ ܘܰܐܦܨܰܚ ܐܶܢܶܝܢ ܀

ܫܽܘܒܚܳܐ ܠܰܐܒܳܐ ܕܰܐܓܥܶܠ ܒܺܐܝ̈ܕܰܝܟ ܓܰܙܳܐ ܕܥܽܘܬܪ̈ܰܘܗ̱ܝ܆ ܘܣܶܓܕܬܳܐ ܠܰܒܪܳܐ ܕܗܽܘܝܽܘ ܕܦܰܪܢܶܣ ܗܳܠܶܝܢ ܕܺܝܠܳܟ܆ ܬܰܘܕܺܝ ܠܪܽܘܚܳܐ ܕܒܶܗ ܡܶܬܬܙܺܝܥ ܗ̱ܘܰܝܬ ܥܰܠ ܣܳܩܽܘܪ̈ܰܝܟ܆ ܘܗܽܘܝܽܘ ܕܟܰܠܠܳܟ ܒܰܟܠܺܝܠ ܫܽܘܒܚܳܐ ܨܠܽܘܬܳܟ ܥܰܡܰܢ ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀

ܫܠܶܡ ܛܶܟܣܳܐ ܕܕܽܘܟܪܳܢ ܕܡܳܪܝ ܒܰܪܨܰܘܡܳܐ ܪܺܝܫܳܐ ܕܰܐܒܺܝ̈ܠܶܐ