ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܩܽܘܩܳܝܳܐ
ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ ܘܰܢܝܳܚܳܐ

ܠܰܚܠܽܘܠܶܗ ܕܡܳܪܝ ܒܰܪܨܰܘܡܳܐ ܩܪܳܢܝ ܐܰܠܳܗܳܐ܆ ܐܶܢ ܐܺܙܰܠ ܩܶܢܛܰܐ ܗ̱ܘ ܪܰܒܳܐ ܘܶܐܢ ܐܶܦܽܘܫ ܕܶܚܠܬܳܐ ܗ̱ܝ܆ ܐܶܢ ܐܳܙܶܠ ܐ̱ܢܳܐ܆ ܚܰܘ̈ܒܰܝ ܥܳܗܶܕ ܐ̱ܢܳܐ܆ ܘܶܐܢ ܦܳܐܶܫ ܐ̱ܢܳܐ܆ ܗܘܺܝܬ ܠܺܝ ܢܽܘܟܪܳܝܳܐ܆ ܒܰܕܡܳܐ ܕܰܪܕܳܐ ܡܶܢ ܕܰܦܢܶܗ ܕܒܰܪ ܐܰܠܳܗܳܐ܆ ܢܶܬܚܰܣܽܘܢ ܚܰܘ̈ܒܰܝ ܘܶܐܩܥܶܐ ܕܠܳܟ ܫܽܘܒܚܳܐ ܡܳܪܝܳܐ܆ ܗ̄ ܡܟܰܠܶܠ ܠܰܪ̈ܚܽܘܡܰܘܗ̱ܝ܀

ܫܽܘܒܚܳܐ

ܚܰܡܫܺܝܢ ܓܶܝܪ ܘܰܐܪܒܰܥ ܫܢܰܝ̈ܳܐ ܢܽܘܓܪܳܐ ܪܰܒܳܐ܆ ܚܰܡܣܶܢ ܒܟܰܦܢܳܐ ܘܰܒܨܰܗܝܳܐ ܓܰܒܝܳܐ ܒܰܪܨܰܘܡܳܐ܆ ܥܰܡ ܚܰܝ̈ܘܳܬܳܐ܆ ܒܛܽܘܪ̈ܶܐ ܥܳܡܰܪ ܗ̱ܘܳܐ܆ ܘܢܰܩܺܝܦ ܗ̱ܘܳܐ ܠܶܗ܆ ܣܽܘܓܳܐܐ ܕܬܰܠܡܺܝ̈ܕܶܐ܆ ܐܰܝܟ ܡܳܐܐ ܘܚܰܡܫܺܝܢ ܫܰܪܺܝܪ̈ܶܐ ܐܰܬܠܺܝ̈ܛܶܐ ܡܫܰܒ̈ܚܶܐ܆ ܒܰܨܠܽܘܬܶܗ ܘܰܕܬܰܠܡܺܝ̈ܕܰܘܗ̱ܝ ܪ̈ܰܚܡܶܐ ܢܶܗܘܽܘܢ ܥܠܰܝܢ܆ ܗ̄ ܒܰܬܪ̈ܰܝܗܽܘܢ ܥܳܠ̈ܡܶܐ܀

ܡܰܕܪܳܫܳܐ

ܩܳܠܳܐ ܒܩ̄: ܛܽܘܒܰܝܟܝ ܐܳܦܪܰܬ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܐܘܪܶܒ ܝܽܘܡ ܕܽܘܟܪܳܢܳܟ܆ ܣܳܒܳܐ ܙܰܗܝܳܐ ܡܳܪܝ ܒܰܪܨܰܘܡܳܐ.

ܛܽܘܒܰܝܟ ܓܰܒܝܳܐ ܡܳܪܝ ܒܰܪܨܰܘܡܳܐ܆ ܕܰܥܠܰܝܟ ܫܶܠܡܰܬ ܡܶܠܬܶܗ ܕܡܳܪܰܢ܆ ܕܟܽܠ ܐܰܝܢܳܐ ܕܚܰܝ ܘܰܡܗܰܝܡܶܢ ܒܺܝ܆ ܐܳܦܶܢ ܡܳܐܶܬ ܚܳܝܶܐ ܠܥܳܠܰܡ܆ ܥܰܠܗܳܕܶܐ ܟܽܠܝܽܘܡ ܡܳܐܶܬ ܗ̱ܘܰܝܬ܆ ܠܥܳܠܡܳܐ ܕܥܳܩ̈ܳܬܳܐ ܘܰܕܬܶܢ̈ܚܳܬܳܐ܆ ܕܰܒܥܳܠܡܳܐ ܚܰܕܬܳܐ܆ ܕܠܳܐ ܡܰܘܦܶܝܢ ܛܽܘ̈ܒܰܘܗ̱ܝ܆ ܬܶܚܕܶܐ ܘܬܶܬܒܰܣܰܡ܀

ܛܽܘܒܰܝܟ ܐܰܒܽܘܢ ܡܳܪܝ ܒܰܪܨܰܘܡܳܐ܆ ܕܰܐܝܟ ܥܰܡܽܘܕܳܐ ܕܠܳܐ ܡܶܙܕܰܥܙܰܥ܆ ܣܳܡܳܟ ܡܳܪܳܟ ܒܥܳܠܡܳܐ ܗܳܢܳܐ܆ ܕܒܳܟ ܡܶܬܓܰܘܣܺܝܢ ܟܽܠ ܕܰܐܠܺܝܨܺܝܢ܆ ܒܚܺܝܠ ܒܳܥܽܘܬܳܟ ܢܳܣܒܺܝܢ ܪ̈ܰܚܡܶܐ܆ ܘܰܚܢܳܢܳܐ ܘܫܽܘܒܩܳܢܳܐ ܕܚܰܘ̈ܒܶܐ܆ ܡܶܢ ܡܳܪܝܳܐ ܕܰܓܒܳܟ܆ ܘܙܰܡܢܳܟ ܠܡܰܠܟܽܘܬܶܗ܆ ܕܬܶܚܕܶܐ ܘܬܶܬܒܰܣܰܡ܀

ܛܽܘܒܰܝܟ ܓܰܒܝܳܐ ܡܳܪܝ ܒܰܪܨܰܘܡܳܐ܆ ܕܥܺܝܪ̈ܶܐ ܒܪܰܘܡܳܐ ܙܳܡܪܺܝܢ ܫܽܘܒܚܳܐ܆ ܠܡܳܪܝܳܐ ܕܰܓܒܳܟ ܡܶܢ ܓܰܘ ܟܰܪܣܳܐ܆ ܘܥܰܒܕܳܟ ܪܺܝܫܳܐ ܥܰܠ ܡܰܪܥܺܝܬܶܗ܆ ܟܽܠ ܐܰܝܢܳܐ ܕܳܐܬܶܐ ܠܝܰܘܡܶܗ ܕܥܺܐܕܳܟ܆ ܘܰܒܗܰܝܡܳܢܽܘܬܳܐ ܡܶܬܓܰܘܰܣ ܒܳܟ܆ ܡܳܪܳܟ ܒܰܥܓܰܠ܆ ܡܦܰܢܶܐ ܫܶܐܠܳــ̈ܬܶܗ܆ ܘܗܳܦܶܟ ܒܚܰܕܽܘܬܳܐ܀

ܛܽܘܒܰܝܟ ܓܰܒܝܳܐ ܡܳܪܝ ܒܰܪܨܰܘܡܳܐ܆ ܕܰܒܕܰܚܺܝܚܳܐ ܕܦܰܓܪܳܟ ܕܰܟܝܳܐ܆ ܫܰܪܝܳܐ ܫܟܺܝܢܬܳܐ ܕܪܽܘܚܳܐ ܕܩܽܘܕܫܳܐ܆ ܘܗܺܝ ܣܳܥܪܳܐ ܒܶܗ ܚܰܝ̈ܠܶܐ ܟܽܠܝܽܘܡ܆ ܘܗܳܐ ܢܳܣܒܺܝܢ ܟܪ̈ܺܝܗܶܐ ܚܽܘܠܡܳܢܳܐ܆ ܘܰܢܦܺܐܫܳܐ ܐܰܝܠܶܝܢ ܕܰܐܠܺܝܨܺܝܢ܆ ܘܡܰܘܕܶܝܢ ܘܰܡܫܰܒܚܺܝܢ܆ ܠܡܳܪܝܳܐ ܕܝܰܗ̱ܒ ܒܺܐܝ̈ܕܰܝܟ܆ ܬܡܰܠܶܐ ܣܽܘܢܩܳܢܗܽܘܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܟܰܠܰܬ ܡܰܠܟܳܐ

ܥܽܘܢܺܝܬܳܐ: ܫܽܘܒܚܳܐ ܠܳܟ ܡܳܪܝ ܕܰܗܘܰܝܬ ܫܽܘܪܳܐ ܠܒܰܪܨܰܘܡܳܐ ܒܰܐܓܽܘܢܶܗ.

ܡܰܢܽܘ ܓܰܒܪܳܐ ܕܶܐܬܒܚܰܪ܆ ܐܰܝܟ ܕܰܒܟܽܘܪܳܐ ܘܰܢܦܰܩ ܕܰܟܝܳܐ܆ ܐܰܝܢܰܘ ܕܶܐܬܒܩܺܝ ܘܶܐܫܬܟܰܚ܆ ܕܰܗܒܳܐ ܓܰܒܝܳܐ ܒܓܰܘ ܣܺܝܠܽܘܢܳܐ܆ ܗܳܐ ܒܰܪܨܰܘܡܳܐ܆ ܢܦܰܠ ܐܰܝܟ ܕܰܗܒܳܐ܆ ܒܟܽܘܪܳܐ ܘܰܢܦܰܩ܆ ܐܰܝܟ ܒܶܪܽܘܠܳܐ܆ ܢܽܘܪܳܐ ܕܰܒܩܳܬܶܗ܆ ܗܳܐ ܩܳܥܝܳܐ ܕܕܰܗܒܰܐ ܗ̱ܘ܆ ܓܰܒܝܳܐ ܕܠܳܐ ܡܽܘܡܳܐ ܒܪܺܝܟ ܕܰܓܒܳܝܗ̱ܝ܀

ܐܳܘ ܠܰܐܬܠܺܝܛܳܐ ܕܶܐܬܟܪܰܗ܆ ܘܰܚܕܺܝ ܒܟܺܐܒܶܗ ܡܶܢ ܚܽܘܠܡܳܢܳܐ܆ ܐܳܘ ܠܰܓܡܺܝܪܳܐ ܕܶܐܨܛܪܶܟ܆ ܘܰܗܘܳܐ ܥܽܘܬܪܶܗ ܡܶܣܟܺܢܽܘܬܳܐ܆ ܐܶܢ ܐܶܨܛܰܥܰܪ܆ ܩܪܳܝܗ̱ܝ ܐܺܝܩܳܪܳܐ܆ ܘܶܐܢ ܐܶܬܝܰܩܰܪ܆ ܚܰܫܒܶܗ ܨܰܥܪܳܐ܆ ܠܒܰܪܨܰܘܡܳܐ ܛܽܘܒܰܘܗ̱ܝ܆ ܕܶܐܢ ܝܰܩܪܽܘܗ̱ܝ ܒܟܳܐ ܗ̱ܘܳܐ܆ ܘܰܐܝܟܳܐ ܕܡܶܨܛܰܥܰܪ ܕܳܐܶܨ ܗ̱ܘܳܐ܀

ܟܽܘܪܳܐ ܒܰܚܪܶܗ ܒܟܽܠ ܙܒܰܢ܆ ܕܰܪ̈ܓܺܝܓܳܬܳܐ ܘܠܳܐ ܐܶܬܪܰܦܺܝ܆ ܘܢܶܫܒܰܬ ܪܽܘܚܳܐ ܕܠܺܝܚܬܳܐ܆ ܕܟܳܦܽܘܪܽܘܬܳܐ ܘܠܳܐ ܒܰܕܰܪܬܶܗ܆ ܡܶܢ ܛܰܠܝܽܘܬܶܗ܆ ܒܚܰܪܬܶܗ ܢܽܘܪܳܐ܆ ܕܰܪ̈ܓܺܝܓܳܬܳܐ܆ ܘܠܳܐ ܐܶܬܚܰܪܰܟ܆ ܒܙܰܒܢܳܐ ܕܣܰܝܒܽܘܬܶܗ܆ ܛܽܘܥܝܰܝ ܚܠܳܦ ܢܽܘܪܳܐ܆ ܒܩܳܬܶܗ ܘܠܳܐ ܚܰܠܶܦ ܕܰܟܝܽܘܬܶܗ܀

ܡܰܠܟܳܐ ܒܕܳܪܰܢ ܦܢܳܐ ܗ̱ܘܳܐ܆ ܐܰܪܝܳܐ ܒܥܳܒܳܐ ܘܬܰܒܰܪ ܘܰܫܕܳܐ܆ ܘܰܗܘܳܬ ܥܰܡܶܗ ܡܰܠܟܬܳܐ܆ ܚܰܝܘܰܬ ܫܶܢܳܐ ܒܓܰܘ ܡܰܪܥܺܝܬܳܐ܆ ܘܰܗܘܰܘ ܕܺܐܒ̈ܶܐ܆ ܪ̈ܳܥܰܘܳܬܳܐ܆ ܘܰܒܢܺܝ̈ܒܰܝܗܽܘܢ. ܒܰܣܒܶܣܘ ܠܥܳܢ̈ܗܽܘܢ܆ ܠܒܰܪܨܰܘܡܳܐ ܛܽܘܒܰܘܗ̱ܝ܆ ܕܰܐܝܟ ܨܶܦܪܳܐ ܒܛܽܘܪܳܐ܆ ܐܶܙܰܠ ܫܟܶܢ ܐܰܝܟ ܠܽܘܛ ܘܶܐܬܦܰܠܰܛ܀

ܪ̈ܦܰܝܳܐ ܘܝܰܥ̈ܢܶܐ ܕܶܐܬܦܟܰܪܘ܆ ܒܰܪ̈ܓܺܝܓܳܬܳܐ ܕܰܥܠܰܝܡܽܘܬܳܐ܆ ܡܛܰܘ ܠܣܰܝܒܽܘܬܳܐ ܘܶܐܬܦܟܰܪܘ܆ ܡܶܢ ܛܳܥܝܽܘܬܳܐ ܕܰܒܝܰܘ̈ܡܳܬܰܢ܆ ܦܶܟܪܰܬ ܡܰܠ̈ܟܶܐ܆ ܘܕܳܫܰܬ ܐܶܢܽܘܢ܆ ܘܛܶܦܚܰܬ ܣܳܡܰܬ܆ ܟܳܗ̈ܢܶܐ ܒܥܶܩ̈ܒܶܝܗ̇܆ ܕܳܫܰܬ ܠܰܐܒܺܝ̈ܠܶܐ܆ ܘܒܰܣܪܰܬ ܠܨܰܝ̈ܳܡܶܐ܆ ܛܽܘܒܰܘܗ̱ܝ ܠܒܰܪܨܰܘܡܳܐ ܕܶܐܬܢܰܨܰܚ܀

ܒܦܰܓܪܳܟ ܘܰܕܡܳܟ ܗܰܝܡܢܶܬ܆ ܕܺܐܝܬ ܚܽܘܣܳܝܳܐ ܠܰܒ̈ܢܰܝ ܐ̱ܢܳܫ̈ܳܐ܆ ܒܡܰܘܬܳܟ ܐܰܘܕܺܝܬ ܘܰܐܫܪܶܬ܆ ܕܗܽܘ ܢܽܘܚܳܡܰܐ ܗ̱ܘ ܕܰܒ̈ܢܰܝ ܐܳܕܳܡ܆ ܕܠܳܐ ܦܰܠܶܓܬܶܗ܆ ܠܰܬܪܶܝܢ ܣܶܕܩܺܝ̈ܢ܆ ܠܳܐ ܬܶܦܠܓܰܝܢܝ܆ ܡܶܢ ܡܰܠܟܽܘܬܳܟ܆ ܠܥܰܒܕܳܟ ܒܰܪܨܰܘܡܳܐ܆ ܟܰܠܶܠܬ ܐܰܝܟ ܫܶܡܥܽܘܢ܆ ܘܰܥܠܰܝ ܥܒܶܕ ܪ̈ܰܚܡܶܐ ܐܰܝܟ ܙܰܟܰܝ܀

ܐ̱ܚܪܺܢܳܐ

ܩܳܠܳܐ ܒܩ̄: ܦܰܪܕܰܝܣܳܐ
ܒܝܰܘܡܳܐ ܕܶܐܬܝܰܠܕܶܬ ܫܶܡܫܳܐ ܡܰܪܩܶܕ

ܥܽܘܢܺܝܬܳܐ: ܫܽܘܒܚܳܐ ܠܗܰܘ ܕܰܓܒܳܟ ܓܰܒܝܳܐ ܒܰܪܨܰܘܡܳܐ܆ ܘܰܐܘܪܶܒ ܕܽܘܟܪܳܢܳܟ ܒܰܫܡܰܝܳܐ ܘܒܰܐܪܥܳܐ.

ܐܰܢ̱ܬ ܡܳܪܝ ܒܛܰܝܒܽܘܬܳܟ܆ ܕܰܚܙܰܝܬܳܝܗ̱ܝ ܠܥܰܒܕܳܟ܆ ܕܚܳܫܰܚ ܕܢܶܗܘܶܐ ܠܶܗ ܡܳܐܢܳܐ ܠܬܶܫܒܽܘܚܬܳܟ܆ ܐܰܓܥܶܠܬ ܒܶܝܬ ܐܺܝ̈ܕܰܘܗ̱ܝ܆ ܥܽܘܬܪܳܐ ܕܣܺܝ̈ܡܳܬܳܟ܆ ܕܢܶܬܶܠ ܘܰܢܦܰܠܶܓ ܠܰܕܒܳܥܶܝ݉ܢ܆ ܠܡܰܪ̈ܥܶܐ ܚܽܘܠܡܳܢܳܐ܆ ܘܠܰܐܠܺܝ̈ܨܶܐ ܢܦܺܐܫܳܐ܆ ܠܓܰܪ̈ܒܶܐ ܕܽܘܟܳܝܳܐ܆ ܘܰܠܡܺܝ̈ܬܶܐ ܩܝܳܡܬܳܐ܀

ܒܚܰܝܠܳܐ ܕܪܽܘܚܩܽܘܕܫܳܐ܆ ܡܶܬܬܙܺܝܥ ܗ̱ܘܳܐ ܟܽܠܝܽܘܡ܆ ܓܰܒܝܳܐ ܒܰܪܨܰܘܡܳܐ܆ ܘܣܳܥܰܪ ܗ̱ܘܳܐ ܚܰܝ̈ܠܶܐ܆ ܡܰܚܶܐ ܗ̱ܘܳܐ ܡܺܝ̈ܬܶܐ܆ ܘܟܳܠܶܐ ܗ̱ܘܳܐ ܘܡܰܥܒܰܪ܆ ܫܰܒ̈ܛܶܐ ܘܡܰܚ̈ܘܳܬܳܐ ܒܟܽܠــ݉ܙܒܰܢ܆ ܘܢܶܣ̈ܝܽܘܢܶܐ ܥܰܣ̈ܩܶܐ܆ ܘܟܰܦ̈ܢܶܐ ܘܡܰܘ̈ܬܳܢܶܐ܆ ܒܪܺܝܟܽ ܗ̱ܘ ܕܝܰܗ̱ܒ ܒܺܐܝ̈ܕܰܘܗ̱ܝ܆ ܕܗܳܠܶܝܢ ܢܶܣܥܽܘܪ ܗ̱ܘܳܐ܀

ܓܒܶܐ ܗ̱ܘܰܝܬ ܐܳܘ ܐܰܒܽܘܢ܆ ܓܰܒܝܳܐ ܒܰܪܨܰܘܡܳܐ܆ ܕܬܶܗܘܶܐ ܠܪܽܘܚܩܽܘܕܫܳܐ ܢܰܘܣܳܐ ܘܒܳܟ ܬܶܫܪܶܐ܆ ܐܰܝܟ ܓܰܒܝܳܐ ܫܡܽܘܐܶܝܠ ܪܰܒܳܐ ܒܰܢ̈ܒܺܝܶܐ܆ ܕܺܝܪܶܒ ܘܶܐܬܢܰܨܰܚ ܒܟܽܠــ݉ܙܒܰܢ܆ ܗܳܟܰܢܳܐ ܐܳܦ ܐܰܢ̱ܬ܆ ܝܺܪܶܒܬ ܘܶܐܬܢܰܨܰܚܬ܆ ܟܽܠܗܽܘܢ ܝܰܘ̈ܡܳܬܳܟ ܩܽܘܕܡܰܬ ܒܳܪܽܘܝܳܟ܀

ܚܰܝ̈ܶܐ ܪ̈ܽܘܚܳܢܶܐ܆ ܟܽܠܝܽܘܡ ܚܳܝܶܐ ܗ̱ܘܰܝܬ܆ ܒܨܰܘܡܳܐ ܘܒܰܨܠܽܘܬܳܐ ܘܫܰܗܪ̈ܶܐ ܐܰܡܺܝ̈ܢܶܐ܆ ܒܟܰܦܢܳܐ ܘܰܒܨܰܗܝܳܐ܆ ܘܥܰܡ̈ܠܶܐ ܕܦܽܘܪܫܳܢܳܐ܆ ܠܡܳܪܳܟ ܡܩܰܪܶܒ ܗ̱ܘܰܝܬ ܒܟܽܠــ݉ܙܒܰܢ܆ ܘܰܚܠܳܦ ܕܽܘܒܳܪ̈ܰܝܟ܆ ܕܰܫܦܰܪܘ ܩܕܳܡ ܡܳܪܳܟ܆ ܒܰܥܕܶܢ ܕܒܽܘ̈ܣܳܡܶܐ܆ ܡܚܰܕܶܐ ܘܡܰܦܨܰܚ ܠܳܟ܀

ܠܡܰܠܟܽܘܬܳܐ ܕܪܰܘܡܳܐ܆ ܕܠܳܗ̇ ܗ̱ܘ ܙܰܡܶܢܬܳܝܗ̱ܝ܆ ܠܓܰܒܝܳܐ ܒܰܪܨܰܘܡܳܐ܆ ܐܳܘ ܡܳܪܳܐ ܛܳܒܳܐ܆ ܙܰܡܶܢ ܘܰܠܟܶܢ̈ܫܶܐ܆ ܕܶܐܬܰܘ ܘܶܐܬܛܰܝܰܒܘ܆ ܕܰܢܙܰܝܚܽܘܢ ܠܥܺܐܕܶܗ ܒܚܰܕܽܘ݉ܬܳܐ܆ ܕܥܰܡܶܗ ܢܶܬܒܰܣܡܽܘܢ܆ ܒܡܰܠܟܽܘܬܳܐ ܕܪܰܘܡܳܐ܆ ܘܢܶܥܠܽܘܢ ܠܰܓܢܽܘܢܳܐ ܕܰܡܠܶܐ ܚܰܕ̈ܘܳܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܽܘܡ ܦܰܘܠܳܘܣ
ܡܶܢ ܥܳܠܡܳܐ ܡܶܕܶܡ ܠܳܐ ܟܰܢܫܶܬ

ܥܽܘܢܺܝܬܳܐ: ܕܽܘܟܪܳܢܳܟ ܐܰܒܽܘܢ ܠܒܽܘܪ̈ܟܳܬܳܐ܆ ܘܰܨܠܽܘܬܳܟ ܫܽܘܪܳܐ ܠܢܰܦ̈ܫܳܬܰܢ.

ܢܶܣܝܽܘ̈ܢܶܐ ܨܰܒܬܽܘܗ̱ܝ ܕܨܶܒܝܳܢܳܐ܆ ܘܰܐܓܽܘܢܳܐ ܟܰܠܠܶܗ ܕܚܺܐܪܽܘܬܳܐ܆ ܚܺܐܪܽܘܬܶܗ ܨܰܒܬܰܬ ܘܟܰܠܶܠܬܶܗ܆ ܘܥܰܡ̈ܠܰܘܗ̱ܝ ܕܶܝܢ ܥܰܡ ܨܰܘܡܶܗ ܕܰܟܝܳܐ܆ ܐܳܘ ܓܰܒܪܳܐ ܪܓܺܝܓܳܐ܆ ܡܛܰܟܣܳܐ ܘܦܳܪܽܘܫܳܐ܆ ܕܚܺܐܪܽܘܬܶܗ ܙܗܺܝܬܳܐ܆ ܨܰܒܬܰܬ ܨܠܺܝܒܽܘܬܶܗ܆ ܐܳܘ ܗܰܘܢܳܐ ܡܝܰܬܒܳܐ ܒܰܪ ܚܺܐܪ̈ܶܐ܆ ܕܨܶܒܝܳܢܶܗ ܠܳܐ ܨܒܳܐ ܕܢܶܫܬܰܦܰܠ܀

ܢܰܦ̈ܫܳܬܳܐ ܕܩܰܠܣܽܘܗ̱ܝ ܠܒܰܪܨܰܘܡܳܐ܆ ܥܰܡ ܟܶܢ̈ܫܶܐ ܕܡܰܠܰܐܟ̈ܶܐ ܢܗܰܠܠܽܘܢ܆ ܘܟܽܠ ܐܰܝܠܶܝܢ ܕܳܐܬܶܝܢ ܠܒܶܝܬ ܨܰܘܒܶܗ܆ ܠܦܰܪܕܰܝܣܳܐ ܢܡܰܢܥܽܘܢ ܕܠܶܗ ܥܳܐܶܠ܆ ܬܽܘܒ ܘܳܐܦ ܥܰܠܠܳܢ̈ܶܐ܆ ܕܙܰܝܚܽܘܗ̱ܝ ܓܙܳܪ̈ܰܝܗܽܘܢ܆ ܒܰܨܠܺܝܒܳܐ ܚܰܝܳܐ܆ ܢܕܰܒܪܽܘܢ ܡܰܪܥܺܝܬܗܽܘܢ܆ ܘܰܩܝܳܡܳܐ ܢܰܟܦܳܐ ܕܩܳܡܘ ܩܽܘܕܡܰܘܗ̱ܝ܆ ܒܰܪ ܡܰܠܟܳܐ ܢܣܰܬܰܪ ܠܗܽܘܢ ܒܟܶܢܦܰܘ̈ܗ̱ܝ܀

ܠܳܟ ܛܽܘܒܰܝܟ ܓܰܒܝܳܐ ܒܰܪܨܰܘܡܳܐ܆ ܟܡܳܐ ܚܰܡܣܶܢܬ ܒܟܰܦܢܳܐ ܘܰܒܨܰܗܝܳܐ܆ ܘܠܳܐ ܪܰܛܶܢܬ ܒܟܽܠܗܽܘܢ ܝܰܘ̈ܡܳܬܳܟ܆ ܕܠܰܫܡܰܝܳܐ ܥܰܠܺܝܬ ܪܶܥܝܳܢܳܟ܆ ܕܬܰܡܳܢ ܬܶܬܒܰܣܰܡ܆ ܘܬܶܪܘܰܙ ܒܟܽܠܥܶܕܳܢ܆ ܐܰܝܟܳܐ ܕܠܳܐ ܡܰܡܠܶܟ ܚܰܫܳܐ ܘܟܰܪܝܽܘܬܳܐ܆ ܘܗܳܐ ܢܛܺܝܪ ܠܳܟ ܐܰܓܪܳܐ ܕܕܽܘܒܳܪ̈ܰܝܟ܆ ܨܶܝܕ ܡܳܪܳܟ ܕܰܥܒܰܕܬ ܨܶܒܝܳܢܶܗ܀

ܡܶܢ ܝܰܘܡܳܐ ܕܰܐܚܒܳܗ̇ ܠܥܺܝܪܽܘܬܳܐ܆ ܘܠܳܐ ܦܶܠܓܶܗ ܕܠܺܠܝܳܐ ܢܳܡ ܘܰܕܡܶܟ܆ ܘܡܶܢ ܝܰܘܡܳܐ ܕܶܐܬܢܙܰܪ ܕܠܳܐ ܠܰܚܡܳܐ܆ ܠܳܐ ܢܶܦܠܰܬ ܚܶܛܬܳܐ ܒܓܰܘ ܦܽܘܡܶܗ܆ ܘܡܶܢ ܝܰܘܡܳܐ ܕܰܐܪܦܺܝ܆ ܛܥܳܡܬܳܐ ܕܙܰܪ̈ܥܽܘܢܶܐ܆ ܠܳܐ ܩܰܒܶܠ ܡܶܢ ܙܢܶܝ̈ܗ̇܆ ܕܦܰܕܳܢܳܐ ܡܶܡܬܽܘܡ܆ ܘܡܶܢ ܕܟܰܕ ܣܳܡ ܕܶܐܣܛܠܶܗ ܢܗܶܐ ܣܰܩܳܐ܆ ܘܠܳܐ ܝܰܘܡܳܐ ܘܫܳܥܬܳܐ ܠܒܶܫ ܥܰܡܪܳܐ܀

ܬܶܫܒܽܘܚܬܳܐ ܠܡܳܪܝܳܐ ܩܪܰܒܬܳܢܳܐ܆ ܕܗܽܘ ܚܰܣܢܶܗ ܘܫܰܦܠܶܗ ܠܫܰܒܳܝܳܐ܆ ܘܒܰܪܨܰܘܡܳܐ ܕܶܐܫܬܘܺܝ ܠܒܽܘ̈ܣܳܡܶܐ܆ ܢܶܬܒܰܣܰܡ ܥܰܡ ܒܪܳܐ ܕܪܳܚܶܡ ܠܶܗ܆ ܘܳܐܡܽܘܪܳܐ ܕܒܰܕܩܳܗ̇܆ ܠܗܳܕܶܐ ܬܰܫܥܺܝܬܳܐ܆ ܢܶܫܒܽܘܩ ܠܶܗ ܡܳܪܝܳܐ܆ ܐܶܫܛܳܪܳܐ ܕܚܰܘ̈ܒܰܘܗ̱ܝ܆ ܘܟܽܠ ܕܰܠܐܺܝ ܘܰܡܫܰܡܶܫ ܒܥܺܐܕܶܗ܆ ܢܶܬܚܰܣܽܘܢ ܚܰܘ̈ܒܰܘܗ̱ܝ ܒܒܳܥ̈ܘܳܬܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܐ ܩܛܺܝܠܽ ܗ̱ܘ

ܥܽܘܢܺܝܬܳܐ: ܦܽܘ̈ܡܶܐ ܘܠܶܫܳܢ̈ܶܐ ܕܟܽܠ ܝܺܠܺܝ̈ܕܶܐ܆ ܢܶܬܠܽܘܢ ܬܶܫܒܽܘܚܬܳܐ ܠܡܳܪܝܳܐ ܕܰܓܒܳܟ.

ܗܳܢ ܕܰܐܘܟܶܡ ܓܽܘܫܡܶܗ ܐܰܝܟ ܗܶܢ̈ܕܘܳܝܶܐ܆ ܡܶܢ ܚܽܘܡܳܐ ܕܫܶܡܫܳܐ ܘܩܽܘܪܳܐ ܕܣܰܬܘܳܐ܆ ܘܠܳܐ ܣܳܟ ܐܰܡܶܐܢ ܗ̱ܘܳܐ ܐܰܘ ܐܰܫܦܶܠ ܗ̱ܘܳܐ܆ ܕܰܒܚܽܘܒܳܐ ܕܡܳܪܶܗ ܕܠܰܩ ܪܶܥܝܳܢܶܗ܀

ܣܥܰܪ ܚܰܝ̈ܠܶܐ ܬܡܺܝ̈ܗܶܐ ܐܳܦ ܐܳܬܘ̈ܳܬܳܐ܆ ܘܬܰܠܡܶܕ ܗ̱ܘܳܐ ܚܰܢ̈ܦܶܐ ܕܠܳܐ ܡܶܢܝܳܢܳܐ܆ ܐܰܦܢܺܝ ܗ̱ܘܳܐ ܥܰܡ̱̈ܡܶܐ ܘܰܐܥܡܶܕ ܐܶܢܽܘܢ܆ ܘܚܰܘܺܝ ܠܗܽܘܢ ܫܪܳܪܳܐ ܕܗܰܝܡܳܢܽܘܬܳܐ܀

ܫܰܦܠܶܗ ܗ̱ܘܳܐ ܠܚܰܝܠܶܗ ܕܰܒܥܶܠܕܰܪܳܐ܆ ܘܪܰܨܶܗ ܗ̱ܘܳܐ ܠܪܺܝܫܶܗ ܒܰܨܠܺܝܒ ܢܽܘܗܪܳܐ܆ ܒܰܙܥܳܗ̇ ܗ̱ܘܳܐ ܠܟܰܪܣܶܗ ܕܗܰܘ ܚܰܪܡܳܢܳܐ܆ ܘܰܐܦܩܳܗ̇ ܗ̱ܘܳܐ ܠܡܶܪܬܳܐ ܕܰܛܡܺܝܪܳܐ ܒܶܗ܀

ܒܥܰܝܢܳܐ ܕܪܶܥܝܳܢܶܗ ܚܳܪ ܟܰܣܝܳܐܺܝܬ܆ ܠܪܰܘܡܳܐ ܠܘܳܬ ܡܳܪܶܗ ܘܰܚܙܳܐ ܬܰܡܳܢ܆ ܟܶܢ̈ܫܶܐ ܕܡܰܠܰܐܟ̈ܶܐ ܐܳܦ ܕܰܣܪ̈ܳܦܶܐ܆ ܕܰܡܫܰܡܫܺܝܢ ܩܽܘܕܡܰܘܗ̱ܝ ܩܰܕܺܝܫܳܐܺܝܬ܀

ܡܳܐ ܫܰܦܺܝܪ ܗ̱ܘܳܐ ܠܶܗ ܠܡܳܪܝ ܒܰܪܨܰܘܡܳܐ܆ ܟܰܕ ܣܳܐܶܡ ܒܽܘܪܟܳܐ ܩܕܳܡ ܐܰܠܳܗܳܐ܆ ܘܫܳܐܶܠ ܗ̱ܘܳܐ ܡܶܢܶܗ ܒܕܶܡ̈ܥܶܐ ܘܚܰܫܳܐ܆ ܕܰܢܒܰܛܶܠ ܪܽܘܓܙܳܐ ܡܶܢ ܒܢܰܝ̈ܢܳܫܳܐ܀

ܣܶܕܪ̈ܶܐ ܕܡܰܠܰܐܟ̈ܶܐ ܚܳܪܘ ܘܰܚܙܰܐܽܘܗ̱ܝ܆ ܕܡܰܩܪܶܒ ܥܰܡ ܒܺܝܫܳܐ ܓܰܢ̱ܒܳܪܳܐܺܝܬ܆ ܬܗܰܪܘ ܗ̱ܘܰܘ ܒܰܩܪܳܒܶܗ ܕܰܟܡܳܐ ܩܫܶܐ ܗ̱ܘܳܐ܆ ܘܝܰܗ̱ܒܘ ܗ̱ܘܰܘ ܠܶܗ ܛܽܘܒܳܐ ܟܡܳܐ ܚܰܡܣܶܢ ܗ̱ܘܳܐ܀

ܩܰܒܶܠ ܒܳܥܽܘܬܰܢ ܐܳܘ ܡܪܰܚܡܳܢܳܐ܆ ܘܰܫܡܰܥ ܠܰܨܠܽܘܬܰܢ ܡܳܪܰܢ ܝܶܫܽܘܥ܆ ܘܰܐܫܦܰܥ ܒܰܐܪ̈ܥܳܬܰܢ ܟܽܠ ܒܽܘܪ̈ܟܳܬܳܐ܆ ܘܚܰܣܳܐ ܚܰܘ̈ܒܳܬܰܢ ܪܳܚܶܡ ܐ̱ܢܳܫ̈ܳܐ܀

ܫܰܝܢܳܐ ܘܰܫܠܳܡܳܐ ܫܰܐܠ ܠܰܢ ܐܰܒܽܘܢ܆ ܡܶܢ ܡܳܪܳܟ ܓܰܒܝܳܐ ܡܳܪܝ ܒܰܪܨܰܘܡܳܐ܆ ܘܰܒܝܰܕ ܒܳܥ̈ܘܳܬܳܟ ܢܶܗܘܽܘܢ ܪ̈ܰܚܡܶܐ܆ ܥܰܠ ܟܶܢܫܳܐ ܕܙܰܝܰܚ ܝܽܘܡ ܥܰܕܥܺܐܕܳܟ܀

ܨܠܺܝܒܳܐ ܕܗܽܘ ܫܰܝܶܢ ܪܰܘܡܳܐ ܘܥܽܘܡܩܳܐ܆ ܘܒܶܗ ܗܽܘ ܐܶܬܬܰܩܰܢ̈ܝ ܟܽܠ ܒܶܪ̈ܝܳܬܳܐ܆ ܗܽܘ ܢܶܗܘܶܐ ܫܽܘܪܳܐ ܠܥܺܕܰܬ ܩܽܘܕܫܳܐ܆ ܒܰܨܠܽܘܬܶܗ ܕܓܰܒܝܳܐ ܡܳܪܝ ܒܰܪܨܰܘܡܳܐ܀

ܣܽܘܓܺܝܬܳܐ

ܩܳܠܳܐ ܒܩ̄: ܐܰܝܠܶܝܢ ܩ̈ܳܠܶܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܓܒܳܟ ܘܟܰܠܶܠ ܘܢܰܨܚܳܟ ܡܳܪܝ ܒܰܪܨܰܘܡܳܐ ܬܡܺܝܗ ܒܰܐܬܠܺܝ̈ܛܶܐ.

ܚܽܘܒܳܐ ܬܰܒܥܰܢܝ ܕܺܐܡܰܪ ܫܰܪܒܶܗ܆ ܕܡܳܪܝ ܒܰܪܨܰܘܡܳܐ ܩܕܳܡ ܫܳܡܽܘ̈ܥܶܐ܆ ܐܰܢ̱ܬ ܡܳܪܝ ܗܰܒܠܺܝ ܩܳܠܳܐ ܘܡܶܠܬܳܐ܆ ܕܣܳܦܩܳܐ ܬܡܰܠܶܠ ܥܰܠ ܫܰܦܺܝܪܳܐ܀

ܬܰܘ ܫܳܡܽܘ̈ܥܶܐ ܕܗܰܝܡܳܢܽܘܬܳܐ܆ ܗܰܒܘ ܠܺܝ ܨܰܘܬܳܐ ܕܰܐܥܶܠ ܫܰܪܒܶܗ܆ ܕܣܳܒܳܐ ܙܰܗܝܳܐ܆ ܘܶܐܫܬܰܥܶܐ ܠܟܽܘܢ ܥܰܠ ܕܽܘܒܳܪ̈ܰܘܗ̱ܝ ܪ̈ܽܘܚܳܢܳܝܶܐ܀

ܗܰܒܘ ܠܺܝ ܨܰܘܬܳܐ ܘܗܰܒܘ ܡܰܫܡܰܥܬܳܐ܆ ܕܨܳܝܬܳܐ ܠܡܶܠܰܬܝ ܐܳܘ ܦܳܪ̈ܽܘܫܶܐ܆ ܘܟܶܢ ܐܳܡܰܪ ܐ̱ܢܳܐ ܒܰܙܥܽܘܪ̈ܝܳܬܳܐ܆ ܫܰܪܒܶܗ ܪܰܒܳܐ ܕܰܡܠܶܐ ܬܶܗܪܳܐ܀

ܠܰܬܡܺܝ̈ܗܳܬܶܗ ܠܳܐ ܣܳܦܶܩ ܐ̱ܢܳܐ܆ ܕܺܐܡܰܪ ܐܶܢܶܝܢ ܐܰܝܟ ܕܺܐܝܬܰܝܗܶܝܢ܆ ܕܪ̈ܳܡܶܢ ܐܶܢܶܝܢ ܡܶܢ ܠܶܫܳܢܳܐ܆ ܐܶܥܒܰܪ ܡܶܢܗܶܝܢ ܨܶܝܕ ܕܰܙܥܽܘܪܺܝܢ܀

ܐܶܩܪܽܘܒ ܡܶܟܺܝܠ ܥܰܠ ܬܽܘܟܠܳܢܳܐ ܕܰܨܠܰܘ̈ܳܬܶܗ ܩܰܕܺܝ̈ܫܳܬܳܐ܆ ܕܰܐܒܳܐ ܒܪܺܝܟܳܐ ܘܰܐܕܢܰܚ ܫܰܪܒܶܗ܆ ܥܰܠ ܡܰܫܡܰܥܬܳܐ ܕܝܰܐܺܝܒܳܐ ܠܶܗ܀

ܗܳܢܳܐ ܕܰܓܒܳܝܗ̱ܝ ܪܽܘܚܳܐ ܕܩܽܘܕܫܳܐ܆ ܡܶܢ ܓܰܘ ܟܰܪܣܳܐ ܐܰܝܟ ܐܶܪܰܡܝܳܐ܆ ܢܒܺܝܳܐ ܕܬܶܗܪܳܐ ܘܰܕܕܽܘܡܳܪܳܐ܆ ܕܰܐܟܶܣ ܡܰܠ̈ܟܶܐ ܕܠܳܐ ܟܽܘܚܳܕܳܐ܀

ܗܺܝ ܓܰܒܝܽܘܬܶܗ ܝܺܕܺܝܥܳܐ ܗ̱ܘܳܬ܆ ܘܰܠܣܰܓܺܝ̈ܶܐܐ ܥܰܕܠܳܐ ܢܶܗܘܶܐ܆ ܕܩܰܕܶܡ ܒܰܕܶܩ ܚܰܕ ܙܰܕܺܝܩܳܐ܆ ܡܶܛܽܠܳܬܶܗ ܟܰܕ ܐܳܡܰܪ ܗ̱ܘܳܐ܀

ܕܒܳܬܰܪ ܩܰܠܺܝܠ ܙܰܒܢܳܐ ܐܰܚܰܝ̈܆ ܗܳܘܶܐ ܒܰܐܪܥܳܐ ܚܰܕ ܙܰܕܺܝܩܳܐ܆ ܘܰܫܡܶܗ ܕܗܳܢܳܐ ܡܰܘܪܶܒ ܡܳܪܝܳܐ܆ ܒܥܳܠܡܳܐ ܟܽܠܶܗ ܡܶܛܽܠ ܫܽܘܦܪ̈ܰܘܗ̱ܝ܀

ܘܫܰܐܠܽܘܗ̱ܝ ܐ̱ܢܳܫܺܝ̈ܢ ܕܰܫܡܶܗ ܕܗܳܢܳܐ܆ ܢܺܐܡܰܪ ܠܗܽܘܢ ܘܰܢܚܰܘܶܐ ܠܗܽܘܢ܆ ܘܗܺܝ ܕܰܓܠܳܐ ܠܶܗ ܡܳܪܝܳܐ ܐܶܡܰܪ܆ ܕܒܰܪܨܰܘܡܳܐ ܫܡܶܗ ܡܳܐ ܕܡܶܬܺܝܠܶܕ܀

ܐܰܫܰܪܘ ܐܰܚܰܝ̈ ܕܠܳܐ ܩܳܐܶܡ ܒܶܗ܆ ܒܥܳܠܡܳܐ ܟܽܠܶܗ ܓܰܒܪܳܐ ܐܰܝܟ ܗܰܘ܆ ܒܰܡܝܰܬܪܽܘܬܳܐ ܘܙܰܕܺܝܩܽܘܬܳܐ܆ ܐܶܡܰܪ ܝܰܘܣܶܦ ܥܰܠ ܒܰܪܨܰܘܡܳܐ܀

ܟܰܕ ܕܶܝܢ ܐܶܬܳܐ ܘܰܡܛܳܐ ܙܰܒܢܳܐ܆ ܕܒܶܗ ܢܶܬܺܝܠܶܕ ܡܳܪܝ ܒܰܪܨܰܘܡܳܐ܆ ܦܩܰܕ ܐܰܠܳܗܳܐ ܘܶܐܬܺܝܠܶܕ ܗ̱ܘܳܐ܆ ܘܶܐܬܬܥܺܝܩ ܒܺܝܫܳܐ ܕܰܚܙܳܝܗ̱ܝ ܕܺܝܠܺܝܕ܀

ܡܶܬܚܰܫܰܒ ܗ̱ܘܳܐ ܣܰܓܺܝ̈ܐܳܬܳܐ ܐܳܟܶܠܩܰܪܨܳܐ ܡܶܛܽܠܳܬܶܗ܆ ܕܰܐܝܟܰܢ ܢܺܐܒܰܕ ܒܓܶܕܫܳܐ ܡܶܕܶܡ܆ ܘܢܶܓܗܶܐ ܡܶܢܶܗ ܟܰܕ ܝܰܠܽܘܕܰܐ ܗ̱ܘ܀

ܡܶܢ ܕܟܰܕ ܫܰܡܥܶܗ ܐܳܟܶܠܩܰܪܨܳܐ܆ ܠܗܰܘ ܕܶܐܬܢܰܒܺܝ ܥܰܠ ܒܰܪܨܰܘܡܳܐ܆ ܝܺܕܰܥ ܒܺܝܫܳܐ ܕܡܶܕܶܡ ܪܰܒܳܐ܆ ܐܺܝܬܰܘܗ̱ܝ ܫܰܪܒܶܗ ܘܰܕܚܶܠ ܡܶܢܶܗ܀

ܟܰܕ ܪܳܕܶܐ ܗ̱ܘܳܐ ܗܽܘ ܒܰܪܨܰܘܡܳܐ܆ ܒܚܰܕ ܡܶܢ ܝܰܘܡܺܝ̈ܢ ܘܳܐܙܶܠ ܠܚܰܩܠܳܐ܆ ܕܒܰܪ ܣܳܛܳܢܳܐ ܠܟܰܠ̈ܒܶܐ ܕܥܳܢ̈ܳܐ܆ ܘܙܰܝܶܢ ܐܶܢܽܘܢ ܥܰܠ ܝܰܠܽܘܕܳܐ܀

ܘܰܣܒܰܟܘ ܥܠܰܘܗ̱ܝ ܟܰܠ̈ܒܶܐ ܦܰܩܪ̈ܶܐ܆ ܐܰܝܟ ܚܰܝ̈ܘܳܬܳܐ ܚܰܒܳܠܳــ̈ܬܳܐ܆ ܘܓܳܪܺܝܢ ܗ̱ܘܰܘ ܠܶܗ ܘܰܡܢܰܬܫܺܝܢ ܠܶܗ܆ ܘܫܳܕܶܝܢ ܗ̱ܘܰܘ ܠܶܗ ܗܳܢܳܐ ܠܗܳܢܳܐ܀

ܟܰܕ ܕܶܝܢ ܫܰܒܪܳܐ ܒܰܝܢܳܬ ܟܰܠ̈ܒܶܐ܆ ܪܡܶܐ ܗ̱ܘܳܐ ܒܚܰܩܠܳܐ ܚܙܰܐܽܘܗ̱ܝ ܐ̱ܢܳܫܺܝ̈ܢ܆ ܘܰܢܣܰܒܘ ܚܽܘܛܪ̈ܶܐ ܘܰܐܫܩܶܠܘ ܘܶܐܙܰܠܘ܆ ܘܡܶܢ ܦܽܘܡ ܟܰܠ̈ܒܶܐ ܠܫܰܒܪܳܐ ܐܰܥܕܺܝܘ܀

ܚܳܪܘ ܘܰܚܙܰܐܽܘܗ̱ܝ ܒܦܽܘܡܳܐ ܕܟܰܠ̈ܒܶܐ܆ ܘܰܣܒܰܪܘ ܥܠܰܘܗ̱ܝ ܕܡܺܝܬ ܡܶܢ ܟܰܕܽܘ܆ ܘܶܐܬܒܰܩܺܝܘ ܒܶܗ ܡܶܢ ܕܰܚܙܰܐܽܘܗ̱ܝ܆ ܘܫܽܘܡܬܳܐ ܒܦܰܓܪܶܗ ܠܳܐ ܐܶܬܚܰܙܝܰܬ܀

ܘܗܳܐ ܡܶܢ ܗܳܕܶܐ ܝܺܕܰܥ ܒܺܝܫܳܐ܆ ܕܡܳܐܢܰܐ ܗ̱ܘ ܓܰܒܝܳܐ ܘܢܰܘܣܳܐ ܕܪܽܘܚܳܐ܆ ܘܚܰܝܠܳܐ ܟܰܣܝܳܐ ܠܘܶܐ ܠܝܰܠܽܘܕܳܐ܆ ܘܗܽܘ ܡܢܰܛܰܪ ܠܶܗ ܡܶܢ ܢܶܟ̈ܝܳܢܶܐ܀

ܘܳܐܦ ܗܽܘ ܫܰܒܪܳܐ ܐܶܣܬܰܟܰܠ ܗ̱ܘܳܐ܆ ܕܳܐܬܳܐ ܗ̱ܝ ܗܳܕܶܐ ܕܝܰܗ̱ܒܠܶܗ ܡܳܪܝܳܐ܆ ܕܰܒܢܶܣ̈ܝܽܘܢܶܐ ܪܰܘܪ̈ܒܶܐ ܢܶܦܶܠ܆ ܘܠܳܐ ܡܶܬܢܰܟܪܝܳܐ ܫܰܪܺܝܪܽܘܬܶܗ܀

ܗܳܐ ܡܶܢ ܗܳܝܕܶܝܢ ܫܰܪܺܝ ܫܰܒܪܳܐ܆ ܓܰܒܝܳܐ ܘܪܰܒܳܐ ܡܳܪܝ ܒܰܪܨܰܘܡܳܐ܆ ܕܰܡܕܰܒܰܪ ܠܶܗ ܚܰܝܠܳܐ ܟܰܣܝܳܐ܆ ܘܰܡܫܰܘܫܶܛ ܠܶܗ ܒܰܡܝܰܬܪܽܘܬܳܐ܀

ܡܶܢ ܛܰܠܝܽܘܬܶܗ ܫܰܪܺܝ ܒܥܰܡ̈ܠܶܐ܆ ܕܰܡܝܰܬܪܽܘܬܳܐ ܘܩܰܕܺܝܫܽܘܬܳܐ܆ ܒܨܰܘܡܳܐ ܪܰܒܳܐ ܐܳܦ ܒܰܨܠܽܘܬܳܐ܆ ܕܗܺܝ ܗ̱ܝ ܥܶܠܬܳܐ ܕܟܽܠ ܛܳܒ̈ܳܬܳܐ܀

ܠܥܶܠ ܡܶܢ ܫܽܘܥܳܐ ܕܗܰܝܡܳܢܽܘܬܳܐ܆ ܣܳܡ ܒܶܢܝܳܢܶܗ ܐܰܝܟ ܚܰܟܺܝܡܳܐ܆ ܕܡܳܐ ܕܛܳܪܶܐ ܒܶܗ ܝܰܡܳܐ ܒܓܰܠ̱̈ܠܰܘܗ̱ܝ܆ ܠܳܐ ܢܶܙܕܰܥܙܰܥ ܡܶܢ ܡܰܚ̈ܫܽܘܠܶܐ܀

ܒܪܺܝܫ ܒܶܢܝܳܢܶܗ ܣܳܡ ܩܰܕܡܳܝܰܬ܆ ܟܺܐܦܳܐ ܓܒܺܝܬܳܐ ܕܺܐܝܬܶܝܗ̇ ܗܳܕܶܐ܆ ܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ܆ ܗܳܝ ܕܰܐܟܪܶܙܘ ܠܰܢ ܐܰܒܳܗ̈ܳܬܳܐ܀

ܘܰܐܠܘܶܬ ܥܳܡܳܗ̇ ܘܰܐ̱ܚܪ̈ܳܢܝܳܬܳܐ܆ ܣܰܓܺܝ̈ܳܐܬܳܐ ܕܛܳܒ ܫܰܦܺܝܪ̈ܳܢ܆ ܣܰܒܪܳܐ ܪܰܒܳܐ ܘܚܽܘܒܳܐ ܕܰܟܝܳܐ܆ ܘܟܽܠ ܕܽܘܒܳܪ̈ܶܐ ܕܙܰܕܺܝܩܽܘܬܳܐ܀

ܡܶܢ ܕܰܒܢܳܐ ܗ̱ܘܳܐ ܠܗܰܘ ܒܶܢܝܳܢܶܗ܆ ܪܽܘܚܳܢܳܝܳܐ ܒܰܡܗܺܝܪܽܘܬܶܗ܆ ܢܫܰܒ̈ܝ ܒܶܗ ܪ̈ܽܘܚܶܐ ܥܰܙܺܝ̈ܙܳܬܳܐ܆ ܘܠܳܐ ܐܰܟ̈ܝܳܝܗ̱ܝ ܗ̱ܘܰܝ̈ ܕܰܡܫܰܪܰܪ ܗ̱ܘܳܐ܀

ܫܰܦܺܝܪ ܗ̱ܘܳܐ ܠܶܗ ܟܰܕ ܩܳܐܶܡ ܗ̱ܘܳܐ܆ ܐܰܝܟ ܥܰܡܽܘܕܳܐ ܕܢܽܘܗܪܳܐ ܓܰܐܝܳܐ܆ ܠܥܶܠ ܡܶܢ ܩܰܘܡܳܐ ܕܟܺܐܦܳܐ ܪܰܒܬܳܐ܆ ܘܡܰܢܗܰܪ ܙܺܝܘܶܗ ܠܰܐܪܒܰܥ ܦܶܢ̈ܝܳܢ܀

ܫܰܦܺܝܪ ܗ̱ܘܳܐ ܠܶܗ ܕܰܡܨܰܠܶܐ ܗ̱ܘܳܐ܆ ܘܒܳܥܶܐ ܪ̈ܰܚܡܶܐ ܡܶܢ ܐܰܠܳܗܳܐ܆ ܥܰܠ ܚܰܛܳܝ̈ܶܐ ܕܠܳܐ ܢܺܐܒܕܽܘܢ ܡܳܪܝ܆ ܒܰܚ̈ܛܳܗܰܝܗܽܘܢ ܐܶܢ ܦܳܩܶܕ ܐܰܢ̱ܬ܀

ܫܰܦܺܝܪ ܗ̱ܘܳܐ ܠܶܗ ܕܰܡܨܰܠܶܐ ܗ̱ܘܳܐ܆ ܕܢܰܡܠܶܟ ܫܰܝܢܳܐ ܒܥܳܠܡܳܐ ܟܽܠܶܗ܆ ܘܬܶܒܛܰܠ ܚܰܪܒܳܐ ܡܶܢ ܐ̱ܢܳܫܽܘܬܳܐ܆ ܕܫ̈ܺܐܕܶܐ ܒܺܝ̈ܫܶܐ ܘܡܰܠ̈ܟܶܐ ܚܰܢ̈ܦܶܐ܀

ܫܰܦܺܝܪ ܗ̱ܘܳܐ ܠܶܗ ܕܰܡܨܰܠܶܐ ܗ̱ܘܳܐ܆ ܡܶܛܽܠ ܐܰܪܥܳܐ ܕܠܳܛܳܗ̇ ܡܳܪܝܳܐ܆ ܕܬܶܬܶܠ ܦܺܐܪ̈ܶܐ ܘܟܽܠ ܥܰܠ̈ܠܳܬܳܐ܆ ܠܰܒ̈ܢܰܝܢܳܫܳܐ ܕܰܒܗܽܘܢ ܢܺܚܽܘܢ܀

ܫܰܦܺܝܪ ܗ̱ܘܳܐ ܠܶܗ ܕܰܡܨܰܠܶܐ ܗ̱ܘܳܐ܆ ܥܰܠ ܥܺܕ̈ܳܬܳܐ ܩܰܕܺܝ̈ܫܳܬܳܐ܆ ܕܢܶܙܓܽܘܪ ܡܶܢܗܶܝܢ ܒܰܪ ܐܰܠܳܗܳܐ܆ ܟܽܠ ܗܶܪ̈ܶܣܺܝܣ ܕܰܓ̈ܳܠܳܬܳܐ܀

ܫܰܦܺܝܪ ܗ̱ܘܳܐ ܠܶܗ ܕܰܡܨܰܠܶܐ ܗ̱ܘܳܐ܆ ܥܰܠ ܕܰܝܪ̈ܳܬܳܐ ܘܥܰܠ ܕܰܝܪ̈ܳܝܶܐ܆ ܕܢܶܗܘܽܘܢ ܥܺܝܪܺܝܢ ܡܳܐ ܕܰܡܨܰܠܶܝܢ܆ ܩܕܳܡ ܐܰܠܳܗܳܐ ܐܰܝܟ ܡܰܠܰܐܟ̈ܶܐ܀

ܫܰܦܺܝܪ ܗ̱ܘܳܐ ܠܶܗ ܕܰܡܨܰܠܶܐ ܗ̱ܘܳܐ܆ ܡܶܛܽܠ ܟܰܪ̈ܟܶܐ ܘܰܡ̈ܕܺܝܢܳܬܳܐ܆ ܕܢܶܙܓܽܘܪ ܡܳܪܝܳܐ ܡܶܢ ܥܰܡ̱̈ܡܰܝܗܶܝܢ܆ ܟܽܠ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ܀

ܫܰܦܺܝܪ ܗ̱ܘܳܐ ܠܶܗ ܕܰܡܨܰܠܶܐ ܗ̱ܘܳܐ܆ ܡܶܛܽܠ ܬܶܓ̈ܡܶܐ ܕܺܝܚܺܝ̈ܕܳܝܶܐ܆ ܕܠܳܐ ܢܶܬܓܰܢܒܽܘܢ ܡܶܢ ܣܳܛܳܢܳܐ܆ ܒܝܰܕ ܚܽܘ̈ܬܚܳܬܰܘܗ̱ܝ ܝܳܗ̈ܒܰܝ ܡܰܘܬܳܐ܀

ܫܰܦܺܝܪ ܗ̱ܘܳܐ ܠܶܗ ܕܰܡܨܰܠܶܐ ܗ̱ܘܳܐ܆ ܥܰܠ ܓܰܕܽܘ̈ܕܶܐ ܘܰܒܬܽܘ̈ܠܳܬܳܐ܆ ܕܠܳܐ ܒܫܽܘܕܳܠܰܘ̈ܗ̱ܝ ܕܳܐܟܶܠܩܰܪܨܳܐ܆ ܢܺܐܒܰܕ ܫܽܘܦܪܳܐ ܕܰܒܬܽܘܠܽܘܬܗܽܘܢ܀

ܫܰܦܺܝܪ ܗ̱ܘܳܐ ܠܶܗ ܕܰܡܨܰܠܶܐ ܗ̱ܘܳܐ܆ ܡܶܛܽܠ ܥܰܪܣܳܐ ܕܫܰܘܬܳܦܽܘܬܳܐ܆ ܕܠܳܐ ܒܛܰܡܽܐܘܬܳܐ ܕܓܰܘܪܳܐ ܣܰܢܝܳܐ܆ ܬܶܪܕܶܐ ܐܶܠܳܐ ܒܩܰܕܺܝܫܽܘܬܳܐ܀

ܫܰܦܺܝܪ ܗ̱ܘܳܐ ܠܶܗ ܕܰܡܨܰܠܶܐ ܗ̱ܘܳܐ܆ ܥܰܠ ܟܽܠܒܰܪܢܳܫ ܓܰܘܳܢܳܐܺܝܬ܆ ܘܚܰܘܺܝ ܒܗܳܕܶܐ ܕܰܟܝܽܘܬ ܠܶܒܶܗ܆ ܩܕܳܡ ܐܰܠܳܗܳܐ ܥܰܒܕܳܐ ܛܳܒܳܐ܀

ܫܰܦܺܝܪ ܗ̱ܘܳܐ ܠܶܗ ܟܰܕ ܐܳܙܶܠ ܗ̱ܘܳܐ܆ ܠܓܰܘ ܐܽܘܪܫܠܶܡ ܠܰܡܨܰܠܳܝܽܘ܆ ܘܡܰܐܣܶܐ ܟܺܐܒ̈ܶܐ ܥܰܡ ܟܽܘܪ̈ܗܳܢܶܐ܆ ܕܰܒܢܰܝ̈ܢܳܫܳܐ ܕܡܶܬܓܰܘܣܺܝܢ ܒܶܗ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܩܳܡ ܒܰܐܓܽܘܢܳܐ ܕܚܺܝܠܳܐ ܕܰܕܡܳܐ܆ ܓܰܒܝܳܐ ܘܪܰܒܳܐ ܡܳܪܝ ܒܰܪܨܰܘܡܳܐ܆ ܟܰܕ ܡܶܬܟܰܬܰܫ ܥܰܡ ܣܳܛܳܢܳܐ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܩܳܡ ܒܰܨܠܽܘܬܳܐ ܩܕܳܡ ܐܰܠܳܗܳܐ܆ ܘܠܳܐ ܐܶܬܪܰܦܺܝ ܐܰܘ ܡܶܐܢܰܬ ܠܶܗ܆ ܒܚܰܕ ܡܶܢ ܥܰܡ̈ܠܰܘܗ̱ܝ ܐܰܓܽܘܢܺܝܣܛܳܐ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܥܰܙܺܝ ܒܨܰܘܡܳܐ ܣܳܒܳܐ ܙܰܗܝܳܐ܆ ܘܠܳܐ ܛܥܶܡ ܠܰܚܡܳܐ ܗܰܘ ܨܰܝܳܡܳܐ܆ ܕܙܺܝܘܶܗ ܕܡܳܪܝܳܐ ܡܦܰܛܶܡ ܗ̱ܘܳܐ ܠܶܗ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܕܢܶܫܬܶܐ ܡܰܝ̈ܳܐ ܠܳܐ ܨܒܳܐ ܓܰܒܝܳܐ܆ ܕܪܽܘܚܳܐ ܕܩܽܘܕܫܳܐ ܡܰܫܩܶܐ ܗ̱ܘܳܐ ܠܶܗ܆ ܡܶܢ ܡܰܒܽܘ̈ܥܶܐ ܒܪ̈ܺܝܟܶܐ ܕܰܥܕܶܢ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܐܶܣܰܪ ܗܰܘܢܶܗ ܩܽܘܕܡܰܬ ܡܳܪܶܗ܆ ܟܰܕ ܡܶܬܓܰܐܶܐ ܐܳܦ ܡܶܬܒܰܣܰܡ܆ ܒܙܺܝܘܳܐ ܘܗܶܕܪܳܐ ܕܥܰܠ ܦܰܪܨܽܘܦܶܗ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܣܺܝܡ ܗ̱ܘܳܐ ܡܳܪܝܳܐ ܩܽܘܕܡܰܬ ܥܰܝܢܰܘ̈ܗ̱ܝ܆ ܘܒܶܗ ܚܳܐܰܪ ܗ̱ܘܳܐ ܐܰܡܺܝܢܳܐܺܝܬ܆ ܘܠܶܗ ܚܳܙܶܐ ܗ̱ܘܳܐ ܒܓܰܘ ܬܰܪܥܺܝܬܶܗ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܥܺܝܪ ܗ̱ܘܳܐ ܘܩܳܐܶܡ ܥܰܠ ܬܶܫܡܶܫܬܶܗ܆ ܕܠܳܐ ܢܶܬܚܰܠܰܨ ܡܶܢ ܣܳܛܳܢܳܐ܆ ܘܢܺܐܒܕܽܘܢ ܥܰܡ̈ܠܰܘܗ̱ܝ ܘܰܢܙܺܝܪܽܘܬܶܗ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܠܳܐ ܫܳܠܶܐ ܗ̱ܘܳܐ ܡܶܢ ܦܽܘܠܚܳܢܳܐ܆ ܕܥܰܡ ܐܰܠܳܗܳܐ ܗܰܘ ܟܰܫܺܝܪܳܐ܆ ܒܰܕܡܽܘܬ ܝܳܪܬܳܐ ܘܰܒܪܳܐ ܛܳܒܳܐ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܥܰܒܕܶܗ ܡܳܪܝܳܐ ܢܰܘܣܳܐ ܕܰܟܝܳܐ܆ ܘܥܰܠ ܘܰܥܡܰܪ ܒܶܗ ܐܳܦ ܕܰܝܰܪ ܒܶܗ܆ ܒܝܰܕ ܓܶܠ̈ܝܳܢܰܘܗ̱ܝ ܐܰܠܳܗܳܝ̈ܶܐ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܙܳܡܪܳܐ ܗ̱ܘܳܬ ܒܶܗ ܪܽܘܚܳܐ ܕܩܽܘܕܫܳܐ܆ ܙܡܳܪܳܐ ܚܰܠܝܳܐ ܐܳܦ ܗܰܢܺܝܐܳܐ܆ ܕܰܚܠܶܐ ܘܒܰܣܺܝܡ ܐܰܝܟ ܗܶܪ̈ܽܘܡܶܐ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܥܰܒܕܶܗ ܠܦܰܓܪܶܗ ܐܰܝܟ ܩܺܝܬܳܪܳܐ܆ ܕܢܳܩܫܳܐ ܗ̱ܘܳܬ ܒܶܗ ܨܶܒܥܳܐ ܕܪܽܘܚܳܐ܆ ܢܩܳܫܳܐ ܕܡܰܥܪܶܩ ܫ̈ܺܐܕܶܐ ܒܩܳܠܰܘ̈ܗ̱ܝ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܨܠܽܘܬܶܗ ܕܦܽܘܡܶܗ ܠܳܐ ܒܳܛܠܳܐ ܗ̱ܘܳܐ܆ ܥܰܡ ܡܰܠܰܐܟ̈ܶܐ ܚܠܰܛ ܩܺܝ̈ܢܳܬܶܗ܆ ܐܳܦ ܢܶܥ̈ܡܳܬܶܗ ܗܰܢܺܝ̈ܐܳܬܳܐ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܫܽܘܒܚܳܐ ܕܦܽܘܡܶܗ ܠܳܐ ܫܳܠܶܐ ܗ̱ܘܳܐ܆ ܕܪܶܚܡܰܬ ܡܳܪܶܗ ܕܳܠܩܳܐ ܗ̱ܘܳܬ ܒܶܗ܆ ܒܗܰܘ ܢܰܨܺܝܚܳܐ ܘܣܳܒܳܐ ܙܰܗܝܳܐ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܥܰܡ ܟܶܢܫܰܝ̈ܗܽܘܢ ܕܰܒܢܰܝ̈ ܢܽܘܗܪܳܐ܆ ܐܰܣܪܶܗ ܠܗܰܘܢܶܗ ܘܰܐܠܦܶܗ ܫܶܠܝܳܐ܆ ܕܪܳܬܶܡ ܫܽܘܒܚܳܐ ܠܡܳܪܝܳܐ ܕܰܓܒܳܝܗ̱ܝ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܣܳܥܰܪ ܗ̱ܘܳܐ ܠܗܶܝܢ ܠܰܡ̈ܕܺܝܢܳܬܳܐ܆ ܒܰܕܡܽܘܬ ܐܳܣܝܳܐ ܛܥܺܝܢ ܣܰܡ̱̈ܡܳܢܶܐ܆ ܡܳܐ ܕܰܒܛܺܝܠ ܠܶܗ ܥܰܠ ܕܰܟܪܺܝܗܺܝܢ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܟܰܕ ܪܳܕܶܐ ܗ̱ܘܳܐ ܒܰܐܬܪ̈ܰܘܳܬܳܐ܆ ܠܥܰܡ̱̈ܡܶܐ ܚܰܢ̈ܦܶܐ ܘܰܠܛܳܥܰܝ̈ܳܐ܆ ܠܘܳܬ ܐܰܠܳܗܳܐ ܡܰܦܢܶܐ ܗ̱ܘܳܐ ܠܗܽܘܢ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܚܰܝ̈ܠܶܐ ܬܡܺܝ̈ܗܶܐ ܘܰܓܒܰܪ̈ܘܳܬܳܐ܆ ܣܥܰܪ ܐܰܠܳܗܳܐ ܒܺܐܝ̈ܕܰܝ ܥܰܒܕܶܗ܆ ܠܘܳܬ ܒܶܪ̈ܝܳܬܶܗ ܒܰܒܛܺܝܠܽܘܬܶܗ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܟܽܠ ܢܶܣ̈ܝܽܘܢܶܐ ܒܥܳܠܡܳܐ ܣܰܝܒܰܪ܆ ܡܶܛܽܠ ܚܽܘܒܶܗ ܕܒܰܪ ܐܰܠܳܗܳܐ܆ ܕܠܶܗ ܪܳܚܶܡ ܗ̱ܘܳܐ ܡܶܢ ܟܽܠ ܡܶܕܶܡ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܩܪ̈ܳܒܶܐ ܟܣܰܝ̈ܳܐ ܐܳܪܥܺܝܢ ܗ̱ܘܰܘ ܠܶܗ܆ ܡܶܢ ܣܳܛܳܢܳܐ ܠܰܐܓܽܘܢܺܝܣܛܳܐ܆ ܘܗܽܘ ܙܳܟܶܐ ܗ̱ܘܳܐ ܒܚܰܝܠܳܐ ܕܪܽܘܚܳܐ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܐܰܥܺܝܪ ܥܠܰܘܗ̱ܝ ܐܳܟܶܠܩܰܪܨܳܐ܆ ܚܣܳܡܳܐ ܣܰܢܝܳܐ ܡܶܢ ܒܰܪ̈ܳܝܶܐ܆ ܘܢܶܟܠܳܐ ܟܰܣܝܳܐ ܡܶܢ ܓܰܘܳܝ̈ܶܐ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܡܰܬܚܳܗ̇ ܠܩܶܫܬܶܗ ܗܰܘ ܢܰܨܺܝܚܳܐ܆ ܟܰܕ ܫܳܕܶܐ ܗ̱ܘܳܐ ܠܽܘܩܒܰܠ ܒܺܝܫܳܐ܆ ܓܶܐܪ̈ܶܐ ܫܢܺܝ̈ܢܶܐ ܕܰܨ̈ܠܰܘܳܬܳܐ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܒܟܽܠ ܠܽܘ̈ܠܝܳܬܳܐ ܚܰܪ̈ܺܝܦܳܬܳܐ܆ ܡܦܰܫܶܕ ܗ̱ܘܳܐ ܠܶܗ ܠܰܒܥܶܠܕܰܪܳܐ܆ ܒܚܰܝܠܳܐ ܕܪܽܘܚܳܐ ܕܰܠܘܶܐ ܗ̱ܘܳܐ ܠܶܗ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܡܚܳܝܗ̱ܝ ܗ̱ܘܳܐ ܓܰܒܝܳܐ ܠܳܐܟܶܠܩܰܪܨܳܐ܆ ܥܰܠ ܩܰܪܩܰܦܬܶܗ ܒܚܽܘܛܪܳܐ ܕܥܽܘܫܢܳܐ܆ ܕܺܐܝܬܰܘܗ̱ܝ ܗܳܢܳܐ ܨܠܺܝܒܳܐ ܚܰܝܳܐ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܣܳܡܶܗ ܡܳܪܝܳܐ ܠܳܐܟܶܠܩܰܪܨܳܐ܆ ܟܽܘܒܫܳܐ ܠܪ̈ܶܓܠܰܘܗ̱ܝ ܕܡܳܪܝ ܒܰܪܨܰܘܡܳܐ܆ ܥܰܠ ܕܰܐܡܪܰܚ ܗ̱ܘܳܐ ܕܢܰܩܪܶܒ ܥܰܡܶܗ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܨܒܳܐ ܐܰܠܳܗܳܐ ܕܢܶܗܘܶܐ ܓܰܒܝܳܐ܆ ܒܥܳܠܡܳܐ ܗܳܢܳܐ ܡܠܶܐ ܥܳܩ̈ܳܬܳܐ܆ ܘܗܳܝܕܶܝܢ ܢܶܬܬܢܺܝܚ ܡܶܢ ܛܽܘܪ̈ܳܦܰܘܗ̱ܝ܀

ܬܽܘܒ ܒܳܥܶܐ ܗ̱ܘܳܐ ܫܰܪܒܶܗ ܕܰܐܒܽܘܢ܆ ܕܢܶܬܡܰܠܰܠ ܗ̱ܘܳܐ ܒܰܐܪ̈ܺܝܟܳܬܳܐ܆ ܥܰܡܽܘܛ ܪܶܥܝܳܢܝ ܘܰܡܚܺܝܠ ܠܶܫܳܢܝ܆ ܘܟܰܪܝܳܐ ܗ̱ܝ ܡܶܠܰܬܝ ܐܰܝܟܰܢ ܬܶܗܘܶܐ܀

ܐܺܡܰܪ ܩܰܠܺܝܠ ܘܶܐܫܒܽܘܩ ܣܰܓܺܝ܆ ܘܟܶܢ ܫܳܬܶܩ ܐ̱ܢܳܐ ܡܶܢ ܩܽܘܠܳܣܰܘ̈ܗ̱ܝ܆ ܨܰܘܡܶܗ ܐܺܡܰܪ ܨܠܽܘܬܶܗ ܐܶܬܢܶܐ܆ ܐܰܘ ܕܽܘܒܳܪ̈ܰܘܗ̱ܝ ܪ̈ܽܘܚܳܢܳܝܶܐ܀

ܨܰܘܡܶܗ ܕܗܳܢܳܐ ܘܰܢܙܺܝܪܽܘܬܶܗ܆ ܥܳܒܪܳܐ ܠܥܰܡܠܳܐ ܕܟܽܠ ܩܰܕܺܝ̈ܫܶܐ܆ ܦܰܚܶܡ ܘܰܚܙܺܝ ܐܳܘ ܦܳܪܽܘܫܳܐ܆ ܗܳܝ ܕܳܐܡܰܪ ܐ̱ܢܳܐ ܘܶܐܬܒܰܩܳܐ ܒܶܗ܀

ܨܳܡ ܗ̱ܘܳܐ ܡܳܪܰܢ ܐܰܪܒܥܺܝܢ ܝܰܘ̈ܡܺܝܢ܆ ܘܰܕܪܰܫ ܐܽܘܪܚܳܐ ܩܕܳܡ ܬܰܠܡܺܝ̈ܕܰܘܗ̱ܝ܆ ܘܰܐܠܶܦ ܐܶܢܽܘܢ ܠܰܒ̈ܢܰܝ ܐ̱ܪܳܙܶܗ܆ ܕܒܶܗ ܢܶܬܕܰܡܽܘܢ ܟܰܕ ܪܳܕܶܝܢ ܒܳܗ̇܀

ܘܫܰܪܺܝܘ ܡܶܚܕܳܐ ܥܰܒ̈ܕܰܝ ܡܳܪܝܳܐ܆ ܟܽܠܚܰܕ ܡܶܢܗܽܘܢ ܒܙܰܒܢܳܐ ܕܰܡܛܳܝܗ̱ܝ܆ ܕܰܐܝܟܰܢ ܕܺܝܠܶܦ ܡܶܢ ܦܳܪܽܘܩܰܢ܆ ܢܶܪܕܶܐ ܒܽܐܘܪܚܳܐ ܕܙܰܕܺܝܩܽܘܬܳܐ܀

ܨܳܡ ܗ̱ܘܳܐ ܡܽܘܫܶܐ ܐܰܪܒܥܺܝܢ ܝܰܘ̈ܡܺܝܢ܆ ܨܳܡ ܐܶܠܺܝܳܐ ܐܰܪܒܥܺܝܢ ܝܰܘ̈ܡܺܝܢ܆ ܨܳܡ ܬܽܘܒ ܫܶܡܥܽܘܢ ܗܰܘ ܙܰܕܺܝܩܳܐ܆ ܐܰܪܒܥܺܝܢ ܝܰܘ̈ܡܺܝܢ ܥܰܠ ܐܶܣܛܽܘܢܳܐ܀

ܨܳܡ ܕܳܢܺܝܐܶܝܠ ܨܰܘܡܳܐ ܕܰܟܝܳܐ܆ ܘܓܰܒܪܳܐ ܕܪܶܓܬܳܐ ܩܪܳܝܗ̱ܝ ܡܰܠܰܐܟܳܐ܆ ܘܨܳܡܘ ܗ̱ܘܰܘ ܛܠܳܝ̈ܶܐ ܕܒܶܝܬ ܚܰܢܰܢܝܳܐ܆ ܘܡܶܢ ܓܰܘ ܢܽܘܪܳܐ ܐܶܫܬܰܘܙܰܒܘ ܗ̱ܘܰܘ܀

ܘܨܳܡܘ ܗ̱ܘܰܘ ܫܠܺܝ̈ܚܶܐ ܒܓܰܘ ܥܶܠܺܝܬܳܐ܆ ܘܩܰܒܶܠܘ ܪܽܘܚܳܐ ܦܰܪܰܩܠܺܝܛܳܐ܆ ܘܨܳܡܘ ܬܽܘܒ ܟܺܐܢ̈ܶܐ ܐܳܦ ܙܰܕܺܝ̈ܩܶܐ܆ ܘܺܝܚܺܝ̈ܕܳܝܶܐ ܐܳܦ ܥܳܢ̈ܘܳܝܶܐ܀

ܗܳܐ ܝܺܕܺܝܥܺܝܢ ܨܰܘ̈ܡܶܐ ܕܟܺܐܢ̈ܶܐ܆ ܘܰܕܙܰܕܺܝ̈ܩܶܐ ܕܥܰܠܘ ܠܰܒܪܺܝܬܳܐ܆ ܕܠܰܘ ܟܽܠ ܙܰܒܢܳܐ ܒܨܰܘܡܳܐ ܥܰܙܺܝܘ܆ ܐܶܠܳܐ ܒܫܰܒ̈ܶܐ ܘܰܒܝܰܘ̈ܡܳܬܳܐ܀

ܢܺܐܬܶܐ ܗܳܫܳܐ ܨܰܘܡܶܗ ܐܰܚܰܝ̈܆ ܕܓܰܒܝܳܐ ܘܪܰܒܳܐ ܡܳܪܝ ܒܰܪܨܰܘܡܳܐ܆ ܘܢܶܚܙܶܝܘܗ̱ܝ ܟܽܠܢܳܫ ܕܰܟܡܳܐ ܫܰܦܺܝܪ܆ ܘܢܶܬܶܠ ܛܽܘܒܳܐ ܠܣܳܒܳܐ ܙܰܗܝܳܐ܀

ܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܐܰܚܰܝ̈܆ ܠܳܐ ܛܥܶܡ ܠܰܚܡܳܐ ܐܳܦܠܳܐ ܡܰܝ̈ܳܐ܆ ܘܗܳܢܰܘ ܬܶܗܪܳܐ ܐܳܦ ܕܽܘܡܳܪܳܐ܆ ܠܰܐܝܢܳܐ ܕܚܳܐܰܪ ܦܳܪܽܘܫܳܐܺܝܬ܀

ܡܰܢ ܡܶܢ ܟܺܐܢ̈ܶܐ ܘܡܶܢ ܩܰܕܺܝ̈ܫܶܐ܆ ܕܥܰܠܘ ܠܶܗ ܠܥܳܠܡܳܐ ܘܰܢܦܰܩܘ ܡܶܢܶܗ܆ ܗܳܐ ܡܶܢ ܗܳܫܳܐ ܥܕܰܡܳܐ ܠܥܳܠܰܡ܆ ܕܠܳܐ ܛܥܶܡ ܡܰܝ̈ܳܐ ܫܢܰܝ̈ܳܐ ܚܰܡܫܺܝܢ܀

ܡܶܢ ܠܰܚܡܳܐ ܓܶܝܪ ܡܰܨܝܳܐ ܕܰܢܨܽܘܡ܆ ܐ̱ܢܳܫ ܦܳܪܽܘܫܳܐ ܐܶܢܗܽܘ ܕܨܳܒܶܐ܆ ܡܶܢ ܡܰܝ̈ܳܐ ܕܶܝܢ ܠܳܐ ܐ̱ܢܳܫ ܡܶܫܟܰܚ܆ ܠܰܡܣܰܝܒܳܪܽܘ ܚܰܡܫܺܝܢ ܫܢܰܝ̈ܳܐ܀

ܡܶܛܽܠ ܗܳܢܳܐ ܪܳܡ ܘܰܡܥܰܠܰܝ܆ ܕܰܪܓܶܗ ܕܓܰܒܝܳܐ ܡܳܪܝ ܒܰܪܨܰܘܡܳܐ܆ ܠܘܳܬ ܐܰܠܳܗܳܐ ܘܰܪܚܺܝܡ ܣܰܓܺܝ܆ ܥܰܠ ܡܰܠܰܐܟ̈ܶܐ ܘܰܒܢܰܝ̈ܢܳܫܳܐ܀

ܘܗܳܐ ܥܺܕ̈ܳܬܳܐ ܥܰܡ ܕܰܝܪ̈ܳܬܳܐ܆ ܘܰܡ̈ܕܺܝܢܳܬܳܐ ܘܥܰܡ̱̈ܡܶܐ ܕܰܒܗܶܝܢ܆ ܒܗܰܝܡܳܢܽܘܬܳܐ ܘܚܽܘܒܳܐ ܕܰܟܝܳܐ܆ ܡܝܰܩܪ̈ܳܢ ܥܺܐܕܶܗ ܕܰܐܒܳܐ ܒܪܺܝܟܳܐ܀

ܘܫܳܐܠܺܝܢ ܪ̈ܰܚܡܶܐ ܡܶܢ ܐܰܠܳܗܳܐ܆ ܒܝܽܘܡ ܕܽܘܟܪܳܢܶܗ ܟܽܠܢܳܫ ܒܰܐܬܪܶܗ܆ ܒܰܨܠܰܘ̈ܳܬܶܗ ܫܳܡܰܥ ܡܳܪܝܳܐ܆ ܠܰܕܩܳܪܶܐ ܠܶܗ ܘܰܡܚܰܣܶܐ ܠܶܗ܀

ܠܪ̈ܰܚܺܝܩܶܐ ܟܺܝܬ ܘܰܠܩܰܪ̈ܺܝܒܶܐ܆ ܣܳܥܰܪ ܓܰܒܝܳܐ ܒܰܒܛܺܝܠܽܘܬܶܗ܆ ܠܟܺܐܒ̈ܶܐ ܓܠܰܝ̈ܳܐ ܒܡܶܠܬܶܐ ܡܰܚܠܶܡ܆ ܘܚܰܫ̈ܶܐ ܕܢܰܦܫܳܐ ܒܟܶܣܝܳܐ ܫܳܒܶܩ܀

ܫܰܠܺܝܛ ܓܰܒܝܳܐ ܥܰܠ ܒܶܝܬ ܓܰܙܳܐ܆ ܕܡܳܪܝܳܐ ܡܳܪܶܗ ܠܰܡܦܰܠܳܓܽܘ܆ ܠܰܒ̈ܢܰܝ ܐ̱ܢܳܫ̈ܳܐ ܕܡܶܬܓܰܘܣܺܝܢ ܒܶܗ܆ ܘܫܳܐܠܺܝܢ ܡܶܢܶܗ ܒܗܰܝܡܳܢܽܘܬܳܐ܀

ܗܰܒ ܐܳܘ ܐܰܒܽܘܢ ܟܽܠ ܒܽܘܪ̈ܟܳܬܳܐ܆ ܩܰܕܺܝ̈ܫܳܬܳܐ ܠܟܽܠܗܽܘܢ ܬܶܓ̈ܡܶܐ܆ ܕܺܐܝܬ ܒܳܗ̇ ܒܥܺܕܬܳܐ ܡܟܺܝܪܬܶܗ ܕܰܒܪܳܐ܆ ܘܰܫܪܺܝ ܐܶܢܽܘܢ ܟܽܠܢܳܫ ܠܰܐܬܪܶܗ܀

ܒܥܺܝ ܐܳܘ ܐܰܒܽܘܢ ܡܶܢ ܐܰܠܳܗܳܐ܆ ܕܰܢܚܰܣܶܐ ܠܰܢ ܒܰܨ̈ܠܰܘܳܬܳܟ܆ ܘܰܢܫܰܘܙܶܒ ܠܰܢ ܡܶܢ ܓܺܗܰܢܳܐ܆ ܘܰܢܒܰܣܶܡ ܠܰܢ ܥܰܡ ܩܰܕܺܝܫܰܘ̈ܗ̱ܝ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܫܽܘܒܚܳܐ ܠܳܟ ܒܽܘܟܪܶܗ ܕܰܐܒܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܡܳܪܝ ܒܰܪܨܰܘܡܳܐ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܟܡܳܐ ܣܰܝܒܰܪ ܦܰܓܪܶܗ ܕܟܺܐܢܳܐ܆ ܐܽܘܠ̈ܨܳܢܶܐ ܘܥܰܡ̈ܠܶܐ ܩܫܰܝ̈ܳܐ܆ ܒܝܽܘܡ ܩܰܝܛܳܐ ܡܶܢ ܟܰܘܪ̈ܳܢܶܐ܆ ܘܰܒܣܰܬܘܳܐ ܡܶܢ ܥܰܪ̈ܦܶܠܶܐ܆ ܚܰܡܫܺܝܢ ܓܶܝܪ ܘܰܐܪܒܰܥ ܫܢܰܝ̈ܳܐ܆ ܚܰܡܣܶܢ ܒܟܰܦܢܳܐ ܘܰܒܨܰܗܝܳܐ܀

ܫܽܘܒܚܳܐ ܠܶܗ ܠܛܳܒܳܐ ܕܰܓܒܳܝܗ̱ܝ܆ ܠܩܰܕܺܝܫܳܐ ܡܳܪܝ ܒܰܪܨܰܘܡܳܐ܆ ܘܰܒܥܰܡ̈ܠܶܐ ܘܕܽܘܥ̈ܬܶܐ ܢܨܰܚ ܗ̱ܘܳܐ܆ ܘܰܒܚܽܘܒܳܐ ܘܗܰܝܡܳܢܽܘܬܳܐ܆ ܘܰܒܕܽܘܒܳܪ̈ܶܐ ܕܰܓܡܺܝܪ̈ܶܐ܆ ܫܰܠܶܡ ܪܶܗܛܳܐ ܕܝܰܘ̈ܡܳܬܶܗ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܡܳܪܝ ܒܰܪܨܰܘܡܳܐ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀