ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܣܳܗ̈ܕܰܘܗ̱ܝ ܐܰܢ̱ܬܽܘܢ
ܝܳܕܥܺܝܢܰܢ ܡܳܪܝ ܕܰܚܛܰܝܢܰܢ ܠܳܟ

ܛܶܥܢܰܬ ܡܰܪܝܰܡ ܠܰܡܕܰܒܰܪ ܟܽܠ܆ ܘܣܶܠܩܰܬ ܠܺܝܗܽܘܕ ܠܒܰܝܬܶܗ ܕܰܙܟܰܪܝܳܐ܆ ܕܥܰܡ ܐܶܠܺܝܫܒܰܥ ܬܺܐܙܰܠ ܬܶܚܙܶܐ܆ ܣܳܒܬܳܐ ܥܩܰܪܬܳܐ ܕܰܛܥܺܝܢܳܐ ܦܺܐܪܳܐ܆ ܒܪܺܝܟܽ ܗ̱ܘ ܡܳܪܝܳܐ ܕܰܓܒܳܝܗ̱ܝ ܡܶܢ ܟܰܪܣܳܐ ܕܶܐܡܶܗ܆ ܐܳܦ ܐܶܬܡܠܺܝ ܪܽܘܚܳܐ ܕܩܽܘܕܫܳܐ܀

ܫܽܘܒܚܳܐ

ܣܶܠܩܰܬ ܡܰܪܝܰܡ ܠܛܽܘܪܳܐ ܕܺܝܗܽܘܕ܆ ܘܰܛܥܺܝܢܳܐ ܠܶܗ ܠܰܛܥܺܝܢ ܟܽܠܒܶܪ̈ܝܳܢ܆ ܕܰܒܗܰܘ ܥܶܓܠܳܐ ܒܰܪ ܠܶܘܳܝ̈ܶܐ܆ ܬܺܐܙܰܠ ܬܶܚܕܶܐ ܕܰܡܕܰܝܶܨ ܒܺܝܗܽܘܕ܆ ܒܪܺܝܟܽ ܗ̱ܘ ܕܰܛܥܺܝܢ ܪܰܘܡܳܐ ܘܥܽܘܡܩܳܐ ܘܟܽܠ ܕܰܒܗܽܘܢ܆ ܘܰܠܥܰܒܕܶܗ ܐܶܬܳܐ ܕܢܶܣܥܽܘܪ܀

ܡܰܕܪܳܫܳܐ

ܩܳܠܳܐ ܒܩ̄: ܐܰܒܳܐ ܟܬܰܒ ܗ̱ܘܳܐ
ܥܰܠ ܗܰܘ ܬܰܪܥܳܐ ܒܰܪܳܝܳܐ

ܥܽܘܢܺܝܬܳܐ: ܒܪܺܝܟ ܕܰܓܒܳܐ ܠܶܗ ܟܳܪܽܘܙܳܐ܆ ܕܰܢܫܰܦܶܐ ܐܽܘܪܚܳܐ ܩܕܳܡ ܡܶܐܬܝܶܗ.

ܐܳܘ ܦܳܪ̈ܽܘܫܶܐ ܙܡܰܪܘ ܫܽܘܒܚܳܐ܆ ܠܓܰܢ̱ܒܳܪܳܐ ܕܰܐܪܟܢܽܘܗ̱ܝ ܪ̈ܰܚܡܰܘܗ̱ܝ܆ ܘܰܫܪܳܐ ܒܰܛܠܺܝܬܳܐ܆ ܕܢܶܣܥܽܘܪ ܬܰܚܬܳܝ̈ܶܐ܆ ܘܰܗܘܳܐ ܐ̱ܢܳܫܳܐ ܕܠܳܐ ܙܰܪܥܳܐ܆ ܡܶܢ ܡܰܪܝܰܡ ܒܬܽܘܠܬܳܐ ܒܪܺܝܟ ܫܡܶܗ܀

ܘܰܐܟܡܳܐ ܕܫܶܡܥܰܬ ܡܶܢ ܥܺܝܪܳܐ܆ ܐܶܳܙܰܠ̱ܬ ܗ̱ܘܳܬ ܠܒܰܝܬܶܗ ܕܰܙܟܰܪܝܳܐ܆ ܕܬܶܚܙܶܐ ܠܰܫܪܳܪܳܐ܆ ܘܬܶܚܕܶܐ ܒܥܰܩܪܽܘܬܳܐ܆ ܕܰܐܟܡܳܐ ܕܫܶܡܥܰܬ ܡܶܢ ܥܺܝܪܳܐ܆ ܬܩܰܒܶܠ ܗ̱ܘܳܬ ܠܰܫܪܳܪܳܐ ܕܣܰܒܪܳܗ̇܀

ܚܕܰܬܳܐ ܫܶܐܠܰܬ ܒܰܫܠܳܡܳܗ̇܆ ܕܶܐܠܺܝܫܒܰܥ ܥܩܰܪܬܳܐ ܕܣܶܐܒܰܬ܆ ܘܰܠܒܰܟ ܝܰܠܽܘܕܳܐ܆ ܕܰܘܨܳܐ ܦܨܺܝܚܳܐܺܝܬ܆ ܐܳܦ ܐܶܬܡܰܠܝܰܬ ܪܽܘܚ ܩܽܘܕܫܳܐ܆ ܐܶܠܺܝܫܒܰܥ ܘܰܠܡܰܪܝܰܡ ܐܶܡܪܰܬ܀

ܝܰܘܢܳܐ ܦܺܐܝܬܳܐ ܕܰܛܥܺܝܢܳܐ܆ ܗܰܘ ܢܶܫܪܶܐ ܕܩܰܫܺܝܫ ܡܶܢ ܕܳܪ̈ܶܐ܆ ܒܪܺܝܟܬܳܐ ܕܡܶܢ ܢܶܫ̈ܶܐ܆ ܛܥܺܝܢܰܬ ܓܰܢ̱ܒܳܪܳܐ܆ ܠܰܘܛܰܬ ܚܰܘܳܐ ܒܶܟܝ ܬܶܫܬܪܶܐ܆ ܘܗܳܝ ܡܶܠܬܳܐ ܕܰܒ̈ܟܺܐܒܶܐ ܬܺܐܠܕܺܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܬܬܥܺܝܪܘ ܫܳܗܪ̈ܶܐ

ܥܽܘܢܺܝܬܳܐ: ܒܪܺܝܟ ܕܰܨܒܳܐ ܘܰܗܘܳܐ܆ ܥܽܘܠܳܐ ܒܓܰܘ ܟܰܪܣܳܐ܆ ܘܰܒܝܰܠܕܶܗ ܦܰܪܩܶܗ ܠܥܳܠܡܳܐ ܡܶܢ ܠܰܘܛܬܳܐ.

ܬܪܶܝܢ ܒܰܛܢܺܝ̈ܢ ܐܰܬܡܗܽܘܢܝ܆ ܬܪܶܝܢ ܝܰܠ̈ܕܺܝܢ ܐܰܬܗܪܽܘܢܝ܆ ܕܡܰܪܝܰܡ ܘܕܶܐܠܺܝܫܒܰܥ܆ ܚܕܰܬܳܐ ܘܥܰܬܺܝܩܬܳܐ܀

ܚܕܳܐ ܣܰܬܳܐ ܕܰܐܥܬܩܰܬ܆ ܘܟܰܕ ܚܶܘܪܰܬ ܣܰܘܟܬܳܗ̇܆ ܐܰܕܺܝܩ ܠܶܗ ܣܡܳܕܪܳܐ܆ ܡܶܢ ܥܽܘܒܳܐ ܡܓܰܙܝܳܐ܀

ܚܕܳܐ ܛܥܺܝܢܳܐ ܒܡܰܪܒܥܳܗ̇܆ ܠܟܳܪܽܘܙܳܐ ܕܡܶܠܬܳܐ܆ ܕܢܶܦܽܘܩ ܘܰܢܫܰܦܶܐ܆ ܐܽܘܪܚܳܐ ܩܕܳܡ ܡܰܠܟܳܐ܀

ܬܰܘ ܠܟܽܘܢ ܐܰܚܰܝ̈ ܚܙܰܘ܆ ܚܰܕ̱̈ܬܳܬܳܐ ܕܶܐܣܬܥܰܪ̈ܝ܆ ܕܚܰܕ ܡܰܠܰܐܟܳܐ ܗܘܳܐ܆ ܡܣܰܒܪܳܢܳܐ ܕܒܰܛܢܗܶܝܢ܀

ܗܽܘ ܟܰܕ ܗ̱ܽܘ ܐܶܬܚܙܺܝ܆ ܠܰܒܬܽܘܠܬܳܐ ܘܣܰܒܪܳܗ̇܆ ܕܰܐܠܳܗܳܐ ܒܳܛܢܳܐ܆ ܘܦܳܪܽܘܩܳܐ ܝܳܠܕܳܐ܀

ܒܪܺܝܟܰܬ ܒܢܶܫ̈ܶܐ ܩܪܳܗ̇܆ ܘܛܰܝܒܽܘܬܳܐ ܐܶܫܟܚܰܬ܆ ܠܘܳܬ ܐܰܠܳܗܳܐ ܕܟܽܠ܆ ܕܰܫܪܳܐ ܒܳܗ̇ ܘܰܐܪܗܒܳܗ̇܀

ܒܩܳܠܶܗ ܣܡܰܟ ܚܰܝܠܳܗ̇܆ ܕܪܽܘܚ ܩܽܘܕܫܳܐ ܢܺܐܬܶܐ܆ ܘܚܰܝܠܶܗ ܢܰܓܶܢ ܥܠܰܝܟܝ܆ ܕܥܶܠܳܝܳܐ ܨܒܳܐ ܒܶܟܝ܀

ܗܳܢܳܐ ܠܰܡ ܝܰܪܚܳܐ܆ ܕܶܫܬܳܐ ܠܰܐܚܝܳܢܬܶܟܝ܆ ܐܶܠܺܝܫܒܰܥ ܕܶܐܬܬܨܺܝܪ܆ ܥܽܘܠܳܐ ܒܓܰܘ ܡܰܪܒܥܳܗ̇܀

ܐܶܙܰܠ̱ܬ ܟܰܕ ܚܳܕܝܳܐ܆ ܘܰܠܒܶܝܬ ܝܺܗܽܘܕ ܡܛܳܬ܆ ܘܫܶܐܠܰܬ ܟܰܕ ܪܳܘܙܳܐ܆ ܫܠܳܡܳܗ̇ ܕܒܰܪ̱ܬ ܐܰܗܪܽܘܢ܀

ܒܪܺܝܟܬܳܐ ܒܢܶܫ̈ܶܐ ܩܪܳܬ܆ ܠܡܰܪܝܰܡ ܟܰܕ ܪܳܘܙܳܐ܆ ܘܰܒܪܺܝܟܽ ܗ̱ܘ ܦܺܐܪܳܐ܆ ܕܰܒܟܰܪܣܶܟܝ ܩܳܥܝܳܐ܀

ܘܒܰܪ̱ܬ ܕܰܘܺܝܕ ܢܰܟܦܬܳܐ܆ ܛܥܺܝܢܳܐ ܒܓܰܘ ܡܰܪܒܥܳܗ̇܆ ܠܩܰܫܺܝܫ ܡܶܢ ܥܳܠ̈ܡܶܐ ܕܡܶܢ ܪܽܘܚܩܽܘܕܫܳܐ ܒܛܺܝܢ܀

ܒܰܛܢܳܟ ܡܳܪܝ ܚܰܕܝܰܢ܆ ܘܡܰܘܠܳܕܳܟ ܐܰܪܘܙܰܢ܆ ܘܰܥܡܳܕܳܟ ܐܰܦܨܚܰܢ܆ ܕܚܰܣܺܝ ܠܟܽܠ ܒܶܪ̈ܝܳܢ܀

ܒܪܺܝܟ ܐܰܒܳܐ ܕܫܰܕܪܳܟ܆ ܕܡܶܢ ܫܶܒܝܳܐ ܬܶܦܪܩܰܢ܆ ܘܡܶܢ ܦܶܗܝܳܐ ܬܟܰܢܫܰܢ܆ ܘܡܶܢ ܡܰܘܬܳܐ ܬܫܰܘܙܒܰܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܐܰܨܶܕ ܗܰܘܢܳܟ ܚܰܟܺܝܡܳܐ ܕܠܳܐ ܢܶܦܗܶܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܡܰܪܝܰܡ ܘܶܐܠܺܝܫܒܰܥ܆

ܒܰܨܠܽܘܬܗܶܝܢ ܘܰܒܒܳܥ̈ܘܳܬܗܶܝܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܐܶܙܰܠ̱ܬ ܡܰܪܝܰܡ ܒܰܪ̱ܬ ܕܰܘܺܝܕ܆ ܕܬܶܫܰܐܠ ܫܠܳܡܳܗ̇ ܕܶܐܠܺܝܫܒܰܥ܆ ܪܽܘܚ ܩܽܘܕܫܳܐ ܫܪܳܬ ܒܰܥܩܰܪܬܳܐ܆ ܕܰܐܝܡܶܟܳܐ ܠܺܝ ܐܳܦ ܗܳܕܶܐ܆ ܒܝܰܕ ܩܳܠܳܐ ܪܳܡܳܐ ܙܶܥܩܰܬ܆ ܕܡܳܪܝ ܘܶܐܡܶܗ ܢܺܐܬܽܘܢ ܨܶܐܕܰܝ܀

ܝܰܘܡܳܢ ܢܶܚܕܽܘܢ ܠܶܘܳܝ̈ܶܐ܆ ܕܚܰܕ̱̈ܬܳܬܳܐ ܗܘܰܝ̈ ܨܶܐܕܰܝܗܽܘܢ܆ ܟܰܕ ܐܶܬܺܝܠܶܕ ܝܽܘܚܰܢܳܢ܆ ܟܳܪܽܘܙܳܐ ܕܗܰܝܡܳܢܽܘܬܳܐ܆ ܘܰܙܡܰܪܘ ܫܽܘܒܚܳܐ ܘܬܰܘܕܺܝܬܳܐ܆ ܠܚܰܢܳܢܳܐ ܕܰܣܥܰܪ ܐܶܢܽܘܢ܆ ܗܳܐ ܡܶܢ ܗܳܫܳܐ ܘܰܠܥܳܠܰܡ܆ ܟܽܠ ܠܶܫܳܢܺܝ̈ܢ ܠܶܗ ܢܰܘܕܽܘܢ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܡܰܪܝܰܡ ܘܶܐܠܺܝܫܒܰܥ܆

ܒܰܨܠܽܘܬܗܶܝܢ ܘܰܒܒܳܥ̈ܘܳܬܗܶܝܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀