ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ
ܫܠܺܝ̈ܚܶܐ ܦܝܳܣܳܐ ܩܰܪܶܒܘ ܠܗܰܘ ܕܰܓܒܳܟܽܘܢ

ܗܰܘ ܕܰܐܟܪܶܙ ܐܶܫܰܥܝܳܐ ܒܰܢܒܺܝܽܘܬܶܗ܆ ܕܗܳܐ ܒܬܽܘܠܬܳܐ ܬܶܒܛܰܢ ܘܬܺܐܠܰܕ ܓܰܢ̱ܒܳܪܳܐ ܕܥܳܠ̈ܡܶܐ܆ ܗܳܐ ܣܠܶܩ ܡܶܢ ܐܰܪܥܳܐ ܨܗܺܝܬܳܐ ܐܰܝܟ ܝܰܠܽܘܕܳܐ܆ ܘܫܶܡܥܽܘܢ ܣܳܒܳܐ ܒܓܰܘ ܗܰܝܟܠܳܐ ܥܰܠ ܐܺܝ̈ܕܰܘܗ̱ܝ ܛܰܥܢܶܗ܆ ܘܰܐܦܺܝܣ ܠܶܗ ܘܗܳܟܰܢ ܐܶܡܰܪ ܠܶܗ܆ ܕܰܫܪܺܝܢܝ ܡܳܪܝ ܐܶܬܬܢܺܝܚ ܒܰܫܠܳܡܳܐ܆ ܕܗܳܐ ܚܙܰܝ̈ ܥܰܝ̈ܢܰܝ ܠܰܚܢܳܢܳܟ܆ ܡܳܪܳܐ ܕܒܶܪ̈ܝܳܬܳܐ܀

ܫܽܘܒܚܳܐ

ܥܰܠ ܕܪ̈ܳܥܰܘܗ̱ܝ ܫܰܩܠܶܗ ܫܶܡܥܽܘܢ ܒܗܰܝܟܰܠ ܩܽܘܕܫܳܐ܆ ܘܰܡܦܺܝܣ ܗ̱ܘܳܐ ܠܶܗ ܠܝܰܠܽܘܕܳܐ ܘܗܳܟܰܢ ܐܳܡܰܪ ܠܶܗ܆ ܕܰܫܪܺܝܢܝ ܡܶܢ ܚܰܝ̈ܶܐ ܕܙܰܒܢܳܐ ܕܰܚܙܺܝܬܳܟ ܡܳܪܝ܆ ܕܢܽܘܓܪܳܐ ܪܰܒܳܐ ܐܰܣܺܝܪ ܐ̱ܢܳܐ ܘܠܳܟܽ ܗ̱ܘ ܡܣܰܟܶܐ ܐ̱ܢܳܐ܆ ܗܳܫܳܐ ܡܳܪܝ ܕܰܚܙܺܝܬܳܟ ܐܶܬܬܢܺܝܚ܆ ܕܰܒܪܶܡܙܳܟ ܣܺܝܡ ܡܰܘܬܳܐ ܘܚܰܝ̈ܶܐ܆ ܒܪܺܝܟ ܕܶܐܬܳܐ ܘܰܠܟܽܠ ܚܰܪܰܪ ܒܰܡܪܰܚܡܳܢܽܘܬܶܗ܀

ܡܰܕܪܳܫܳܐ

ܩܳܠܳܐ ܒܩ̄: ܚܽܘܬܘ ܐܰܚܰܝ̈ ܪ̈ܫܺܝܡܶܐ

ܥܽܘܢܺܝܬܳܐ: ܫܽܘܒܚܳܐ ܠܗܰܘ ܕܢܰܨܪܶܗ܆ ܫܶܡܥܽܘܢ ܒܓܰܘ ܗܰܝܟܠܳܐ.

ܟܽܠ ܕܶܟܪܳܐ ܕܦܳܬܰܚ܆ ܡܰܪܒܥܳܐ ܩܰܕܺܝܫܰܐ ܗ̱ܘ܆ ܘܰܚܠܳܦܰܘܗ̱ܝ ܢܩܰܪܒܽܘܢ܆ ܩܽܘܪ̈ܒܳܢܶܐ ܫܰܠ̈ܡܶܐ܆ ܘܕܶܒ̈ܚܶܐ ܠܰܐܠܳܗܳܐ܀

ܛܥܶܢܬܶܗ ܠܓܰܢ̱ܒܳܪܳܐ܆ ܛܠܺܝܬܳܐ ܘܣܶܠܩܰܬ ܗ̱ܘܳܬ܆ ܕܰܬܩܰܪܶܒ ܚܠܳܦܰܘܗ̱ܝ܆ ܩܽܘܪܒܳܢܳܐ ܕܰܟܝܳܐ܆ ܘܕܶܒܚܳܐ ܕܠܳܐ ܡܽܘܡܳܐ܀

ܬܳܐ ܒܰܫܠܳܡ ܐܶܡܪܶܗ܆ ܚܰܝܳܐ ܕܰܐܠܳܗܳܐ܆ ܬܳܐ ܒܰܫܠܳܡ ܦܺܐܪܳܐ܆ ܚܰܕ̱ܬܳܐ ܕܰܒܬܽܘܠܬܳܐ܆ ܬܶܫܒ̈ܚܳܢ ܠܫܳܠܽܘܚܳܟ܀

ܬܳܐ ܒܰܫܠܳܡ ܚܳܐܶܢ܆ ܣܰܝܒܽܘܬܝ ܒܰܫܠܳܡܳܐ܆ ܬܳܐ ܒܰܫܠܳܡ ܫܳܪܶܐ. ܐܰܣܽܘܪ̈ܶܐ ܕܥܰܒܕܶܗ܆ ܫܽܘܒܚܳܐ ܠܰܚܢܳܢܳܟ܀

ܚܽܘܢܳܝܗ̱ܝ ܡܳܪܝ ܠܥܰܒܕܳܟ܆ ܘܰܫܪܺܝܢܝ ܒܰܫܠܳܡܳܐ܆ ܐܶܚܽܘܬ ܠܳܗ̇ ܠܰܫܝܽܘܠ܆ ܘܰܣܒܰܪܬܳܟ ܐܰܟܪܶܙ܆ ܠܡܺܝ̈ܬܶܐ ܕܰܒܩܰܒܪ̈ܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܬܩܰܛܰܠܘ ܗ̱ܘܳܐ ܝܰܠܽܘ̈ܕܶܐ

ܥܽܘܢܺܝܬܳܐ: ܠܳܟ ܫܽܘܒܚܳܐ ܡܶܢ ܟܽܠ ܦܽܘ̈ܡܺܝܢ܆ ܒܰܪ ܐܰܠܳܗܳܐ ܕܶܐܬܓܰܫܰܡ.

ܬܳܐ ܚܙܺܝ ܗܳܫܳܐ ܠܥܰܬܺܝܩܳܐ܆ ܕܰܪܡܶܐ ܩܽܘܕܡܰܬ ܝܰܠܽܘܕܳܐ܆ ܘܒܳܥܽܘܬܳܐ ܡܩܰܪܶܒ ܗ̱ܘܳܐ ܠܶܗ܆ ܕܢܶܗܘܶܐ ܢܝܳܚܳܐ ܠܣܰܝܒܽܘܬܳܐ܆ ܕܰܒܚܰܒܠܳܐ ܕܚܰܝ̈ܶܐ ܐܰܣܺܝܪ ܗ̱ܘܳܐ܆ ܕܠܳܐ ܢܶܓܫܽܘܦ ܒܶܗ ܥܽܘܢܕܳܢܳܐ܆ ܥܕܰܡܳܐ ܕܢܶܚܙܶܐ ܠܰܡܫܺܝܚܳܐ܆ ܘܫܶܠܡܰܬ ܬܰܢܘܰܝ ܕܰܐܓܥܶܠ ܠܶܗ܆ ܘܶܐܬܳܐ ܘܛܰܥܢܶܗ ܥܰܠ ܕܪ̈ܳܥܰܘܗ̱ܝ܆ ܫܽܘܒܚܳܐ ܠܳܟ ܒܰܪ ܥܶܠܳܝܳܐ܀

ܐܳܘ ܣܰܟܠܳܐ ܕܒܳܨܶܐ ܠܝܶܫܽܘܥ܆ ܕܶܐܬܺܝܠܶܕ ܡܶܢ ܒܰܪ̱ܬ ܕܰܘܺܝܕ܆ ܢܰܟܣܳܟ ܫܶܡܥܽܘܢ ܥܰܬܺܝܩܳܐ܆ ܒܰܦܝܳܣܶܗ ܕܰܠܘܳܬ ܫܰܒܪܳܐ܆ ܐܶܠܽܘܠܳܐ ܕܗܽܘܝܽܘ ܡܳܪܳܐ܆ ܕܰܒܚܰܝܠܶܗ ܛܥܺܝܢ ܒܶܪ̈ܝܳܬܳܐ܆ ܐܰܝܟܰܢ ܣܳܒܳܐ ܐܰܦܺܝܣܶܗ܆ ܕܰܫܪܺܝܢܝ ܐܶܢܽܘܚ ܥܰܠ ܥܰܦܪܳܐ܆ ܕܗܳܐ ܚܙܰܝ̈ ܥܰܝ̈ܢܰܝ ܠܰܚܢܳܢܳܟ܆ ܒܪܺܝܟ ܢܽܘܗܪܳܟ ܡܰܦܨܰܚ ܟܽܠܳܐ܀

ܩܢܰܘ ܒܳܟ ܟܽܘܡܪ̈ܶܐ ܚܽܘܣܳܝܳܐ܆ ܘܩܽܘܕܫܳܐ ܐܰܘܫܶܛܬ ܠܰܡ̈ܟܰܬܡܶܐ܆ ܐܰܥܒܰܪܬ ܕܶܒ̈ܚܶܐ ܕܒܶܝܬ ܠܶܘܺܝ܆ ܕܰܗܘܰܝܬ ܚܠܳܦܰܝܢ ܩܽܘܪܒܳܢܳܐ܆ ܘܰܐܢ̱ܬ ܠܳܟ ܩܰܪܶܒܬ ܠܝܳܠܽܘܕܳܟ܆ ܕܢܶܬܪܰܥܶܐ ܠܰܪܓܺܝܙܽܘܬܰܢ܆ ܫܰܝܶܢ ܐܰܪܥܳܐ ܒܰܡܠܳܐܳܗ̇܆ ܘܰܐܥܒܰܪ ܡܶܢ ܥܺܕܬܳܐ ܫܓܽܘ̈ܫܝܶܐ܆ ܕܠܳܐ ܢܶܣܓܽܘܢ ܒܳܗ̇ ܕܳܪ̈ܽܘܫܶܐ܆ ܠܳܟ ܫܽܘܒܚܳܐ ܟܣܶܐ ܒܝܳܠܽܘܕܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܒܳܐ ܟܬܰܒ ܗ̱ܘܳܐ
ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ ܕܰܠܡܰܠ̈ܟܶܐ

ܥܽܘܢܺܝܬܳܐ: ܒܪܺܝܟ ܚܰܝܠܳܐ ܕܰܛܥܺܝܢ ܟܽܠܳܐ܆ ܕܛܰܥܢܶܗ ܗ̱ܘܳܐ ܫܶܡܥܽܘܢ ܥܰܠ ܕܪ̈ܳܥܰܘܗ̱ܝ.

ܕܢܰܚ ܡܶܢ ܐܰܒܳܐ ܘܰܫܪܳܐ ܒܳܗ̇܆ ܙܰܠܺܝܩܳܐ ܕܡܰܢܗܰܪ ܠܶܗ ܠܥܳܠܡܳܐ܆ ܕܢܰܚ ܘܰܢܦܰܩ ܡܶܢܳܗ̇܆ ܘܰܐܦܨܰܚ ܒܶܪ̈ܝܳܬܳܐ܆ ܒܝܰܠܕܶܗ ܐܰܥܪܶܩ ܛܶܠܳــ̈ـܠܶܐ܆ ܘܰܒܕܶܢܚܶܗ ܚܶܫܽܘܟܳܐ ܐܶܬܒܠܰܥ܀

ܥܰܡ ܐܰܒܳܐ ܗ̱ܘܳܐ ܒܛܽܘܪ ܣܺܝܢܰܝ܆ ܟܰܕ ܝܳܗܶܒ ܢܳܡܽܘܣܳܐ ܠܥܳܠܡܳܐ܆ ܘܗܽܘ ܡܩܰܒܶܠ ܕܶܒ̈ܚܶܐ. ܘܝܳܗܶܒ ܚܽܘܣܳܝܳܐ܆ ܗܳܪܟܳܐ ܛܠܺܝܬܳܐ ܛܥܺܝܢܳܐ ܠܶܗ܆ ܘܰܚܠܳܦܰܘܗ̱ܝ ܡܰܝܬܝܳܐ ܩܽܘܪ̈ܒܳܢܶܐ܀

ܡܶܢ ܢܽܘܚ ܩܰܒܶܠ ܩܽܘܪ̈ܒܳܢܶܐ܆ ܘܰܒܕܶܒ̈ܚܶܐ ܠܰܐܒܪܳܗܳܡ ܐܶܬܓܠܺܝ܆ ܠܺܐܝܣܚܳܩ ܒܰܥܠܳܬܳܐ܆ ܠܝܰܥܩܽܘܒ ܒܣܶܒܠܬܳܐ܆ ܒܚܽܘܒܶܗ ܚܰܣܺܝ ܠܩܰܕܡܳܝ̈ܶܐ܆ ܘܰܒܚܰܪܬܳܐ ܒܩܽܘܪ̈ܒܳܢܶܐ ܡܶܬܓܠܶܐ܀

ܚܰܘܺܝ ܝܰܘܡܶܗ ܠܰܐܒܪܳܗܳܡ܆ ܒܺܐܝܠܳܢܳܐ ܘܰܒܕܶܟܪܳܐ ܕܶܐܬܚܙܺܝ܆ ܝܰܗ̱ܒ ܠܶܐܠܺܝܥܳܙܳܪ. ܦܶܕܬܳܐ ܕܫܰܠܡܽܘܬܳܐ܆ ܘܥܰܡ ܝܰܠܽܘ̈ܕܶܐ ܩܽܘܪ̈ܒܳܢܶܐ܆ ܠܬܰܕܟܺܝܬܳܐ ܡܰܣܶܩ ܗ̱ܘܳܐ ܠܗܰܝܟܠܳܐ܀

ܐܰܣܺܝܪ ܗ̱ܘܳܐ ܒܪܽܘܚܳܐ ܕܩܽܘܕܫܳܐ܆ ܘܰܡܣܰܟܶܐ ܠܰܡܫܺܝܚܳܐ ܫܶܡܥܽܘܢ܆ ܒܓܶܠܝܳܢܳܐ ܪܰܒܳܐ܆ ܠܡܳܪܶܗ ܚܳܐܰܪ ܗ̱ܘܳܐ܆ ܘܟܰܕ ܐܶܬܚܰܘܺܝ ܝܰܠܽܘܕܳܐ܆ ܪܬܰܚ ܣܳܒܳܐ ܘܰܡܦܺܝܣ ܠܶܗ ܒܪܶܚܡܬܳܐ܀

ܥܒܰܪܘ ܗ̱ܘܰܘ ܕܳܪ̈ܶܐ ܘܰܫ̈ܢܰܝܳܐ܆ ܘܫܽܘܘܕܳܝܳܐ ܩܳܐܶܡ ܒܡܶܠܬܳܐ܆ ܘܰܐܣܺܝܪ ܥܰܬܺܝܩܳܐ. ܘܰܡܣܰܟܶܐ ܘܚܳܐܰܪ܆ ܘܰܡܛܳܐ ܝܰܘܡܶܗ ܕܓܶܠܝܳܢܳܐ܆ ܘܰܣܘܰܚ ܠܶܗ ܘܰܐܦܺܝܣܶܗ ܕܢܶܫܬܪܶܐ܀

ܫܪܺܝܢܝ ܡܳܪܝ ܕܶܐܢܽܘܚ ܥܰܠ ܥܰܦܪܳܐ܆ ܘܶܐܣܰܒܰܪ ܠܰܩܒܺܝܪ̈ܶܐ ܟܽܠܗܽܘܢ܆ ܕܫܳܪܶܐ ܐܰܣܺܝܪ̈ܶܐ܆ ܡܳܪܝܳܐ ܡܰܛܺܝ ܠܶܗ܆ ܣܒܰܪܬܳܐ ܥܠܰܝܟܽܘܢ ܥܰܢܺܝ̈ܕܶܐ܆ ܕܗܳܐ ܒܳܬܰܪܝ ܐܳܬܶܐ ܡܢܰܚܡܳܢܟܽܘܢ܀

ܬܶܗܪܳܐ ܪܰܒܳܐ ܠܦܳܪ̈ܽܘܫܶܐ܆ ܘܰܠܚܰܢ̈ܦܶܐ ܘܝܗܽܘܕܳܝ̈ܶܐ ܒܶܗܬܬܳܐ܆ ܕܣܳܒܳܐ ܥܰܬܺܝܩܳܐ܆ ܡܦܺܝܣ ܗ̱ܘܳܐ ܠܝܰܠܽܘܕܳܐ܆ ܕܰܫܪܺܝܢܝ ܐܶܬܬܢܺܝܚ ܡܶܢ ܚܰܝ̈ܶܐ܆ ܕܗܽܘ ܐܰܣܪܶܗ ܘܰܕܢܶܫܪܶܝܘܗ̱ܝ ܦܫܺܝܩ ܠܶܗ܀

ܬܳܐ ܠܳܟ ܚܰܒܪܶܗ ܕܝܽܘܕܳܝܳܐ܆ ܕܠܳܐ ܡܰܘܕܶܐ ܕܡܳܪܶܗ ܐܶܬܺܝܠܶܕ܆ ܠܡܰܢ ܐܰܦܺܝܣ ܫܶܡܥܽܘܢ. ܕܢܶܫܪܶܝܘܗ̱ܝ ܡܶܢ ܚܰܝ̈ܶܐ܆ ܐܶܠܳܐ ܠܡܳܪܶܐ ܕܪ̈ܽܘܚܳܬܳܐ܆ ܕܗܽܘ ܐܰܣܪܶܗ ܘܰܕܢܶܫܪܶܝܘܗ̱ܝ ܦܫܺܝܩ ܠܶܗ܀

ܢܶܫܡܰܥ ܝܰܘܡܳܢ ܡܶܨܥܳܝܳܐ܆ ܒܳܥܽܘܬܶܗ ܕܗܰܘ ܣܳܒܳܐ ܡܫܰܒܚܳܐ܆ ܟܰܕ ܡܰܪܟܶܢ ܪܺܝܫܶܗ. ܘܰܣܓܶܕ ܒܰܦܝܳܣܳܐ܆ ܠܫܰܒܪܳܐ ܕܰܛܥܺܝܢ ܥܰܠ ܐܺܝ̈ܕܰܘܗ̱ܝ܆ ܕܗܽܘ ܢܡܰܠܶܐ ܡܶܕܶܡ ܕܫܶܐܠ ܗ̱ܘܳܐ܀

ܫܶܡܥܰܬ ܡܰܪܝܰܡ ܠܰܦܝܳܣܶܗ܆ ܕܗܰܘ ܣܳܒܳܐ ܕܰܒܪܽܘܚܳܐ ܡܶܬܬܙܺܝܥ܆ ܘܪܶܘܙܰܬ ܒܰܕܝܳܨܳܐ܆ ܘܗܳܟܰܢ ܐܶܡܪܰܬ ܠܶܗ܆ ܡܰܠܶܠ ܣܳܒܳܐ ܝܰܩܺܝܪܳܐ܆ ܕܰܐܝܟ ܕܶܒܫܳܐ ܚܠܶܐ ܛܰܥܡܳܐ ܕܡܶܠܬܳܟ܀

ܐܰܪܺܝܡ ܩܳܠܳܟ ܥܰܬܺܝܩܳܐ܆ ܘܚܽܘܨ ܡܶܢܰܝ̈ ܩܺܝܬܳܪܳܟ ܕܢܶܙܡܪ̈ܳܢ܆ ܒܰܙܡܳܪܳܟ ܚܰܠܝܳܐ܆ ܒܰܝܰܐ ܠܰܟܡܺܝܪܽܘܬܝ܆ ܕܗܳܐ ܒܢܰܝ̈ ܥܰܡܳܟ ܡܨܰܚܶܝܢ ܠܺܝ܆ ܒܰܙܡܳܪܳܟ ܐܰܟܶܣ ܠܣܳܢܰܐܝ̈܀

ܡܳܐ ܫܰܦܺܝܪ ܗ̱ܘܳܐ ܥܶܢܝܳܢܳܐ܆ ܕܰܛܠܺܝܬܳܐ ܘܣܳܒܳܐ ܡܝܰܩܪܳܐ܆ ܕܣܳܗ̈ܕܶܐ ܠܚܰܕ̱̈ܬܳܬܳܐ܆ ܥܒܺܝܕܺܝܢ ܗ̱ܘܰܘ ܒܡ̈ܶܠܶܐ܆ ܕܝܳܕܥܺܝܢ ܡܰܢܽܘ ܘܒܰܪ ܡܰܢܽܘ܆ ܘܗܳܐ ܡܡܰܠܠܺܝܢ ܫܰܪܒܶܗ ܒܓܰܘ ܥܳܠܡܳܐ܀

ܣܓܽܘܠܳܐ ܕܚܰܝ̈ܶܐ ܛܥܶܢ ܫܶܡܥܽܘܢ܆ ܥܰܠ ܐܺܝ̈ܕܰܘܗ̱ܝ ܡܶܢ ܣܰܬܳܐ ܒܬܽܘܠܬܳܐ܆ ܘܰܠܒܶܝܬ ܚܽܘܣܳܝܳܐ܆ ܐܰܥܠܶܗ ܒܒܽܘܪ̈ܟܳܬܳܐ܆ ܘܰܚܕܺܝ ܟܽܠܶܗ ܒܶܝܬ ܩܽܘܕܫܳܐ܆ ܒܢܽܘܩܳܝܳܐ ܕܡܶܢ ܐܰܒܳܐ ܐܶܫܬܠܰܚ܀

ܢܒܺܝܬܳܐ ܒܰܪܬܶܗ ܕܰܦܢܽܘܐܶܝܠ܆ ܡܶܢ ܫܰܒܛܳܐ ܕܳܐܫܺܝܪ ܒܰܪ ܝܰܥܩܽܘܒ܆ ܥܰܡ ܫܶܡܥܽܘܢ ܣܳܒܳܐ܆ ܥܶܠܰܬ ܠܓܰܘ ܗܰܝܟܠܳܐ܆ ܘܡܰܘܕܝܳܐ ܗ̱ܘܳܬ ܠܡܳܪܝܳܐ ܨܒܰܐܘܽܬ܆ ܕܰܒܪ̈ܰܚܡܰܘܗ̱ܝ ܣܰܥܪܳܗ̇ ܠܰܓܒܺܝܠܬܶܗ܀

ܪܶܬܚܰܬ ܚܰܢܰܐ ܒܪܽܘܚ ܩܽܘܕܫܳܐ܆ ܘܰܐܘܕܝܰܬ ܗ̱ܘܳܬ ܠܡܳܪܝܳܐ ܒܕܶܚܠܬܳܐ܆ ܘܥܰܡ ܣܳܒܳܐ ܫܶܡܥܽܘܢ܆ ܡܰܘܕܝܳܐ ܗ̱ܘܳܬ ܘܳܐܡܪܳܐ܆ ܐܳܘ ܣܽܘܟܳܝܶܗ ܕܺܝܣܪܳܐܶܝܠ܆ ܒܪܺܝܟ ܝܰܘܡܳܟ ܕܚܰܕܺܝ ܠܥܳܠܡܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܝܠܶܝܢ ܩ̈ܳܠܶܐ ܡܰܠ̈ܝܰܝ

ܥܽܘܢܺܝܬܳܐ: ܫܽܘܒܚܳܐ ܠܳܟ ܡܳܪܝ ܟܡܳܐ ܐܶܬܡܰܟܰܟܬ܆ ܘܰܠܒܶܫܬ ܦܰܓܪܳܐ ܡܶܛܽܠܳܬܰܢ.

ܐܶܬܢܰܒܺܝ ܐܶܫܰܥܝܳܐ ܘܶܐܡܰܪ. ܕܗܳܐ ܒܬܽܘܠܬܳܐ ܒܳܛܢܳܐ ܘܝܳܠܕܳܐ ܒܪܳܐ܆ ܒܶܛܢܰܬ ܓܶܝܪ ܟܰܕ ܒܬܽܘܠܬܳܐ ܐܺܝܬܶܝܗ̇܆ ܘܒܳܬܰܪ ܝܰܠܕܳܐ ܒܬܽܘܠܬܳܐ ܟܰܬܪܰܬ܀

ܗܳܢܳܐ ܕܰܫܡܶܗ ܐܺܝܬܰܘܗ̱ܝ ܫܶܡܥܽܘܢ. ܒܚܰܕ ܡܶܢ ܝܰܘ̈ܡܺܝܢ ܟܰܕ ܝܳܬܶܒ ܗ̱ܘܳܐ܆ ܘܩܳܪܶܐ ܒܰܟܬܳܒܳܐ ܕܶܐܫܰܥܝܳܐ܆ ܥܰܠ ܬܰܪܥܳܐ ܕܗܰܝܟܠܳܐ ܕܰܐܠܳܗܳܐ܀

ܛܰܦܝܶܗ ܠܰܟܬܳܒܳܐ ܘܶܐܬܬܰܢܰܚ. ܘܰܩܪܳܐ ܠܣܳܒ̈ܶܐ ܕܺܝܣܰܪ̈ܠܳܝܶܐ܆ ܝܳܕܥܺܝܬܽܘܢ ܐܳܘ ܒܢܰܝ̈ ܝܺܣܪܳܐܶܝܠ܆ ܕܰܐܠܳܗܶܗ ܕܺܐܝܣܪܳܐܶܝܠ ܚܰܕܽ ܗ̱ܘ܀

ܡܰܣܠܶܐ ܐ̱ܢܳܐ ܠܰܟܬܳܒܳܐ ܗܳܢܳܐ܆ ܘܰܠܡܰܟ̈ܬܒܳܢܰܘܗ̱ܝ ܡܶܢ ܒܶܝܬ ܩܽܘܕܫܳܐ܆ ܢܶܗܘܶܐ ܨܶܒܝܳܢܳܟ ܐܳܡܪܺܝܢ ܠܶܗ܆ ܥܰܠ ܕܰܐܣܠܺܝܬ ܡܶܠܰܘ̈ܗ̱ܝ ܕܶܐܫܰܥܝܳܐ܀

ܥܺܝܪܳܐ ܕܢܽܘܪܳܐ ܐܰܣܪܶܗ ܠܫܶܡܥܽܘܢ. ܥܕܰܡܳܐ ܕܢܶܗܘܶܐ ܦܺܐܪܳܐ ܕܚܰܝ̈ܶܐ܆ ܡܶܢ ܒܬܽܘܠܬܳܐ ܡܰܪܝܰܡ ܒܰܪ̱ܬ ܕܰܘܺܝܕ܆ ܐܰܟܡܳܐ ܕܶܐܬܢܰܒܺܝ ܕܶܐܫܰܥܝܳܐ܀

ܨܽܘܪܬܳܐ ܠܚܰܝ̈ܶܐ ܣܺܝܡ ܗ̱ܘܳܐ ܫܶܡܥܽܘܢ܆ ܠܕܳܪ̈ܶܐ ܐ̱ܚܪ̈ܳܢܶܐ ܕܠܳܐ ܢܶܬܦܰܠܓܽܘܢ܆ ܕܝܰܠܕܳܐ ܕܰܕܢܰܚ ܕܠܳܐ ܙܽܘܘܳܓܳܐ܆ ܥܰܠ ܚܰܝ̈ܶܐ ܘܡܰܘܬܳܐ ܗܽܘ ܫܰܠܺܝܛ܀

ܦܳܪܽܘܩܰܢ ܓܶܝܪ ܟܰܕ ܐܶܬܺܝܠܶܕ. ܐܰܟܡܳܐ ܕܶܐܬܢܰܒܺܝ ܐܶܫܰܥܝܳܐ܆ ܨܒܳܬ ܡܰܪܝܰܡ ܕܬܰܥܠܺܝܘܗ̱ܝ ܠܓܰܘ ܗܰܝܟܠܳܐ܆ ܐܰܝܟ ܢܳܡܽܘܣܳܐ ܕܺܝܣܰܪ̈ܠܳܝܶܐ܀

ܚܰܡܶܫܡܳܐܐ ܫܢܺܝ̈ܢ ܐܰܣܪܶܗ ܠܫܶܡܥܽܘܢ ܥܕܰܡܳܐ ܕܡܽܘܠܳܝܳܐ ܢܶܫܬܰܡܠܶܐ܆ ܘܢܺܐܬܶܐ ܠܝܰܠܕܳܐ ܡܳܪܳܐ ܕܥܳܠ̈ܡܶܐ܆ ܐܰܟܡܳܐ ܕܶܐܬܢܰܒܺܝ ܐܶܫܰܥܝܳܐ܀

ܩܰܒܠܶܗ ܗ̱ܘܳܐ ܫܶܡܥܽܘܢ ܥܰܠ ܕܪ̈ܳܥܰܘܗ̱ܝ܆ ܘܰܡܦܺܝܣ ܗ̱ܘܳܐ ܠܶܗ ܟܰܕ ܐܳܡܰܪ ܗ̱ܘܳܐ܆ ܪܰܒܽܘܬܳܐ ܗ̱ܝ ܠܺܝ ܕܰܚܙܺܝܬܳܟ ܡܳܪܝ܆ ܕܢܽܘܓܪܳܐ ܠܺܝ ܕܰܡܣܰܟܶܐ ܐ̱ܢܳܐ ܠܳܟ܀

ܫܪܺܝܢܝ ܡܶܢ ܚܰܝ̈ܶܐ ܡܦܺܝܣ ܗ̱ܘܳܐ ܫܶܡܥܽܘܢ܆ ܕܗܳܐ ܚܙܰܝ̈ ܥܰܝ̈ܢܰܝ ܚܢܳܢܳܟ ܪܰܒܳܐ܆ ܬܶܗܘܶܝܢ ܐܳܘ ܒܬܽܘܠܬܳܐ ܩܰܕܺܝܫܬܳܐ܆ ܡܰܦܽܘܠܬܳܐ ܘܰܩܝܳܡܳܐ ܪܰܒܳܐ܀

ܪܺܝܫܳܐ ܕܚܰܝ̈ܶܐ ܘܡܳܪܳܐ ܕܡܺܝ̈ܬܶܐ܆ ܫܪܺܝܢܝ ܡܶܢ ܚܰܝ̈ܶܐ ܐܶܬܬܢܺܝܚ ܒܰܫܝܽܘܠ܆ ܕܢܽܘܓܪܳܐ ܪܰܒܳܐ ܣܰܟܺܝܬ ܠܳܟ ܡܳܪܝ܆ ܕܶܐܚܙܶܝܟ ܫܰܒܪܳܐ ܫܪܺܝܢܝ ܒܰܫܠܳܡܳܐ܀

ܬܶܗܘܶܐ ܡܰܦܽܘܠܬܳܐ ܠܟܳܦܽܘܪ̈ܶܐ܆ ܘܰܩܝܳܡܬܳܐ ܠܰܢ ܕܰܐܘܕܺܝܢܰܢ ܒܳܟ܆ ܘܶܐܢܳܐ ܡܳܪܝ ܕܟܶܬܒܶܬ ܬܶܫܒܽܘܚܬܳܟ܆ ܐܰܫܘܳܢܝ ܕܶܐܩܽܘܡ ܡܶܢ ܝܰܡܺܝܢܳܟ܀

ܬܰܘܕܺܝܬܳܐ ܪܟܺܝܢܬܳܐ ܘܩܰܕܺܝܫܬܳܐ܆ ܬܶܣܰܩ ܠܳܟ ܡܳܪܝ ܒܗܳܢܳܐ ܥܺܐܕܳܐ܆ ܡܶܢ ܥܶܠܳܝ̈ܶܐ ܘܡܶܢ ܬܰܚ̈ܬܳܝܶܐ܆ ܘܡܶܢ ܫܶܡܥܽܘܢ ܣܳܒܳܐ ܘܩܰܕܺܝܫܳܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܡܫܺܝܚܳܐ ܕܰܐܣܗܶܕܘ ܥܰܠ ܩܶܛܠܶܗ

ܡܳܪܰܢ ܐܶܬܪܰܚܰܡ ܥܠܰܝܢ ܒܗܳܢܳܐ ܥܺܐܕܳܐ ܩܰܕܺܝܫܳܐ܆

ܘܰܒܗܰܘ ܥܺܐܕܳܐ ܕܠܳܐ ܥܳܒܰܪ ܐܰܩܺܝܡ ܠܰܢ ܡܶܢ ܝܰܡܺܝܢܳܟ܀

ܡܩܰܒܶܠ ܕܶܒ̈ܚܶܐ ܘܩܽܘܪ̈ܒܳܢܶܐ܆ ܬܪܶܝܢ ܦܰܪ̈ܽܘܓܶܐ ܩܰܪܶܒ ܗ̱ܘܳܐ܆ ܩܰܪܶܒ ܠܟܳܗܢܳܐ ܥܰܡ ܐܶܡܶܗ܆ ܘܩܰܒܶܠ ܡܶܢܶܗ ܥܰܡ ܐܰܒܽܘܗ̱ܝ܆ ܘܫܰܩܠܶܗ ܣܳܒܳܐ ܥܰܠ ܐܺܝ̈ܕܰܘܗ̱ܝ܆ ܘܰܡܙܰܝܰܚ ܠܶܗ ܒܶܝܬ ܩܽܘܕܫܳܐ܀

ܐܺܙܰܠ ܐܰܟܪܶܙ ܒܶܝܬ ܡܺܝ̈ܬܶܐ܆ ܘܶܐܣܰܒܰܪ ܒܶܝܬ ܥܰܢܺܝ̈ܕܶܐ܆ ܒܽܘܝܳܐܳܐ ܕܰܡܠܶܐ ܣܰܒܪܳܐ܆ ܕܦܳܪܽܘܩܳܐ ܕܢܰܚ ܡܶܢ ܡܰܪܝܰܡ܆ ܘܶܐܬܳܐ ܠܘܳܬܰܢ ܘܰܚܙܰܝܢܳܝܗ̱ܝ܆ ܘܰܗܘܳܐ ܐ̱ܢܳܫܳܐ ܒܨܶܒܝܳܢܶܗ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܗܳܢܳܐ ܥܺܐܕܳܐ ܩܰܕܺܝܫܳܐ܆

ܘܰܒܗܰܘ ܥܺܐܕܳܐ ܕܠܳܐ ܥܳܒܰܪ ܐܰܩܺܝܡ ܠܰܢ ܡܶܢ ܝܰܡܺܝܢܳܟ܀