ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܒܪܰܡܫܳܐ ܐܶܬܚܰܫܰܒ ܝܰܘܣܶܦ܆ ܕܰܠܡܰܪܝܰܡ ܡܟܺܝܪܬܶܗ ܢܶܫܪܶܐ܆ ܘܰܕܟܺܐܢܳܐ ܗ̱ܘܳܐ ܘܙܰܕܺܝܩܳܐ܆ ܠܳܐ ܨܳܒܶܐ ܗ̱ܘܳܐ ܕܰܢܦܰܪܣܶܝܗ̇܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܒܦܶܠܓܶܗ ܕܠܺܠܝܳܐ ܢܚܶܬ ܥܺܝܪܳܐ܆ ܠܘܳܬ ܝܰܘܣܶܦ ܟܺܐܢܳܐ ܒܚܶܠܡܳܐ܆ ܘܶܐܡܰܪ ܠܶܗ ܠܳܐ ܬܶܬܦܰܠܰܓ܆ ܥܰܠ ܒܰܛܢܳܗ̇ ܕܰܡܒܰܪܰܟܬܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܒܨܰܦܪܳܐ ܐܶܬܬܥܺܝܪ ܡܶܢ ܫܶܢܬܶܗ܆ ܝܰܘܣܶܦ ܟܺܐܢܳܐ ܘܶܐܬܕܰܡܰܪ܆ ܒܚܶܙܘܳܐ ܕܚܶܠܡܳܐ ܕܚܰܘܺܝ ܠܶܗ܆ ܓܰܒܪܺܐܶܝܠ ܪܺܝܫ ܡܰܠܰܐܟ̈ܶܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܥܽܘܠܳܐ ܕܩܰܫܺܝܫ ܡܶܢ ܕܳܪ̈ܶܐ܆ ܫܪܳܐ ܒܟܰܪܣܳܗ̇ ܕܡܰܠܝܰܬ ܫܽܘܦܪ̈ܶܐ܆ ܘܫܰܪܪܶܗ ܗ̱ܘܳܐ ܠܝܰܘܣܶܦ ܟܺܐܢܳܐ܆ ܕܠܳܐ ܢܶܬܦܰܠܰܓ ܥܰܠ ܒܰܛܢܳܗ̇܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܛܳܣ ܓܰܒܪܺܐܶܝܠ ܡܰܠܰܐܟܳܐ܆ ܘܰܡܛܳܐ ܨܶܝܕ ܝܰܘܣܶܦ ܟܺܐܢܳܐ܆ ܘܚܰܘܺܝ ܠܶܗ ܙܺܝܘܳܐ ܕܚܺܝܠܳܐ܆ ܕܰܒܝܰܕ ܚܶܙܘܳܐ ܢܶܣܬܰܪܰܕ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܫܽܘܒܚܳܐ ܠܰܐܒܳܐ ܩܰܕܺܝܫܳܐ܆ ܕܫܰܕܰܪ ܠܰܒܪܶܗ ܩܰܕܺܝܫܳܐ܆ ܘܶܐܬܺܝܠܶܕ ܡܶܢ ܒܰܪ̱ܬ ܕܰܘܺܝܕ܆ ܘܚܰܕܺܝ ܠܝܰܘܣܶܦ ܒܡܰܘܠܳܕܶܗ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܛܰܠܳܐ ܕܚܰܝ̈ܶܐ ܗܰܘ ܕܶܐܫܬܰܕܰܪ

ܠܶܚܫܰܬ ܡܰܪܝܰܡ܆ ܠܰܒܪܳܐ ܕܰܫܪܳܐ ܒܓܰܘ ܥܽܘܒܳܗ̇܆ ܟܰܕ ܡܶܬܟܰܫܦܳܐ ܒܰܨܠܽܘܬܳܐ܆ ܕܠܳܐ ܬܶܓܠܙܺܝܘܗ̱ܝ ܠܝܰܘܣܶܦ ܡܶܢܶܗ܆ ܕܐ̱ܪܳܙܳܐ ܕܣܰܒܪܰܢܝ ܓܰܒܪܺܐܶܝܠ܆ ܕܒܰܫܡܶܗ ܗܳܟܺܝܠ ܡܶܬܒܰܝܐܳܢ܆ ܡܳܪܳܐ ܕܶܐܡܶܗ ܓܠܺܝ ܠܝܰܘܣܶܦ܆ ܘܰܐܫܘܳܝܗ̱ܝ ܕܢܶܥܽܘܠ ܠܰܛܝܳܪܳܟ܆ ܘܢܰܟܶܣ ܠܰܐܝܠܶܝܢ ܕܥܳܫܩܺܝܢ ܠܺܝ܆ ܥܰܠ ܒܰܛܢܳܟ ܐܰܠܳܗܳܝܳܐ܀

ܫܽܘܒܚܳܐ

ܚܕܺܝ ܗ̱ܘܳܐ ܝܰܘܣܶܦ܆ ܕܶܐܣܬܰܒܰܪ ܡܶܢ ܡܰܠܰܐܟܳܐ܆ ܥܰܠ ܒܰܛܢܳܗ̇ ܕܛܽܘܒܳܢܺܝܬܳܐ܆ ܒܬܽܘܠܬܳܐ ܝܳܠܕܰܬ ܐܰܠܳܗܳܐ܆ ܘܫܰܪܺܝ ܩܳܥܶܐ ܘܰܡܫܰܒܰܚ܆ ܟܰܕ ܐܳܡܰܪ ܗ̱ܘܳܐ ܗܳܟܰܢܳܐ܆ ܣܳܓܶܕ ܐ̱ܢܳܐ ܠܳܗ̇ ܠܕܰܟܝܽܘܬܶܟܝ܆ ܒܺܐܪܬܳܐ ܕܟܺܝܬܳܐ ܕܠܳܐ ܡܽܘܡܳܐ܆ ܕܒܰܪ ܡܰܠܟܳܐ ܗܳܐ ܫܪܶܐ ܒܓܰܘܶܟܝ܆ ܗܰܘ ܕܺܐܝܬܰܘܗ̱ܝ ܒܥܽܘܒܶܗ ܕܰܐܒܽܘܗ̱ܝ܀

ܡܰܕܪܳܫܳܐ

ܩܳܠܳܐ ܒܩ̄: ܐܶܦܢܶܐ ܕܶܝܢ ܘܶܐܫܬܰܥܶܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܫܰܕܰܪ ܡܰܠܰܐܟܳܐ ܘܚܰܘܺܝ ܠܟܺܐܢܳܐ ܓܶܠܝܳܢܶܗ.

ܫܟܶܒ ܗ̱ܘܳܐ ܝܰܘܣܶܦ ܥܰܠ ܥܰܪܣܶܗ܆ ܟܰܕ ܡܶܬܩܰܠܶܐ ܒܝܰܕ ܫܶܢܬܶܗ܆ ܘܡܶܬܚܰܫܰܒ ܕܢܶܫܪܶܝܗ̇ ܠܡܰܪܝܰܡ܆ ܡܛܰܫܝܳܐܺܝܬ ܐܳܦ ܟܰܣܝܳܐܺܝܬ܆ ܘܰܢܒܰܛܶܠ ܚܶܣܕܳܐ ܕܥܰܡܳܐ܆ ܕܰܡܚܰܣܶܕ ܠܳܗ̇ ܠܰܒܬܽܘܠܬܳܐ܆ ܫܰܕܰܪ ܐܰܒܳܐ ܐܺܝܙܓܰܕܳܐ܆ ܘܰܠܝܰܘܣܶܦ ܒܚܶܠܡܳܐ ܐܰܘܕܰܥ܆ ܕܡܶܢ ܪܽܘܚܳܐ ܕܩܽܘܕܫܳܐ ܒܰܛܢܳܐ܆ ܐܰܟܡܳܐ ܕܶܐܡܰܪ ܐܶܫܰܥܝܳܐ܀

ܒܦܶܠܓܶܗ ܕܠܺܠܝܳܐ ܫܰܕܰܪ ܗ̱ܘܳܐ܆ ܡܳܪܳܐ ܕܥܺܝܪ̈ܶܐ ܠܓܰܒܪܺܐܶܝܠ܆ ܘܰܢܚܶܬ ܩܳܡ ܥܰܠ ܬܰܫܘܺܝܬܶܗ܆ ܕܟܺܐܢܳܐ ܝܰܘܣܶܦ ܟܰܕ ܕܰܡܺܝܟ܆ ܘܚܰܘܺܝ ܠܶܗ ܫܰܪܺܝܪ̈ܳܬܳܐ܆ ܡܶܛܽܠ ܒܰܛܢܳܗ̇ ܕܰܒܬܽܘܠܬܳܐ܆ ܕܗܰܘ ܕܰܫܪܶܐ ܒܳܗ̇ ܗܽܘ ܐܺܝܬܰܘܗ̱ܝ ܒܰܪ ܐܰܠܳܗܳܐ܆ ܘܰܨܒܳܐ ܕܢܶܗܘܶܐ ܒܰܪܢܳܫܳܐ܆ ܕܢܶܦܪܽܘܩ ܓܶܢܣܳܐ ܕܥܰܦܪ̈ܳܢܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܟܶܢܫܳܐ ܥܶܠܳܝܳܐ

ܥܽܘܢܺܝܬܳܐ: ܫܽܘܒܚܳܐ ܠܳܟ ܡܳܪܰܢ ܕܰܒܝܰܕ ܡܰܠܰܐܟܳܐ: ܫܰܪܰܪܬ ܠܦܽܘܠܳܓܶܗ ܕܝܰܘܣܶܦ ܗܰܘ ܟܺܐܢܳܐ.

ܐܰܢ̱ܬ ܡܳܪܝ ܐܰܠܶܦܰܝܢܝ܆ ܕܰܐܝܟܰܢ ܘܰܠܡܳܢܳܐ܆ ܕܡܶܢ ܥܽܘܒܳܐ ܒܬܽܘܠܳܐ ܫܦܰܪ ܠܳܟ ܘܶܐܬܺܝܠܶܕܬ܆ ܠܡܳܐ ܛܽܘܦܣܶܗ ܕܳܐܕܳܡ ܕܡܶܢ ܐܰܪܥܳܐ ܒܬܽܘܠܬܳܐ܆ ܕܠܳܐ ܐܶܬܦܰܠܚܰܬ ܗ̱ܘܳܬ ܥܕܰܟܺܝܠ ܐܶܬܓܒܶܠ ܗ̱ܘܳܐ܆ ܡܽܘܢ ܟܰܝ ܐܳܠܨܳܐ ܗ̱ܘܳܬ ܕܬܶܬܡܟܰܪ܆ ܠܝܰܘܣܶܦ ܗܰܘ ܟܺܐܢܳܐ ܒܰܪ ܕܰܘܺܝܕ܆ ܘܢܶܬܺܝܠܶܕ ܡܶܢܳܗ̇ ܕܠܳܐ ܓܒܰܪ܀

ܡܰܪܟܰܒܬܳܐ ܕܢܽܘܪܳܐ܆ ܒܕܶܚܠܳܐ ܛܥܺܝܢܳܐ ܠܶܗ ܘܒܽܘܪ̈ܟܶܐ ܕܶܝܢ ܡܚܺܝ̈ܠܶܐ ܛܰܥܢܳܝ̈ ܘܠܳܐ ܝܺܩܶܕܝ̈܆ ܓܺܝ̈ܓܠܶܐ ܕܓܰܘܙܰܠܬܳܐ܆ ܒܙܰܘܥܳܐ ܡܙܰܝܚܺܝܢ ܠܶܗ܆ ܒܬܽܘܠܬܳܐ ܒܰܪ̱ܬ ܕܰܘܺܝܕ ܥܰܦܶܩܬܶܗ ܘܠܳܐ ܝܶܩܕܰܬ܆ ܟܪ̈ܽܘܒܶܐ ܛܥܺܝܢܺܝܢ ܠܶܗ ܘܪܳܥܠܺܝܢ܆ ܣܪ̈ܳܦܶܐ ܡܩܰܕܫܺܝܢ ܠܶܗ ܘܟܳܘܙܺܝܢ܆ ܘܡܰܪܝܰܡ ܚܰܒܶܒܬܶܗ ܥܰܠ ܬܕܶܝ̈ܗ̇܀

ܣܽܘܓܺܝܬܳܐ ܕܥܰܠ ܡܰܪܝܰܡ ܘܝܰܘܣܶܦ

ܩܳܠܳܐ ܒܩ̄: ܐܳܘ ܥܽܘܡܪܳܐ ܕܙܰܒܢܳܐ
ܕܠܳܐ ܡܶܨܥܳܝ̈ܳܬܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܫܰܕܰܪ ܡܰܠܰܐܟܳܐ ܘܚܰܘܺܝ ܠܟܺܐܢܳܐ ܓܶܠܝܳܢܶܗ.

ܥܰܠ ܢܳܨܪܰܬ ܥܶܒܪܶܬ܆ ܘܩܳܠܶܗ ܕܝܰܘܣܶܦ ܫܳܡܰܥ ܗ̱ܘܺܝܬ܆ ܟܰܕ ܪܳܫܶܐ ܠܡܰܪܝܰܡ܆ ܘܳܐܡܰܪ ܠܳܗ̇ ܪܰܥܽܘܡܳܐܺܝܬ܆ ܐܶܡܰܪܝ ܠܺܝ ܡܰܪܝܰܡ܆ ܡܰܢ ܐܶܨܛܰܕܺܝ ܒܶܟܝ܀

ܐܳܘ ܚܰܩܠܳܐ ܒܪܺܝܟܬܳܐ܆ ܘܶܐܫܟܳܪܳܐ ܕܒܰܪܟܶܗ ܡܳܪܝܳܐ܆ ܐܰܝܢܰܘ ܐܰܟܳܪܳܐ܆ ܕܰܫܕܳܐ ܒܶܟܝ ܙܰܪܥܳܐ ܓܢܺܝܒܳܐ܆ ܐܶܡܰܪܝ ܠܺܝ ܡܰܪܝܰܡ܆ ܦܰܫܶܩ ܠܺܝ ܒܰܪ̱ܬ ܥܶܒܪ̈ܳܝܶܐ܀

ܐܳܘ ܣܰܬܳܐ ܒܬܽܘܠܬܳܐ܆ ܕܰܬܠܶܐ ܒܶܟܝ ܣܓܽܘܠܳܐ ܪܓܺܝܓܳܐ܆ ܐܰܝܢܰܘ ܦܰܠܳܚܳܐ܆ ܕܰܢܨܰܒ ܒܶܟܝ ܣܓܽܘܠܳܐ ܓܢܺܝܒܳܐ܆ ܐܶܡܰܪܝ ܠܺܝ ܡܰܪܝܰܡ܆ ܡܰܢ ܐܶܨܛܰܕܺܝ ܒܶܟܝ܀

ܐܳܘ ܝܰܘܢܳܐ ܗܕܺܝܪܬܳܐ܆ ܕܒܰܩܕܽܘܫ ܩܽܘ̈ܕܫܺܝܢ ܐܶܬܪܰܒܝܰܬ܆ ܡܰܢ ܩܰܨܶܨ ܓܶܦܰܝ̈ܟܝ܆ ܘܚܰܒܶܠ ܛܰܒ̈ܥܶܐ ܕܰܒܬܽܘ̈ܠܰܝܟܝ܆ ܐܶܡܰܪܝ ܠܺܝ ܡܰܪܝܰܡ܆ ܡܰܢܽܘ ܓܠܳܐ ܫܽܘܦܪܶܟܝ܀

ܐܳܘ ܡܰܪܓܳܢܺܝܬܳܐ܆ ܕܠܳܐ ܦܳܚܡܺܝܢ ܠܳܗ̇ ܒܶܪ̈ܽܘܠܶܐ܆ ܐܰܝܢܰܘ ܬܰܓܳܪܳܐ܆ ܫܪܳܐ ܟܺܝܣܶܗ ܘܰܬܩܰܠ ܛܺܝ̈ܡܰܝܟܝ܆ ܐܶܡܰܪܝ ܠܺܝ ܡܰܪܝܰܡ܆ ܡܰܢ ܐܶܨܛܰܕܺܝ ܒܶܟܝ܀

ܐܳܘ ܐܶܠܦܳܐ ܬܡܺܝܗܬܳܐ܆ ܛܥܺܝܢܰܬ ܓܰܙܳܐ ܫܡܰܝܳܢܳܐ܆ ܐܰܝܢܳܐ ܟܺܐܡܽܘܢܳܐ܆ ܛܰܒܥܶܟܝ ܒܰܝܢܳܬ ܡܰܚܫܽܘܠܰܘ̈ܗ̱ܝ܆ ܐܶܡܰܪܝ ܠܺܝ ܡܰܪܝܰܡ܆ ܡܰܢ ܐܶܨܛܰܕܺܝ ܒܶܟܝ܀

ܐܳܘ ܒܺܝܪܬܳܐ ܦܺܐܝܬܳܐ܆ ܕܥܰܠ ܫܶܬܶܐܣܬܳܐ ܒܰܢܝܳܐ ܗ̱ܘܳܬ܆ ܡܰܢܽܘ ܟܰܝ ܥܰܩܪܶܟܝ܆ ܘܣܳܡܶܟܝ ܒܰܐܪܥܳܐ ܕܠܰܘ̈ܛܳܬܳܐ܆ ܐܶܡܰܪܝ ܠܺܝ ܡܰܪܝܰܡ܆ ܡܰܢ ܐܶܨܛܰܕܺܝ ܒܶܟܝ܀

ܘܶܐܢܗܽܘ ܕܦܳܩܶܕ ܐܰܢ̱ܬ܆ ܟܰܕ ܗܳܕܶܐ ܥܠܰܝ ܡܶܬܪܰܥܶܝܬ܆ ܕܒܽܘܪ ܠܺܝ ܘܰܐܘܒܶܠܰܝܢܝ܆ ܠܡܰܝ̈ܳܐ ܒܚܺܝܪ̈ܶܐ ܕܒܽܘܚܪܳܢܳܐ܆ ܕܰܒܗܽܘܢ ܡܶܬܒܰܚܪ̈ܳܢ܆ ܓܰܝܳܪ̈ܳܬܳܐ ܕܺܝܣܪܳܐܶܝܠ܀

ܗܳܝܕܶܝܢ ܦܽܘܩܕܳܢܶܗ܆ ܕܡܳܪܳܐ ܕܥܺܝܪ̈ܶܐ ܐܶܣܬܰܪܗܰܒ܆ ܘܰܪܡܰܙ ܠܡܰܠܰܐܟܳܐ܆ ܘܨܶܝܕ ܝܰܘܣܶܦ ܟܺܐܢܳܐ ܢܚܶܬ ܗ̱ܘܳܐ܆ ܠܰܒܒܶܗ ܘܶܐܡܰܪ ܠܶܗ܆ ܕܠܳܐ ܬܶܕܚܰܠ ܐܳܘ ܒܰܪ ܕܰܘܺܝܕ܆ ܕܗܰܘ ܕܰܫܪܶܐ ܒܡܰܪܝܰܡ܆ ܗܽܘܝܽܘ ܡܳܪܳܐ ܕܰܫܡܰܝܳܐ܀

ܟܰܕ ܗܳܕܶܐ ܫܡܰܥ ܗ̱ܘܳܐ܆ ܝܰܘܣܶܦ ܟܺܐܢܳܐ ܘܙܰܕܺܝܩܳܐ܆ ܦܽܘܩܕܳܢܳܐ ܕܝܰܗ̱ܒ ܠܶܗ܆ ܓܰܒܪܺܐܶܝܠ ܪܺܝܫ ܡܰܠܰܐܟ̈ܶܐ܆ ܗܰܝܡܶܝܢ ܗ̱ܘܳܐ ܘܶܐܡܰܪ܆ ܣܳܓܶܕ ܐ̱ܢܳܐ ܠܶܟܝ ܐܳܘ ܡܰܪܝܰܡ܆ ܕܰܐܢ̱ܬܝ ܗ̱ܺܝ ܛܥܺܝܢܰܬܝ ܠܶܗ܆ ܠܓܰܢ̱ܒܳܪܳܐ ܛܥܺܝܢ ܒܶܪ̈ܝܳܬܳܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܒܪܳܐ ܕܒܰܨܠܺܝܒܶܗ ܦܰܪܩܳܗ̇ ܠܥܺܕܬܶܗ

ܨܠܽܘܬܳܟ ܥܰܡܰܢ ܝܰܘܣܶܦ ܟܺܐܢܳܐ ܨܠܽܘܬܳܟ ܥܰܡܰܢ܆

ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܪܶܬܡܰܬ ܡܰܪܝܰܡ ܩ̈ܳܠܶܐ ܕܚܰܫܳܐ ܠܽܘܩܒܰܠ ܥܽܘܒܳܗ̇܆ ܘܰܒܟܰܪܝܽܘܬܳܐ ܠܰܒܪܳܗ̇ ܠܶܚܫܰܬ ܚܰܒܺܝܒܳܐܺܝܬ܆ ܒܶܪܝ ܚܰܒܺܝܒܳܐ ܕܰܨܒܳܐ ܒܚܽܘܒܶܗ ܘܰܗܘܳܐ ܐ̱ܢܳܫܳܐ܆ ܠܳܐ ܬܶܓܠܙܰܢܝ ܡܶܢ ܐ̱ܚܝܳܢܽܘܬ ܟܺܐܢܳܐ ܝܰܘܣܶܦ܀

ܫܽܘܒܚܳܐ ܠܰܐܒܳܐ ܕܫܰܕܰܪ ܠܰܒܪܶܗ ܘܰܗܘܳܐ ܐ̱ܢܳܫܳܐ܆ ܘܣܶܓܕܬܳܐ ܠܰܒܪܳܐ ܕܰܓܠܳܐ ܠܝܰܘܣܶܦ ܡܶܛܽܠ ܒܰܛܢܶܗ܆ ܬܰܘܕܺܝ ܠܪܽܘܚܳܐ ܕܰܐܙܺܝܥ ܠܝܰܘܣܶܦ ܥܰܠ ܪܰܒܽܘܬܶܗ܆ ܘܩܳܡ ܡܶܢ ܫܶܢܬܶܗ ܣܳܓܶܕ ܡܰܘܕܶܐ ܠܰܡܒܰܪܰܟܬܳܐ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀