ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܒܨܰܦܪܳܐ ܚܙܰܐܽܘܗ̱ܝ ܬܰܠܡܺܝ̈ܕܶܐ
ܒܰܨܠܽܘܬ ܢܒܺܝ̈ܶܐ ܘܰܫܠܺܝ̈ܚܶܐ (ܣܳܠܶܩ: ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ)

ܦܩܰܕ ܐܳܕܳܡ ܠܰܒ̈ܢܰܘܗ̱ܝ ܟܽܠܗܽܘܢ܆ ܥܰܠ ܟܺܐܦܳܐ ܕܶܐܫܛܳܪ ܚܰܘ̈ܒܰܘܗ̱ܝ܆ ܕܢܶܙܕܰܗܪܽܘܢ ܒܳܗ̇ ܚܦܺܝܛܳܐܺܝܬ. ܘܢܶܬܕܰܟܪܽܘܢ ܐܰܡܺܝܢܳܐܺܝܬ܆ ܕܢܶܬܥܛܶܐ ܐܶܫܛܳܪ ܚܰܘ̈ܒܳܬܶܗ. ܘܬܶܬܬܫܺܝܓ ܟܽܠܳܗ̇ ܣܰܟܠܽܘܬܶܗ܀

ܫܽܘܒܚܳܐ

ܡܽܘܫܶܐ ܘܝܶܫܽܘܥ ܘܶܐܠܺܝܫܳܥ܆ ܒܥܰܐܽܘܗ̇ ܠܟܺܐܦܳܐ ܘܠܳܐ ܐܶܫܟܚܽܘܗ̇܆ ܘܶܐܬܳܐ ܡܳܪܰܢ ܒܰܥܡܳܕܶܗ. ܘܩܳܡ ܗ̱ܘܳܐ ܥܠܶܝܗ̇ ܕܺܝܕܰܥ ܕܰܐܝܟܳܐ ܗ̱ܝ܆ ܘܰܠܚܳܐ ܠܰܚܛܺܝܬܶܗ ܕܳܐܕܳܡ. ܘܟܽܠܗܽܘܢ ܝܰܠ̈ܕܰܘܗ̱ܝ ܐܶܬܚܰܪܰܪܘ܀

ܡܰܕܪܳܫܳܐ

ܩܳܠܳܐ ܒܩ̄: ܩܽܘܡ ܦܰܘܠܳܘܣ
ܐܰܫܘܳܢܝ ܡܳܪܝ ܕܶܐܙܡܰܪ ܫܰܪ̈ܒܰܝܗܽܘܢ

ܥܽܘܢܺܝܬܳܐ: ܠܳܟ ܫܽܘܒܚܳܐ ܡܫܺܝܚܳܐ ܕܒܰܥܡܳܕܶܗ: ܪ̈ܽܘܚܳܢܶܐ ܡܶܢ ܡܰܝ̈ܳܐ ܥܒܰܕܬܳܢ.

ܒܡܰܝ̈ܳܐ ܕܰܥܡܳܕܳܐ܆ ܪܽܘܚܶܗ ܕܰܐܠܳܗܳܐ܆ ܙܶܩܪܰܬ ܠܶܗ ܠܒܽܘܫܳܐ܆ ܢܰܚܬܳܐ ܕܬܶܫܒܽܘܚܬܳܐ܆ ܠܳܐܕܳܡ ܕܶܐܬܦܰܪܣܺܝ܆ ܒܪܺܝܟ ܕܰܢܚܶܬ ܚܰܘܺܝ ܠܶܗ ܡܰܝ̈ܳܐ܆ ܕܒܰܣܚܳܬܗܽܘܢ ܝܰܠ̈ܕܰܘܗ̱ܝ ܢܶܬܩܰܕܫܽܘܢ܀

ܒܓܰܘ ܡܰܝ̈ܳܐ ܠܒܽܘܫܳܐ ܕܠܳܐ ܒܳܠܶܐ܆ ܙܶܩܪܰܬ ܠܰܢ ܪܽܘܚܶܗ ܕܰܐܠܳܗܳܐ܆ ܒܓܰܘ ܡܰܝ̈ܳܐ ܫܳܠܚܺܝܢ ܢܰܚܬܰܝ̈ܗܽܘܢ܆ ܘܡܶܢ ܡܰܝ̈ܳܐ ܠܳܒܫܺܝܢ ܬܶܫܒܽܘܚܬܳܐ܆ ܢܽܘܗܪܳܐ ܠܒܽܘ̈ܫܰܝܗܽܘܢ܆ ܙܺܝܘܳܐ ܥܛܳܦܰܝ̈ܗܽܘܢ܆ ܬܰܟܣܺܝܬܗܽܘܢ ܗܶܕܪܳܐ܆ ܘܰܩܢܽܘܡܗܽܘܢ ܫܽܘܒܚܳܐ܆ ܓܰܘ̈ܢܰܝܗܽܘܢ ܢܽܘܗܪܳܐ ܥܰܙܺܝܙܳܐ܆ ܘܡܰܦܪܓܺܝܢ ܒܰܟ̈ܠܺܝܠܶܐ ܕܫܽܘܒܚܳܐ܀

ܒܓܰܘ ܡܰܝ̈ܳܐ ܠܒܽܘܫܳܐ ܕܠܳܐ ܒܳܠܶܐ: ܙܶܩܪܰܬ ܠܰܢ ܪܽܘܚܶܗ ܕܰܐܠܳܗܳܐ: ܘܗܳܐ ܢܽܘܪܳܐ ܚܰܝܬܳܐ ܒܒܰܪ̱ܬ ܢܽܘܗܪܳܐ: ܡܶܢ ܡܰܝ̈ܳܐ ܒܚܺܝܪ̈ܶܐ ܘܩܰܕܺܝ̈ܫܶܐ: ܥܶܒܕܰܬ ܠܒܽܘ̈ܫܰܝܗܽܘܢ: ܬܰܘ ܚܽܘܬܘ ܠܒܰܫܘ ܡܶܢܳܗ̇: ܢܰܚ̈ܬܶܐ ܕܬܶܫܒܽܘܚܬܳܐ: ܕܫܳܘܶܝܢ ܠܡܰܠܟܽܘܬܳܐ: ܡܶܢ ܡܰܝ̈ܳܐ ܘܢܽܘܪܳܐ ܘܪܽܘܚ ܩܽܘܕܫܳܐ: ܐܶܫܟܰܚܬܽܘܢ ܟܽܠܗܽܘܢ ܫܽܘܦܪ̈ܰܝܟܽܘܢ܀

ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ܆ ܗܳܐ ܡܰܠܝܳܐ ܐܰܪܥܳܐ ܕܠܰܘ̈ܛܳܬܳܐ܆ ܚܠܳܦ ܟܽܘ̈ܒܶܐ ܘܕܰܪܕܪ̈ܶܐ ܕܡܰܪܺܝܪܺܝܢ܆ ܐܺܝ̈ܠܳܢܶܐ ܡܠܺܝ̈ܠܶܐ ܘܫܰܦܺܝܪ̈ܶܐ܆ ܕܪܳܥܶܡ ܒܦܽܘ̈ܡܰܝܗܽܘܢ܆ ܩܳܠܳܐ ܕܗܽܘܠܳܠܳܐ܆ ܕܰܡܝܰܒܒܺܝܢ ܫܽܘܒܚܳܐ܆ ܠܗܰܘ ܕܰܐܝܬܺܝ ܐܶܢܽܘܢ܆ ܡܶܢ ܐܰܪܥܳܐ ܕܡܰܠܝܳܐ ܠܰܘ̈ܛܳܬܳܐ܆ ܠܒܽܘܪ̈ܟܳܬܳܐ ܕܒܶܝܬ ܐܰܒܽܘܗ̱ܝ ܡܫܰܒܚܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܚܽܘܬܘ ܐܰܚܰܝ̈ ܪ̈ܫܺܝܡܶܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܒܰܥܡܳܕܶܗ܆ ܦܰܪܩܰܢ ܡܶܢ ܒܺܝܫܳܐ.

ܬܗܽܘܡܳܐ ܙܳܥ ܡܶܢܳܟ܆ ܕܰܚܙܳܟ ܕܶܐܬܡܰܟܰܟܬ܆ ܐܳܦ ܐܰܪܟܶܢܬ ܪܺܝܫܳܟ܆ ܩܽܘܕܡܰܬ ܝܽܘܚܰܢܳܢ܆ ܘܡܰܠܝܰܬ ܟܺܐܢܽܘܬܳܐ܀

ܚܙܳܟ ܢܰܗܪܳܐ ܘܰܕܚܶܠ܆ ܕܶܐܬܰܝܬ ܕܬܶܥܡܰܕ ܒܶܗ܆ ܘܰܗܦܰܟ ܗ̱ܘܳܐ ܠܒܶܣܬܪܶܗ܆ ܟܰܕ ܪܳܥܶܠ ܒܕܶܚܠܳܐ܆ ܕܰܒܥܳܐ ܕܢܶܥܪܽܘܩ ܠܶܗ܀

ܗܳܐ ܝܰܘܡܰܐ ܗ̱ܘ ܕܢܽܘܗܪܳܐ܆ ܘܕܶܢܚܳܐ ܕܬܶܫܒܽܘܚܬܳܐ܆ ܕܰܕܢܰܚ ܡܶܢ ܒܬܽܘܠܬܳܐ܆ ܘܶܐܬܳܐ ܨܶܝܕ ܡܰܝ̈ܳܐ܆ ܕܢܶܥܡܰܕ ܒܓܰܘ ܝܽܘܪܕܢܳܢ܀

ܒܰܥܡܳܕܳܟ ܡܳܪܰܢ܆ ܒܪܺܝܬܳܐ ܐܶܬܢܰܗܪܰܬ܆ ܡܶܢ ܝܰܕ ܚܶܫܽܘܟܳܐ܆ ܘܥܰܡܛܳܢܳܐ ܕܛܽܘܥܝܰܝ܆ ܐܳܦ ܣܶܓܕܰܬ ܦܬܰܟܪ̈ܶܐ܀

ܢܳܚܬܺܝܢ ܚܰܝܳܒ̈ܶܐ܆ ܣܳܠܩܺܝܢ ܙܰܟܳܝ̈ܶܐ܆ ܘܕܰܦܪܰܥܘ ܚܰܘ̈ܒܳܬܗܽܘܢ܆ ܠܒܽܘ̈ܫܰܝ ܬܶܫܒܽܘܚܬܳܐ܆ ܬܶܫܠܚܽܘܢ ܡܶܢܟܽܘܢ܀

ܒܢܽܘܪܳܐ ܘܰܒܡܰܝ̈ܳܐ܆ ܘܰܒܪܽܘܚܳܐ ܥܡܰܕܬܽܘܢ܆ ܘܰܟܠܺܝ̈ܠܶܐ ܕܫܽܘܒܚܳܐ ܒܪ̈ܺܝܫܰܝܟܽܘܢ ܣܺܝܡܺܝܢ܆ ܒܪܺܝܟܽ ܗ̱ܘ ܕܗܰܕܰܪܟܽܘܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܳܘ ܢܰܦܫܳܐ ܨܽܘܪܬܳܐ

ܥܽܘܢܺܝܬܳܐ: ܒܪܺܝܟ ܕܰܐܘܠܶܕ ܒܢܰܝ̈ܳܐ ܣܰܓܺܝ̈ܶܐܐ: ܡܶܢ ܥܽܘܒܳܐ ܕܰܟܝܳܐ ܕܡܰܥܡܽܘܕܺܝܬܳܐ.

ܚܳܪ ܘܰܚܙܳܐ ܕܣܰܓܺܝܺܐܝܢ ܫܽܘ̈ܚܢܰܝ: ܐܰܬܩܶܢ ܠܺܝ ܡܥܺܝܢܳܐ ܕܒܳܗ̇ ܐܶܣܚܶܐ: ܘܒܳܗ̇ ܫܽܘ̈ܚܢܰܝ ܟܽܠܗܽܘܢ ܡܶܬܚܰܠܡܺܝܢ܀

ܡܰܘܠܳܕܳܐ ܐܰܘܠܕܰܢܝ ܬܪܰܝܳܢܳܐ: ܘܰܛܠܺܝܬܳܐ ܥܰܒܕܰܢܝ ܒܓܰܘ ܡܰܝ̈ܳܐ: ܘܰܒܙܽܘܦܶܗ ܕܰܟܝܰܢܝ ܕܛܰܡܳܐܐ ܗ̱ܘܺܝܬ܀

ܒܰܫ̈ܡܳܗܶܐ ܬܠܳܬܳܐ ܥܡܺܝܕܳܐ ܐ̱ܢܳܐ: ܠܚܰܕ ܚܰܬܢܳܐ ܫܒܺܝܚܳܐ ܡܟܺܝܪܳܐ ܐ̱ܢܳܐ: ܒܥܶܙܰܩܬܳܐ ܕܡܰܠܟܳܐ ܛܒܺܝܥܳܐ ܐ̱ܢܳܐ܀

ܡܶܢ ܒܺܐܪܳܐ ܚܕܰܬܳܐ ܕܶܐܬܦܰܬܚܰܬ: ܥܰܠ ܪܰܘܡܳܐ ܪܳܡܳܐ ܕܓܳܓܽܘܠܬܳܐ: ܪܕܳܐ ܫܶܩܝܳܐ ܘܶܐܫܬܺܝܬ ܕܨܰܗܝܳܐ ܗ̱ܘܺܝܬ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܡܫܺܝܚܳܐ ܕܰܐܣܗܶܕܘ ܥܰܠ ܩܶܛܠܶܗ

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܡܰܥܡܽܘܕܺܝܬܳܐ ܐܰܝܟ ܓܺܝܫܪܳܐ ܗ̱ܝ܆ ܕܡܶܢ ܥܳܠܡܳܐ ܠܥܳܠܡܳܐ ܡܰܥܒܰܪ܆ ܕܰܥܠܶܝܗ̇ ܥܳܒܪܺܝܢ ܐܰܪ̈ܥܳܢܶܐ܆ ܠܗܰܘ ܐܰܬܪܳܐ ܕܰܫܡܰܝ̈ܳܢܶܐ܆ ܕܰܒܢܽܘܗܪܳܐ ܪܰܒܳܐ ܢܶܗܘܽܘܢ܆ ܕܠܳܐ ܩܳܪܶܒ ܠܶܗ ܚܶܫܽܘܟܳܐ܀

ܡܶܢ ܬܰܪܥܳܐ ܕܡܰܥܡܽܘܕܺܝܬܳܐ܆ ܥܳܐܶܠ ܐ̱ܢܳܫ ܨܶܝܕ ܐܰܠܳܗܳܐ܆ ܘܥܰܡ ܐܰܒܳܐ ܒܢܽܘܗܪܳܐ ܡܰܡܠܶܟ܆ ܘܥܰܡ ܝܰܠܕܶܗ ܒܚܰܝ̈ܶܐ ܚܰܕ̱̈ܬܶܐ܆ ܘܥܰܡ ܪܽܘܚܩܽܘܕܫܳܐ ܡܶܬܒܰܣܰܡ܆ ܒܚܰܝ̈ܶܐ ܕܰܠܥܳܠܰܡ ܥܳܠܡܺܝܢ: ܘܡܰܣܶܩ ܫܽܘܒܚܳܐ ܘܬܰܘܕܺܝܬܳܐ: ܠܰܐܒܳܐ ܘܠܰܒܪܳܐ ܘܪܽܘܚ ܩܽܘܕܫܳܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀