ܕܰܬܠܳܬܳܐ ܒܫܰܒܳܐ

ܕܦܶܠܓܶܗ ܕܝܰܘܡܳܐ

ܩܳܠܳܐ ܒܩ̄: ܕܰܚܛܳܐ ܠܳܐ ܢܶܚܛܶܐ
ܩܺܝܢܬܳܐ ܕܓܽܘܫܡܳܐ

ܡܳܐ ܫܰܦܺܝܪܳܐ ܗ̱ܘܳܬ܆ ܐܶܓܰܪܬܳܐ ܕܟܶܬܒܰܬ܆ ܢܺܝܢܘܶܐ ܡܗܰܝܡܰܢܬܳܐ ܠܟܽܠ ܐܰܬܪ̈ܰܘܳܬܳܐ܆ ܕܶܐܢ ܡܶܬܡܰܣܪܺܝܢ ܐ̱ܢܬܽܘܢ܆ ܒܺܐܝ̈ܕܰܝ ܟܺܐܢܽܘܬܳܐ܆ ܒܝܰܕ ܣܰܩ̈ܶܐ ܘܩܶܛܡܳܐ ܪܰܥܰܘ ܠܰܐܠܳܗܳܐ܆ ܗ̄ܘܗ̄ ܡܶܬܦܢܶܐ ܘܰܡܪܰܚܶܡ ܥܰܠ ܟܽܠܶܗ ܥܳܠܡܳܐ܀

ܫܽܘܒܚܳܐ

ܐܰܠܳܗܳܐ ܕܩܰܒܶܠ܆ ܒܳܥܽܘܬܳܐ ܕܢܺܝܢܘܶܐ܆ ܘܦܰܨܝܳܗ̇ ܡܶܢ ܪܽܘܓܙܳܐ ܕܰܠܚܺܝܡ ܗ̱ܘܳܐ ܕܢܰܘܒܕܺܝܗ̇܆ ܩܰܒܶܠ ܒܳܥܽܘܬܳܗ̇܆ ܕܥܺܕܬܳܐ ܩܰܕܺܝܫܬܳܐ܆ ܘܰܟܠܺܝ ܡܳܪܝ ܡܶܢܳܗ̇ ܡܰܚ̈ܘܳܬܳܐ ܕܪܽܘܓܙܳܐ ܗ̄ܘܗ̄ ܕܬܶܚܕܶܐ ܘܬܶܙܡܰܪ ܠܳܟ ܫܽܘܒܚܳܐ ܒܟܽܠܥܶܕܳܢ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܺܝܢܬܳܐ ܕܺܝܠܳܢܳܝܬܳܐ

ܦܬܰܚ ܠܰܢ ܡܳܪܰܢ ܬܰܪܥܳܟ ܪܰܒܳܐ ܕܰܡܠܶܐ ܖ̈ܰܚܡܶܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܐܰܘ

ܩܳܪܶܝܢܰܢ ܠܳܟ ܡܳܪܝܳܐ ܡܳܪܰܢ ܬܳܐ ܠܥܽܘܕܪܳܢܰܢ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܐܰܪܒܥܺܝܢ ܝܰܘ̈ܡܺܝܢ ܒܬܰܪܥܶܗ ܕܳܐܣܝܳܐ ܕܪ̈ܰܚܡܶܐ ܢܶܩܫܰܬ܆ ܕܢܰܐܣܶܐ ܗ̱ܘܳܐ ܠܳܗ̇ ܫܽܘܚܢܳܐ ܕܥܰܘܠܳܐ ܕܚܳܢܶܩ ܗ̱ܘܳܐ ܠܳܗ̇܆ ܐܰܪܒܥܺܝܢ ܝܰܘ̈ܡܺܝܢ ܒܟܳܬ ܥܰܠ ܬܰܪܥܶܗ ܕܡܳܪܶܐ ܚܰܘܒܳܐ܆ ܕܗܰܘ ܐܶܫܛܳܪܳܐ ܪܰܒܳܐ ܢܶܬܠܽܘܚ ܕܰܡܙܺܝܥ ܗ̱ܘܳܐ ܠܳܗ̇܀

ܡܳܪܰܢ ܕܩܰܒܶܠ ܠܰܬܝܳܒܽܘܬܗܽܘܢ ܘܰܦܪܰܩ ܐܶܢܽܘܢ܆ ܫܡܰܥ ܒܳܥܽܘܬܰܢ ܘܰܐܥܒܰܪ ܡܶܢܰܢ ܟܽܠ ܢܶܟܝܳܢܺܝ̈ܢ܆ ܕܢܰܘܕܶܐ ܠܳܟ ܡܳܪܝ ܥܰܠ ܛܰܝܒܽܘܬܳܟ ܪܳܥܝܳܐ ܛܳܒܳܐ܆ ܠܳܟ ܡܳܪܝ ܘܠܰܐܒܽܘܟ ܘܰܠܪܽܘܚ ܩܽܘܕܫܳܐ ܒܟܽܠܥܶܕܳܢܺܝ̈ܢ܀

ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨ̈ܠܰܘܳܬܳܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܐܰܘ

ܡܫܺܝܚܳܐ ܕܩܰܒܶܠ ܨܰܘܡܳܐ ܕܡܽܘܫܶܐ ܘܡܰܟܺܝܟܽܘܬܶܗ܆

ܘܰܐܦܢܳܐ ܠܶܒܗܽܘܢ ܕܰܒܢܰܝ̈ܢܳܫܳܐ ܠܰܬܝܳܒܽܘܬܳܐ܀