ܕܰܬܠܳܬܳܐ ܒܫܰܒܳܐ

ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܗܳܢܰܘ ܝܰܪܚܳܐ

ܝܳܕܰܥ ܐ̱ܢܳܐ ܡܳܪܝ ܕܟܽܠܳܟ ܪ̈ܰܚܡܶܐ ܒܪ̈ܰܚܡܶܐ ܫܦܺܝܥ ܐܰܢ̱ܬ܆ ܒܫܳܥܬܳܐ ܕܪ̈ܰܚܡܶܐ ܐܳܘ ܡܠܶܐ ܪ̈ܰܚܡܶܐ܆ ܝܶܫܽܘܥ ܣܰܒܪܳܐ ܕܫܳܐܠܰܝ̈ ܪ̈ܰܚܡܶܐ܆ ܐܰܫܦܰܥ ܪ̈ܰܚܡܰܝܟ ܥܰܠ ܚܰܛܳܝ̈ܶܐ ܕܪ̈ܰܚܡܰܝܟ ܫܳܐܠܺܝܢ܀

ܩܳܠܳܐ ܒܩ̄: ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ
ܡܶܢ ܓܽܘܒܳܐ ܕܕܽܘܘܳܢܳܐ

ܢܺܝܢ̈ܘܳܝܶܐ ܒܚܰܫܳܐ ܩܪܰܐܽܘܟ܆ ܘܰܒܕܶܡ̈ܥܶܐ ܡܳܪܝ ܐܰܦܺܝܣܽܘܟ܆ ܘܰܒ̈ܣܰܩܶܐ ܘܩܶܛܡܳܐ ܘܨܰܘܡܳܐ ܚܢܳܢܳܐ ܢܣܰܒܘ ܡܶܢܳܟ܆ ܘܗܳܐ ܗܳܫܳܐ ܥܺܕܬܳܐ ܡܟܺܝܪܬܳܟ܆ ܩܳܪܝܳܐ ܠܳܟ ܘܰܡܦܺܝܣܳܐ ܠܳܟ܆ ܚܽܘܣ ܡܳܪܝܳܐ ܘܪܰܚܶܡ ܥܠܶܝܗ̇ ܡܶܛܽܠ ܛܰܝܒܽܘܬܳܟ܀

ܫܽܘܒܚܳܐ

ܠܘܳܬܳܟ ܡܳܪܝ ܬܰܠ̈ܝܳܢ ܥܰܝܢܰܝ̈ܢ܆ ܘܰܡܥܰܠܶܝܢ ܠܶܒܰܘ̈ܳܬܰܢ܆ ܘܰܦܫܺܝ̈ܛܳܢ ܐܺܝ̈ܕܰܝܢ ܘܓܳܥܶܝܢ ܒܰܕܡܽܘܬ ܢܺܝܢ̈ܘܳܝܶܐ܆ ܪܰܚܶܡ ܥܠܰܝܢ ܐܰܠܳܗܳܐ܆ ܐܰܟܡܳܐ ܕܶܐܬܪܰܚܰܡܬ ܥܠܰܝܗܽܘܢ܆ ܘܩܰܒܶܠ ܨܰܘܡܰܢ ܘܰܨܠܽܘܬܰܢ ܘܦܰܢܳܐ ܫܶܐܠܳــ̈ـܬܰܢ܀

ܡܰܕܪܳܫܳܐ

ܩܳܠܳܐ ܒܩ̄: ܦܰܪܕܰܝܣܳܐ

ܥܽܘܢܺܝܬܳܐ: ܫܽܘܒܚܳܐ ܠܛܰܝܒܽܘܬܳܟ ܕܚܳܢܰܬ ܠܢܺܝ̈ܢܘܳܝܶܐ܆ ܫܽܘܒܚܳܐ ܠܛܰܝܒܽܘܬܳܟ ܡܩܰܒܠܰܬ ܬܰܝܳܒ̈ܶܐ.

ܛܠܳܝ̈ܶܐ ܘܝܰܠܽܘ̈ܕܶܐ ܡܫܰܐܠܺܝܢ ܠܰܐܒܳܗ̈ܶܐ܆ ܕܠܶܐܡܰܬ ܡܶܬܥܰܩܪܳܐ ܢܺܝܢܘܶܐ ܡܥܰܕܰܢܬܳܐ܆ ܘܠܰܒ̈ܢܰܝܳܐ ܒܚܰܫܳܐ ܡܦܰܢܶܝ݉ܢ ܐܰܒܳܗ̈ܶܐ܆ ܕܡܶܟܳܐ ܠܝܰܘ̈ܡܳܬܳܐ ܐܰܪܒܥܺܝܢ. ܗܳܦܟܳܐ ܠܳܗ̇ ܡܕܺܝܢ̱ܬܰܢ ܘܳܐܦ ܬܶܠܠܳܐ ܗܳܘܝܳܐ܆ ܚܢܰܢ ܡܳܬܛܰܡܪܺܝܢܰܢ ܒܩܰܒܪ̈ܶܐ ܟܰܕ ܚܰܝܺܝܢ܀

ܐܶܡ̈ܗܳܬܳܐ ܒܳܟ̈ܝܳܢ ܠܽܘܩܒܰܠ ܝܰܠ̈ܕܰܝܗܶܝܢ܆ ܘܝܰܠܽܘ̈ܕܶܐ ܕܓܳܥܶܝܢ ܘܚܳܝܪܺܝܢ ܒܶܐܡ̈ܗܳܬܗܽܘܢ܆ ܘܰܬܕܰܝ̈ܳܐ ܕܰܡܠܶܝܢ ܚܰܠܒܳܐ ܟܰܕ ܪܳܬܚܺܝܢ܆ ܘܫܰܒܪ̈ܶܐ ܟܰܕ ܒܳܟܶܝܢ ܡܶܢ ܟܰܦ݉ܢܳܐ܆ ܓܳܥܶܝܢ ܘܡܶܬܛܰܪܦܺܝܢ ܘܠܰܝܬ ܕܚܳܐܶܣ ܥܠܰܝܗܽܘܢ. ܫܽܘܒܚܳܐ ܠܚܰܢܳܢܳܐ ܕܚܳܢܳܗ̇ ܠܰܓܒܺܝܠܬܶܗ܀

ܝܰܘܢܳܢ ܒܓܰܘ ܢܽܘܢܳܐ ܒܶܣ̈ܡܶܐ ܣܳܐܶܡ ܗ̱ܘܳܐ܆ ܘܰܐܝܟܰܢ ܣܳܐܶܡ ܗ̱ܘܳܐ ܒܶܣ̈ܡܶܐ ܕܠܳܐ ܢܽܘܪܳܐ܆ ܕܶܡ̈ܥܰܘܗ̱ܝ ܗܘܰܝ̈ ܓܽܘܡܪ̈ܶܐ ܘܚܶܢ̈ܓܳܬܶܗ ܒܶܣ̈ܡܶܐ܆ ܠܶܒܶܗ ܘܬܰܪܥܺܝܬܶܗ ܦܺܝ݉ܪܡܳܐ܆ ܐܰܠܳܗܳܐ ܕܩܰܒܶܠ ܨܠܽܘܬܶܗ ܘܒܳܥܽܘܬܶܗ܆ ܩܰܒܶܠ ܒܰܚܢܳܢܳܟ ܨܰܘܡܰܢ ܘܨܠܽܘܬܰܢ܀

ܝܰܘܢܳܢ ܒܰܪ ܡܰܬܰܝ ܒܟܰܪܝܽܘܬܳܐ ܐܰܟܪܶܙ܆ ܕܠܰܐܪܒܥܺܝܢ ܝܰܘ̈ܡܳܬܳܐ ܢܺܝܢܘܶܐ ܡܶܬܗܰܦܟܳܐ܆ ܘܰܒܨܰܘܡܳܐ ܕܨܳܡܰܬ ܘܰܒ̈݉ܣܰܩܶܐ ܕܠܶܒܫܰܬ. ܐܶܬܪܰܥܺܝ ܡܳܪܝܳܐ ܡܪܰܚܡܳܢܳܐ܆ ܘܰܫܒܰܩ ܠܳܗ̇ ܣܽܘܓܳܐܐ ܕܥܰܘ̈ܠܶܐ ܕܣܶܥܪܰܬ ܗ̱ܘܳܬ܆ ܫܒܽܘܩ ܠܰܢ ܐܰܟܘܳܬܳܗ̇ ܦܳܪܽܘܩܶܗ ܕܥܳܠܡܳܐ܀

ܡܶܢ ܥܽܘ̈ܡܩܶܐ ܕܚܺܝ̈ܠܶܐ ܘܡܶܢ ܒܰܝܢܳܬ ܓܰܠ̱̈ܠܶܐ܆ ܨܰܠܺܝ ܠܳܟ ܡܳܪܝܳܐ ܝܰܘܢܳܢ ܘܰܥܢܰܝܬܳܝܗ̱ܝ܆ ܐܳܦ ܚܢܰܢ ܚܰܛܳܝ̈ܶܐ ܩܰܒܶܠ ܒܳܥܽܘܬܰܢ܆ ܘܦܰܢܳܐ ܫ̈ܶܐܠܳܬܰܢ ܒܛܰܝ݉ܒܽܘܬܳܟ܆ ܘܰܐܥܒܰܪ ܡܶܢ ܥܺܕܬܳܟ ܡܰܚ̈ܘܳܬܳܐ ܕܪܽܘܓܙܳܐ܆ ܕܛܳܒܳܐ ܘܒܰܣܺܝܡܳܐ ܘܰܡܪܰܚܡܳܢܳܐ ܐܰܢ̱ܬ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܚܰܛܦܰܢܝ ܪܰܡܫܳܐ ܘܰܒܡܰܛܰܪܬܶܗ

ܦܬܰܚ ܠܰܢ ܡܳܪܰܢ ܬܰܪܥܳܟ ܪܰܒܳܐ ܕܰܡܠܶܐ ܖ̈ܰܚܡܶܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܐܰܘ

ܩܳܪܶܝܢܰܢ ܠܳܟ ܡܳܪܝܳܐ ܡܳܪܰܢ ܬܳܐ ܠܥܽܘܕܪܳܢܰܢ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܢܦܰܩ ܗ̱ܘܳܐ ܚܰܬܢܳܐ ܡܶܢ ܩܰܝܛܽܘܢܶܗ ܘܰܠܒܺܝܫ ܣܰܩܳܐ܆ ܘܡܶܢ ܒܶܝܬ ܓܢܽܘܢܳܐ ܟܰܠܬܳܐ ܘܡܰܪܟܰܢ ܪܺܝܫܳܗ̇ ܒܶܐܒܠܳܐ܆ ܒܡܰܠܟܳܐ ܚܳܪܘ ܗ̱ܘܰܘ ܕܰܫܕܳܐ ܬܳܓܶܗ ܒܚܰܫܳܐ ܪܰܒܳܐ܆ ܘܰܫܕܰܘ ܚܰܬܢ̈ܶܐ ܠܰܟܠܺܝ̈ܠܰܝܗܽܘܢ ܘܰܒܟܰܘ ܥܰܡܶܗ܀

ܡܰܢܽܘ ܚܙܶܐ ܠܶܗ ܡܰܠܟܳܐ ܕܒܳܟܶܐ ܘܠܳܐ ܡܰܝܠܶܠ ܗ̱ܘܳܐ܆ ܟܶܢܫܳܐ ܪܰܒܳܐ ܗܘܳܐ ܗ̱ܘܳܐ ܬܰܡܳܢ ܕܰܡܠܶܐ ܚܰܫܳܐ܆ ܒܪܺܝܟ ܚܰܢܳܢܳܐ ܕܚܳܪ ܒܒܳܥܽܘܬܳܐ ܪܚܺܝܡܬܳܐ ܕܩܰܪܶܒܘ܆ ܘܩܰܒܶܠ ܡܶܢܗܽܘܢ ܚܰܫܳܐ ܘܕܶܡ̈ܥܶܐ ܕܡܶܢ ܒܳܒ̈ܳܬܗܽܘܢ܀

ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨ̈ܠܰܘܳܬܳܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܐܰܘ

ܡܫܺܝܚܳܐ ܕܩܰܒܶܠ ܨܰܘܡܳܐ ܕܡܽܘܫܶܐ ܘܡܰܟܺܝܟܽܘܬܶܗ܆

ܘܰܐܦܢܳܐ ܠܶܒܗܽܘܢ ܕܰܒܢܰܝ̈ܢܳܫܳܐ ܠܰܬܝܳܒܽܘܬܳܐ܀