ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܙ: ܐ ـ ܝܙ Hebrews 7:1-17

ܥܰܠ ܕܗܰܢܳܐ ܡܰܠܟܺܝܙܕܶܩ ܐܽܘ ܡܰܠܟܳܐ ܕܫܳܠܺܝܡ ܐܽܘ ܟܽܘܡܪܳܐ ܕܰܐܠܳܗܳܐ ܐܽܘ ܥܶܠܳܝܳܐ، ܗܽܘܘܶܐ ܠܰܩܺܝ ܠܰܐܒܪܳܗܳܡ ܐܺܝ ܢܰܩܩܰܐ ܕܕܰܥܶܪ ܡܽܐܘ ܚܰܪܒ ܕܰܡ̈ܡܰܠܟܶܐ، ܘܡܒܰܪܰܟ̣ ܠܶܗ ܐܰܥܠܶܗ. ܘܶܐܠܶܗ ܦܪܶܫ ܠܶܗ ܠܐܰܒܪܳܗܳܡ ܡܰܥܣܳܪ̈ܶܐ ܡܶܐ ܟܽܠ ܡܶܕܶܐ ܕܟܶܬܗ̱ܘܳܐ ܐܰܥܡܶܗ. ܓܡܶܫܪܶܚ ܐܶܫܡܶܗ، ܡܰܠܟܳܐ ܕܺܐܝ ܟܺܐܢܽܘܬ̣ܳܐ. ܘܗܰܡ ܐܽܘ ܡܰܠܟܳܐ ܕܫܳܠܺܝܡ، ܝܰܐܢܺܝ ܡܰܠܟܳܐ ܕܽܐܘ ܫܠܳܡܳܐ. ܠܳܐ ܐܽܘ ܒܰܐܒܰܝܕܶܗ ܘܠܳܐ ܐܺܝ ܐܶܡܰܝܕܶܗ ܟܬ̣ܺܝܘܺܝ ܒܰܫܰܪ̈ܒܳܬ̣ܳܐ. ܘܠܳܐ ܪܺܝܫܶܗ ܕܰܝܰܘ̈ܡܰܝܕܶܗ، ܘܠܳܐ ܐܺܝ ܐ̱ܚܰܪܰܝܬܳܐ ܕܰܚܰܝܰܝ̈ܕܶܗ. ܐܶܠܳܐ ܒܽܐܘ ܕܽܘܡܝܳܐ ܕܽܐܘ ܒܪܳܐ ܕܰܐܠܳܗܳܐ ܓܦܰܝܫܳܐ ܐܺܝ ܟܽܘܡܪܽܘܬ̣ܰܝܕܶܗ ܠܥܳܠܰܡ. ܚܙܰܐܽܘ ܡܶܩܩܰܐ ܪܰܒܳܝܳܐ ܗܰܢܳܐ. ܕܰܐܒܪܳܗܳܡ ܐܽܘ ܪܺܝܫܳܐ ܕܰܐܰܒ̈ܳܗܳܬ̣ܳܐ، ܗܽܘܠܶܐ ܠܶܗ ܡܰܥܣܳܪ̈ܶܐ. ܐܰܝܢܰܐ ܡܰܢܢܰܒ̈ܢܶܐ ܕܠܶܘܺܝ ܕܗܳܘܶܢ ܗ̱ܘܰܐ ܟܽܘܡܪ̈ܶܐ، ܟܶܬܗ̱ܘܳܐ ܠܶܢ ܐܰܡܪܳܐ ܡܽܐܘ ܢܳܡܽܘܣܳܐ، ܕܡܰܝܕܺܝ ܡܰܥܣܳܪ̈ܶܐ ܡܽܐܘ ܥܰܡܳܐ. ܝܰܐܢܺܝ ܡܰܐܢܢܰـ̈ܚܰܬ̣ܬ̣ܶܐ. ܥܰܡܰܗ̱ܝܳܐ ܕܢܰܦܺܝܩܺܝ ܡܶܐ ܚܰܨܶܐ ܕܰܐܒܪܳܗܳܡ. ܗܰܢܳܐ ܕܠܰܬܝܳܐ ܟܬ̣ܺܝܘܳܐ ܒܰܫܰܪ̈ܒܳܬ̣ܰܬ̣ܬ̣ܶܗ، ܡܶܕܠܶܐ ܡܰܥܣܳܪ̈ܶܐ ܡܶܐ ܐܰܒܪܳܗܳܡ. ܘܡܒܰܪܰܟ̣ ܠܶܗ ܥܰܠܰܗ̱ܘܳܐ ܕܶܐܠܶܗ ܗܰܘܶܢ ܐܰ ܘܰܥ̈ܕܰܬ. ܠܰܝܬ ܥܬܺܪܰܕ. ܐܽܘ ܢܰܥܺܝܡܳܐ ܓܡܺܝܒܰܪܶܟ ܡܽܐܘ ܪܰܒܳܐ. ܗܰܪܟܶܐ ܐܰܢ̈ܢܳܫܶܐ ܕܟܳܡܰܝܬܺܝ ܓܡܰܝܕܺܝ ܡܰܥܣܳܪ̈ܶܐ. ܐܶܠܳܐ ܬܰܡܳܐ ܣܗܶܕ ܠܶܗ ܠܽܐܘ ܟܬ̣ܳܘܳܐ ܐܰܥܠܶܗ ܕܒܰܚ̈ܚܰܝܶܐܝܳܐ. ܟ̣ܶܕ ܚܰܕ̱ ܕܳܐܡܶܪ، ܒܺܐܝ ܘܰܨܺܝ̣ܛܰܐ ܕܰܐܒܪܳܗܳܡ، ܠܶܘܺܝ ܣܬܶܐ ܕܡܳܝܰܕ ܗ̱ܘܳܐ ܐܰ ܡܰܥܣܳܪ̈ܶܐ ܗܽܘܠܶܗ ܡܰܥܣܳܪ̈ܶܐ. ܡܺܝܕ̥ܶܐ ܕܶܒܚܰܨܶܗ ܕܽܐܘ ܒܰܐܒܳܐ ܗ̱ܘܳܐ. ܐܺܝ ܢܰܩܩܰܐ ܕܠܰܩܺܝ ܠܡܰܠܟܺܝܙܕܶܩ. ܐܶܢ ܕܗܽܘܝܳܐ ܗ̱ܘܰܐ ܐܺܝ ܓܡܺܝܪܽܘܬ̣ܳܐ ܒܺܐܝ ܟܳܗܢܽܘܬ̣ܳܐ ܕܰܠܶܘ̈ܳܝܶܐ، ܕܶܐܒܰܗ̇ ܡܶܕܠܶܗ ܐܽܘ ܥܰܡܳܐ ܐܽܘ ܢܳܡܽܘܣܳܐ܆ ܡܶܢ ܣܢܺܝܩܽܘܬ̣ܳܐ ܟܶܬܗ̱ܘܳܐ ܕܩܳܝܶܡ ܟܽܘܡܪܳܐ ܐ̱ܚܪܶܢܳܐ ܒܽܐܘ ܕܽܘܡܝܳܐ ܕܡܰܠܟܺܝܙܕܶܩ؟ ܘܠܳܐ ܐ̱ܡܶܪ ܠܶܗ ܒܽܐܘ ܕܽܘܡܝܳܐ ܕܰܐܗܪܽܘܢ ܓܬܳܗ̱ܘܶܐ. ܐܠܳܐ ܟ̣ܶܕ ܐܰܝܕܰܪܒܳܐ ܕܗܰܘܺܝ ܚܶܠܳܦܳܐ ܒܺܐܝ ܟܽܘܡܪܽܘܬܳܐ، ܗܰܘܟ̣ܰܐ ܗܰܘܺܝ ܚܶܠܳܦܳܐ ܒܽܐܘ ܢܳܡܽܘܣܳܐ ܣܬܶܐ. ܡܺܝܕ̥ܶܐ ܗܰܘܳܐ ܕܐ̱ܡܺܝܪ ܐܰܥܠܶܗ ܗܰܢܺܝ، ܡܶܐ ܫܰܪܒܬ̣ܳܐ ܐ̱ܚܪܶܬܳܐ ܡܰܘܠܶܕ. ܕܐ̱ܢܳܫܳܐ ܡܶܢܰܗ̇ ܩܰܛܥܺܝܰܢ ܠܳܐ ܟ̣ܕܶܡ ܠܶܗ ܒܽܐܘ ܡܰܕܒܚܳܐ. ܓܠܺܝܬ̣ܳܝܳܐ، ܕܡܽܐܘ ܫܰܒܛܳܐ ܕܺܝ̣ܗܽܘܕܳܐ ܢܰܦܶܩ ܡܳܪܰܢ. ܕܠܳܐ ܐ̱ܡܶܪܠܶܗ ܐܰܥܠܰܗ ܠܡܽܘܫܶܐ ܡܶܕܶܐ ܥܰܠܺܝ ܟܽܘܡܪܽܘܬ̣ܳܐ. ܘܙܶܬ ܝ̣ܺܕܶܥܬܳܝܳܐ، ܡܺܝܕ̥ܶܐ ܕܐ̱ܡܶܪ ܠܶܗ ܒܽܐܘ ܕܽܘܡܝܳܐ ܕܡܰܠܟܺܝܙܕܶܩ ܓܩܳܝܶܡ ܟܽܘܡܪܳܐ ܐ̱ܚܪܶܢܳܐ. ܗܰܘܳܐ ܕܠܰܬܝܳܐ ܟ̣ܕܽܘ ܢܳܡܽܘܣܳܐ ܕܰܦܽܘܩ̈ܕܳܢܶܐ ܔܶܣܕܰܐܢܺܝ. ܐܶܠܳܐ ܟ̣ܕܽܘ ܚܰܝܠܳܐ ܕܰܚܰܝ̈ܶܐ ܕܠܳܐ ܓܬܰܝܡܺܝ. ܥܰܠ ܕܟܳܣܳܗܶܕ ܐܰܥܠܶܗ، ܕܗܰܬܰܬ ܟܽܘܡܪܳܐ ܠܥܳܠܰܡ، ܒܽܐܘ ܕܽܘܡܝܳܐ ܕܡܰܠܟܺܝܙܕܶܩ. ܒܰܪܶܟ̥ܡܳܪܝ܀