ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܐ: ܐ ـ ܝܕ܇ ܒ: ܐ ـ ܕ Hebrews 1:1-14, 2:1-4

ܒܟܽ‍ܠ ܡ̈ܢܰܘܢ ܘܰܒܟܽ‍ܠ ܕܶܡ̈ܘܳܢ ܡܰܠܶ‍ܠ ܐܰܠܳܗܳܐ ܥܰܡ ܐܰܒܗܰܝ̈ܢ ܒܰܢ̈ܒܺܝܶܐ ܡܶܢ ܩܕܺܝܡ. ܘܰܒܗܳܠܶܝܢ ܝܰܘ̈ܡܬܐ ܐ̱ܚܪ̈ܳܝܶܐ ܡܰܠܶ‍ܠ ܥܰܡܰܢ ܒܰܒܪܶܗ. ܕܠܶܗ ܣܳܡ ܝܳܪܬܳܐ ܕܟܽ‍ܠܡܶܕܶܡ. ܘܒܶܗ ܥܒܰܕ ܠ̈ܥܳܠܡܶܐ. ܕܗܽܘܝܽܘ ܨܶܡܚܳܐ ܕܫܽܘܒܚܶܗ ܘܨܰܠܡܳܐ ܕܺܐܝܬܽܘܬܗ ܘܰܐܚܺܝܕ ܟܽ‍ܠ ܒܚܰܝܠܐ ܕܡܶܠܬܗ. ܘܗܽܘ ܒܰܩܢܽܘܡܶܗ ܥܒܰܕ ܕܽܘܟܳܝܳܐ ܕܰܚܛܳܗܰܝ̈ܢ ܘܺܝܬܶܒ ܥܰܠ ܝܰܡܺܝܢܐ ܕܪܰܒܽܘܬܐ ܒܰܡܪ̈ܰܘܡܶܐ. ܘܗܳܢܐ ܟܽ‍ܠܶܗ ܝܺܪܶܒ ܡܶܢ ܡܰـ̈ܠܐܟܶܐ܆ ܐܰܝܟ ܡܳܐ ܕܰܡܝܰܬܪ ܫܡܳܐ ܕܺܝܪܶܬ ܡܶܢ ܕܺܝܠܗܽܘܢ. ܠܰܐܝܢܐ ܓܶܝܪ ܡܶܢ ܡܰـ̈ܠܐܟܶܐ ܡܶܡܬܘܡ ܐܶܡܰܪ ܐܠܗܐ. ܕܒܶܪܝ ܐܰܢ̱ܬ܇ ܐܶܢܳܐ ܝܰܘܡܳܢܐ ܝܺܠܶܕܬܟ܆ ܘܬܽܘܒ ܕܶܐܢܳܐ ܐܶܗܘܶܐ ܠܶܗ ܠܰܐܒܐ܇ ܘܗܽܘ ܢܶܗܘܶܐ ܠܺܝ ܠܰܒܪܐ. ܬܘܒ ܕܶܝܢ ܐܶܡܰܬܝ ܕܡܰܥܶܠ ܒܽܘܟܪܳܐ ܠܥܳܠܡܐ܆ ܐܶܡܰܪ. ܕܠܶܗ ܢܶܣܓܕܽܘܢ ܟܽ‍ܠܗܽܘܢ ܡܰـ̈ܠܐܟܶܐ ܕ̣ܰܐܠܗܐ. ܥܰܠ ܡܰـ̈ܠܐܟܶܐ ܕ̣ܶܝܢ ܗܳܟܰܢܐ ܐܶܡܰܪ. ܕܰܥܒܰܕ ܡܰܠܐܟܰܘ̈ܗ̱ܝ ܪܽܘܚ܇ ܘܰܡܫܰܡܫܢܰܘ̈ܗ̱ܝ ܢܽܘܪ ܝܳܩܕܳܐ. ܥܰܠ ܒܪܳܐ ܕܶܝܢ ܐܶܡܰܪ. ܕܟܽܘܪܣܝܳܟ ܕܺܝܠܳܟ ܐܰܠܗܐ ܠܥܳܠܰܡ ܥܳܠܡܺܝܢ. ܫܰܒܛܳܐ ܦܫܺܝܛܳܐ ܫܰܒܛܳܐ ܕ̣ܡܰܠܟܘܬܟ. ܪܚܶܡܬ ܟܺܐܢܽܘܬܐ ܘܰܣܢܰܝܬ ܥܰܘܠܐ܆ ܡܶܛܽܠ ܗܳܢܐ ܡܰܫܚܳܟ ܐܰܠܗܐ ܐܰܠܗܳܟ܇ ܡܶܫܚܳܐ ܕܚܰܕܽܘܬܐ ܝܰܬܝܪ ܡܶܢ ܚܰܒܪ̈ܰܝܟ. ܘܬܘܒ ܐܰܢ̱ܬ ܡܶܢ ܒܪܺܝܫܺܝܬ ܣܳܡܬ ܫܶܬܐܣܶܝ̈ܗ̇ ܕܰܐܪܥܐ. ܘܰܫܡܰܝܐ ܥܒܳܕ ܐܻܝ̈ܕܰܝܟ ܐܢܽܘܢ. ܗܶܢܽܘܢ ܢܶܥܒܪܽܘܢ ܘܰܐܢ̱ܬ ܩܰܝܳܡ ܐܰܢ̱ܬ. ܘܟܽܠܗܽܘܢ ܐܰܝܟ ܢܰܚܬܳܐ ܢܶܒܠܽܘܢ. ܘܰܐܝܟ ܬܰܟܣܺܝܬܐ ܬܶܥܽܘܦ ܐܶܢܽܘܢ. ܗܶܢܽܘܢ ܢܶܬܚܰܠܦܽܘܢ. ܘܰܐܢ̱ܬ ܐܰܝܟ ܕܺܐܝܬܝܟ ܐܰܢ̱ܬ. ܘܰܫܢܰܝ̈ܟ̇ ܠܐ ܢܶܓܡܪ̈ܳܢ. ܠܡܰܢ ܕܶܝܢ ܡܶܢ ܡܰـ̈ܠܐܟܶܐ ܡܶܡܬܽܘܡ ܐܶܡܰܪ. ܕܬܶܒ ܡܶܢ ܝܰܡܺܝܢܝ܆ ܥܕܰܡܐ ܕܶܐܣܺܝܡ ܒܥܶܠܕܒܒܰܝ̈ܟ ܟܽܘܒܫܳܐ ܬܚܶܝܬ ܪ̈ܶܓـܠܰܝܟ. ܠܐ ܗܳܐ ܟܽܠܗܽܘܢ ܐܺܝܬܝܗܽܘܢ ܪ̈ܽܘܚܶܐ ܕܬܶܫܡܶܫܬܐ܆ ܕܡܶܫܬܰܕܪܺܝܢ ܒܬܶܫܡܶܫܬܐ ܡܶܛܽܠ ܐܰܝܠܶܝܢ ܕܰܥܬܺܝܕܺܝܢ ܠܡܺܐܪܰܬ ܚܰـ̈ܝܶܐ. ܡܶܛܽܠ ܗܳܢܐ ܚܰܝܒܺܝܢܰܢ܆ ܕܝܰܬܝܪܐܝܺܬ ܢܶܗܘܶܐ ܙܗܺܝܪܺܝܢ ܒܡܶܕܶܡ ܕܰܫܡܰܥܢ ܕܠܐ ܢܶܦܶܠ. ܐܶܢ ܓܶܝܪ ܡܶܠܬܐ ܕܶܐܬܡܰܠ‍ܠܰܬ ܒܝܰܕ ܡܰـ̈ܠܐܟܶܐ ܐܶܫܬܰܪܪܰܬ: ܘܟܽܠ ܕܫܰܡܥܗ̇ ܘܰܥܒܰܪ ܥܠܶܝܗ̇ ܩܰܒܶܠ ܦܽܘܪܥܳܢܳܐ ܒܟܺܐܢܽܘܬܐ܆ ܐܰܝܟܢܐ ܚܢܰܢ ܢܶܥܪܽܘܩ܇ ܐܢ ܢܰܒܣܶܐ ܥܰܠ ܐܰܝܠܶܝܢ ܕܗܶܢܽܘܢ ܐܢܽܘܢ ܚܰܝܰܝ̈ܢ܇ ܗܳܢܽܘܢ ܕܫܰܪܺܝܘ ܡܶܢ ܡܪܰܢ ܠܡܶܬܡܰܠ‍ܠܽܘ. ܘܡܶܢ ܐܰܝܠܶܝܢ ܕܡܶܢܶܗ ܫܡܰܥܘ ܒܰܢ ܐܶܫܬܰܪܰܪܘ܇ ܟܰܕ ܣܳܗܶܕ ܥܠܰܝܗܽܘܢ ܐܠܗܐ. ܒܐܳܬܘ̈ܳܬܐ. ܘܰܒܬܶܕܡܪ̈ܳܬܳܐ. ܘܰܒܚܰܝ̈ܠܐܶ ܡܫܰܚ̈ܠܦܶܐ. ܘܰܒܦܽܘ̈ܠܳܓܶܐ ܕܪܽܘܚܐ ܕܩܽܘܕܫܐ܇ ܕܶܐܬܝܗܶܒܘ ܐܰܝܟ ܨܶܒܝܢܶܗ܀