ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܛ: ܓ ـ ܝܒ Hebrews 9:3-12

ܡܰܫܟܢܳܐ ܕܶܝܢ ܓܰܘܳܝܳܐ ܕܰܠܓܰܘ ܡܶܢ ܐܰܦ̈ܰܝ ܬܰܪܥܳܐ ܕܰܬܪ̈ܝܢ܆ ܡܶܬܩܪܶܐ ܗ̱ܘܳܐ ܩܕܽܘܫ ܩܽܘ̈ܕܫܶܐ. ܘܺܐܝܬ ܗ̱ܘܳܐ ܒܶܗ ܒܶܝܬ ܒܶܣ̈ܡܶܐ ܕܕܰܗܒܳܐ ܘܩܺܒܽܘܬܳܐ ܕܕܺܝܰܬܺܩܺܐ ܕܰܩܪܺܝܡܐ ܟܽ‍ܠܗ̇ ܒܕܰܗܒܳܐ. ܘܺܐܝܬ ܒܳܗ̇ ܩܶܣܛܐ ܕܕܰܗܒܳܐ܆ ܗܳܝ ܕܺܐܝܬ ܗ̱ܘܳܐ ܒܳܗ̇ ܡܰܢ̱ܢܳܐ ܘܫܰܒܛܳܐ ܕܰܐܗܪܽܘܢ ܗܰܘ ܕܰܐܦܪܰܥ ܘܠܽܘ̈ܚܶܐ ܕܕܺܝܰܬܺܩܺܐ. ܘܰܠܥܶܠ ܡܶܢܗ̇ ܟܪ̈ܘܒܶܐ ܕܫܽܘܒܚܳܐ ܕܡܰܛܠܺܝܢ ܥܰܠ ܚܽܘܣܳܝܳܐ. ܠܳܐ ܗ̱ܘܳܐ ܕܶܝܢ ܙܰܒܢܰܐ ܗ̱ܘ܆ ܕܢܺܐܡܰܪ ܥܰܠ ܚܕܳܐ ܚܕܳܐ ܡܶܢ ܗܳܠܶܝܢ ܕܗܳܟܰܢܐ ܡܰܬܩ̈ܢܳܢ ܗܘ̈ܰܝ. ܘܰܠܡܰܫܟܢܳܐ ܒܰܪܳܝܳܐ ܒܟܽܠܙܒܰܢ ܥܳܐܠܺܝܢ ܗܘܰܘ ܟܽܘܡܪ̈ܐ ܘܰܡܫܰܠܡܺܝܢ ܗܘܰܘ ܬܶܫܡܶܫܬܗܽܘܢ. ܠܡܰܫܟܢܳܐ ܕܶܝܢ ܕܰܠܓܰܘ ܡܶܢܶܗ܆ ܚܕܳܐ ܗ̱ܘ ܒܫܰܢ̱ܬܳܐ ܒܰܠܚܽܘܕܰܘܗ̱ܝ ܥܳܐܶܠ ܗ̱ܘܳܐ ܪܰܒܟܽܘܡܪ̈ܐ܆ ܒܰܕܡܳܐ ܗܰܘ ܕܰܡܩܰܪܶܒ ܗ̱ܘܳܐ ܚܠܳܦ ܢܰܦܫܶܗ ܘܰܚܠܳܦ ܣܰܟ‍ܠܽܘܬܗ ܕܥܰܡܐ. ܒܗܳܕܶܐ ܕܶܝܢ ܡܰܘܕܥܳܐ ܗܘܳܬ ܪܽܘܚܐ ܕܩܽܘܕܫܳܐ: ܕܠܳܐ ܐܶܬܓܰ‍ܠܝܰܬ ܥܕܰܟܺܝܠ ܐܽܘܪܚܐ ܕܩܰܕܺܝ̈ܫܶܐ܆ ܟܡܳܐ ܙܰܒܢܳܐ ܕܺܐܝܬ ܗ̱ܘܳܐ ܩܝܳܡܳܐ ܠܡܰܫܟܢܳܐ ܩܰܕܡܳܝܐ. ܘܺܐܝܬܰܘܗ̱ܝ ܗ̱ܘܳܐ ܡܰܬܠܳܐ ܗܳܢܐ܆ ܠܙܰܒܢܳܐ ܗܰܘ ܕܒܶܗ ܩܽܘܪ̈ܒܳܢܶܐ ܘܕܶܒ̈ܚܶܐ ܡܶܬܩܰܪܒܺܝܢ ܗܘܰܘ܆ ܐܰܝܠܶܝܢ ܕܠܳܐ ܡܶܫܟܚܺܝܢ ܗܘܰܘ ܠܡܶܓܡܰܪ ܬܺܐܪܬܶܗ ܕܡܰܢ ܕܰܡܩܰܪܶܒ ܠܗܽܘܢ܆ ܐܶܠܳܐ ܒܡܶܐܟܠܳܐ ܘܰܒܡܰܫܬܝܳܐ ܒܰܠܚܽܘܕ. ܘܰܒܡܰܥ̈ܡܽܘܕܝܳܬܳܐ ܕܰܙܢܺܝ̈ܢ ܙܢܺܝ̈ܢ. ܕܺܐܝܬܰܝܗܶܝܢ ܦܽܘ̈ܩܳܕܶܐ ܕܒܶܣܪܳܐ ܕܣܺܝܡܺܝܢ ܥܕܰܡܳܐ ܠܙܰܒܢܳܐ ܕܬܽܘܪܳܨܳܐ. ܡܫܺܝܚܳܐ ܕܶܝܢ ܕܶܐܬܳܐ ܗܘܳܐ ܪܰܒܟܽܘܡܪ̈ܶܐ ܕܛܳܒ̈ܳܬܐ ܕܰܣܥܰܪ܆ ܘܥܰܠ ܠܡܰܫܟܢܳܐ ܪܰܒܳܐ ܘܰܡܫܰܠܡܳܢܳܐ ܕܠܐ ܥܒܺܝܕ ܒܺܐܝ̈ܕܰܝܳܐ ܘܠܳܐ ܗܘܳܐ ܡܶܢ ܗܳܠܶܝܢ ܒܶܪ̈ܝܳܬܐ. ܘܠܳܐ ܥܰܠ ܒܰܕܡܳܐ ܕܨܺܦܪ̈ܳܝܶܐ ܘܰܕܥܶܓ̈ܠܶܐ܆ ܐܶܠܐ ܒܰܕܡܳܐ ܕܢܰܦܫܶܗ ܥܰܠ ܚܕܳܐ ܙܒܰܢ ܠܒܶܝܬ ܡܰܩܕܫܳܐ܆ ܘܶܐܫܟܰܚ ܦܽܘܪܩܳܢܳܐ ܕܰܠܥܳܠܰܡ܀

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܝܒ: ܟܚ ـ ܟܛ܇ ܝܓ: ܐ ـ ܒ Hebrews 12:28-29, 13:1-2

ܡܶܛܽܠ ܗܳܟܺܝܠ ܕܩܰܒܶܠܢ ܡܰܠܟܽܘܬܐ ܕܠܐ ܡܶܬܙܺܝܥܳܐ܆ ܢܺܐܚܽܘܕ ܛܰܝܒܽܘܬܐ ܕܒܳܗ̇ ܢܫܰܡܶܫ ܘܢܶܫܦܰܪ ܠܐܠܳܗܳܐ ܒܬܰܚܡܶܨܬܐ ܘܰܒܕܶܚܠܬܐ. ܐܰ‌ܠܳܗܰܢ ܓܶܝܪ ܢܽܘܪܰܐ ܗ̱ܘ ܐܳܟܶ‍ܠܬܐ ܚܽܘܒܳܐ ܕܰܐܚܶـ̈ܐ ܢܟܰ‍ܬܰܪ ܒܟܽܘܢ. ܘܪܶܚܡܬܐ ܕܰܐܟ̈ܣܢܳܝܶܐ ܠܐ ܬܶܛܥܽܘܢ. ܒܗܳܕܶܐ ܓܶܝܪ ܫܘܰܘ ܐ̱ܢܳܫ̈ܳܐ܆ ܕܟܰܕ ܠܐ ܪܓܺܝܫܺܝܢ ܢܩܰܒܠܽܘܢ ܡܰܠܰܐܟ̈ܶܐ܀