ܚܕ ܒܫܒܐ ܕܩܛܢܐ
ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܝܓ: ܝܐ ـ ܝܕ܇ ܝܕ:ܐ ـ ܟܓ Romans 13:11-14, 14:1-23
ܘܳܐܦ ܗܳܕܐ ܕܰܥܘ܆ ܕܙܰܒܢܰܐ ܗ̱ܘ ܘܫܳܥܬܳܐ ܗ̱ܝ ܡܶܟܺܝܠ ܕܢܶܬܥܺܝܪ ܡܶܢ ܫܶܢܬܰܢ. ܗܳܫܰܐ ܗ̱ܘ ܓܶܝܪ ܐܶܬܩܰܪܰܒܘ ܠܰܢ ܚܰܝܰܝ̈ܢ ܝܰܬܺܝܪ ܡܶܢ ܕܟܰܕ ܗܰܝܡܶܢܰܢ. ܠܺܠܝܳܐ ܡܶܟܺܝܠ ܥܒܰܪ ܘܺܐܝܡܳܡܳܐ ܩܪܶܒ. ܢܢܺܝܚ ܡܶܢܰܢ ܗܳܟܺܝܠ ܥܒ̈ܳܕܶܐ ܕܚܶܫܽܘܟܳܐ܆ ܘܢܶܠܒܰܫ ܙܰܝܢܶܗ ܕܢܽܘܗܪܐ ܘܰܐܝܟ ܕܒܺܐܝܡܳܡܳܐ ܒܶܐܣܟܺܡܳܐ ܢܗܰܠܶܟ. ܠܳܐ ܒܰܙܡܳܪܳܐ ܘܠܳܐ ܒܪܰܘܳܝܽܘܬܳܐ. ܘܠܳܐ ܒܡܰܕܡܟܳܐ ܛܰܢܦܳܐ. ܘܠܳܐ ܒܰܚܣܳܡܳܐ ܘܰܒܚܶܪܝܳܢܳܐ. ܐܶܠܳܐ ܠܽܘܒܫܽܘܗ̱ܝ ܠܡܳܪܰܢ ܝܶܫܘܥ ܡܫܺܝܚܐ܆ ܘܠܳܐ ܬܺܐܨܦܽܘܢ ܕܒܶܣܪܟܽܘܢ ܠܰܪ̈ܓܺܝܓܳܬܳܐ. ܠܰܐܝܢܳܐ ܕܶܝܢ ܕܰܟܪܺܝܗ ܒܗܰܝܡܳܢܘܬܳܐ ܗܰܒܘ ܠܗ ܐܺܝܕܳܐ. ܘܠܳܐ ܬܶܗܘܘܢ ܡܶܬܦܰܠܓܺܝܢ ܒܡܰܚ̈ܫܒܳܬܟܽܘܢ. ܐܺܝܬ ܓܶܝܪ ܕܰܡܗܰܝܡܢ ܕܟܽܠܡܕܶܡ ܢܶܐܟܽܘܠ. ܘܕܰܟܪܺܝܗ ܝܰܪܩܰܐ ܗ̱ܘ ܐܳܟܶܠ. ܗܰܘ ܕܶܝܢ ܕܳܐܟܶܠ ܠܗܰܘ ܡܰܢ ܕܠܳܐ ܐܳܟܶܠ ܠܳܐ ܢܫܽܘܛ. ܘܗܰܘ ܡܰܢ ܕܠܳܐ ܐܳܟܶܠ ܠܗܰܘ ܡܰܢ ܕܳܐܟܶܠ ܠܳܐ ܢܕܽܘܢ. ܐܰܠܗܐ ܓܶܝܪ ܩܰܪܒܶܗ. ܐܰܢ̱ܬ ܡܰܢ ܐܰܢ̱ܬ ܕܕܳܐܷܢ ܐܰܢ̱ܬ ܠܥܰܒܕܳܐ ܕܠܳܐ ܕܺܝܠܟ. ܕܶܐܢ ܩܳܐܷܡ ܠܡܳܪܶܗ ܩܳܐܷܡ. ܘܶܐܢ ܢܳܦܠ ܠܡܳܪܗ ܢܳܦܶܠ. ܡܩܳܡ ܗ̱ܽܘ ܕܶܝܢ ܩܳܐܷܡ. ܡܳܛܶܐ ܓܶܝܪ ܒܺܐܝ̈ܕܰܝ ܡܳܪܗ ܕܰܢܩܺܝܡܺܝܘܗ̱ܝ. ܐܺܝܬ ܕܕܳܐܷܢ ܝܰܘܡܳܐ ܡܶܢ ܝܰܘܡܐ. ܘܺܐܝܬ ܕܕܳܐܷܢ ܟܠܗܘܢ ܝܰܘ̈ܡܳܬܳܐ. ܟܠܢܳܫ ܕܶܝܢ ܒܡܰܕܥܳܐ ܕܢܰܦܫܶܗ ܢܶܫܬܰܪܰܪ. ܡܰܢ ܕܡܶܬܪܰܥܶܐ ܕܝܰܘܡܐ܆ ܠܡܳܪܶܗ ܡܶܬܪܰܥܶܐ. ܘܟܽܠ ܕܠܳܐ ܡܶܬܪܰܥܐ ܕܝܰܘܡܳܐ ܠܡܳܪܗ ܠܳܐ ܡܶܬܪܰܥܶܐ. ܘܕܳܐܟܶܠ ܠܡܳܪܗ ܐܳܟܶܠ. ܘܠܰܐܠܳܗܐ ܡܰܘܕܶܐ. ܘܰܕܠܳܐ ܐܳܟܶܠ ܠܡܳܪܗ ܠܳܐ ܐܳܟܠ. ܘܡܰܘܕܶܐ ܠܰܐܠܳܗܐ. ܠܰܝܬ ܓܶܝܪ ܐ̱ܢܳܫ ܡܶܢܰܢ ܕܰܠܢܰܦܫܶܗ ܚܰܝ. ܘܠܰܝܬ ܐ̱ܢܳܫ ܕܰܠܢܰܦܫܶܗ ܡܳܐܷܬ. ܡܛܠ ܕܶܐܢ ܚܳܐܷܝܢܰܢ܆ ܠܡܳܪܰܢ ܚܳܐܷܝܢܰܢ. ܘܶܐܢ ܡܳܝܬܺܝܢܰܢ܆ ܠܡܳܪܰܢ ܗ̱ܽܘ ܡܳܝܬܺܝܢܰܢ. ܘܶܐܢ ܚܰܝܺܝܢܰܢ ܗܳܟܺܝܠ ܘܶܐܢ ܡܳܝܬܺܝܢܰܢ ܕܡܳܪܰܢ ܚܢܰܢ. ܡܶܛܠ ܗܳܢܐ ܐܳܦ ܡܫܺܝܚܐ ܡܺܝܬ ܘܰܚܝܳܐ ܘܩܳܡ܆ ܕܗܽܘ ܢܶܗܘܐ ܡܳܪܝܐ ܠܡܺܝ̈ܬܶܐ ܘܰܠܚܰܝ̈ܶܐ. ܐܰܢ̱ܬ ܕܶܝܢ ܡܳܢܳܐ ܕܳܐܷܢ ܐܰܢ̱ܬ ܠܰܐܚܽܘܟ. ܐܰܘ ܐܳܦ ܐܰܢ̱ܬ ܠܡܳܢܐ ܫܳܐܷܛ ܐܰܢ̱ܬ ܠܰܐܚܽܘܟ. ܟܠܰܢ ܓܶܝܪ ܥܬܺܝܕܺܝܢܰܢ ܠܰܡܩܳܡ ܩܕܳܡ ܒܺܝܡ ܕܰܡܫܺܝܚܐ. ܐܰܝܟ ܕܰܟܬܺܝܒ. ܕܚܰܝ ܐ̱ܢܳܐ ܐܳܡܰܪ ܡܳܪܝܐ܆ ܕܠܺܝ ܬܶܟܽܘܦ ܟܠ ܒܪܽܘܟ܇ ܘܠܺܝ ܢܰܘܕܶܐ ܟܠ ܠܶܫܳܢ. ܡܳܕܶܝܢ ܟܠ ܐ̱ܢܳܫ ܡܶܢܰܢ ܦܶܬܓܳܡܐ ܚܠܳܦ ܢܰܦܫܶܗ ܝܳܗܶܒ ܠܰܐܠܗܐ. ܠܳܐ ܡܶܟܺܝܠ ܢܕܽܘܢ ܚܰܕ ܠܚܰܕ. ܐܶܠܳܐ ܗܳܕܐ ܕܽܘܢܘ ܝܰܬܺܝܪܳܐܝܺܬ܆ ܕܬܽܘܩܰܠܬܳܐ ܠܰܐܚܽܘܟ ܠܳܐ ܬܣܺܝܡ. ܝܳܕܰܥ ܐ̱ܢܳܐ ܓܶܝܪ ܘܰܡܦܳܣ ܐ̱ܢܳܐ ܒܡܳܪܝܐ ܝܶܫܘܥ܆ ܕܡܶܕܶܡ ܕܰܡܣܰܝܰܒ ܡܶܢ ܠܘܳܬܶܗ ܠܰܝܬ. ܐܶܠܳܐ ܠܰܐܝܢܳܐ ܕܪܳܢܶܐ ܥܰܠ ܡܶܕܶܡ ܕܰܛܡܰܐ܆ ܠܗܰܘ ܗ̱ܽܘ ܒܰܠܚܽܘܕ ܛܡܰܐ. ܐܶܢ ܕܝܢ ܡܶܛܠ ܡܶܐܟܽܘܠܬܳܐ ܡܥܺܝܩ ܐܰܢ̱ܬ ܠܰܐܚܽܘܟ܆ ܠܳܐ ܗ̱ܘܳܐ ܒܚܽܘܒܳܐ ܡܗܰܠܶܟ ܐܢ̱ܬ. ܠܳܐ ܬܰܘܒܶܕ ܒܡܶܐܟܘܠܬܳܟ ܠܗܰܘ ܕܡܛܠܬܶܗ ܡܺܝܬ ܡܫܺܝܚܐ. ܘܠܳܐ ܬܶܬܓܰܕܰܦ ܛܳܒܬܰܢ. ܡܰܠܟܘܬܶܗ ܓܝܪ ܕܰܐܠܗܐ܆ ܠܳܐ ܗ̱ܘܳܬ ܡܶܐܟܠܳܐ ܘܡܰܫܬܝܳܐ܇ ܐܶܠܳܐ ܟܺܐܢܽܘܬܳܐ ܘܰܫܠܳܡܐ ܘܚܰܕܽܘܬܳܐ ܒܪܽܘܚܐ ܕܩܽܘܕܫܳܐ. ܡܰܢ ܕܰܒܗܳܠܝܢ ܓܶܝܪ ܡܫܰܡܶܫ ܠܰܡܫܺܝܚܐ ܫܳܦܰܪ ܠܰܐܠܳܗܐ܇ ܘܰܩܕܳܡ ܒܢܰܝ̈ܢܳܫܳܐ ܒܩܶܐ. ܗܳܫܐ ܒܳܬܰܪ ܫܠܳܡܐ ܢܶܪܗܰܛ. ܘܒܳܬܰܪ ܒܶܢܝܳܢܐ ܚܰܕ ܕܚܰܕ. ܘܠܳܐ ܡܶܛܠ ܡܶܐܟܽܘܠܬܳܐ ܢܶܫܪܶܐ ܥ̈ܒܳܕܶܐ ܕܰܐܠܗܐ. ܟܠܡܶܕܶܡ ܓܶܝܪ ܕܟܶܐ ܗ̱ܽܘ. ܐܶܠܳܐ ܒܺܝܫ ܗ̱ܘ ܠܒܰܪܢܳܫܐ ܕܰܒܬܽܘܩܰܠܬܳܐ ܐܳܟܶܠ. ܫܰܦܺܝܪ ܗ̱ܽܘ ܕܠܳܐ ܢܶܐܟܽܘܠ ܒܶܣܪܳܐ ܘܠܳܐ ܢܶܫܬܶܐ ܚܰܡܪܳܐ ܘܠܳܐ ܡܶܕܶܡ ܕܡܶܬܬܩܶܠ ܒܶܗ ܐܰܚܘܢ. ܐܰܢ̱ܬ ܕܺܐܝܬ ܒܳܟ ܗܰܝܡܳܢܘܬܳܐ܆ ܒܢܰܦܫܳܟ ܐܰܚܽܘܕܶܝܗ̇ ܩܕܳܡ ܐܰܠܗܐ. ܛܽܘܒܰܘܗ̱ܝ ܠܡܰܢ ܕܠܳܐ ܕܳܢ ܢܰܦܫܶܗ ܒܡܶܕܶܡ ܕܰܦܪܰܫ. ܐܰܝܢܳܐ ܓܶܝܪ ܕܡܶܬܦܰܠܰܓ ܘܳܐܟܶܠ܆ ܐܶܬܚܰܝܰܒ ܠܗ܇ ܡܛܠ ܕܠܰܘ ܒܗܰܝܡܳܢܘܬܐ. ܟܠ ܡܶܕܶܡ ܓܝܪ ܕܠܳܐ ܗ̱ܘܳܐ ܡܶܢ ܗܰܝܡܳܢܘܬܳܐ܆ ܚܛܺܝܬܰܐ ܗ̱ܘ܀