ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܛܺܝܡܳܬܶܐܳܘܣ ܐ
ܒ: ܐ ـ ܝܗ 1Thimothy 2:1-15

ܒܳܥܶܐ ܐ̱ܢܳܐ ܗܳܟܺܝܠ ܡܶܢܳܟ܆ ܕܡܶܢ ܩܕܳܡ ܟܽ‍ܠܡܶܕܶܡ ܒܳܥܽܘܬܐ ܬܶܗܘܶܐ ܡܩܰܪܶܒ ܠܰܐܠܗܳܐ ܘܰܨܠܽܘܬܐ ܘܬܰܚܢܰܢܬܐ ܘܬܰܘܕܺܝܬܐ܇ ܚܠܳܦ ܟܽ‍ܠܗܘܢ ܒܢܰܝ̈ܢܳܫܳܐ ܚܠܳܦ ܡܰܠܟ̈ܶܐ ܘܪ̈ܰܘܪܒܳܢܶܐ܇ ܕܥܽܘܡܪܳܐ ܫܰܠܝܳܐ ܘܢܺܝܚܳܐ ܢܶܥܡܰܪ ܒܟܽ‍ܠܳܗ̇ ܕܶܚܠܰܬ ܐܰܠܳܗܳܐ ܘܕܰܟܝܽܘܬܳܐ. ܗܳܕܶܐ ܓܶܝܪ ܫܰܦܺܝܪܳܐ ܘܰܡܩܰܒܠܳܐ ܩܕܳܡ ܐܰܠܳܗܳܐ ܡܰܚܝܳܢܰܢ܇ ܗܰܘ ܕܨܳܒܶܐ ܕܟܽ‍ܠܗܽܘܢ ܒܢܰܝ̈ܢܳܫܳܐ ܢܺܝܚܽܘܢ܇ ܘܢܶܬܦܢܽܘܢ ܠܺܝܕܰܥܬܳܐ ܕܰܫܪܳܪܳܐ. ܚܰܕ ܗ̱ܘ ܓܶܝܪ ܐܰܠܳܗܳܐ. ܘܚܰܕ ܗ̱ܽܘ ܡܶܨܥܳܝܳܐ ܕܰܐܠܳܗܳܐ ܘܕܰܒܢܰܝ̈ܢܳܫܳܐ ܒܰܪܢܳܫܳܐ ܝܶܫܘܥ ܡܫܺܚܐ܇ ܗܰܘ ܕܝܰܗ̱ܒ ܢܰܦܫܶܗ ܦܽܘܪܩܳܢܳܐ ܚܠܳܦ ܟܽ‍ܠ ܐ̱ܢܳܫ܆ ܣܳܗܕܽܘܬܳܐ ܕܶܐܬܳܬ ܒܙܰܒܢܳܗ̇. ܗܳܝ ܕܶܐܢܳܐ ܐܶܬܣܺܝܡܶܬ ܟܪܽܘܙܳܗ̇ ܘܰܫܠܺܝܚܳܗ̇. ܩܽܘܫܬܳܐ ܐܳܡܰܪ ܐ̱ܢܳܐ ܘܠܳܐ ܡܕܰܓܶ‍ܠ ܐ̱ܢܳܐ܆ ܕܰܗܘܺܝܬ ܡܰܠܦܢܳܐ ܕܥܰܡ̱̈ܡܶܐ ܒܗܰܝܡܳܢܽܘܬܳܐ ܕܰܫܪܳܪܳܐ. ܨܳܒܶܐ ܐ̱ܢܳܐ ܗܳܟܺܝܠ܆ ܕܰܗܘܰܘ ܡܨܰܠܶܝܢ ܓܰܒܪ̈ܶܐ ܒܟܽ‍ܠ ܕܽܘܟܳܐ܇ ܟܰܕ ܡܪܺܝܡܺܝܢ ܐܺܝܕ̈ܰܝܗܽܘܢ ܕܰܟܝܳܐܝܺܬ ܕܠܳܐ ܪܽܘܓܙܳܐ ܘܰܕܠܳܐ ܡܰܚ̈ܫܒܳܬܳܐ. ܗܳܟܰܢܳܐ ܐܳܦ ܢܶـ̈ܫܶܐ ܒܶܐܣܟܺܡܳܐ ܢܰܟܦܳܐ ܕܰܠܒܽܘܫܳܐ. ܒܬܰܚܡܶܨܬܳܐ ܘܰܒܢܰܟܦܽܘܬܳܐ ܢܶܗܘܶܐ ܬܰܨܒܺܝܬܗܶܝܢ܆ ܠܳܐ ܒܰܓܕܽܘ̈ܠܶܐ ܘܰܒܕܰܗܒܳܐ. ܐܰܘ ܒܡܰܪ̈ܓܳܢܝܳܬܳܐ. ܐܰܘ ܒܢܰܚ̈ܬܶܐ ܫܰܦܺܝܪ̈ܶܐ܇ ܐܶܠܳܐ ܒܰܥ̈ܒܳܕܶܐ ܛܳـ̈ܒܶܐ ܐܰܝܟܰܢܳܐ ܕܝܳܐܐܷ ܠܢܶܫ̈ܶܐ ܕܡܶܫܬܰܘ̈ܕܝܳܢ ܕܶܚܠܰܬ ܐܰܠܳܗܳܐ. ܐܰܢ̱ܬܬܳܐ ܒܫܶܠܝܳܐ ܗܘܳܬ ܝܳܠܦܳܐ ܒܟܽ‍ܠ ܫܽܘܥܒܳܕ. ܠܰܐܢ̱ܬܬܳܐ ܓܶܝܪ ܠܡܰܠܳܦܽܘ ܠܳܐ ܡܰܦܶܣ ܐ̱ܢܳܐ܆ ܘܠܳܐ ܠܡܰܡܪܳܚܽܘ ܥܰܠ ܓܰܒܪܳܐ܇ ܐܶܠܳܐ ܬܶܗܘܶܐ ܒܫܶܠܝܳܐ. ܐܳܕܳܡ ܓܶܝܪ ܐܶܬܓܒܶܠ ܠܽܘܩܕܰܡ ܘܗܳܝܕܶܝܢ ܚܰܘܳܐ. ܘܳܐܕܳܡ ܠܳܐ ܛܥܳܐ܆ ܐܰܢ̱ܬܬܳܐ ܕܶܝܢ ܛܥܳܬ ܘܥܶܒܪܰܬ ܥܰܠ ܦܽܘܩܕܳܢܳܐ. ܚܳܝܳܐ ܕܶܝܢ ܒܝܰܕ ܝܰܠܕܶܝ̈ܗ̇܆ ܐܶܢ ܢܩܰܘܽܘܢ ܒܗܰܝܡܳܢܽܘܬܳܐ ܘܰܒܚܽܘܒܳܐ ܘܰܒܩܰܕܺܝܫܽܘܬܳܐ ܘܰܒܢܰܟܦܽܘܬܳܐ܀