ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܝܒ: ܓ ـ ܝܐ Hebrews 12:3-11

ܚܙܰܘ ܗܳܟܺܝܠ ܟܡܳܐ ܣܰܝܒܰܪ ܡܶܢ ܚܰـ̈ܛܳܝܶܐ ܗܳܢܽܘܢ܇ ܕܗܶܢܽܘܢ ܗܘܰܘ ܣܰܩܽܘܒܠܳܐ ܠܢܰܦܫܗܽܘܢ܆ ܕܠܳܐ ܬܶܡܰܐܢ ܠܟܽܘܢ ܘܠܳܐ ܬܶܬܪܰܦܶܐ ܢܰܦܫܟܽܘܢ. ܠܳܐ ܥܕܰܟܺܝܠ ܡܰܛܺܝܬܽܘܢ ܥܕܰܡܳܐ ܠܰܕܡܳܐ ܒܰܐܓܽܘܢܳܐ ܕܠܽܘܩܒܰܠ ܚܛܺܝܬܳܐ. ܘܰܛܥܰܝܬܽܘܢܳܝܗ̱ܝ ܠܝܽܘܠܦܳܢܳܐ ܐܰܝܢܳܐ ܕܰܐܝܟ ܕܠܰܒ̈ܢܰܝܳܐ ܐܶܡܰܪ ܠܟܽܘܢ. ܒܶܪܝ ܠܳܐ ܬܰܗܡܶܐ ܡܶܢ ܡܰܪܕܽܘܬܶܗ ܕܡܳܪܝܳܐ ܘܠܳܐ ܬܪܰܦܶܐ ܢܰܦܫܳܟ ܐܶܡܰܬܝ ܕܡܶܢܶܗ ܡܶܬܟܰܘܰܢ ܐܰܢ̱ܬ. ܠܡܰܢ ܕܪܳܚܶܡ ܓܶܝܪ ܡܳܪܝܳܐ ܪܳܕܶܐ ܠܶܗ. ܘܰܡܢܰܓܶܕ ܠܰܒ̈ܢܰܝܳܐ ܐܰܝܠܶܝܢ ܕܗܽܘ ܨܳܒܶܐ ܒܗܽܘܢ. ܣܰܝܒܰܪܘ ܗܳܟܺܝܠ ܡܰܪܕܽܘܬܳܐ܆ ܡܶܛܽܠ ܕܰܐܝܟ ܕܰܠܘܳܬ ܒܢܰܝ̈ܳܐ ܣܳܥܰܪ ܨܶܐܕܰܝܟܽܘܢ ܐܰܠܳܗܳܐ. ܐܰܝܢܰܘ ܓܶܝܪ ܒܪܳܐ ܕܠܳܐ ܪܳܕܶܐ ܠܶܗ ܐܰܒܽܘܗ̱ܝ. ܘܶܐܢ ܕܠܳܐ ܡܰܪܕܽܘܬܳܐ ܐܰܢ̱ܬܘܢ܇ ܗܳܝ ܕܒܳܗ̇ ܡܶܬܪܕܶܐ ܟܽ‍ܠܢܳܫ܆ ܗܘܰܝܬܘܢ ܠܟܽܘܢ ܢܽܘܟܪ̈ܳܝܶܐ ܘܠܳܐ ܒܢܰܝ̈ܳܐ. ܘܶܐܢ ܐܰܒܳܗܰܝ̈ܢ ܕܒܶܣܪܳܐ ܪܳܕܶܝܢ ܗ̱ܘܰܘ ܠܰܢ ܘܒܳܗܬܺܝܢ ܗ̱ܘܰܝܢ ܡܶܢܗܽܘܢ܆ ܟܡܳܐ ܗܳܟܺܝܠ ܚܰܝܳܒܺܝܢܰܢ ܕܢܶܫܬܰܥܒܰܕ ܠܰܐܒܽܘܗܶܝܢ ܕܪ̈ܽܘܚܳܬܳܐ ܘܢܺܚܶܐ. ܗܳܢܽܘܢ ܓܶܝܪ ܠܰܙܒܰܢ ܗ̱ܽܘ ܙܥܽܘܪ ܐܰܝܟ ܕܨܳܒܶܝܢ ܗܘܰܘ ܪܳܕܶܝܢ ܗܘܰܘ ܠܰܢ܆ ܐܰܠܳܗܳܐ ܕܶܝܢ ܠܥܽܘܕܪܳܢܰܢ ܕܢܶܫܬܰܘܬܰܦ ܠܩܰܕܺܝܫܽܘܬܶܗ. ܟܽ‍ܠ ܡܰܪܕܽܘܬܳܐ ܕܶܝܢ ܒܙܰܒܢܳܗ̇ ܠܳܐ ܡܶܣܬܰܒܪܳܐ ܕܰܕܚܰܕܽܘܬܳܐ ܗ̱ܝ ܐܶܠܳܐ ܕܟܰܪܝܽܘܬܳܐ܆ ܠܚܰܪܬܳܐ ܕ̣ܶܝܢ ܦܺܐܪ̈ܶܐ ܕܰܫܠܳܡܳܐ ܘܰܕܙܰܕܺܝܩܽܘܬܳܐ ܝܳܗܒܳܐ ܠܰܐܝܠܶܝܢ ܕܒܳܗ̇ ܐܶܬܕܰܪܰܫܘ܀