ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܓܰ‍ܠܰܛܳܝ̈ܶܐ
ܕ: ܝܛ ـ ܠܐ Galatians 4:19-31

ܒܢ̈ܰܝ܆ ܐܰܝܠܶܝܢ ܕܡܶܢ ܕܪܺܝܫ ܡܚܰܒܶܠ ܐ̱ܢܳܐ܆ ܥܕܰܡܐ ܕ̣ܢܶܬܬܨܺܝܪ ܒܟܽܘܢ ܡܫܺܝܚܐ. ܨܳܒܶܐ ܗܘܺܝܬ ܕܶܝܢ ܕܶܐܗܘܶܐ ܠܘܳܬܟܽܘܢ ܗܳܫܐ܆ ܘܶܐܫܰܚܠܶܦ ܒܰܪ̱ܬ ܩܳܠܝ: ܡܶܛܠ ܕܬܰܡܺܝܗ ܐ̱ܢܳܐ ܒܟܽܘܢ. ܐܶܡܰܪܘ ܠܺܝ ܐܰܢ̱ܬܘܢ܆ ܐܰܝܠܶܝܢ ܕܨܳܒܶܝܢ ܕܢܶܗܘܽܘܢ ܬܚܶܝܬ ܢܳܡܽܘܣܐ܆ ܠܶܗ ܠܢܳܡܽܘܣܐ ܠܐ ܫܳܡܥܺܝܢ ܐܢ̱ܬܘܢ܆ ܟ‍ܬܺܝܒ ܓܶܝܪ ܕܠܰܐܒܪܳܗܳܡ ܬܪ̈ܶܝܢ ܒܢܺܝ̈ܢ ܗܘܰܘ ܠܶܗ. ܚܰܕ ܡܶܢ ܐܰܡܬܳܐ ܘܚܰܕ ܡܶܢ ܚܺܐܪܬܳܐ. ܐܶܠܐ ܗܰܘ ܕܡܶܢ ܐܰܡܬܐ ܒܰܒܣܰܪ ܐܶܬܺܝܠܶܕ. ܗܰܘ ܕܶܝܢ ܕܡܶܢ ܚܺܐܪܬܳܐ ܒܡܽܘܠܟܳܢܐ ܗܘܳܐ. ܗܳܠܶܝܢ ܕܶܝܢ ܐܺܝܬܰܝܗܶܝܢ ܦܷ̈ܠܐܳܬܳܐ ܕܬܰܪ̈ܬܶܝܢ ܕܺܝ̈ܰܬܺܩܰܣ. ܚܕܳܐ ܕܡܶܢ ܛܽܘܪ ܣܺܝܢܰܝ܆ ܝܳܠܕܐ ܠܥܰܒܕܽܘܬܐ ܕܺܐܝܬܶܝܗ̇ ܗܳܓܳܪ. ܗܳܓܳܪ ܓܶܝܪ ܛܽܘܪܰܐ ܗ̱ܘ ܕܣܺܝܢܰܝ܇ ܕܒܰܐܪܰܒܺܝܰܐ܆ ܘܫܳܠܡܳܐ ܠܗܳܕܶܐ ܐܘܪܺܫܠܶܡ܇ ܘܦܳܠܚܳܐ ܥܰܒܕܽܘܬܐ ܗܺܝ ܘܰܒܢ̈ܶܝܗ̇. ܗܳܝ ܕܶܝܢ ܐܘܪܺܫܠܶܡ ܥܶܠܳܝܬܳܐ ܚܺܐܪܬܳܐ ܗ̱ܝ ܕܺܐܝܬܶܝܗ̇ ܐܶܡܰܢ. ܟ‍ܬܺܝܒ ܓܶܝܪ ܕܶܐܬܒܰܣܰܡܝ ܥܩܰܪܬܳܐ ܗܳܝ ܕܠܳܐ ܝܳܠܕܳܐ ܘܶܐܬܦܰܨܚܝ ܘܰܓ‍ܥܳܝ ܗܳܝ ܕܠܳܐ ܡܚܰܒܠܐ. ܡܶܛܽܠ ܕܰܣܓܺܝܘ ܒܢܶܝ̈ܗ̇ ܕܨܳܕܺܝܬܳܐ ܝܰܬܺܝܪ ܡܶܢ ܒܢܶܝ̈ܗ̇ ܕܰܒܥܺܝܠܬܳܐ. ܚܢܰܢ ܕܶܝܢ ܐܰܚ̈ܰܝ܆ ܐܰܝܟ ܐܺܝܣܚܳܩ ܒ̈ܢܰܝ ܡܽܘܠܟܳܢܐ ܚܢܰܢ. ܘܰܐܝܟ ܕܗܳܝܕܶܝܢ ܗܰܘ ܕܺܝܠܺܝܕ ܗ̱ܘܳܐ ܒܒܶܣܪܳܐ ܪܳܕܶܦ ܗ̱ܘܐ ܠܗܰܘ ܕܰܒܪܽܘܚܐ܆ ܗܳܟܰܢܐ ܐܳܦ ܗܳܫܐ. ܐܶܠܐ ܡܳܢܐ ܐܶܡܰܪ ܟܬܳܒܳܐ ܐܰܦܶܩܶܝܗ̇ ܠܐܰܡܬܐ ܘܠܰܒܪܗ̇܆ ܡܶܛܽܠ ܕܠܐ ܢܺܐܪܰܬ ܒܪܳܗ̇ ܕܰܐܡܬܐ ܥܰܡ ܒܪܳܗ̇ ܕܚܺܐܪܬܳܐ. ܚܢܰܢ ܗܳܟܺܝܠ ܐܰܚܰܝ̈܆ ܠܐ ܗܘܰܝܢ ܒ̈ܢܰܝ ܐܰܡܬܳܐ ܐܶܠܐ ܒ̈ܢܰܝ ܚܺܐܪܬܐ܀