ܚܕ ܒܫܒܐ ܕܟܢܥܢܝܬܐ
ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܬܶܣܰܠܽܘܢܺܝ̈ܩܳܝܶܐ ܐ
ܗ: ܝܒ ـ ܟܚ 1Thessalonians 5:12-28
ܒܳܥܶܝܢܰܢ ܕܶܝܢ ܡܶܢܟܽܘܢ ܐܰܚܰـ̈ܝ܆ ܕܰܗܘܰܝܬܘܢ ܝܳܕܥܺܝܢ ܠܰܐܝܠܶܝܢ ܕܠܳܐܝܷܢ ܒܟܽܘܢ܇ ܘܩܳܝܡܺܝܢ ܒܰܐܦܰܝ̈ܟܽܘܢ ܒܡܳܪܰܢ܇ ܘܡܰܠܦܺܝܢ ܠܟܽܘܢ܇ ܕܰܗܘܰܘ ܚܫܺܝܒܺܝܢ ܠܟܽܘܢ ܒܚܽܘܒܳܐ ܝܰܬܝܪܳܐ. ܘܡܶܛܽܠ ܥܒܳܕܗܽܘܢ ܐܶܫܬܰܝ̱ܢܘ ܥܰܡܗܽܘܢ. ܒܳܥܶܝܢܰܢ ܕܶܝܢ ܡܶܢܟܽܘܢ ܐܰܚ̈ܰـܝ܆ ܪܕܰܘ ܠܡܰܣܟ̈ܠܳܢܶܐ. ܘܠܰܒܶܒܘ ܠܰܙܥܽܘܪ̈ܰܝ ܢܰܦܫܳܐ. ܘܣܰܒܘ ܛܰܥܢܳܐ ܕܰܡܚܺܝ̈ܠܐܶ. ܘܰܐܓܰܪܘ ܪܽܘܚܟܽܘܢ ܠܘܳܬ ܟܽܠܢܳܫ. ܘܶܐܙܕܰܗ̱ܪܘ ܕܰܠܡܳܐ ܐ̱ܢܳܫ ܡܶܢܟܽܘܢ ܒܺܝܫܬܐ ܚܠܳܦ ܒܺܝܫܬܐ ܢܶܦܪܽܘܥ܆ ܐܶܠܳܐ ܒܟܽܠܙܒܰܢ ܗܰܪ̱ܛܘ ܒܳܬܰܪ ܛܳـ̈ܒܳܬܐ ܠܘܳܬ ܚ̈ܕܳܕܶܐ ܘܰܠܘܳܬ ܟܽܠܢܳܫ. ܗܘܰܘ ܚܳܕܶܝܢ ܒܟܽܠܙܒܰܢ. ܘܰܡܨܰܠܶܝܢ ܕܠܳܐ ܫܰܠܘܳܐ. ܘܰܒܟܽܠ ܡܶܕܶܡ ܗܘܰܘ ܡܰܘܕܶܝܢ. ܗܳܢܰܘ ܓܶܝܪ ܨܶܒܝܳܢܶܗ ܕܰܐܠܗܳܐ ܒܝܶܫܽܘܥ ܡܫܺܝܚܳܐ ܒܟܽܘܢ. ܪܽܘܚܳܐ ܠܳܐ ܬܕܰܥܟܽܘܢ. ܢ̈ܒܺܝܰܘܳܬܐ ܠܳܐ ܬܰܣܠܽܘܢ. ܟܽܠܡܶܕܶܡ ܒܩܰܘ܆ ܘܰܕܫܰܦܺܝܪ ܐܰܚܽܘܕܘ. ܘܡܶܢ ܟܽܠ ܨܒܽܘ ܒܺܝܫܳܐ ܥܪܽܘܩܘ. ܗܽܘ ܕܶܝܢ ܐܠܗܳܐ ܕܰܫܠܳܡܳܐ܇ ܢܩܰܕܶܫܟܽܘܢ ܓܡܺܝܪܳܐܝܺܬ ܠܟܽܠܟܽܘܢ. ܘܟܽܠܳܗ̇ ܪܽܘܚܟܽܘܢ ܘܢܰܦܫܟܽܘܢ ܘܦܰܓܪܟܽܘܢ܆ ܢܢܰܛܰܪ ܕܠܳܐ ܪܶܫܝܳܢ ܠܡܶܐܬܺܝܬܶܗ ܕܡܳܪܰܢ ܝܶܫܽܘܥ ܡܫܺܝܚܳܐ. ܡܗܰܝܡܰܢ ܗܽܘ ܡܰܢ ܕܰܩܪܳܟܽܘܢ܆ ܕܗܽܘ ܢܶܥܒܶܕ. ܐܰܚܰـ̈ܝ ܨܰܠܰܘ ܥܠܰܝܢ. ܫܰܐܠܘ ܒܰܫܠܳܡܳܐ ܕܰܐܚܰܝ̈ܢ ܟܽܠܗܽܘܢ ܒܢܽܘܫܰܩܬܐ ܩܰܕܺܝܫܬܐ. ܡܰܘܡܶܐ ܐ̱ܢܳܐ ܠܟܽܘܢ ܒܡܳܪܰܢ܆ ܕܬܶܬܩܪܶܐ ܐܶܓܰܪܬܳܐ ܗܳܕܶܐ ܠܟܽܠܗܽܘܢ ܐܰܚܶـ̈ܐ ܩܰܕܺܝ̈ܫܶܐ. ܛܰܝܒܽܘܬܗ ܕܡܳܪܰܢ ܝܶܫܽܘܥ ܡܫܺܝܚܳܐ ܥܰܡܟܽܘܢ ܐܰܡܺܝܢ܀