ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܓܰ‍ܠܰܛܳܝ̈ܶܐ
ܐ: ܝܐ ـ ܟܕ Galatians 1:11-24

ܡܰܘܕܰܥ ܐ̱ܢܳܐ ܠܟܽܘܢ ܕܶܝܢ ܐܰܚ̈ـܝ܆ ܕܰܣܒܰܪܬܳܐ ܕܶܐܣܬܰܒܪܰܬ ܡܶܢܝ: ܠܳܐ ܗܘܳܬ ܡܶܢ ܒܰܪܢܳܫܐ ܐܳܦܠܳܐ ܓܶܝܪ ܐܶܢܳܐ ܡܶܢ ܒܰܪܢܳܫܐ ܩܰܒܶܠܬܳܗ̇ ܘܺܝܠܶܦܬܳܗ̇܆ ܐܶܠܳܐ ܒܓܶ‍ܠܝܳܢܳܐ ܕܝܶܫܽܘܥ ܡܫܺܝܚܐ. ܫܡܰܥܬܘܢ ܓܶܝܪ ܗܽܘ̈ܦܳܟܰܝ ܕܡܶܢ ܩܕܺܝܡ ܕܒܺܝܗܽܘܕܳܝܽܘܬܳܐ܆ ܕܝܰܬܺܝܪܳܐܺܝܬ ܪܳܕܶܦ ܗܘܺܝܬ ܥܺܕܬܶܗ ܕܰܐܠܗܐ: ܘܚܳܪܶܒ ܗܘܺܝܬ ܠܳܗ̇. ܘܡܶܬܝܰܬܰܪ ܗܘܺܝܬ ܒܺܝܗܽܘܕܳܝܽܘܬܐ܆ ܛܳܒ ܡܶܢ ܣܰܓ̈ܺܝܶܐܐ ܒ̈ܢܰܝ ܫܢ̈ܰܝ ܕܺܐܝܬ ܗ̱ܘܳܐ ܒܛܽܘܗܡܝ. ܘܝܰܬܺܝܪܳܐܺܝܬ ܛܳܐܶܢ ܗܘܺܝܬ ܒܝܽܘܠܦܢܳܐ ܕܰܐܒ̈ܳܗܰܝ. ܟܰܕ ܨܒܳܐ ܕܶܝܢ ܗܰܘ ܡܰܢ ܕܦܰܪܫܰܢܝ ܡܶܢ ܟܪܶܣ ܐܶܡܝ: ܘܰܩܪܳܢܝ ܒܛܰܝܒܽܘܬܶܗ܆ ܕܢܶܓܠܶܐ ܒܪܶܗ ܒܺܝ: ܕܶܐܣܰܒܪܺܝܘܗ̱ܝ ܒܥܰܡ̱̈ܡܶܐ܆ ܒܰܪ ܫܳܥܬܶܗ ܠܳܐ ܓ‍ܠܺܝܬ ܠܒܶܣܪܳܐ ܘܠܰܕܡܐ. ܘܠܳܐ ܐܶܙܶܠ̱ܬ ܠܐܘܪܺܫܠܶܡ ܠܘܳܬ ܫܠܺܝ̈ܚܶܐ ܕܡܶܢ ܩܕܳܡܰܝ. ܐܶܠܳܐ ܐܶܙܶܠ̱ܬ ܠܰܐܪܰܒܺܝܰܐ: ܘܬܽܘܒ ܗܶܦܟܶ‍ܬ ܠܕܰܪܡܣܽܘܩ. ܘܡܶܢ ܒܳܬܰܪ ܬܠܳܬ ܫܢܺܝ̈ܢ܆ ܐܶܙܶܠ̱ܬ ܠܐܽܘܪܺܫܠܶܡ ܕܶܐܚܙܶܐ ܠܟܺܐܦܳܐ. ܘܩܰܘܺܝܬ ܠܘܳܬܗ ܝܰܘ̈ܡܳܬܳܐ ܚܰܡܶܫܬܰܥܣܰܪ. ܠܰܐܚܪܺܝܢ ܕܶܝܢ ܡܶܢ ܫܠܺܝ̈ܚܶܐ ܠܐ ܚܙܺܝܬ܆ ܐܶܠܐ ܐܶܢ ܠܝܰܥܩܽܘܒ ܐܰܚܽܘܗ̱ܝ ܕܡܳܪܰܢ. ܗܳܠܶܝܢ ܕܶܝܢ ܕܟܳ‍ܬܶܒ ܐ̱ܢܳܐ ܠܟܽܘܢ܆ ܗܳܐ ܩܕܳܡ ܐܰܠܗܳܐ ܕܠܳܐ ܡܟܰܕܶܒ ܐ̱ܢܳܐ. ܡܶܢ ܒܳܬܰܪ ܗܳܠܶܝܢ܆ ܐܶܬܺܝܬ ܠܰܐܬܪ̈ܰܘܳܬܳܐ ܕܣܽܘܪܺܝܰܐ ܘܰܕܩܺܝܠܺܝܩܺܝܰܐ. ܘܠܳܐ ܝܳܕ̈ܥܳܢ ܗܘ̈ܰܝ ܠܺܝ ܒܰܐܦܺܝ̈ܢ ܥܺܕ̈ܬܳܐ ܕܒܺܝܗܽܘܕ ܗܳܠܶܝܢ ܕܒܰܡܫܺܝܚܐ. ܐܶܠܐ ܗܳܕܶܐ ܒܰܠܚܽܘܕ ܫܳܡܥܺܝܢ ܗܘܰܘ. ܕܗܰܘ ܕܡܶܢ ܩܕܺܝܡ ܪܳܕܶܦ ܗ̱ܘܳܐ ܠܰܢ܆ ܗܳܫܐ ܗܳܐ ܡܣܰܒܰܪ ܗܰܝܡܳܢܽܘܬܐ܆ ܗܳܝ ܕܡܶܢ ܩܕܳܡ ܙܰܒܢܳܐ ܡܣܰܚܶܦ ܗ̱ܘܳܐ. ܘܰܡܫܰܒܚܺܝܢ ܗܘܰܘ ܒܺܝ ܠܰܐܠܳܗܳܐ܀