ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܝܓ: ܛ ـ ܝܚ Hebrews 13:9-18

ܠܝܽܘ̈ܠܦܳܢܶܐ ܢܽܘܟܪ̈ܳܝܶܐ ܘܰܡܫܰܚ̈ܠܦܶܐ ܠܳܐ ܬܶܬܕܰܒܪܽܘܢ. ܫܰܦܺܝܪ ܗ̱ܽܘ ܓܶܝܪ ܕܰܒܛܰܝܒܽܘܬܳܐ ܢܫܰܪܰܪ ܠܶـ̈ܒܰܘܳܬܰܢ ܘܠܳܐ ܒܡܶܐܟ̈‍ܠܳܬܳܐ܇ ܡܶܛܽܠ ܕܠܳܐ ܐܶܬܥܰܕܰܪܘ ܐܰܝܠܶܝܢ ܕܗܰܠܶܟܘ ܒܗܶܝܢ. ܐܺܝܬ ܠܰܢ ܕܶܝܢ ܡܰܕܒܚܳܐ ܕܠܳܐ ܫܰܠܺܝܛ ܠܡܶܐܟܰ‍ܠ ܡܶܢܶܗ ܠܗܳܢܽܘܢ ܕܰܒܡܰܫܟܢܳܐ ܡܫܰܡܫܺܝܢ. ܚܰܝ̈ܘܳܬܳܐ ܓܶܝܪ ܗܳܠܶܝܢ ܕܡܰܥܶܠ ܗ̱ܘܳܐ ܕܶܡܗܶܝܢ ܪܰܒ ܟܽܘܡܪ̈ܶܐ ܠܒܶܝܬ ܡܰܩܕܫܳܐ ܚܠܳܦ ܚ̈ܛܳܗܶܐ܆ ܒܶܣܪܗܶܝܢ ܝܳܩܶܕ ܗ̱ܘܳܐ ܠܒܰܪ ܡܶܢ ܡܰܫܪܺܝܬܳܐ. ܡܶܛܽܠ ܗܳܢܳܐ ܐܳܦ ܝܶܫܽܘܥ ܕܰܢܩܰܕܶܫ ܠܥܰܡܶܗ ܒܰܕܡܶܗ܆ ܠܒܰܪ ܡܶܢ ܡܕܺܝܢ̱ܬܳܐ ܚܰܫ. ܘܳܐܦ ܚܢܰܢ ܗܳܟܺܝܠ ܢܶܦܽܘܩ ܠܘܳܬܶܗ ܠܒܰܪ ܡܶܢ ܡܰܫܪܺܝܬܳܐ܆ ܟܰܕ ܫܩܺܝܠܺܝܢܰܢ ܚܶܣܕܶܗ. ܠܰܝܬ ܠܰܢ ܓܶܝܪ ܡܕܺܝܢ̱ܬܳܐ ܕܰܡܩܰܘܝܳܐ ܗܳܪܟܳܐ܆ ܐܶܠܳܐ ܠܰܐܝܕܳܐ ܕܰܥܬܺܝܕܳܐ ܡܣܰܟܶܝܢܰܢ. ܘܒܺܐܝܕܶܗ ܢܰܣܶܩ ܕܶܒ̈ܚܶܐ ܕܬܶܫܒܽܘܚܬܳܐ ܒܟܽ‍ܠܙܒܰܢ ܠܰܐܠܳܗܳܐ. ܕܺܐܝܬܶܝܗ̇ ܦܺܐܪ̈ܶܐ ܕܣܶܦ̈ܘܳܬܳܐ ܕܡܰܘ̈ܕܝܳܢ ܠܰܫܡܶܗ. ܘܠܳܐ ܬܶܛܥܽܘܢ ܡܪܰܚܡܳܢܽܘܬܳܐ ܘܫܰܘܬܳܦܽܘܬܳܐ ܕܡܶܣ̈ܟܺܢܶܐ. ܒܗܳܠܶܝܢ ܓܶܝܪ ܕܶܒ̈ܚܶܐ ܫܳܦܰܪ ܐ̱ܢܳܫ ܠܰܐܠܳܗܳܐ. ܐܶܬܛܦܺܝܣܘ ܠܰܡܕܰܒܪ̈ܳܢܰܝܟܽܘܢ܆ ܘܶܐܫܬܰܡ̱ܥܘ ܠܗܽܘܢ. ܗܶܢܽܘܢ ܓܶܝܪ ܫܳܗܪܺܝܢ ܚܠܳܦ ܢܰܦܫ̈ܳܬܟܽܘܢ ܐܰܝܟ ܐ̱ܢܳܫܳܐ ܕܝܳܗܒܺܝܢ ܚܽܘܫܒܳܢܟܽܘܢ܆ ܕܰܒܚܰܕܽܘܬܳܐ ܢܶܗܘܽܘܢ ܥܳܒܕܺܝܢ ܗܳܕܶܐ ܘܠܳܐ ܒܬܶܢ̈ܚܳܬܳܐ܇ ܡܶܛܽܠ ܕܠܳܐ ܦܳܩܚܳܐ ܠܟܽܘܢ. ܨܰܠܰܘ ܥܠܰܝܢ. ܬܟܺܝܠܺܝܢܰܢ ܓܶܝܪ ܕܬܺܐܪܬܳܐ ܛܳܒܬܳܐ ܐܺܝܬ ܠܰܢ܆ ܕܰܒܟ‍ܠܡܶܕܶܡ ܨܳܒܶܝܢܰܢ ܕܫܰܦܺܝܪ ܢܶܬܕܰܒܰܪ܀