ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܘ: ܛ ـ ܟ Hebrews 6:9-20

ܕܢܓܗ

ܡܦܺܝܣܺܝܢܰܢ ܕܶܝܢ ܥܠܰܝܟܽܘܢ ܐܰܚܰـ̈ܝ ܐܰܝܠܶܝܢ ܕܫܰܦܺܝܪ̈ܳܢ ܘܩܰܪ̈ܺܝܒܳܢ ܠܚܰܝ̈ܶܐ܆ ܐܳܦܶܢ ܗܳܟܰܢܳܐ ܡܡܰܠ‍ܠܺܝܢܰܢ. ܠܐ ܗܘܳܐ ܓܶܝܪ ܥܰܘܳܠ ܐܠܗܳܐ܆ ܕܢܶܛܥܶܐ ܥܒܳܕܰܝ̈ܟܽܘܢ. ܘܚܽܘܒܟܽܘܢ ܗܰܘ ܕܚܰܘܺܝܬܘܢ ܒܰܫܡܶܗ܇ ܕܫܰܡܶܫܬܘܢ ܠܩܰܕܺܝ̈ܫܶܐ ܘܰܡܫܰܡܫܺܝܬܘܢ. ܨܳܒܶܝܢܰܢ ܕܶܝܢ܆ ܕܐܢܳܫ ܐܢܳܫ ܡܶܢܟܽܘܢ ܗܺܝ ܗܳܕܶܐ ܚܦܺܝܛܽܘܬܐ ܢܚܰܘܶܐ܇ ܠܫܽܘܡܠܳܝܳܐ ܕܣܰܒܪܟܽܘܢ ܥܕܰܡܳܐ ܠܚܰܪܬܐ܆ ܘܰܕܠܐ ܬܶܬܩܰܛܰܥ ܠܟܽܘܢ܇ ܐܶܠܐ ܕܬܶܗܘܽܘܢ ܡܡܰܪ̈ܝܳܢܶܐ ܠܗܳܢܽܘܢ ܕܰܒܗܰܝܡܳܢܽܘܬܐ ܘܰܒܢܰܓܺܝܪܽܘܬ ܪܽܘܚܳܐ ܗܘܰܘ ܝܳܪ̈ܬܷܐ ܕܡܽܘܠܟܳܢܳܐ. ܠܐܰܒܪܳܗܳܡ ܓܶܝܪ ܟܰܕ ܡܠܰܟ ܠܶܗ ܐܠܗܳܐ: ܡܶܛܽܠ ܕܠܰܝܬ ܗܘܳܐ ܠܶܗ ܕܪܰܒ ܡܶܢܶܗ ܕܢܺܐܡܶܐ ܒܶܗ܆ ܝܺܡܳܐ ܒܢܰܦܫܶܗ܇ ܘܶܐܡܰܪ. ܕܰܡܒܰܪܳܟܽܘ ܐܶܒܰܪܟܳܟ܆ ܘܡܰܣܓܳܝܽܘ ܐܰܣܓܶܝܟ. ܘܗܳܟܰܢܳܐ ܐܰܓܰܪ ܪܽܘܚܶܗ ܘܩܰܒܶܠ ܡܽܘܠܟܳܢܳܐ. ܒܢܰܝ̈ܢܳܫܳܐ ܓܶܝܪ ܒܰܕܪܰܒ ܡܶܢܗܽܘܢ ܝܳܡܶܝܢ. ܘܥܰܠ ܟܽ‍ܠ ܚܶܪܝܳܢ ܕܗܳܘܶܐ ܒܰܝܢܳܬܗܽܘܢ܆ ܫܽܘܠܳܡܳܐ ܫܰܪܺܝܪܳܐ ܒܡܰܘ̈ܡܳܬܐ ܗܳܘܶܐ ܠܶܗ. ܡܶܛܽܠ ܗܳܢܳܐ ܝܰܬܝܪܳܐܝܺܬ ܨܒܳܐ ܐܠܗܳܐ܆ ܕܰܢܚܰܘܶܐ ܠܝܳܪ̈ܬܶܐ ܕܡܽܘܠܟܳܢܳܐ܇ ܕܫܽܘܘ̱ܕܳܝܶܗ ܠܐ ܡܶܫܬܰܚܠܰܦ. ܘܚܰܒܫܶܗ ܒܡܰܘ̈ܡܳܬܐ܆ ܕܰܒܬܰܪ̈ܬܶܝܢ ܨܶܒ̈ܘܳܢ ܕܠܐ ܡܶܫܬܰܚ̈ܠܦܳܢ܇ ܕܠܐ ܡܶܫܟܰܚ ܐܠܗܳܐ ܕܰܢܕܰܓܶ‍ܠ ܒܗܶܝܢ܇ ܒܽܘܝܳܐܐܴ ܪܰܒܳܐ ܢܶܗܘܶܐ ܠܰܢ ܕܶܐܬܓܰܘܰܣܢ ܒܶܗ܇ ܘܢܶܐܚܽܘܕ ܣܰܒܪܳܐ ܕܰܡܠܺܝܟ ܠܰܢ܆ ܗܰܘ ܕܺܐܝܬܘܗܝ ܠܰܢ ܐܰܝܟ ܐܶܘܩܺܝܢܳܐ. ܕܰܠܒܺܝܟ ܒܢܰܦܫܰܢ ܕܠܐܳ ܬܶܬܙܺܝܥ. ܘܥܳܐܷܠ ܠܓܰܘ ܡܶܢ ܐܰܦܰـ̈ܝ ܬܰܪܥܳܐ܇ ܟܰܪ ܕܩܰܕܶܡ ܥܰܠ ܚܠܳܦܰܝܢ ܝܶܫܽܘܥ܇ ܘܰܗܘܳܐ ܟܽܘܡܪܳܐ ܠܥܳܠܰܡ ܒܰܕܡܽܘܬܗ ܕܡܰܠܟܺܝܙܕܶܩ܀

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܒ: ܗ ـ ܝܓ Hebrews 2:5-13

ܕܠܠܝܐ

ܡܫܺܝܚܳܐ ܕܶܝܢ ܕܶܐܬܳܐ ܗܘܳܐ ܪܰܒܟܽܘܡܪ̈ܶܐ ܕܛܳܒ̈ܳܬܐ ܕܰܣܥܰܪ܆ ܘܥܼܰܠ ܠܡܰܫܟܢܳܐ ܪܰܒܳܐ ܘܰܡܫܰܠܡܳܢܳܐ ܕܠܳܐ ܥܒܺܝܕ ܒܺܐܝ̈ܕܰܝܳܐ ܘܠܳܐ ܗܘܳܐ ܡܶܢ ܗܳܠܶܝܢ ܒܶܪ̈ܝܳܬܐ. ܘܠܳܐ ܥܼܰܠ ܒܰܕܡܳܐ ܕܨܺܦܪ̈ܳܝܶܐ ܘܰܕܥܶܓ̈ܠܶܐ܆ ܐܶܠܳܐ ܒܰܕܡܳܐ ܕܢܰܦܫܶܗ ܥܼܰܠ ܚܕܳܐ ܙܒܰܢ ܠܒܶܝܬ ܡܰܩܕܫܳܐ܆ ܘܶܐܫܟܰܚ ܦܽܘܪܩܳܢܳܐ ܕܰܠܥܳܠܰܡ. ܐܶܢ ܓܶܝܪ ܕܡܳܐ ܕܨܺܦܪ̈ܳܝܶܐ ܘܰܕܥܶܓ̈ܠܶܐ ܘܩܶܛܡܳܐ ܕܰܥܓܶ‍ܠܬܳܐ ܡܶܬܪܣܶܣ ܗ̱ܘܳܐ ܥܰܠ ܐܰܝܠܶܝܢ ܕܡܶܬܛܰܡܺܐܝܢ ܗ̱ܘܰܘ: ܘܰܡܩܰܕܶܫ ܠܗܽܘܢ ܠܕܽܘܟܳܝܳܐ ܕܒܶܣܪܗܽܘܢ܆ ܟܡܳܐ ܗܳܟܺܝܠ ܝܰܬܝܪܳܐܝܺܬ ܕܡܶܗ ܕܰܡܫܺܝܚܳܐ ܕܰܒܪܽܘܚܳܐ ܕܰܠܥܳܠܰܡ ܢܰܦܫܶܗ ܩܰܪܶܒ ܕܠܳܐ ܡܽܘܡ ܠܐܠܳܗܳܐ܇ ܢܕܰܟܶܐ ܬܺܐܪܬܰܢ ܡܶܢ ܥܒ̈ܳܕܶܐ ܡܺܝ̈ܬܐ܇ ܕܰܢܫܰܡܶܫ ܠܐܠܳܗܳܐ ܚܰܝܳܐ. ܡܶܛܽܠ ܗܳܢܰܐ ܗܽܘ ܗܘܳܐ ܡܶܨܥܳܝܳܐ ܕܕܺܝܰܬܩܺܐ ܚܕܰܬܳܐ܆ ܕܰܒܡܰܘܬܶܗ ܗܽܘ ܗܘܳܐ ܦܽܘܪܩܳܢܳܐ ܠܰܐܝܠܶܝܢ ܕܰܥܒܰܪܘ ܥܰܠ ܕܺܝܰܬܩܺܐ ܩܰܕܡܳܝܬܐ܇ ܕܢܶܣܒܽܘܢ ܡܽܘܠܟܳܢܳܐ. ܐܰܝܠܶܝܢ ܕܶܐܬܩܪܺܝܘ ܠܝܳܪܬܽܘܬܳܐ ܕܰܠܥܳܠܰܡ. ܐܰܝܟܳܐ ܓܶܝܪ ܕܺܐܝܬ ܕܺܝܰܬܩܺܐ܆ ܡܰܘܬܰܐ ܗ̱ܘ ܡܚܰܘܝܳܐ ܕܗܰܘ ܕܥܰܒܕܳܗ̇܀

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܛ: ܝܐ ـ ܝܘ Hebrews 9:11-16

ܕܨܦܪܐ

ܠܳܐ ܗܘܳܐ ܓܶܝܪ ܠܡܰܠܐܟ̈ܶܐ ܫܰܥܒܶܕ ܥܳܠܡܳܐ ܕܰܥܬܺܝܕ ܕܰܥܠܰܘܗܝ ܡܡܰܠ‍ܠܺܝܢܰܢ܆ ܐܶܠܐ ܐܰܝܟ ܕܡܰܣܗܶܕ ܟ‍ܬܳܒܳܐ ܘܳܐܡܰܪ. ܡܳܢܰܘ ܓܰܒܪܳܐ ܕܶܥ̱ܗܰܕܬܳܝܗ̱ܝ܇ ܘܰܒܪܶܗ ܕܐܢܳܫܳܐ ܕܰܣܥܰܪܬܳܝܗ̱ܝ. ܐܰܡܶܟ‍ܬܳܝܗܝ ܩܰܠܺܝܠ ܡܶܢ ܡܰـ̈ܠܐܟܶܐ. ܬܶܫܒܽܘܚܬܐ ܘܺܐܝܩܳܪܳܐ ܣܳܡܬ ܒܪܺܝܫܶܗ. ܘܰܐܫܠܶܛܬܳܝܗܝ ܒܰܥܒܳܕܳܐ ܕܺܐܝ̈ܕܰܝܟ. ܘܟܽ‍ܠ ܡܶܕܶܡ ܫܰܥܒܶܕܬ ܬܚܶܝܬ ܪ̈ܶܓ‍ܠܰܘܗܝ. ܒܗܳܝ ܕܶܝܢ ܕܟܽ‍ܠ ܡܶܕܶܡ ܫܰܥܒܶܕ ܠܶܗ܆ ܠܐ ܫܒܰܩ ܡܶܕܶܡ ܕܠܐ ܡܫܰܥܒܰܕ. ܗܳܫܳܐ ܕܶܝܢ ܠܐ ܥܕܰܟܺܝܠ ܚܳܙܶܝܢܰܢ܆ ܕܟܽ‍ܠ ܡܶܕܶܡ ܡܫܰܥܒܰܕ ܠܶܗ. ܗܰܘ ܕܶܝܢ ܕܡܰܟ ܩܰܠܺܝܠ ܡܶܢ ܡܰـ̈ܠܐܟܶܐ ܚܳܙܶܝܢܰܢ܆ ܕܗܽܘܝܽܘ ܝܶܫܽܘܥ ܡܶܛܽܠ ܚܰܫܳܐ ܕܡܰܘܬܗ. ܘܬܶܫܒܽܘܚܬܐ ܘܺܐܝܩܳܪܳܐ ܣܺܝܡ ܒܪܺܝܫܶܗ. ܗܽܘ ܓܶܝܪ ܒܛܰܝܒܽܘܬܗ ܐܠܗܳܐ ܚܠܳܦ ܟܽ‍ܠܢܳܫ ܛܥܶܡ ܡܰܘܬܐ. ܝܳܐܷܐ ܗ̱ܘܳܐ ܓܶܝܪ ܠܗܰܘ ܕܟܽ‍ܠ ܒܺܐܝܕܶܗ ܘܟܽ‍ܠ ܡܶܛܽܠܳܬܗ: ܘܰܒ̈ܢܰܝܳܐ ܣܰـ̈ܓܺܝܶܐܐ ܐܰܥܶܠ ܠܬܶܫܒܽܘܚܬܐ܆ ܕܰܠܪܺܝܫܳܐ ܕܚܰܝܰܝ̈ܗܽܘܢ ܒܚܰܫܶܗ ܢܶܓܡܪܺܝܘܗܝ ܗܰܘ ܓܶܝܪ ܕܩܰܕܶܫ ܘܗܳܢܽܘܢ ܕܶܐܬܩܰܕܰܫܘ܆ ܡܶܢ ܚܰܕ ܐܶܢܽܘܢ ܟܽ‍ܠܗܽܘܢ. ܡܶܛܽܠ ܗܳܢܳܐ ܠܐ ܒܗܶܬ ܕܢܶܩܪܶܐ ܐܶܢܽܘܢ ܐܰܚܰܘ̈ܗ̱ܝ܇ ܟܰܕ ܐܳܡܰܪ ܐܶܣܰܒܰܪ ܫܡܳܟ ܠܰܐܚܰـ̈ܝ܆ ܘܰܒܓܰܘܳܗ̇ ܕܥܺܕܬܐ ܐܶܫܰܒܚܳܟ. ܘܬܘܒ. ܕܶܐܢܳܐ ܐܶܗܘܶܐ ܬܟܺܝܠ ܥܠܰܘܗܝ. ܘܬܘܒ. ܗܳܐ ܐܶܢܳܐ ܘܰܒ̈ܢܰܝܳܐ ܕܝܰܗܒ ܠܺܝ ܐܠܗܳܐ܀

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܐ: ܐ ـ ܝܙ 1Corinthians 1:1-17

ܕܬܠܬܫܥܝ̈ܢ

ܦܰܘܠܳܘܣ ܩܰܪܝܳܐ ܘܰܫܠܺܝܚܳܐ ܕܝܶܫܽܘܥ ܡܫܺܝܚܳܐ ܒܨܶܒܝܳܢܶܗ ܕܰܐܠܗܳܐ ܘܣܳܘܣܬܶܢܺܣ ܐܰܚܳܐ܆ ܠܥܺܕܬܐ ܕܰܐܠܗܳܐ ܕܰܒܩܳܘܪܺܢܬܳܘܣ܇ ܩܪ̈ܰܝܳܐ ܘܩܰܕܺܝ̈ܫܶܐ ܕܰܒܝܶܫܽܘܥ ܡܫܺܝܚܳܐ ܡܩܰܕܫܺܝܢ. ܘܰܠܟܽ‍ܠܗܽܘܢ ܐܰܝܠܶܝܢ ܕܩܳܪܶܝܢ ܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܒܟܽ‍ܠ ܐܰܬܰܪ܇ ܕܺܝܠܗܽܘܢ ܘܕܺܝܠܰܢ. ܛܰܝܒܽܘܬܐ ܥܰܡܟܽܘܢ ܘܰܫܠܳܡܳܐ ܡܶܢ ܐܠܳܗܳܐ ܐܰܒܽܘܢ܆ ܘܡܶܢ ܡܳܪܰܢ ܝܶܫܽܘܥ ܡܫܺܝܚܳܐ. ܡܰܘܕܶܐ ܐ̱ܢܳܐ ܠܰܐܠܳܗܝ ܒܟܽ‍ܠܙܒܰܢ ܚܠܳܦܰܝܟܽܘܢ܇ ܥܰܠ ܛܰܝܒܽܘܬܐ ܕܰܐܠܳܗܳܐ ܕܶܐܬܝܰܗܒܰܬ ܠܟܽܘܢ ܒܝܶܫܽܘܥ ܡܫܺܝܚܳܐ. ܕܰܒܟܽ‍ܠ ܡܶܕܶܡ ܥܬܰܪܬܽܘܢ ܒܶܗ܇ ܒܟܽ‍ܠ ܡܶܠܴܐ ܘܰܒܟܽ‍ܠ ܝܺܕܰܥܬܳܐ. ܐܰܝܟ ܕܣܳܗܕܽܘܬܶܗ ܕܰܡܫܺܝܚܳܐ ܐܶܫܬܰܪܪܰܬ ܒܟܽܘܢ. ܕܠܐ ܐܶܬܒܰܨܰܪܬܘܢ ܒܰܚܕܳܐ ܡܶܢ ܡܰܘܗ̈ܒܳܬܗ܇ ܐܶܠܐ ܡܣܰܟܶܝܢ ܐܢ̱ܬܘܢ ܠܓܶ‍ܠܝܳܢܶܗ ܕܡܳܪܰܢ ܝܶܫܽܘܥ ܡܫܺܝܚܳܐ. ܕܗܽܘ ܢܫܰܪܰܪܟܽܘܢ ܥܕܰܡܳܐ ܠܰ‍ܐ̱ܚܪܳܝܬܳܐ ܕܰܕܠܳܐ ܪܶܫܝܳܢ ܬܶܗܘܽܘܢ ܒܝܰܘܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ. ܡܗܰܝܡܰܢ ܗ̱ܘ ܐܰܠܳܗܳܐ ܕܒܺܐܝܕܶܗ ܐܶܬܩܪܺܝܬܽܘܢ ܠܫܰܘܬܳܦܽܘܬܳܐ ܕܰܒܪܶܗ ܝܶܫܽܘܥ ܡܫܺܝܚܳܐ ܡܳܪܰܢ. ܒܳܥܶܐ ܐ̱ܢܳܐ ܕܶܝܢ ܡܶܢܟܽܘܢ ܐܰܚܰـ̈ܝ܇ ܒܰܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܆ ܕܬܶܗܘܶܐ ܚܕܳܐ ܡܶܠܬܳܐ ܠܟܽ‍ܠܟܽܘܢ. ܘܠܳܐ ܢܶܗ̈ܘܝܳܢ ܒܟܽܘܢ ܦܳܠܰܓ̈ܘܳܬܳܐ. ܐܶܠܳܐ ܬܶܗܘܽܘܢ ܓܡܺܝܪܺܝܢ ܒܰܚܕܳܐ ܬܰܪܥܺܝܬܳܐ ܘܰܒܚܰܕ ܪܶܥܝܳܢܳܐ. ܫܠܰܚܘ ܠܺܝ ܓܶܝܪ ܥܠܰܝܟܽܘܢ ܐܰܚܰـ̈ܝ܇ ܡܶܢ ܒܶܝܬ ܟ̈‍ܠܴ‍ܐܶܐ܆ ܕܚܶܪ̈ܝܳܢܶܐ ܐܺܝܬ ܒܰܝܢܳܬܟܽܘܢ. ܗܳܕܶܐ ܕܶܝܢ ܐܳܡܰܪ ܐ̱ܢܳܐ܆ ܕܺܐܝܬ ܡܶܢܟܽܘܢ ܕܳܐܡܰܪ ܐܶܢܳܐ ܕܦܰܘܠܳܘܣ ܐ̱ܢܳܐ܆ ܘܺܐܝܬ ܕܳܐܡܰܪ ܐܶܢܳܐ ܕܰܐܦܳܠܳܘ ܐ̱ܢܳܐ܆ ܘܺܐܝܬ ܕܳܐܡܰܪ ܐܶܢܳܐ ܕܟܺܐܦܳܐ ܐ̱ܢܳܐ܆ ܘܺܐܝܬ ܕܳܐܡܰܪ ܐܶܢܳܐ ܕܰܡܫܺܝܚܳܐ ܐ̱ܢܳܐ. ܕܰܠܡܳܐ ܐܶܬܦܰܠܰܓ ܠܶܗ ܡܫܺܝܚܳܐ. ܐܰܘ ܠܡܳܐ ܦܰܘܠܳܘܣ ܐܶܙܕܩܶܦ ܥܰܠ ܐܰܦܰܝ̈ܟܽܘܢ. ܐܰܘ ܒܰܫܡܶܗ ܕܦܰܘܠܳܘܣ ܥܡܰܕܬܽܘܢ. ܡܰܘܕܶܐ ܐ̱ܢܳܐ ܠܰܐܠܳܗܝ ܕܰܠܐ̱ܢܳܫ ܡܶܢܟܽܘܢ ܠܳܐ ܐܰܥܡܕܶܬ܆ ܐܶܠܳܐ ܠܰܟܪܺܝܣܦܳܘܣ ܘܰܠܓܰܐܻܝܳܘܣ. ܕܠܳܐ ܐ̱ܢܳܫ ܢܺܐܡܰܪ ܕܰܒܫܶܡܝ ܐܰܥܡܕܶܬ. ܐܰܥܡܕܶܬ ܕܶܝܢ ܐܳܦ ܠܒܰܝܬܶܗ ܕܶܐܣܛܶܦܰܢܰܐ. ܬܽܘܒ ܕܶܝܢ ܠܳܐ ܝܳܕܰܥ ܐ̱ܢܳܐ ܐܶܢ ܠܐ̱ܢܳܫ ܐ̱ܚܪܺܝܢ ܐܰܥܡܕܶܬ. ܠܐ ܓܶܝܪ ܫܰܕܪܰܢܝ ܡܫܺܝܚܳܐ ܠܡܰܥܡܳܕܽܘ ܐܶܠܳܐ ܠܰܡܣܰܒܳܪܽܘ. ܠܳܐ ܒܚܶܟܡܰܬ ܡ̈ܶܠܷܐ܇ ܕܠܳܐ ܢܶܣܬܰܪܰܩ ܙܩܺܝܦܶܗ ܕܰܡܫܺܝܚܳܐ܀

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܽܘ̈ܠܳܣܳܝܶܐ
ܒ: ܘ ـ ܝܘ Colossians 2:6-16

ܕܦܠܓܗ ܕܝܘܡܐ

ܐܰܝܟܰܢܳܐ ܗܳܟܺܝܠ ܕܩܰܒܶܠܬܘܢ ܠܝܶܫܽܘܥ ܡܫܺܝܚܳܐ ܡܳܪܰܢ܆ ܒܶܗ ܗܰܠܶܟܘ܇ ܟܰܕ ܡܫܰܪܪܺܝܢ ܥܶܩܳܪ̈ܰܝܟܽܘܢ. ܘܡܶܬܒܢܶܝܢ ܐܢ̱ܬܽܘܢ ܒܶܗ. ܘܡܶܬܩܰܝܡܺܝܢ ܐܢ̱ܬܽܘܢ ܒܗܰܝܡܳܢܽܘܬܐ ܗܳܝ ܕܺܝܠܶܦܬܘܢ܇ ܕܒܳܗ̇ ܬܶܬܝܰܬܪܽܘܢ ܒܬܰܘܕܺܝܬܐ ܐܶܙܕܰܗ̱ܪܘ ܕܰܠܡܳܐ ܐ̱ܢܳܫ ܢܚܰܠܶܨܟܽܘܢ ܒܦܺܝܠܳܣܳܦܽܘܬܐ ܘܰܒܛܳܥܝܽܘܬܐ ܣܪܺܝܩܬܳܐ܇ ܐܰܝܟ ܝܽܘ̈ܠܦܳܢܶܐ ܕܰܒܢܰܝ̈ܢܳܫܳܐ. ܘܰܐܝܟ ܐܶܣܛܽܘܟܣܰܘ̈ܗ̱ܝ ܕܥܳܠܡܳܐ. ܘܠܳܐ ܐܰܝܟ ܡܫܺܝܚܳܐ܇ ܕܒܶܗ ܥܳܡܰܪ ܟܽ‍ܠܶܗ ܡܽܘܠܳܝܳܐ ܕܰܐܠܳܗܽܘܬܐ ܓܽܘܫܡܳܢܳܐܝܺܬ. ܘܒܶܗ ܐܳܦ ܐܰܢ̱ܬܘܢ ܡܶܫܬܰܡܠܶܝܬܘܢ. ܕܗܽܘ ܐܺܝܬܘܗܝ ܪܺܫܳܐ ܕܟܽܠܗܶܝܢ ܐܰܪ̈ܟܰܘܣ ܘܫܽܘ̈ܠܛܳܢܶܐ. ܘܒܶܗ ܐܶܬܓܙܰܪܬܽܘܢ ܓܙܽܘܪܬܐ ܕܠܐ ܒܺܐܝ̈ܕܺܝܢ ܒܰܫܠܳܚ ܒܶܣܪܳܐ ܕܰܚ̈ܛܳܗܶܐ ܒܰܓܙܽܘܪܬܗ ܕܰܡܫܺܝܚܳܐ. ܘܶܐܬܩܒܰܪܬܽܘܢ ܥܰܡܶܗ ܒܡܰܥܡܽܘܕܺܝܬܐ. ܘܒܶܗ ܩܳܡܬܘܢ ܥܰܡܶܗ. ܕܗܰܝܡܶܢܬܘܢ ܒܚܰܝܠܐ ܕܰܐܠܳܗܳܐ ܕܰܐܩܺܝܡܶܗ ܡܶܢ ܒܶܝܬ ܡܺܝ̈ܬܐ. ܘܰܠܟܽܘܢ ܕܡܺܝܬܺܝܢ ܗ̱ܘܰܝܬܘܢ ܒܰܚܛܳܗܰܝ̈ܟܽܘܢ ܘܰܒܥܽܘܪܠܽܘܬ ܒܶܣܪܟܽܘܢ܆ ܐܰܚܺܝܟܽܘܢ ܥܰܡܶܗ. ܘܰܫܒܰܩ ܠܰܢ ܟܽܠܗܽܘܢ ܚܛܳܗܰܝ̈ܢ. ܘܰܥܛܳܐ ܒܦܽܘܩܕܳܢܰܘܗ̈ܝ ܫܛܳܪ ܚܰܘܒܰܝ̈ܢ܇ ܗܰܘ ܕܺܐܝܬܰܘܗܝ ܗܘܳܐ ܣܰܩܽܘܒܠܰܢ. ܘܫܰܩܠܶܗ ܡܶܢ ܡܨܰܥܬܳܐ ܘܩܰܒܥܶܗ ܒܰܙܩܺܝܦܶܗ. ܘܒܰܫܠܳܚ ܦܰܓܪܶܗ ܦܰܪܣܺܝ ܠܰܐܪ̈ܟܰܘܣ ܘܰܠܫܰܠܺܝ̈ܛܳܢܶܐ. ܘܰܐܒܗܶܬ ܐܶܢܽܘܢ ܓܰ‍ܠܝܳܐܝܺܬ ܒܰܩܢܽܘܡܶܗ. ܠܐ ܗܳܟܺܝܠ ܐ̱ܢܳܫ ܢܕܰܘܶܕܟܽܘܢ܆ ܒܡܶܐܟܠܳܐ ܘܰܒܡܰܫܬܝܳܐ ܐܰܘ ܒܦܽܘ̈ܠܳܓܶܐ ܕ̈ܥܺܐܕܶܐ ܘܰܕܪܺܝܫ ܝܰܪ̈ܚܶܐ ܘܰܕ̈ܫܰܒܶܐ܀

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܝܓ: ܛ ـ ܟܗ Hebrews 13:9-25

ܕܬܫܥܫܥܝ̈ܢ

ܠܝܽܘ̈ܠܦܳܢܶܐ ܢܽܘܟܪ̈ܳܝܶܐ ܘܰܡܫܰܚ̈ܠܦܶܐ ܠܳܐ ܬܶܬܕܰܒܪܽܘܢ. ܫܰܦܺܝܪ ܗ̱ܘܽ ܓܶܝܪ ܕܰܒܛܰܝܒܽܘܬܳܐ ܢܫܰܪܰܪ ܠܶܒ̈ܰܘܳܬܰܢ ܘܠܳܐ ܒܡܶܐܟ̈‍ܠܳܬܳܐ܇ ܡܶܛܽܠ ܕܠܳܐ ܐܶܬܥܰܕܰܪܘ ܐܰܝܠܶܝܢ ܕܗܰܠܶܟܘ ܒܗܶܝܢ. ܐܺܝܬ ܠܰܢ ܕܶܝܢ ܡܰܕܒܚܳܐ ܕܠܳܐ ܫܰܠܺܝܛ ܠܡܶܐܟܰ‍ܠ ܡܶܢܶܗ ܠܗܳܢܽܘܢ ܕܰܒܡܰܫܟܢܳܐ ܡܫܰܡܫܺܝܢ. ܚܰܝ̈ܘܳܬܳܐ ܓܶܝܪ ܗܳܠܶܝܢ ܕܡܰܥܶܠ ܗ̱ܘܳܐ ܕܶܡܗܶܝܢ ܪܰܒ ܟܽܘܡܪ̈ܶܐ ܠܒܶܝܬ ܡܰܩܕܫܳܐ ܚܠܳܦ ܚ̈ܛܳܗܶܐ܆ ܒܶܣܪܗܶܝܢ ܝܳܩܶܕ ܗ̱ܘܳܐ ܠܒܰܪ ܡܶܢ ܡܰܫܪܺܝܬܳܐ. ܡܶܛܽܠ ܗܳܢܳܐ ܐܳܦ ܝܶܫܽܘܥ ܕܰܢܩܰܕܶܫ ܠܥܰܡܶܗ ܒܰܕܡܶܗ܆ ܠܒܰܪ ܡܶܢ ܡܕܺܝܢ̱ܬܳܐ ܚܰܫ. ܘܳܐܦ ܚܢܰܢ ܗܳܟܺܝܠ ܢܶܦܽܘܩ ܠܘܳܬܶܗ ܠܒܰܪ ܡܶܢ ܡܰܫܪܺܝܬܳܐ܆ ܟܰܕ ܫܩܺܝܠܺܝܢܰܢ ܚܶܣܕܶܗ. ܠܰܝܬ ܠܰܢ ܓܶܝܪ ܡܕܺܝܢ̱ܬܳܐ ܕܰܡܩܰܘܝܳܐ ܗܳܪܟܳܐ܆ ܐܶܠܳܐ ܠܰܐܝܕܳܐ ܕܰܥܬܺܝܕܳܐ ܡܣܰܟܶܝܢܰܢ. ܘܒܺܐܝܕܶܗ ܢܰܣܶܩ ܕܶܒ̈ܚܶܐ ܕܬܶܫܒܽܘܚܬܳܐ ܒܟܽ‍ܠܙܒܰܢ ܠܰܐܠܳܗܳܐ. ܕܺܐܝܬܶܝܗ̇ ܦܺܐܪ̈ܶܐ ܕܣܶܦ̈ܘܳܬܳܐ ܕܡܰܘ̈ܕܝܳܢ ܠܰܫܡܶܗ. ܘܠܳܐ ܬܶܛܥܽܘܢ ܡܪܰܚܡܳܢܽܘܬܳܐ ܘܫܰܘܬܳܦܽܘܬܳܐ ܕܡܶܣ̈ܟܺܢܶܐ. ܒܗܳܠܶܝܢ ܓܶܝܪ ܕܶܒ̈ܚܶܐ ܫܳܦܰܪ ܐ̱ܢܳܫ ܠܰܐܠܳܗܳܐ. ܐܶܬܛܦܺܝܣܘ ܠܰܡܕܰܒܪ̈ܳܢܰܝܟܽܘܢ܆ ܘܶܐܫܬܰܡ̱ܥܘ ܠܗܽܘܢ. ܗܶܢܽܘܢ ܓܶܝܪ ܫܳܗܪܺܝܢ ܚܠܳܦ ܢܰܦܫܳܬܟܽܘ̈ܢ ܐܰܝܟ ܐ̱ܢܳܫܳܐ ܕܝܳܗܒܺܝܢ ܚܽܘܫܒܳܢܟܽܘܢ܆ ܕܰܒܚܰܕܽܘܬܳܐ ܢܶܗܘܽܘܢ ܥܳܒܕܺܝܢ ܗܳܕܶܐ ܘܠܳܐ ܒܬܶܢ̈ܚܳܬܳܐ܇ ܡܶܛܽܠ ܕܠܳܐ ܦܳܩܚܳܐ ܠܟܽܘܢ. ܨܰܠܰܘ ܥܠܰܝܢ. ܬܟܺܝܠܺܝܢܰܢ ܓܶܝܪ ܕܬܺܐܪܬܳܐ ܛܳܒܬܳܐ ܐܺܝܬ ܠܰܢ܆ ܕܰܒܟ‍ܠܡܶܕܶܡ ܨܳܒܶܝܢܰܢ ܕܫܰܦܺܝܪ ܢܶܬܕܰܒܰܪ. ܝܰܬܺܝܪܳܐܝܺܬ ܒܳܥܶܐ ܐ̱ܢܳܐ ܡܶܢܟܽܘܢ܆ ܕܬܶܥܒܕܽܘܢ ܗܳܕܶܐ܇ ܕܒܰܥܓܰ‍ܠ ܐܶܬܦܰܢܶܐ ܠܟܽܘܢ. ܐܰܠܳܗܳܐ ܕܶܝܢ ܕܰܫܠܳܡܳܐ ܗܰܘ ܕܰܐܣܶܩ ܡܶܢ ܒܶܝܬ ܡܺܝ̈ܬܶܐ ܠܪܳܥܝܳܐ ܪܰܒܳܐ ܕܡܰܪܥܺܝܬܳܐ ܒܰܕܡܳܐ ܕܕܺܝܰܬܺܩܺܐ ܕܰܠܥܳܠܰܡ. ܕܺܐܝܬܰܘܗ̱ܝ ܝܶܫܽܘܥ ܡܫܺܝܚܳܐ ܡܳܪܰܢ܇ ܗܽܘ ܢܶܓܡܽܘܪܟܽܘܢ ܒܟ‍ܠ ܥܒܳܕ ܛܳܒ܆ ܕܬܶܥܒܕܽܘܢ ܨܶܒܝܳܢܶܗ. ܘܗܽܘ ܢܶܣܥܽܘܪ ܒܰܢ ܡܶܕܶܡ ܕܫܰܦܺܝܪ ܩܕܳܡܰܘܗ̱ܝ ܒܝܰܕ ܝܶܫܽܘܥ ܡܫܺܝܚܳܐ. ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ. ܒܳܥܶܐ ܐ̱ܢܳܐ ܕܶܝܢ ܡܶܢܟܽܘܢ ܐܰܚ̈ܰܝ܆ ܕܬܰܓܪܽܘܢ ܪܽܘܚܟܽܘܢ ܒܡܶܠܬܳܐ ܕܒܽܘܝܳܐܳܐ܇ ܡܶܛܽܠ ܕܒܰܙܥܽܘܪ̈ܝܳܬܰܐ ܗ̱ܘ ܟܶ‍ܬܒܶܬ ܠܟܽܘܢ. ܕܰܥܘ ܕܶܝܢ ܠܰܐܚܽܘܢ ܛܺܝܡܳܬܶܐܴܘܣ ܕܶܐܫܬܪܺܝ. ܘܶܐܢ ܒܰܥܓܰ‍ܠ ܢܺܐܬܶܐ ܥܰܡܶܗ ܐܶܚܙܶܝܟܽܘܢ. ܫܰܐܠܘ ܒܰܫܠܳܡܳܐ ܕܟܽ‍ܠܗܽܘܢ ܡܕܰܒܪ̈ܳܢܰܝܟܽܘܢ܆ ܘܰܕܟ‍ܠܗܽܘܢ ܩܰܕܺܝ̈ܫܶܐ. ܫܳܐܠܺܝܢ ܒܰܫܠܳܡܟܽܘܢ ܟ‍ܠܗܽܘܢ ܕܡܶܢ ܐܻܝܛܰܠܺܝܰܐ. ܛܰܝܒܽܘܬܳܐ ܥܰܡ ܟ‍ܠܟܽܘܢ ܐܰܡܺܝܢ܀

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܓܰ‍ܠܰܛܳܝ̈ܶܐ
ܒ: ܝܙ ـ ܟܐ܇ ܓ: ܐ ـ ܘ Galatians 2:17-21, 3:1-6

ܕܣܓܕܬܐ ܕܨܠܝܒܐ

ܐܶܢ ܕܶܝܢ ܟܰܕ ܒܳܥܶܝܢܰܢ ܕܢܶܙܕܰܕܰܩ ܒܰܡܫܺܝܚܳܐ܆ ܐܶܫܬܟܰܚܢ ܠܰܢ ܐܳܦ ܚܢܰܢ ܚܰـ̈ܛܳܝܶܐ܆ ܡܳܕܶܝܢ ܝܶܫܽܘܥ ܡܫܺܝܚܳܐ ܡܫܰܡܫܳܢܰܐ ܗ̱ܘ ܕܰܚܛܺܝܬܐ. ܚܳܣ. ܐܶܢ ܓܶܝܪ ܠܰܐܝܠܶܝܢ ܕܣܶܬܪܶܬ ܬܘܒ ܠܗܶܝܢ ܒܳܢܶܐ ܐ̱ܢܳܐ܆ ܚܰܘܺܝܬ ܥܰܠ ܢܰܦܫܝ ܕܥܳܒܰܪ ܥܰܠ ܦܽܘܩܕܳܢܳܐ ܐ̱ܢܳܐ. ܐܶܢܳܐ ܓܶܝܪ ܒܢܳܡܽܘܣܳܐ ܠܢܳܡܽܘܣܳܐ ܡܺܝܬܶܬ ܕܠܐܠܳܗܳܐ ܐܻܚܶܐ. ܘܥܰܡ ܡܫܺܝܚܳܐ ܙܩܺܝܦ ܐ̱ܢܳܐ. ܘܡܶܟܺܝܠ ܠܐ ܗܘܳܐ ܐܶܢܳܐ ܚܰܝ ܐ̱ܢܳܐ܆ ܐܶܠܐ ܚܰܝ ܒܺܝ ܡܫܺܝܚܳܐ. ܘܗܳܢܳܐ ܕܗܳܫܳܐ ܚܰܝ ܐ̱ܢܳܐ ܒܰܒܣܰܪ܆ ܒܗܰܝܡܳܢܽܘܬܰܐ ܗ̱ܘ ܕܰܒܪܶܗ ܕܰܐܠܳܗܳܐ ܚܰܝ ܐ̱ܢܳܐ. ܗܰܘ ܕܰܐܚܒܰܢ ܘܝܰܗ̱ܒ ܢܰܦܫܶܗ ܚܠܳܦܰܝܢ. ܠܐ ܛܳܠܶܡ ܐ̱ܢܳܐ ܛܰܝܒܽܘܬܗ ܕܰܐܠܳܗܳܐ. ܐܶܢ ܓܶܝܪ ܒܝܰܕ ܢܳܡܽܘܣܳܐ ܗ̱ܝ ܙܰܕܺܝܩܽܘܬܐ܆ ܡܫܺܝܚܳܐ ܡܰܓܳܢ ܡܺܝܬ. ܐܳܘ ܚܰܣܺܝܪ̈ܰܝ ܪܶܥܝܳܢܳܐ ܓܰـ̈ܠܰܛܳܝܶܐ ܡܰܢܽܘ ܚܣܰܡ ܒܟܽܘܢ. ܕܗܳܐ ܐܰܝܟ ܗܰܘ ܕܰܡܨܳܪ ܨܺܝܪ ܗܘܳܐ ܩܕܳܡ ܥܰܝ̈ܢܰܝܟܽܘܢ ܝܶܫܽܘܥ ܡܫܺܝܚܳܐ ܟܰܕ ܨܠܺܝܒ. ܗܳܕܶܐ ܒܰܠܚܽܘܕ ܨܳܒܶܐ ܐ̱ܢܳܐ ܕܶܐܕܰܥ ܡܶܢܟܽܘܢ. ܡܶܢ ܥܒ̈ܳܕܶܐ ܕܢܳܡܽܘܣܳܐ ܢܣܰܒܬܘܢ ܪܽܘܚܳܐ܆ ܐܰܘ ܡܶܢ ܫܶܡܥܳܐ ܕܗܰܝܡܳܢܽܘܬܐ܆ ܗܳܟܰܢܳܐ ܣܰܟ‍ܠܺܝܢ ܐܰܢ̱ܬܘܢ܆ ܕܫܰܪܺܝܬܘܢ ܒܪܽܘܚܳܐ܇ ܘܗܳܫܳܐ ܒܰܒܣܰܪ ܡܫܰܠܡܺܝܢ ܐܰܢ̱ܬܘܢ܆ ܗܳܠܶܝܢ ܟܽ‍ܠܗܶܝܢ ܐܻܝܩܺܐ ܣܰܝܒܰܪܬܘܢ܆ ܘܶܐܫܬܽܘܦ ܕܶܝܢ ܐܻܝܩܺܐ. ܗܰܘ ܗܳܟܺܝܠ ܕܝܰܗ̱ܒ ܒܟܽܘܢ ܪܽܘܚܳܐ܇ ܘܣܳܥܰܪ ܒܟܽܘܢ ܚܰܝ̈ܠܶܐ܆ ܡܶܢ ܥ̈ܒܳܕܶܐ ܕܢܳܡܽܘܣܳܐ ܐܰܘ ܡܶܢ ܫܶܡܥܳܐ ܕܗܰܝܡܳܢܽܘܬܐ܆ ܐܰܝܟܰܢܳܐ ܕܗܰܝܡܶܢ ܐܰܒܪܳܗܳܡ ܠܐܠܳܗܳܐ܆ ܘܶܐܬܚܰܫܒܰܬ ܠܶܗ ܠܙܰܕܺܝܩܽܘ܀

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܐ: ܝܚ ـ ܟܗ 1Corinthians 1:18-25

ܬܘܒ ܐܚܪܢܐ ܕܣܓܕܬܐ ܕܨܠܝܒܐ

ܡܶܠܬܐ ܓܶܝܪ ܕܰܙܩܺܝܦܳܐ ܠܰܐܒܺܝ̈ܕܶܐ ܫܳܛܝܽܘܬܳܐ ܗ̱ܝ. ܠܰܢ ܕܶܝܢ ܠܰܐܝܠܶܝܢ ܕܚܰܝܺܝܢܰܢ ܚܰܝܠܳܐ ܗ̱ܝ ܕܰܐܠܳܗܳܐ. ܟ‍ܬܺܝܒ ܓܶܝܪ ܕܰܐܘܒܶܕ ܚܶܟܡܬܐ ܕܚܰܟܺܝ̈ܡܶܐ܆ ܘܶܐܓ‍ܠܽܘܙ ܬܰܪܥܺܝܬܐ ܕܣܰܟܽܘ̈ܠܬܳܢܶܐ. ܐܰܝܟܰܐ ܗ̱ܘ ܚܰܟܺܝܡܳܐ. ܐܰܘ ܐܰܝܟܰܐ ܗ̱ܘ ܣܳܦܪܳܐ. ܐܰܘ ܐܰܝܟܰܐ ܗ̱ܘ ܕܳܪܽܘܫܳܐ ܕܥܳܠܡܳܐ ܗܳܢܳܐ. ܠܐ ܗܳܐ ܐܰܫܛܝܳܗ̇ ܐܠܳܗܳܐ ܚܶܟܡܬܗ ܕܥܳܠܡܳܐ ܗܳܢܳܐ. ܡܶܛܽܠ ܓܶܝܪ ܕܰܒܚܶܟܡܬܗ ܕܰܐܠܳܗܳܐ ܠܐ ܝܺܕܰܥ ܥܳܠܡܳܐ ܒܚܶܟܡܬܐ ܠܐܠܳܗܳܐ܆ ܨܒܳܐ ܐܠܗܳܐ ܕܰܒܫܳܛܝܽܘܬܐ ܕܟܳܪܽܘܙܽܘܬܐ ܢܰܚܶܐ ܠܰܐܝܠܶܝܢ ܕܰܡܗܰܝܡܢܺܝܢ. ܡܶܛܽܠ ܕܺܝ̈ܗܽܘܕܳܝܶܐ ܐܳܬܘ̈ܳܬܳܐ ܫܳܐܠܺܝܢ. ܘܰܐܪ̈ܡܳܝܶܐ ܚܶܟܡܬܐ ܒܳܥܶܝܢ. ܚܢܰܢ ܕܶܝܢ ܡܰܟܪܙܺܝܢܰܢ ܡܫܺܝܚܳܐ ܟܰܕ ܙܩܺܝܦ܆ ܬܽܘܩܰܠܬܐ ܠܺܝ̈ܗܽܘܕܳܝܶܐ ܘܠܰܐܪ̈ܡܳܝܶܐ ܫܳܛܝܽܘܬܳܐ܆ ܠܗܳܢܽܘܢ ܕܶܝܢ ܕܰܩܪܶܝܢ ܝܺܗܽܘ̈ܕܳܝܶܐ ܘܰܐܪ̈ܡܳܝܶܐ܆ ܡܫܺܝܚܳܐ ܚܰܝܠܳܐ ܕܰܐܠܗܳܐ ܘܚܶܟܡܬܐ ܕܰܐܠܗܳܐ. ܡܶܛܽܠ ܕܫܳܛܝܽܘܬܗ ܕܰܐܠܳܗܳܐ ܚܰܟܺܝܡܳܐ ܗ̱ܝ ܡܶܢ ܒܢܰܝ̈ܢܳܫܳܐ܆ ܘܰܟܪܺܝܗܽܘܬܗ ܕܰܐܠܳܗܳܐ ܚܰܝܠܬܳܢܝܳܐ ܗ̱ܝ ܡܶܢ ܒ̈ܢܰܝ ܐܢܳܫܳܐ܀