ܥܐܕܐ ܕܦܢܛܝܩܘܣܛܝ
ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܐܶܦܶܣܳܝ̈ܶܐ
ܓ: ܝܓ ـ ܟܐ Ephesians 3:13-21
ܡܶܛܽܠ ܗܳܢܳܐ ܫܳܐܷܠܢܳܐ܆ ܕܠܐ ܬܶܡܰܐܢ ܠܝ ܒܐܘܽܠܨܳܢ̈ܰܝ ܕܥܰܠ ܐܰܦܰܝ̈ܟܘܢ. ܕܗܳܕܳܐ ܗ̱ܝ ܬܶܫܒܽܘܚܬܟܘܢ. ܘܟܳܐܷܦܢܳܐ ܒܽܘܪ̈ܟܰܝ ܠܘܳܬ ܐܰܒܘܗܝ ܕܡܳܪܢ ܝܶܫܘܥ ܡܫܺܝܚܐ. ܗܰܘ ܕܡܶܢܶܗ ܡܶܫܬܰܡܗܳܐ ܟܽܠ ܐܰܒܳܗܽܘܬܐ ܕܒܰܫܡܰܝܳܐ ܘܒܰܐܪܥܳܐ܆ ܕܢܶܬܶܠ ܠܟܽܘܢ ܐܰܝܟ ܥܽܘܬܪܳܐ ܕܬܶܫܒܽܘܚܬܶܗ܇ ܕܰܒܚܰܝܠܳܐ ܬܶܫܬܰܪܪܽܘܢ ܒܪܽܘܚܶܗ܆ ܕܰܒܒܰܪܢܳܫܟܽܘܢ ܕܰܠܓܰܘ ܢܶܥܡܰܪ ܡܫܺܝܚܳܐ ܒܗܰܝܡܳܢܽܘܬܐ ܘܰܒܠܶܒܰܘ̈ܳܬܟܽܘܢ ܒܚܽܘܒܳܐ܇ ܟܰܕ ܢܶܗܘܶܐ ܫܰܪܺܝܪ ܥܶܩܳܪܟܽܘܢ ܘܫܶܬܶܐܣܬܟܽܘܢ܆ ܕܬܶܫܟܚܽܘܢ ܠܡܰܕܪܳܟܽܘ ܥܰܡ ܟܽܠܗܽܘܢ ܩܰܕܺܝ̈ܫܶܐ܇ ܡܳܢܰܘ ܪܰܘܡܳܐ ܘܥܽܘܡܩܳܐ ܘܽܐܘܪܟܳܐ ܘܰܦܬܳܝܳܐ܇ ܘܬܶܕܥܽܘܢ ܪܰܒܽܘܬܐ ܕܺܝܕܰܥܬܐ ܕܚܽܘܒܶܗ ܕܰܡܫܺܝܚܳܐ܇ ܘܬܶܬܡܰܠܽܘܢ ܒܟܽܠܶܗ ܡܽܘܠܳܝܳܐ ܕܰܐܠܗܳܐ. ܠܗܰܘ ܕܶܝܢ ܕܰܡܨܶܐ ܒܚܰܝܠܳܐ ܝܰܬܝܪ ܡܶܢ ܟܽܠ ܠܡܶܥܒܰܕ ܠܰܢ܇ ܘܝܰܬܝܪ ܡܶܢ ܡܳܐ ܕܫܳܐܠܺܝܢܰܢ ܘܪܳܢܶܝܢܰܢ܇ ܐܰܝܟ ܚܰܝܠܶܗ ܕܡܶܣܬܥܰܪ ܒܰܢ܆ ܠܶܗ ܬܫܒܽܘܚܬܐ ܒܥܺܕܬܗ ܒܝܶܫܽܘܥ ܡܫܺܝܚܳܐ܇ ܒܟܽܠܗܽܘܢ ܕܳܪ̈ܶܐ ܕܥܳܠܡ̈ܰܝ ܥܳܠܡܺܝܢ ܐܰܡܺܝܢ܀
ܕܣܝܡ ܒܘܪ̈ܟܐ ܕܬܫܡܫܬܐ ܩܕܡܝܬܐ
ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܝܕ: ܟ ـ ܟܗ 1Corinthians 14:20-25
ܐܰܚܰـ̈ܝ܆ ܠܐ ܗܘܰܝܬܘܢ ܛܠܶܝܢ ܒܪ̈ܶܥܝܳܢܰܝܟܽܘܢ. ܐܶܠܐ ܠܒܺܝ̈ܫܳܬܐ ܗܘܰܘ ܝܰܠܽܘ̈ܕܶܐ܆ ܘܰܒܪ̈ܶܥܝܳܢܰܝܟܽܘܢ ܗܘܰܘ ܓܡܺܝܪܺܝܢ. ܒܢܳܡܽܘܣܳܐ ܟܬܺܝܒ܆ ܕܰܒܡܰܡܠ̱ܠܴܐ ܢܽܘܟܪܳܝܳܐ ܘܰܒܠܶܫܳܢܳܐ ܐ̱ܚܪܺܢܳܐ ܐܶܡܰܠܶܠ ܥܰܡܶܗ ܥܰܡ ܥܰܡܳܐ ܗܳܢܳܐ. ܐܳܦܠܳܐ ܗܳܟܰܢܳܐ ܢܶܫܡܥܽܘܢܳܢܝ܆ ܐܳܡܰܪ ܡܳܪܝܳܐ. ܡܳܕܶܝܢ ܠܶܫܳܢ̈ܶܐ ܠܳܐܬܰܐ ܗ̱ܘ ܣܺܝܡܺܝܢ܇ ܠܳܐ ܠܰܡܗܰܝ̈ܡܢܶܐ ܐܶܠܐ ܠܰܐܝܠܶܝܢ ܕܠܐ ܡܗܰܝܡܢܺܝܢ܆ ܢܒܺܝ̈ܰܘܳܬܐ ܕܶܝܢ ܠܐ ܗ̱ܘܳܐ ܠܰܐܝܠܶܝܢ ܕܠܐ ܡܗܰܝܡܢܺܝܢ܇ ܐܶܠܐ ܠܰܐܝܠܶܝܢ ܕܰܡܗܰܝܡܢܺܝܢ. ܐܶܢ ܗܽܘ ܗܳܟܺܝܠ ܕܬܶܬܟܰܢܰܫ ܟܽܠܳܗ̇ ܥܺܕܬܐ܇ ܘܟܽܠܗܽܘܢ ܒܠܶܫ̈ܳܢܶܐ ܢܡܰܠܠܽܘܢ܇ ܘܢܶܥܠܽܘܢ ܗܶܕܝܽܘ̈ܛܶܐ ܐܰܘ ܐܰܝܠܶܝܢ ܕܠܐ ܡܗܰܝܡܢܺܝܢ܆ ܠܐ ܐܳܡܪܺܝܢ ܕܗܳܠܶܝܢ ܫܢܰܘ ܠܗܽܘܢ. ܘܶܐܢ ܟܽܠܟܽܘܢ ܬܶܗܘܽܘܢ ܡܶܬܢܰܒܶܝܢ܇ ܘܢܶܥܽܘܠ ܠܘܳܬܟܽܘܢ ܗܶܕܝܽܘܛܳܐ ܐܰܘ ܡܰܢ ܕܠܐ ܡܗܰܝܡܶܢ܆ ܡܶܬܒܨܶܐ ܡܶܢ ܟܽܠܟܽܘܢ܇ ܘܡܶܬܟܰܘܰܢ ܡܶܢ ܟܽܠܟܽܘܢ. ܘܟܰܣ̈ܝܳܬܐ ܕܠܶܒܶܗ ܡܶـ̈ܬܓܰܠܝܳܢ. ܘܗܳܝܕܶܝܢ ܢܶܦܶܠ ܥܰܠ ܐܰܦܰܘ̈ܗ̱ܝ܆ ܘܢܶܣܓܽܘܕ ܠܐܠܳܗܳܐ ܘܢܺܐܡܰܪ܆ ܫܰܪܺܝܪܳܐܝܺܬ ܐܠܳܗܳܐ ܐܺܝܬ ܒܟܽܘܢ܀
ܕܣܝܡ ܒܘܪ̈ܟܐ ܕܬܫܡܫܬܐ ܕܬܪܬܝܢ
ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܝܕ: ܟܘ ـ ܠܓ 1Corinthians 14:26-33
ܐܳܡܰܪ ܐ̱ܢܳܐ ܗܳܟܺܝܠ ܐܰܚܰـ̈ܝ܆ ܕܶܐܡܰܬܝ ܕܡܶܬܟܰܢܫܺܝܢ ܐܢ̱ܬܽܘܢ܇ ܠܰܐܝܢܳܐ ܡܶܢܟܽܘܢ ܕܺܐܝܬ ܠܶܗ ܡܰܙܡܽܘܪܳܐ ܢܺܐܡܰܪ. ܘܰܐܝܢܳܐ ܕܺܐܝܬ ܠܶܗ ܝܽܘܠܦܳܢܳܐ. ܘܰܐܝܢܳܐ ܕܺܐܝܬ ܠܶܗ ܓܶܠܝܳܢܳܐ. ܘܰܐܝܢܳܐ ܕܺܐܝܬ ܠܶܗ ܠܶܫܳܢܳܐ. ܘܰܐܝܢܳܐ ܕܺܐܝܬ ܠܶܗ ܦܽܘܫܳܩܳܐ܆ ܟܽܠܗܶܝܢ ܠܒܶܢܝܳܢܳܐ ܢܶܗ̈ܘܝܳܢ. ܘܶܐܢ ܒܠܶܫܳܢܳܐ ܐ̱ܢܳܫ ܢܡܰܠܶܠ܆ ܬܪ̈ܶܝܢ ܢܡܰܠܠܽܘܢ. ܘܟܰܕ ܣܰܓܺܝ ܬܠܳܬܐ. ܘܚܰܕ ܚܰܕ ܢܡܰܠܠܽܘܢ. ܘܚܰܕ ܢܦܰܫܶܩ. ܘܶܐܢ ܠܰܝܬ ܕܰܡܦܰܫܶܩ܆ ܢܶܫܬܽܘܩ ܠܶܗ ܒܥܺܕ̱ܬܐ ܗܰܘ ܕܰܡܡܰܠܶܠ ܒܠܶܫܳܢܳܐ. ܘܒܰܝܢܰܘܗ̱ܝ ܠܢܰܦܫܶܗ ܘܠܐܠܳܗܳܐ ܢܡܰܠܶܠ. ܢ̈ܒܺܝܶܐ ܕܶܝܢ ܬܪ̈ܶܝܢ ܐܰܘ ܬܠܳܬܐ ܢܡܰܠܠܽܘܢ܆ ܘܫܰܪܟܳܐ ܢܦܰܪܫܽܘܢ. ܘܶܐܢ ܠܰܐ̱ܚܪܺܢܳܐ ܢܶܬܓܠܷܐ ܟܰܕ ܝܳܬܶܒ܆ ܩܰܕܡܳܝܳܐ ܢܶܫܬܽܘܩ ܠܶܗ. ܡܶܫܟܚܺܝܢ ܐܢ̱ܬܽܘܢ ܓܶܝܪ ܟܽܠܟܽܘܢ ܕܚܰܕ ܚܰܕ ܬܶܬܢܰܒܽܘܢ܆ ܕܟܽܠܢܳܫ ܢܺܐܠܰܦ ܘܟܽܠܢܳܫ ܢܶܬܒܰܝܰܐ. ܪܽܘܚܳܐ ܓܶܝܪ ܕܰܢ̈ܒܺܝܶܐ ܠܰܢ̈ܒܺܝܶܐ ܡܶܫܬܰܥܒܕܳܐ. ܡܶܛܽܠ ܕܰܐܠܳܗܳܐ ܠܐ ܗܘܳܐ ܕܰܫܓܽܘܫܝܳܐ܆ ܐܶܠܐ ܕܰܫܠܳܡܳܐ. ܐܰܝܟ ܕܰܒܟܽܠܗܶܝܢ ܥܺـ̈ܕܳܬܐ ܕܩܰܕܺܝ̈ܫܶܐ܀
ܕܣܝܡ ܒܘܪ̈ܟܐ ܕܬܫܡܫܬܐ ܕܬܠܬ
ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܝܒ: ܐ ـ ܝܓ 1Corinthians 12:1-13
ܥܰܠ ܪ̈ܽܘܚܳܢܳܝܳܬܐ ܕܶܝܢ ܐܰܚܰـ̈ܝ܆ ܨܳܒܶܐ ܐ̱ܢܳܐ ܕܬܶܕܥܽܘܢ ܕܚܰܢ̈ܦܶܐ ܗ̱ܘܰܝܬܘܢ܇ ܘܠܰܦܬܟܪ̈ܶܐ ܐܰܝܠܶܝܢ ܕܠܰܝܬ ܠܗܽܘܢ ܩܳܠܴܐ ܕܠܐ ܦܽܘܪܫܳܢ ܡܶܬܕܰܒܪܺܝܢ ܗ̱ܘܰܝܬܘܢ. ܡܶܛܽܠ ܗܳܢܳܐ ܡܰܘܕܰܥ ܐ̱ܢܳܐ ܠܟܽܘܢ܆ ܕܠܰܝܬ ܐ̱ܢܳܫ ܕܰܒܪܽܘܚܳܐ ܕܰܐܠܳܗܳܐ ܡܡܰܠܶܠ܇ ܘܳܐܡܰܪ ܕܰܚܪܶܡ ܗ̱ܽܘ ܝܶܫܽܘܥ. ܘܳܐܦܠܐ ܐ̱ܢܳܫ ܡܶܫܟܰܚ ܠܡܺܐܡܰܪ ܕܡܳܪܝܰܐ ܗ̱ܘ ܝܶܫܽܘܥ܇ ܐܶܠܐ ܐܶܢ ܒܪܽܘܚܳܐ ܕܩܽܘܕܫܳܐ. ܦܽܘ̈ܠܳܓܶܐ ܕܶܝܢ ܕܡܰܘܗ̈ܒܳܬܐ ܐܺܝܬܝܗܽܘܢ. ܐܶܠܐ ܚܕܳܐ ܗ̱ܝ ܪܽܘܚܳܐ. ܘܦܽܘ̈ܠܳܓܶܐ ܕܬܶܫ̈ܡܫܳܬܐ ܐܺܝܬܝܗܽܘܢ. ܐܶܠܐ ܚܰܕ ܗܽܘ ܡܳܪܝܳܐ. ܘܦܽܘ̈ܠܳܓܶܐ ܕܚܰܝ̈ܠܰܘܳܬܐ ܐܺܝܬ. ܐܶܠܐ ܚܰܕ ܗ̱ܽܘ ܐܠܗܳܐ ܕܡܰܥܒܶܕ ܟܽܠ ܒܟܽܠܢܳܫ. ܠܐܢܳܫ ܐ̱ܢܳܫ ܕܶܝܢ܆ ܡܶܬܺܝܗܶܒ ܠܶܗ ܓܶܠܝܳܢܳܐ ܕܪܽܘܚܳܐ ܐܰܝܟ ܕܥܳܕܪܳܐ ܠܶܗ. ܐܺܝܬ ܕܺܝܗܺܝܒܳܐ ܠܶܗ ܒܪܽܘܚܳܐ ܡܶܠܬܐ ܕܚܶܟܡܬܐ. ܠܰܐܚܪܺܢܳܐ ܕܶܝܢ ܡܶܠܬܐ ܕܺܝܕܰܥܬܳܐ ܒܳܗ̇ ܒܪܽܘܚܳܐ. ܠܰܐܚܪܺܢܳܐ ܗܰܝܡܳܢܽܘܬܐ ܒܳܗ̇ ܒܪܽܘܚܳܐ. ܠܰܐܚܪܺܢܳܐ ܡܰܘܗ̈ܒܳܬܐ ܕܳܐܣܝܽܘܬܳܐ ܒܳܗ̇ ܒܪܽܘܚܳܐ. ܠܰܐܚܪܺܢܳܐ ܕܶܝܢ ܚܰܝ̈ܠܷܐ. ܠܰܐܚܪܺܢܳܐ ܕܶܝܢ ܢܒܺܝܽܘܬܐ. ܠܰܐܚܪܺܢܳܐ ܕܶܝܢ ܦܳܪܽܘܫܽܘܬܐ ܕܪ̈ܽܘܚܶܐ. ܠܰܐܚܪܺܢܳܐ ܕܶܝܢ ܙ̈ܢܰܝܳܐ ܕܠܶܫ̈ܳܢܶܐ. ܠܰܐܚܪܺܢܳܐ ܕܶܝܢ ܦܽܘܫܳܩܳܐ ܕܠܶܫ̈ܳܢܶܐ. ܟܽܠܗܶܝܢ ܕܶܝܢ ܗܳܠܶܝܢ ܚܕܳܐ ܗ̱ܝ ܪܽܘܚܳܐ ܣܳܥܪܳܐ. ܘܰܡܦܰܠܓܳܐ ܠܟܽܠܢܳܫ ܐܰܝܟ ܕܗܺܝ ܨܳܒܝܳܐ. ܐܰܟܙܢܳܐ ܓܶܝܪ ܕܦܰܓܪܳܐ ܚܰܕ ܗܽܘ܇ ܘܺܐܝܬ ܒܶܗ ܗܰܕܳܡܶـ̈ܐ ܣܰـ̈ܓܺܝܶܐܐ. ܟܽܠܗܽܘܢ ܕܶܝܢ ܗܰܕܳܡ̈ܶܐ ܕܦܰܓܪܳܐ ܟܰܕ ܣܰـ̈ܓܺܝܶܐܐ ܐܺܝܬܝܗܽܘܢ ܚܰܕ ܐܶܢܽܘܢ ܦܓܰܪ܆ ܗܳܟܰܢܳܐ ܐܳܦ ܡܫܺܝܚܳܐ. ܐܳܦ ܚܢܰܢ ܓܶܝܪ ܟܽܠܰܢ܆ ܒܰܚܕܳܐ ܪܽܘܚ ܠܚܰܕ ܦܓܰܪ ܥܡܰܕܢ܇ ܐܶܢ ܝܺܗܽܘ̈ܕܳܝܶܐ ܘܶܐܢ ܐܰܪ̈ܡܳܝܶܐ܇ ܘܶܐܢ ܥܰܒ̈ܕܶܐ ܘܶܐܢ ܒ̈ܢܰܝ ܚܺܐܪ̈ܶܐ. ܘܟܽܠܰܢ ܚܕܳܐ ܪܽܘܚܳܐ ܐܶܫܬܺܝܢ܀