ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܛ: ܟ ـ ܟܛ Romans 9:20-29

ܐܰܢ̱ܬ ܗܳܟܺܝܠ ܡܰܢ ܐܰܢ̱ܬ ܐܳܘ ܒܰܪܢܳܫܳܐ܇ ܕܦܶܬܓܳܡܳܐ ܠܐܠܳܗܳܐ ܝܳܗܶܒ ܐܰܢ̱ܬ. ܕܰܠܡܳܐ ܐܳܡܪܳܐ ܓܒܺܝܠܬܳܐ ܠܡܰܢ ܕܓܰܒܠܳܗ̇ ܕܰܠܡܳܢܳܐ ܗܳܟܰܢܳܐ ܓܒܰܠܬܳܢܝ. ܐܰܘ ܠܳܐ ܫܰܠܺܝܛ ܦܰܚܳܪܳܐ ܥܠ ܛܺܝܢܶܗ܇ ܕܡܶܢܗ̇ ܡܶܢ ܓܒܺܝܠܬܳܐ ܢܶܥܒܶܕ ܡܳܐܢ̈ܶܐ܇ ܚܰܕ ܠܐܺܝܩܳܪܐ ܘܚܰܕ ܠܨܰܥܪܳܐ. ܐܶܢ ܕܶܝܢ ܨܒܳܐ ܐܰܠܗܳܐ ܕܰܢܚܰܘܶܐ ܪܽܘܓܙܶܗ ܘܢܰܘܕܰܥ ܚܰܝܠܶܗ܆ ܐܰܝܬܺܝ ܒܣܽܘܓܳܐܐ ܕܡܰܓܪܰܬ ܪܽܘܚܶܗ ܪܽܘܓܙܳܐ܇ ܥܰܠ ܡܳـ̈ܐܢܶܐ ܕܪܽܘܓܙܳܐ ܕܰܓܡܺܝܪܺܝܢ ܠܰܐܒܕܳܢܳܐ܆ ܘܰܐܫܦܰܥ ܪ̈ܰܚܡܰܘܗ̱ܝ ܥܰܠ ܡܳـ̈ܐܢܶܐ ܕܪ̈ܰܚܡܶܐ ܕܰܡܛܰܝܒܺܝܢ ܗ̱ܘܰܘ ܠܰܐܠܗܳܐ ܠܬܶܫܒܽܘܚܬܐ. ܕܺܐܝܬܝܢ ܚ̱ܢܰܢ ܩܪ̈ܰܝܳܐ܆ ܠܳܐ ܗ̱ܘܳܐ ܒܰܠܚܽܘܕ ܡܶܢ ܝܺܗܽܘ̈ܕܳܝܶܐ܇ ܐܶܠܳܐ ܐܳܦ ܡܶܢ ܥܰܡ̱̈ܡܶܐ. ܐܰܝܟܰܢܳܐ ܕܳܐܦ ܒܗܽܘܫܳܥ ܐܶܡܰܪ. ܕܶܐܩܪܶܐ ܠܰܐܝܠܶܝܢ ܕܠܳܐ ܗ̱ܘܰܘ ܥܰܡܝ ܥܰܡܳܐ ܕܺܝܠܝ܆ ܘܰܠܠܳܐ ܐܶܬܪܰܚܡܰܬ܂ ܐܶܬܪܰܚܡܰܬ. ܢܶܗܘܶܐ ܓܶܝܪ ܒܕܽܘܟ‍ܬܳܐ ܟܰܪ ܕܡܶܬܩܪܶܝܢ ܗ̱ܘܰܘ ܠܳܐ ܥܰܡܝ܆ ܬܰܡܳܢ ܢܶܬܩܪܽܘܢ ܒ̈ܢܰܝܳܐ ܠܐܠܳܗܳܐ ܚܰܝܳܐ. ܐܶܫܰܥܝܳܐ ܕܶܝܢ ܐܰܟܪܶܙ ܥܰܠ ܒ̈ܢܰܝ ܐܺܝܣܪܳܝܶܠ. ܕܶܐܢ ܢܶܗܘܶܐ ܡܶܢܝܳܢܳܐ ܕܰܒ̈ܢܰܝ ܐܺܝܣܪܳܝܶܠ ܐܰܝܟ ܚܳܠܳܐ ܕܰܒܝܰܡܳܐ܆ ܫܰܪܟܳܢܳܐ ܕܡܶܢܗܽܘܢ ܢܺܚܶܐ. ܡܶܠܬܐ ܓܪܰܡ ܘܰܦܣܰܩ. ܘܢܶܥܒܕܺܝܗ̇ ܡܳܪܝܳܐ ܥܰܠ ܐܰܪܥܳܐ. ܘܰܐܝܟ ܡܶܕܶܡ ܕܩܰܕܶܡ ܐܶܡܰܪ ܗܽܘ ܐܶܫܰܥܝܳܐ. ܕܶܐܠܽܘ ܠܳܐ ܡܳܪܝܳܐ ܨܒܰܐܘܽܬ ܐܰܘܬܰܪ ܠܰܢ ܣܪܺܝܕܳܐ܆ ܐܰܝܟ ܣܕܽܘܡ ܗܳܘܶܝܢ ܗ̱ܘܰܝܢ܇ ܘܰܠܥܳܡܽܘܪܳܐ ܡܶܬܕܰܡܶܝܢ ܗ̱ܘܰܝܢ܀