ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܐ: ܚ ـ ܝܙ 1Corinthians 1:8-17

ܕܗܽܘ ܢܫܰܪܰܪܟܽܘܢ ܥܕܰܡܳܐ ܠܰ‍ܐ̱ܚܪܳܝܬܳܐ ܕܰܕܠܳܐ ܪܶܫܝܳܢ ܬܶܗܘܽܘܢ ܒܝܰܘܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ. ܡܗܰܝܡܰܢ ܗ̱ܘ ܐܰܠܳܗܳܐ ܕܒܺܐܝܕܶܗ ܐܶܬܩܪܺܝܬܽܘܢ ܠܫܰܘܬܳܦܽܘܬܳܐ ܕܰܒܪܶܗ ܝܶܫܽܘܥ ܡܫܺܝܚܳܐ ܡܳܪܰܢ. ܒܳܥܶܐ ܐ̱ܢܳܐ ܕܶܝܢ ܡܶܢܟܽܘܢ ܐܰܚܰـ̈ܝ܇ ܒܰܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܆ ܕܬܶܗܘܶܐ ܚܕܳܐ ܡܶܠܬܳܐ ܠܟܽܠܟܽܘܢ. ܘܠܳܐ ܢܶܗ̈ܘܝܳܢ ܒܟܽܘܢ ܦܳܠܰܓ̈ܘܳܬܳܐ. ܐܶܠܳܐ ܬܶܗܘܽܘܢ ܓܡܺܝܪܺܝܢ ܒܰܚܕܳܐ ܬܰܪܥܺܝܬܳܐ ܘܰܒܚܰܕ ܪܶܥܝܳܢܳܐ. ܫܠܰܚܘ ܠܺܝ ܓܶܝܪ ܥܠܰܝܟܽܘܢ ܐܰܚܰـ̈ܝ܇ ܡܶܢ ܒܶܝܬ ܟ̈‍ܠܴ‍ܐܶܐ܆ ܕܚܶܪ̈ܝܳܢܶܐ ܐܺܝܬ ܒܰܝܢܳܬܟܽܘܢ. ܗܳܕܶܐ ܕܶܝܢ ܐܳܡܰܪ ܐ̱ܢܳܐ܆ ܕܺܐܝܬ ܡܶܢܟܽܘܢ ܕܳܐܡܰܪ ܐܶܢܳܐ ܕܦܰܘܠܳܘܣ ܐ̱ܢܳܐ܆ ܘܺܐܝܬ ܕܳܐܡܰܪ ܐܶܢܳܐ ܕܰܐܦܳܠܳܘ ܐ̱ܢܳܐ܆ ܘܺܐܝܬ ܕܳܐܡܰܪ ܐܶܢܳܐ ܕܟܺܐܦܳܐ ܐ̱ܢܳܐ܆ ܘܺܐܝܬ ܕܳܐܡܰܪ ܐܶܢܳܐ ܕܰܡܫܺܝܚܳܐ ܐ̱ܢܳܐ. ܕܰܠܡܳܐ ܐܶܬܦܰܠܰܓ ܠܶܗ ܡܫܺܝܚܳܐ. ܐܰܘ ܠܡܳܐ ܦܰܘܠܳܘܣ ܐܶܙܕܩܶܦ ܥܰܠ ܐܰܦܰܝ̈ܟܽܘܢ. ܐܰܘ ܒܰܫܡܶܗ ܕܦܰܘܠܳܘܣ ܥܡܰܕܬܽܘܢ. ܡܰܘܕܶܐ ܐ̱ܢܳܐ ܠܰܐܠܳܗܝ ܕܰܠܐ̱ܢܳܫ ܡܶܢܟܽܘܢ ܠܳܐ ܐܰܥܡܕܶܬ܆ ܐܶܠܳܐ ܠܰܟܪܺܝܣܦܳܘܣ ܘܰܠܓܰܐܻܝܳܘܣ. ܕܠܳܐ ܐ̱ܢܳܫ ܢܺܐܡܰܪ ܕܰܒܫܶܡܝ ܐܰܥܡܕܶܬ. ܐܰܥܡܕܶܬ ܕܶܝܢ ܐܳܦ ܠܒܰܝܬܶܗ ܕܶܐܣܛܶܦܰܢܰܐ. ܬܽܘܒ ܕܶܝܢ ܠܳܐ ܝܳܕܰܥ ܐ̱ܢܳܐ ܐܶܢ ܠܐ̱ܢܳܫ ܐ̱ܚܪܺܝܢ ܐܰܥܡܕܶܬ. ܠܐ ܓܶܝܪ ܫܰܕܪܰܢܝ ܡܫܺܝܚܳܐ ܠܡܰܥܡܳܕܽܘ ܐܶܠܳܐ ܠܰܡܣܰܒܳܪܽܘ. ܠܳܐ ܒܚܶܟܡܰܬ ܡ̈ܶܠܷܐ܇ ܕܠܳܐ ܢܶܣܬܰܪܰܩ ܙܩܺܝܦܶܗ ܕܰܡܫܺܝܚܳܐ܀