ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܛܺܝܡܳܬܶܐܳܘܣ ܒ
ܓ: ܝܘ ـ ܝܙ܇ ܕ:ܐ ـ ܚ 2Thimothy 3:16-17, 4:1-8

ܟܽܠ ܟ‍ܬܳܒ ܕܰܒܪܽܘܚܳܐ ܐܶܬܟ‍ܬܶܒ܆ ܡܰܘܬܪܳܢܰܐ ܗ̱ܘ ܠܝܽܘܠܦܳܢܳܐ. ܘܰܠܟܽܘܘܳܢܳܐ. ܘܰܠܬܽܘܪܳܨܳܐ. ܘܰܠܡܰܪܕܽܘܬܳܐ ܕܰܒܟܺܐܢܽܘܬܐ܇ ܕܢܶܗܘܶܐ ܓܡܺܝܪ ܒܰܪܢܳܫܳܐ ܕܐܠܗܐ ܘܰܠܟ‍ܠ ܥܒܳܕ ܛܳܒ ܡܫܰܠܡܳܢ. ܡܣܰܗܶܕ ܐ̱ܢܳܐ ܠܳܟ ܩܕܳܡ ܐܠܗܳܐ ܘܡܳܪܰܢ ܝܶܫܽܘܥ ܡܫܺܝܚܳܐ ܗܰܘ ܕܰܥܬܺܝܕ ܠܰܡܕܳܢ ܚܰـ̈ܝܶܐ ܘܡܺܝ̈ܬܐ ܒܓܶ‍ܠܝܳܢܳܐ ܕܡܰܠܟܽܘܬܗ܆ ܐܰܟܪܶܙ ܡܶܠܬܐ ܘܩܽܘܡ ܒܰܚܦܺܝܛܽܘܬܐ ܒܙܰܒܢܳܐ ܘܰܕܠܳܐ ܙܰܒܢܳܐ܇ ܐܰܟܶܣ ܘܟܰܘܶܢ ܒܟܽ‍ܠܳܗ̇ ܡܰܓܪܰܬ ܪܽܘܚܳܐ ܘܝܽܘܠܦܳܢܳܐ. ܢܶܗܘܶܐ ܓܶܝܪ ܙܰܒܢܳܐ܆ ܕܰܠܝܽܘܠܦܳܢܳܐ ܚܠܺܝܡܳܐ ܠܐ ܢܶܫܬܰܡܥܽܘܢ܇ ܐܶܠܐ ܐܰܝܟ ܪ̈ܓܺܝܓܳܬܗܽܘܢ ܢܰܣܓܽܘܢ ܠܢܰܦܫܗܽܘܢ ܡܰܠܦܳܢ̈ܶܐ ܒܚܽܘܬܚܳܬܳܐ ܕܡܰܫܡܰܥܬܗܽܘܢ܇ ܘܡܶܢ ܫܪܳܪܳܐ ܢܰܗܦܟܽܘܢ ܐܶܕܢܗܽܘܢ܇ ܠܫܽܘ̈ܥܝܳܬܳܐ ܕܶܝܢ ܢܶܣܛܽܘܢ. ܐܰܢܬ ܕܶܝܢ ܗܘܰܝܬ ܥܺܝܪ ܒܟܽ‍ܠܡܶܕܶܡ. ܘܣܰܝܒܰܪ ܒܺܝܫ̈ܳܬܳܐ. ܘܰܥܒܳܕܳܐ ܥܒܶܕ ܕܰܡܣܰܝܒܪܢܳܐ. ܘܬܶܫܡܶܫܬܳܟ ܫܰܠܶܡ. ܐܶܢܳܐ ܓܶܝܪ ܡܶܟܺܝܠ ܡܶܬܢܰܩܶܐ ܐ̱ܢܳܐ܆ ܘܙܰܒܢܳܐ ܕܶܐܫܬܪܶܐ܇ ܡܛܳܐ. ܐܰܓܽܘܢܳܐ ܫܰܦܺܝܪܳܐ ܐܶܬܟܰ‍ܬܫܶܬ. ܘܪܶܗܛܝ ܫܰܠܡܶܬ. ܘܗܰܝܡܳܢܽܘܬܝ ܢܶܛܪܶܬ. ܘܡܶܢ ܗܳܫܳܐ ܢܛܺܝܪ ܠܺܝ ܟ‍ܠܺܝܠܳܐ ܕܟܺܐܢܽܘܬܐ܆ ܕܢܶܦܪܥܺܝܘܗ̱ܝ ܠܺܝ ܡܳܪܝ ܒܝܰܘܡܳܐ ܗܰܘ ܕܗܽܘܝܽܘ ܕܰܝܳܢܳܐ ܟܺܐܢܳܐ܇ ܠܐ ܕܶܝܢ ܒܰܠܚܽܘܕ ܠܺܝ܇ ܐܶܠܐ ܐܳܦ ܠܰܐܝܠܶܝܢ ܕܰܐܚܶܒܘ ܠܓܶ‍ܠܝܳܢܶܗ܀