ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܒ
ܝܒ: ܝܛ ـ ܟܐ܇ ܝܓ: ܐ ـ ܝܕ 2Corinthians 12:19-21, 13:1-14

ܠܡܳܐ ܬܽܘܒ ܣܳܒܪܺܝܢ ܐܢ̱ܬܘܢ ܕܰܠܟܽܘܢ ܢܳܦܩܺܝܢܰܢ ܪܽܘܚܳܐ܆ ܩܕܳܡ ܐܠܗܳܐ ܒܰܡܫܺܝܚܳܐ ܡܡܰܠ‍ܠܺܝܢܰܢ. ܘܟܽ‍ܠܗܶܝܢ ܚܰܒܺܝ̈ܒܰܝ ܡܶܛܽܠ ܒܶܢܝܳܢܰܐ ܗ̱ܘ ܕܺܝܠܟܽܘܢ. ܕܳܚܶܠ ܐ̱ܢܳܐ ܓܶܝܪ ܕܰܠܡܳܐ ܐܻܬܶܐ ܠܘܳܬܟܽܘܢ܇ ܘܠܳܐ ܐܶܫܟܰܚܟܽܘܢ ܐܰܝܟ ܕܨܳܒܶܐ ܐ̱ܢܳܐ܇ ܘܶܐܫܬܟܰܚ ܠܟܽܘܢ ܐܳܦ ܐܶܢܳܐ ܐܝܟ ܡܳܐ ܕܠܳܐ ܨܳܒܶܝܬܘܢ. ܕܰܠܡܳܐ ܚܶܪܝܳܢܳܐ. ܘܰܚܣܳܡܳܐ. ܘܚܶܡܬܳܐ. ܘܥܶܨܝܳܢܳܐ. ܘܡܶܐܟܰ‍ܠ ܩܰܪܨܳܐ. ܘܪܶܛܢܳܐ. ܘܰܚܬܺܝܪܽܘܬܐ. ܘܰܫܓܽܘܫܝܳܐ. ܕܰܠܡܳܐ ܟܰܕ ܐܻܬܶܐ ܠܘܳܬܟܽܘܢ ܢܡܰܟܟܰܢܝ ܐܰܠܗܝ܆ ܘܶܐܬܶܐܒܶܠ ܥܰܠ ܣܰـ̈ܓܺܝܶܐܐ ܐܰܝܠܶܝܢ ܕܰܚܛܰܘ ܘܠܳܐ ܬܳܒܘ ܡܶܢ ܛܰܢܦܽܘܬܐ ܘܡܶܢ ܙܳܢܝܽܘܬܐ ܘܡܶܢ ܦܰܚܙܽܘܬܐ ܕܰܥܒܰܕܘ. ܗܳܕܶܐ ܕܰܬܠܳܬܺ ܗ̱ܝ ܙܰܒܢܺܝ̈ܢ ܕܺܐܬܶܐ ܐ̱ܢܳܐ ܠܘܳܬܟܽܘܢ܆ ܕܥܰܠ ܦܽܘܡ ܬܪ̈ܶܝܢ ܘܰܬܠܳܬܐ ܣܳܗ̈ܕܺܝܢ ܬܩܽܘܡ ܟ‍ܠ ܡܶܠܳܐ. ܡܶܢ ܩܕܺܝܡ ܐܶܡܪܶܬ ܗܘܺܝܬ ܠܟܽܘܢ܆ ܘܬܘܒ ܡܩܰܕܶܡ ܐ̱ܢܳܐ ܐܳܡܰܪ ܐ̱ܢܳܐ ܠܟܽܘܢ܇ ܐܰܝܟ ܕܳܐܦ ܬܰܪ̈ܬܶܝܢ ܙܰܒܢܺܝ̈ܢ ܕܰܗܘܺܝܬ ܠܘܳܬܟܽܘܢ ܐܶܡܪܶܬ ܠܟܽܘܢ܇ ܘܳܐܦ ܗܳܫܳܐ ܟܰܕ ܪܰܚܺܝܩ ܐ̱ܢܳܐ ܟܳ‍ܬܶܒܢܳܐ܇ ܠܗܳܠܶܝܢ ܕܰܚ̈ܛܰܘ܆ ܘܰܠܫܰܪܟܳܐ ܕܰܐ̱ܚܪ̈ܳܢܶܐ܆ ܕܶܐܢ ܐܻܬܶܐ ܬܽܘܒ ܠܳܐ ܐܶܚܽܘܣ. ܡܶܛܽܠ ܕܒܽܘܩܝܳܐ ܒܳܥܶܝܬܘܢ ܕܰܡܫܺܝܚܳܐ ܕܰܡܡܰܠܶ‍ܠ ܒܺܝ. ܗܰܘ ܕܠܳܐ ܗܘܳܐ ܡܚܺܝܠ ܒܟܽܘܢ܇ ܐܶܠܳܐ ܚܰܝܠܬܳܢ ܗܽܘ ܒܟܽܘܢ. ܐܳܦܶܢ ܐܶܙܕܩܶܦ ܓܶܝܪ ܒܰܡܚܺܝܠܽܘܬܐ܆ ܐܶܠܳܐ ܚܰܝ ܗܽܘ ܒܚܰܝܠܳܐ ܕܰܐܠܗܳܐ. ܘܳܐܦ ܚܢܰܢ ܡܚܺܝܠܺܝܢܰܢ ܥܰܡܶܗ܆ ܐܶܠܳܐ ܚܰܝܺܝܢ ܚ̱ܢܰܢ ܥܰܡܶܗ ܒܚܰܝܠܐܳ ܕܰܐܠܗܳܐ ܕܰܒܟܽܘܢ. ܢܰܦܫܟܽܘܢ ܒܩܰܘ܆ ܐܶܢ ܒܳܗ̇ ܒܗܰܝܡܳܢܽܘܬܐ ܩܳܝܡܺܝܢ ܐܢ̱ܬܽܘܢ. ܢܰܦܫܟܽܘܢ ܐܰܣܰܘ. ܐܰܘ ܠܳܐ ܡܶܫܬܰܘܕܥܺܝܬܘܢ ܕܝܶܫܽܘܥ ܡܫܺܝܚܳܐ ܒܟܽܘܢ ܗܽܘ܆ ܘܶܐܢ ܠܳܐ ܡܰܣ̈ܠܰܝܳܐ ܐܰܢ̱ܬܽܘܢ. ܡܣܰܒܰܪ ܐ̱ܢܳܐ ܕܶܝܢ ܕܬܶܕܥܽܘܢ܆ ܕܰܚܢܰܢ ܠܳܐ ܗܘܰܝܢ ܡܰܣܠܶܝܢ. ܒܳܥܶܐ ܐܢܳܐ ܕܶܝܢ ܡܶܢ ܐܠܗܳܐ܇ ܕܠܳܐ ܢܶܗܘܶܐ ܒܟܽܘܢ ܡܶܕܶܡ ܕܒܺܝܫ܇ ܐܰܝܟ ܕܒܽܘܩܝܰܢ ܕܺܝܠܰܢ ܢܶܬܚܙܶܐ܆ ܐܶܠܳܐ ܕܰܐܢ̱ܬܘܢ ܬܶܗܘܽܘܢ ܣܳܥܪܺܝܢ ܛܳـ̈ܒܳܬܐ܇ ܘܰܚܢܰܢ ܢܶܗܘܶܐ ܐܰܝܟ ܡܰܣ̈ܠܰܝܳܐ. ܠܳܐ ܓܶܝܪ ܡܶܫܟܚܺܝܢܰܢ ܕܢܶܥܒܶܕ ܡܶܕܶܡ ܠܽܘܩܒܰܠ ܩܽܘܫܬܐ܆ ܐܶܠܳܐ ܚܠܳܦ ܩܽܘܫܬܐ. ܚܳܕܶܝܢܰܢ ܕܶܝܢ ܡܳܐ ܕܰܚܢܰܢ ܟܪܺܝܗܺܝܢ܆ ܘܰܐܢ̱ܬܘܢ ܚܰܝܠܬܢܺܝܢ. ܗܳܕܶܐ ܓܶܝܪ ܐܳܦ ܡܨܰܠܶܝܢܰܢ ܕܰܐܢ̱ܬܘܢ ܬܶܬܓܰܡܪܽܘܢ. ܡܶܛܽܠ ܗܳܢܳܐ ܟܰܕ ܪܰܚܺܝܩ ܐ̱ܢܳܐ ܗܳܠܶܝܢ ܟܳ‍ܬܶܒ ܐ̱ܢܳܐ܆ ܕܠܳܐ ܡܳܐ ܕܶܐܬܻܝܬ ܩܰܫܝܳܐܝܺܬ ܐܶܣܥܽܘܪ ܐܰܝܟ ܫܽܘܠܛܳܢܳܐ ܕܝܰܗ̱ܒ ܠܺܝ ܡܳܪܝ܇ ܠܒܶܢܝܳܢܟܽܘܢ ܘܠܳܐ ܠܣܽܘܚܳܦܟܽܘܢ. ܡܶܟܺܝܠ ܐܰܚܰـ̈ܝ܆ ܚܕܰܘ ܘܶܐܬܓܰܡ̱ܪܘ ܘܶܐܬܒܰܝܰܐܘ܇ ܘܰܐܘܝܽܘܬܐ ܘܫܰܝܢܳܐ ܢܶܗܘܶܐ ܒܟܽܘܢ. ܘܰܐܠܗܳܐ ܕܚܽܘܒܳܐ ܘܰܕܫܰܠܡܽܘܬܐ ܢܶܗܘܶܐ ܥܰܡܟܽܘܢ. ܫܰܐܠܘ ܒܰܫܠܳܡܳܐ ܚܰܕ ܕܚܰܕ ܒܢܽܘܫܰܩܬܐ ܩܰܕܺܝܫܬܐ. ܫܳܐܠܺܝܢ ܒܰܫܠܳܡܟܽܘܢ ܟܽ‍ܠܗܽܘܢ ܩܰܕܺܝ̈ܫܶܐ. ܫܠܳܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܘܚܽܘܒܶܗ ܕܰܐܠܗܳܐ ܘܫܰܘܬܦܽܘܬܐ ܕܪܽܘܚܳܐ ܕܩܽܘܕܫܳܐ ܥܰܡ ܟܽ‍ܠܟܽܘܢ ܐܰܡܺܝܢ܀