ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܗ: ܐ ـ ܝܐ Romans 5:1-11

ܡܶܛܽܠ ܕܶܐܙܕܰܕܰܩܢ ܗܳܟܺܝܠ ܒܗܰܝܡܳܢܽܘܬܐ܆ ܢܶܗܘܶܐ ܠܰܢ ܫܠܳܡܳܐ ܠܘܳܬ ܐܠܳܗܳܐ ܒܡܳܪܰܢ ܝܶܫܽܘܥ ܡܫܺܝܚܳܐ. ܕܒܶܗ ܐܶܬܩܰܪܰܒܢ ܒܗܰܝܡܳܢܽܘܬܐ ܠܛܰܝܒܽܘܬܐ ܗܳܕܶܐ ܕܒܳܗ̇ ܩܳܝܡܺܝܢܰܢ܆ ܘܡܶܫܬܒܗܪܺܝܢܰܢ ܒܣܰܒܪܳܐ ܕܬܶܫܒܽܘܚܬܗ ܕܰܐܠܳܗܳܐ. ܘܠܳܐ ܗܳܟܰܢܳܐ ܒܰܠܚܽܘܕ܆ ܐܶܠܳܐ ܐܳܦ ܒܽܐܘܠܨܳܢܺܝ̈ܢ ܡܶܫܬܰܒܗܪܺܝܢܰܢ. ܕܝܳܕܥܺܝܢܰܢ ܕܽܐܘܠܨܳܢܳܐ ܡܣܰܝܒܪܳܢܽܘܬܐ ܓܳܡܰܪ ܒܰܢ. ܘܰܡܣܰܝܒܪܳܢܽܘܬܐ ܒܽܘܩܝܳܐ. ܘܒܽܘܩܝܳܐ ܣܰܒܪܳܐ. ܣܰܒܪܳܐ ܕܶܝܢ ܠܳܐ ܡܰܒܗܶܬ܆ ܡܶܛܽܠ ܕܚܽܘܒܶܗ ܕܰܐܠܳܗܳܐ ܡܫܰܦܰܥ ܥܰܠ ܠܶـ̈ܒܰܘܳܬܢ ܒܪܽܘܚܳܐ ܕܩܽܘܕܫܳܐ ܕܶܐܬܝܰܗܒܰܬ ܠܰܢ. ܐܶܢ ܕܶܝܢ ܡܫܺܝܚܳܐ ܡܶܛܽܠ ܟܪܺܝܗܽܘܬܰܢ ܒܙܰܒܢܳܐ ܗܳܢܳܐ ܚܠܳܦ ܪ̈ܰܫܺܝܥܶܐ ܡܺܝܬ܆ ܠܡܰܚܣܶܢ ܓܶܝܪ ܐܢܳܫ ܚܠܳܦ ܪ̈ܰܫܺܝܥܶܐ ܡܳܐܶܬ܆ ܚܠܳܦ ܛܳـ̈ܒܶܐ ܓܶܝܪ ܛܳܟ ܡܰܡܪܰܚ ܐ̱ܢܳܫ ܠܰܡܡܳܬ܆ ܗܳܪܟܳܐ ܡܚܰܘܶܐ ܐܠܳܗܳܐ ܚܽܘܒܶܗ ܕܰܠܘܳܬܢ. ܕܶܐܢ ܟܰܕ ܚܰܛܳܝ̈ܶܐ ܐܺܝܬܰܝܢ ܗ̱ܘܰܝܢ܆ ܡܫܺܝܚܳܐ ܚܠܳܦܰܝܢ ܡܺܝܬ܆ ܟܡܳܐ ܗܳܟܺܝܠ ܝܰܬܝܪܳܐܝܺܬ ܢܶܙܕܰܕܰܩ ܗܳܫܳܐ ܒܰܕܡܶܗ܇ ܘܒܶܗ ܢܶܬܦܰܨܶܐ ܡܶܢ ܪܽܘܓܙܳܐ. ܐܶܢ ܓܶܝܪ ܟܰܕ ܐܺܝܬܰܝܢ ܒܥܶܠܕ̈ܒܳܒܶܐ ܐܶܬܪܰܥܺܝ ܥܰܡܰܢ ܐܠܳܗܳܐ ܒܡܰܘܬܐ ܕܰܒܪܶܗ܆ ܟܡܳܐ ܗܳܟܺܝܠ ܝܰܬܝܪܳܐܝܺܬ ܒܬܰܪܥܽܘܬܶܗ ܢܺܚܶܐ ܒܚܰܝܰܘ̈ܗ̱ܝ. ܘܠܳܐ ܗܳܟܰܢܳܐ ܒܰܠܚܽܘܕ܆ ܐܶܠܳܐ ܐܳܦ ܢܶܫܬܰܒܗܰܪ ܒܰܐܠܳܗܳܐ ܒܝܰܕ ܡܳܪܰܢ ܝܶܫܽܘܥ ܡܫܺܝܚܳܐ܇ ܕܒܶܗ ܗܽܘ ܗܳܫܳܐ ܩܰܒܶܠܢ ܬܰܪܥܽܘܬܐ܀