ܒܫܡ ܐܒܐ ܘܒܪܐ ܘܪܘܚܐ ܩܕܝܫܐ ܚܕ ܐܠܗܐ ܫܪܝܪܐ ܐܡܝܢ. ܡܫܪܝܢܢ ܠܡܟܬܒ ܨܠܘܬܐ ܕܣܘܬܪܐ ܕܚܕ ܒܫ̈ܒܐ ܕܨܘܡܐ ܕܐܪ̈ܒܥܝܢ
ܡܢ ܒܬܪ ܨܠܘܬܐ ܕܪܡܫܐ ܡܫܪܝܢܢ ܒܨܠܘܬܐ ܕܣܘܬܪܐ ܘܐܡܪܝܢ ܬܠ̈ܬ ܙܒܢܝ̈ܢ:

ܬܶܫܒܽܘܚܬܳܐ ܠܰܐܠܳܗܳܐ ܒܰܡܪ̈ܰܘܡܶܐ܇ ܘܥܰܠ ܐܰܪܥܳܐ ܫܠܳܡܳܐ ܘܫܰܝܢܳܐ ܘܣܰܒܪܳܐ ܛܳܒܳܐ ܠܰܒܢܰܝ̈ܢܳܫܳܐ܀

ܡܙܡܘܪܐ: 4

ܟܰܕ ܩܪܺܝܬ̣ܳܟ ܥܢܰܝܬ̣ܳܢܝ̱܇ ܐܰܠܳܗܝ̱ ܘܦܳܪܽܘܩܳܐ ܕܙܰܕܺܝܩܽܘܬ̣ܝ̱܀

ܒܽܐܘܠ̈ܨܳܢܰܝ ܐܰܪܘܰܚܬ ܠܺܝ܇ ܪܰܚܶܡܥܠܰܝ ܘܰܫܡܰܥ ܨܠܽܘܬ̣ܝ̱܀

ܒܢܰܝ̈ܢܳܫܳܐ ܥܕܰܡܳܐ ܠܶܐܡܰܬܝ̱܇ ܐܺܝܩܳܪܝ̱ ܡܚܰܦܶܝܢ ܐܢ̱ܬܽܘܢ܀

ܘܪܳܚܡܺܝܢ ܐܢ̱ܬܽܘܢ ܣܪܺܝܩܽܘܬ̣ܳܐ܇ ܘܒܳܥܶܝܢ ܐܢ̱ܬܽܘܢ ܕܰܓܳـܠܽܘܬ̣ܳܐ ܠܥܳܠܡܺܝܢ܀

ܕܰܥܘ̱ ܕܰܦܪܰܫ ܠܶܗ ܡܳܪܝܳܐ ܓܰܒܝܳܐ ܒܬܶܕܡܽܘܪܬܳܐ܇ ܡܳܪܝܳܐ ܢܶܫܡܰܥ ܟܰܕ ܐܶܩܪܶܝܘܗ̱ܝ܀

ܪܓ̣ܰܙܘ̱ ܘܠܳܐ ܬܶܚܛܽܘܢ ܐܶܡܰܪܘ̱ ܒܠܶܒܰܘ̈ܳܬ̣ܟ̣ܽܘܢ܇ ܘܥܰܠ ܡܰܫܟܒܰܝ̈ܟ̣ܽܘܢ ܪܢܰܘ܀

ܕܰܒܰܚܘ̱ ܕܶܒ̈ܚܶܐ ܕܙܰܕܺܝܩܽܘܬ̣ܳܐ ܘܣܰܒܰܪܘ̱ ܒܡܳܪܝܳܐ܇ ܣܰܓܺܝ̈ܶܐܐ ܕܳܐܡܪܺܝܢ ܡܰܢܽܘ ܢܚܰܘܶܝܢ ܛܳܒܳܐ܀

ܘܢܶܦܪܽܘܣ ܥܠܰܝܢ ܢܽܘܗܪܳܐ ܕܦܰܪܨܽܘܦܶܗ܇ ܡܳܪܝܳܐ ܝܰܗ̱ܒܬ ܚܰܕܽܘܬ̣ܳܟ ܒܠܶܒܝ̱܀

ܡܶܢ ܙܰܒܢܳܐ ܕܰܥܒܽܘܪܗܽܘܢ ܘܰܕܚܰܡܪܗܽܘܢ ܘܰܕܡܶܫܚܗܽܘܢ ܣܓܺܝܘ̱ ܒܰܫܠܳܡܳܐ ܐܰܟ̣ܚܕܳܐ܀

ܘܶܐܢܳܐ ܐܶܫܟ̣ܰܒ ܘܐܶܕܡܰܟ܇ ܡܶܛܽܠ ܕܰܐܢ̱ܬ ܡܳܪܝܳܐ ܒܰܠܚܽܘܕܰܝ ܒܫܶܠܝܳܐ ܬܰܥܡܪܰܢܝ̱܇ ܘܠܳܟ ܝܳܐܐܶ ܫܽܘܒܚܳܐ ܐܰܠܗܳܐ܀

ܡܕܪܫܐ ܒܩܠܐ: ܩܽܘܡ ܦܰܘܠܳܘܣ

ܦܬܰܚ ܠܺܝ ܡܳܪܝ̱ ܬܰܪܥܳܟ ܡܠܶܐ ܪ̈ܰܚܡܶܐ. ܐܰܝܟ ܕܰܦܬܰܚܬ ܩܽܘܕܡܰܬ̣ ܚܰܛܳܝܬܳܐ. ܘܩܰܒܶܠ ܡܶܢܝ̱ ܕܶܡ̈ܥܶܐ ܕܝܳܗܶܒ ܐܢܳܐ. ܘܗܰܒ ܐܰܢ̱ܬ ܠܺܝ ܫܽܘܒܩܳܢܳܐ ܕܚܰܘ̈ܒܶܐ. ܠܳܟ ܡܰܝ̈ܳܐ ܚܰܝ̈ܶܐ. ܫܶܩܠܶܬ̣ ܗ̱ܘܺܝܬ ܒܰܠܘܺܝܬܝ̱܇ ܕܠܳܐ ܐܶܒܥܶܐ ܬܰܡܳܢ. ܡܰܝ̈ܳܐ ܡܶܢ ܐܰܒܪܰܡ. ܕܰܫܡܺܝܥ ܠܺܝ ܒܫܰܪܒܶܗ ܕܥܰܬܺܝܪܳܐ܇ ܟܰܕ ܫܳܐܶܠ ܗ̱ܘܳܐ ܡܰܝ̈ܳܐ ܒܪܺܝܫ ܚܶܨܪܶܗ܀

ܘܳܝ ܐܰܚܰܝ̈ ܪ̈ܚܺܝܡܶܐ ܘܚܰܒܺܝ̈ܒܶܐ܇ ܘܳܝ ܕܰܗܘܺܝܬ̣ ܡܰܒܥܰܕ ܡܶܢ ܡܳܪܝܳܐ܇ ܕܗܳܐ ܕܥܶܟ ܠܶܗ ܠܰܡܦܺܝܕܝ̱ ܒܡܶܫܬܽܘܬ̣ܳܐ܇ ܘܢܶܦܩܶܬ ܠܺܝ ܠܚܶܫܟܳܐ ܒܰܪܳܝܳܐ. ܘܺܐܝܬ̣ܰܝ ܒܣܰܪܝܽܘܬ̣ܳܐ܇ ܢܕܺܝܕܳܐ ܠܡܰܠܰܐܟ̣̈ܶܐ܇ ܚܰܒܪܳܐ ܠܣܳܛܳܢܳܐ܇ ܥܰܒܕܳܐ ܠܰܚܛܺܝܬ̣ܳܐ܇ ܘܳܝ ܠܺܝ ܕܶܝܢ ܐܶܢܗܽܘ ܕܠܳܐ ܐܶܬ̣ܽܘܒ܇ ܡܰܦܩܺܝܢ ܠܺܝ ܠܚܶܫܟܳܐ ܒܰܪܳܝܳܐ܀

ܐܚܪܢܐ ܒܩܠܐ: ܠܰܬܚܽܘܡܳܐ ܕܗܰܝܡܳܢܽܘܬܳܐ

ܠܝܰܡܳܐ ܕܪ̈ܰܚܡܰܝܟ ܚܳܐܰܪ ܐ̱ܢܳܐ܇ ܝܺܚܺܝܕܳܝܳܐ ܐܰܠܳܗܳܐ ܕܣܰܓܺܝܘ ܚܰܘ̈ܒܰܝ܇ ܘܰܥܫܶܢܘ̱ ܒܽܘܨܳܪ̈ܰܝ܇ ܪܽܘܣ ܥܠܰܝ ܒܙܽܘܦܳܟ ܕܰܟ̣ܝܳܐ܇ ܘܚܰܠܶܠܰܝܢܝ̱ ܒܕܶܡ̈ܥܶܐ ܕܥܰܝ̈ܢܰܝ܇ ܒܳܥܶܐ ܐ̱ܢܳܐ ܡܳܪܝ̱ ܒܚܽܘܒܶܗ ܕܝܳܠܽܘܕܳܟ. ܠܳܐ ܢܰܗܠܽܘܢ ܒܺܝ ܣܳܩܽܘܪ̈ܰܝ܇ ܐܶܠܳܐ ܢܶܚܕܽܘܢ ܡܰܠܰܐܟ̣̈ܶܐ ܒܚܰܕ ܚܰܛܳܝܳܐ܇ ܕܬܳܐܶܒ ܡܶܢ ܥܰܘܠܶܗ. ܘܢܺܐܡܪܽܘܢ ܕܰܒܪܺܝܟ ܗܽܘ ܡܳܪܝܳܐ܇ ܕܰܦܬܺܝܚ ܬܰܪܥܶܗ ܠܬܰܝ̈ܳܒܶܐ ܗ̄ ܒܠܺܠܝܳܐ ܘܒܺܐܝܡܳܡܳܐ܀

ܪܓ̣ܺܝܓ̣ ܗܘܳܐ ܩܳܠܶܗ ܕܚܰܛܳܝܬܳܐ܇ ܟܰܕ ܐܳܡܪܳܐ ܠܶܗ ܠܒܰܣܳܡܳܐ ܕܗܰܒ ܠܺܝ ܡܶܫܚܳܐ܇ ܘܣܰܒ ܕܰܗܒܳܐ ܛܺܝܡܰܘ̈ܗ̱ܝ̱. ܡܶܫܚܳܐ ܪܺܝܫܳܝܳܐ ܗܰܒܠܺܝ܇ ܕܶܐܚܠܽܘܛ ܒܶܗ ܕܶܡ̈ܥܶܐ ܕܥܰܝ̈ܢܰܝ܇ ܘܺܐܙܰܠ ܐܶܡܫܽܘܚ܇ ܠܒܽܘܟ̣ܪܶܗ ܕܥܶܠܳܝܳܐ. ܘܰܬܟ̣ܺܝܠܳܢ ܥܰܠ ܐܰܠܳܗܳܐ܇ ܕܗܳܢ ܡܶܫܚܳܐ ܕܫܳܩܠܳܢ ܡܶܢܳܟ ܒܶܗ ܡܶܫܬܰܒܩܺܝܢ܇ ܚܰܘ̈ܒܰܝ ܘܰܚܛܳܗܰܝ̈. ܟܰܕ ܫܶܩܠܰܬ̣ ܡܶܫܚܳܐ ܘܶܐܙܠ̱ܰܬ̣܇ ܚܙܳܐ ܡܳܪܰܢ ܗܰܝܡܳܢܽܘܬ̣ܳܗ̇ ܗ̄ ܘܰܫܒܰܩ ܠܳܗ̇ ܚܰܘܒܶܝ̈ܗ̇܀

ܠܳܐ ܡܳܪܝ ܐܶܡܽܘܬ ܒܰܚ̈ܛܳܗܰܝ܇ ܕܡ̣ܶܢ ܗܳܪܟܳܐ ܡܩܰܪܶܒ ܐ̱ܢܳܐ ܠܳܟ. ܕܶܡ̈ܥܶܐ ܕܥܰܝ̈ܢܰܝ܇ ܫܽܘܚܕܳܐ ܕܪܳܚܶܡ ܐܰܢ̱ܬ. ܠܳܐ ܬܰܘܪ̈ܶܐ ܡܩܰܪܶܒ ܐ̱ܢܳܐ ܠܳܟ: ܘܠܳܐ ܐܶܡܪ̈ܶܐ ܐܳܦܠܳܐ ܓܕܰܝ̈ܳܐ. ܘܠܳܐ ܫܽܘܦܢܺܝ̈ܢܶܐ: ܐܳܦܠܳܐ ܒܢܰܝ̈ ܝܰܘ̈ܢܶܐ܇ ܬܰܪܬܶܝܢ ܛܽܘ̈ܦܺܝܢ ܡ̣ܶܢ ܥܰܝ̈ܢܰܝ. ܐܰܝܟ ܕܚܰܛܳܝܬܳܐ ܕܒܶܝܬ ܫܶܡܥܽܘܢ. ܩܰܒܶܠ ‌ܐܶܢܶܝܢ: ܘܶܐܬܪܰܚܰܡܥܠܰܝ. ܒܚܽܘܒܶܗ ܕܰܐܒܳܐ ܝܳܠܽܘܕܳܟ܇ ܘܒܰܨܠܽܘܬܳܗ̇ ܕܗܳܝ ܕܺܝܠܶܕܬܳܟ ܗ̄ ܚܰܣܳܐ ܠܺܝ ܚܰܘ̈ܒܰܝ܀

ܐܚܪܺܢܳܐ ܒܩܳܠܳܐ: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ

ܒܡܰــ̈ـܬܠܶܐ ܡܰܠܶܠ ܦܳܪܽܘܩܰܢ. ܘܰܒܦ̈ܶܠܳܐܬܳܐ ܘܽܐܘ̈ܚܕܳܬܳܐ. ܘܶܐܡ̣ܰܪ ܕܕܳܡܝܳܐ ܡܰܠܟܽܘܬܳܐ. ܕܰܫܡܰܝܳܐ ܠܰܒܬܽܘ̈ܠܳܬܳܐ. ܗܳܠܶܝܢ ܕܰܢܣܰܒ̈ܝ ܠܰܡܦܺܐܕ̈ܶܐ ܘܰܢܦܰܩ̈ܝ ܠܽܐܘܪܥܶܗ: ܕܚܰܬܢܳܐ ܘܰܕܟܰܠܬܳܐ. ܘܢܳܡ̈ܝ ܟܽܠܗܶܝܢ ܘܰܕܡܶܟ̈ܝ ܐܰܟܚܕܳܐ: ܘܰܗܘܳܬ ܩܥܳܬܳܐ ܣܰܓܺܝܐܬܳܐ. ܕܗܳܐ ܚܰܬܢܳܐ ܐܳܬܶܐ: ܘܚܰܟܺܝ̈ܡܳܬܳܐ ܥܰܠ̈ܝ ܥܰܡܶܗ. ܘܣܰܟ̈ܠܳܬܳܐ ܦܳܫܝ̈ ܥܰܠ ܬܰܪܥܳܐ. ܒܒܶܟܝܳܐ ܪܰܒܳܐ ܘܬܶܢܚ̈ܳܬܳܐ: ܕܠܳܐ ܡܶܬܡܰܠ̈ܠܳܢ܀

ܒܬܰܪܥܳܐ ܕܺܝܠܳܟ ܚܰܢܳܢܳܐ܇ ܢܳܩܶܫ ܩܳܠܐ ܕܒܳܥܽܘܬ̣ܰܢ. ܠܳܐ ܬܶܟܠܶܐ ܡܶܢ ܣܳܓ̣ܽܘܕܰܝ̈ܟ܇ ܫܶܐܠܳـ̈ܬ̣ܳܐ ܕܣܽܘܢܩܳܢܰܝ̈ܗܽܘܢ. ܒܕܶܡ̈ܥܶܐ ܩܪܳܬ̣ܳܟ ܚܰܛܳܝܬܳܐ܇ ܘܫܽܘܒܩܳܢ ܚܰܘ̈ܒܶܐ ܡܶܢܳܟ ܢܣܶܒܰܬ ܗܘܳܬ̣. ܒܕܶܡ̈ܥܶܐ ܕܟܳܗ̈ܢܶܐ ܕܡܰܪܥܺܝܬ̣ܳܟ܇ ܚܽܘܣ ܥܰܠ ܥܺܕܬܳܟ ܗܳܝ ܕܰܩܢܰܝܬ. ܕܰܚ݉ܛܰܝܢ ܝܳܕܥܺܝܢܰܢ܇ ܟܰܠܫܳܥ ܣܳܓ̣̈ܝܳܢ ܒܺܝ̈ܫܳܬ̣ܳܐ. ܒܰܪ ܛܳܒܳܐ ܚܽܘܣ ܒܰܚܢܳܢܳܟ܇ ܘܰܕܟܳܢ ܒܪ̈ܰܚܡܰܝܟ ܡܶܢ ܟܽܠ ܛܽܘܠ̈ܫܺܝܢ ܕܰܚܛܺܝܬ̣ܳܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ

ܩܳܪܶܝܢܰܢ ܠܳܟ ܡܳܪܝܳܐ ܡܳܪܰܢ ܬܳܐ ܠܥܽܘܕܪܳܢܰܢ܇ ܫܡܰܥ ܒܳܥܽܘܬ̣ܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬ̣ܰܢ܀

ܡܳܪܝܳܐ ܡܳܪܰܢ ܡܳܪܳܐ ܕܥܺܝܪ̈ܶܐ ܘܰܕܡܰܠܰܐܟ̣̈ܶܐ܇ ܫܡܰܥ ܒܳܥܽܘܬ̣ܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬ̣ܰܢ܀

ܐܰܒܳܐ ܘܰܒܪܳܐ ܘܪܽܘܚܳܐ ܕܩܽܘܕܫܳܐ ܐܰܢܗܰܪ ܬܰܪܥܺܝܬ̣ܝ܇ ܒܬܰܪܥܳܟ ܢܶܩܫܶܬ̣ ܒܗܰܝܡܳܢܽܘܬ̣ܳܐ ܥܢܺܝܢܝ ܒܰܚܢܳܢܳܟ܀

ܓـܠܺܝ ܠܺܝ ܥܰܝ̈ܢܰܝ ܕܶܐܚܙܶܐ ܚܢܳܢܳܟ ܘܰܐܘܕܶܐ ܠܰܫܡܳܟ܇ ܕܶܐܚܕܶܬ̣ ܓܰܘܣܳܐ ܒܒܰܣܺܝܡܽܘܬ̣ܳܟ ܪܰܚܶܡܥܠܰܝ܀

ܗܰܒܠܺܝ ܡܳܪܰܢ ܕܰܒܥܺܝܬ̣ ܡܶܢܳܟ ܠܶܒܳܐ ܕܰܟ̣ܝܳܐ܇ ܘܰܐܫܪܳܐ ܒܡܰܕܰܥܝ ܚܶܟܡܰܬ̣ ܚܰܝ̈ܶܐ ܡܶܢ ܡܰܠܝܽܘܬ̣ܳܟ܀

ܙܰܝܢܳܐ ܕܪܽܘܚܳܐ ܢܶܗܘܶܐ ܒܥܽܘܕܪܳܢܝ ܠܽܘܩܒܰܠ ܒܺܝܫܳܐ܇ ܚܬܽܘܡܰܝܢܝ ܒܰܫܡܳܟ ܘܰܦܪܽܘܩ ܚܰܝܰـܝ̈ ܡܶܢ ܐܰܒܕܳܢܳܐ܀

ܫܽܘܚܠܳܦܳܐ

ܛܶܒܳܟ ܪܶܚܡܶܬ̣ ܘܶܐܬܺܝܬ̣ ܒܳܬ̣ܪܳܟ ܠܳܐ ܬܰܒܗܶܬܰܝܢܝ܇ ܝܰܡܺܝܢܳܟ ܡܳܪܝ ܬܰܓܶܢ ܥܠܰܝ ܐܰܝܟ ܕܰܡܥܳܕ ܐܰܢ̱ܬ܀

ܟܽܠܶܗ ܨܶܒܝܳܢܝ ܗܳܢܰܘ ܒܰܠܚܽܘܕ ܕܶܐܗܘܶܐ ܕܺܝܠܳܟ܇ ܠܳܟ ܣܳܓ̣ܶܕ ܐ̱ܢܳܐ ܡܳܪܳܐ ܛܳܒܳܐ ܘܰܡܪܰܚܡܳܢܳܐ܀

ܡܶܢܳܟ ܢܶܣܒܶܬ ܚܢܳܢܳܐ ܘܪ̈ܰܚܡܶܐ ܕܰܒܥܺܝܬ̣ ܡܶܢܳܟ܇ ܢܶܛܥܰܢ ܪܶܥܝܳܢܝ ܐܰܝܟ ܬܰܓܳܪ̈ܶܐ ܡܶܢ ܣܺܝ̈ܡܳܬ̣ܳܟ܀

ܣܶܦܪ̈ܶܐ ܕܩܽܘܫܬܳܐ ܗܰܒܠܺܝ ܕܶܐܩܪܶܐ ܘܰܒܗܽܘܢ ܐܺܠܰܦ܇ ܥܰܒܕܳܟ ܐ̱ܢܳܐ ܡܳܪܝ ܘܰܒܪܳܗ̇ ܕܰܐܡܬ̣ܳܟ܇ ܐܰܚܳܢܝ ܒܰܫܡܳܟ܀

ܫܽܘܚܠܳܦܳܐ

ܦܰܓ̣ܪܳܟ ܐܶܟ̣ܠܶܬ̣ ܘܰܕܡܳܟ ܐܶܫܬܺܝܬ̣ ܒܳܟ ܡܳܪܝ ܐܺܚܶܐ܇ ܨܠܺܝܒܳܟ ܢܶܗܘܶܐ ܫܽܘܪܳܐ ܠܰܩܢܽܘܡܝ ܡܶܢ ܢܶܟ̣̈ܝܳܢܶܐ܀

ܩܪܺܝܬ̣ ܒܰܨܠܽܘܬ̣ܳܐ ܝܰܡܺܝܢܳܟ ܡܳܪܝ ܬܰܓܶܢ ܥܠܰܝ܇ ܪܳܥܝܳܐ ܛܳܒܳܐ ܥܒܶܕܰܝܢܝ̱ ܐܶܡܪܳܐ ܒܓ̣ܰܘ ܡܰܪܥܺܝܬ̣ܳܟ܀

ܫܽܘܒܚܳܐ ܠܰܫܡܳܟ ܡܳܪܳܐ ܛܳܒܳܐ ܘܰܡܪܰܚܡܳܢܳܐ܇ ܬܶܥܽܘܠ ܒܳܥܽܘܬܝ ܐܰܝܟ ܩܽܘܪܒܳܢܳܐ ܩܕܳܡ ܪܰܒܽܘܬ̣ܳܟ܀

ܫܽܘܚܠܳܦܳܐ

ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨܠܰܘ̈ܳܬ̣ܳܐ. ܫܡܰܥ ܒܳܥܽܘܬ̣ܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬ̣ܰܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ

ܡܳܪܰܢ ܐܶܬ̣ܪܰܚܰܡܥܠܰܝܢ܇ ܡܳܪܰܢ ܩܰܒܶܠ ܬܶܫܡܶܫܬܰܢ܀

ܫܰܕܰܪ ܠܰܢ ܡܶܢ ܒܶܝܬ̣ ܓܰܙܳܟ܇ ܚܢܳܢܳܐ ܪ̈ܰܚܡܶܐ ܘܫܽܘܒܩܳܢܳܐ܀

ܗܰܒܠܺܝ ܡܳܪܝ ܟܰܕ ܫܳܗܰܪ ܐ̱ܢܳܐ܇ ܥܺܝܪܳܐܺܝܬ̣ ܐܶܩܽܘܡ ܩܽܘܕܡܰܝܟ. ܘܶܐܢܗܽܘ ܬܽܘܒ ܕܕܳܡܶܟ ܐ̱ܢܳܐ ܠܺܝ܇ ܕܠܳܐ ܚܛܺܝܬ̣ܳܐ ܬܶܗܘܶܐ ܫܶܢܰܬ̣ܝ܀

ܘܰܒܥܺܝܪܽܘܬ̣ܝ̱ ܐܶܢ ܡܰܥܘܶܠ ܐ̱ܢܳܐ܇ ܒܛܰܝܒܽܘܬ̣ܳܟ ܡܳܪܝ ܐܶܬ̣ܚܰܣܶܐ. ܘܰܒܕܰܡܟ̣ܽܘܬ̣ܝ̱ ܐܶܢ ܚܳܛܶܐ ܐ̱ܢܳܐ܇ ܚܢܳܢܳܟ ܢܶܗܘܶܐ ܫܳܒܽܘܩܳܐ܀

ܘܰܒܝܰܕ ܙܩܺܝܦܶܗ ܕܡܽܘܟܳܟ̣ܳܟ܇ ܫܶܢܬ̣ܳܐ ܕܰܢܝܳܚܳܐ ܗܰܒܠܺܝ. ܘܦܰܨܳܢܝ ܡܶܢ ܚܶܠ̈ܡܶܐ ܒܺܝ̈ܫܶܐ܇ ܘܡܶܢ ܕܶܡܘ̈ܳܬ̣ܳܐ ܫܟܺܝܪ̈ܳܬ̣ܳܐ܀

ܘܰܒܫܶܢܬ̣ܳܐ ܕܡܰܠܝܳܐ ܫܰܝܢܳܐ܇ ܟܽܠܶܗ ܠܺܠܝܳܐ ܕܰܒܰܪܰܝܢܝ̱. ܕܠܳܐ ܢܶܫܬܰܠܛܽܘܢ ܒܺܝ ܒܺܝ̈ܫܶܐ܇ ܘܚܽܘ̈ܫܳܒܶܐ ܕܰܡܠܶܝܢ ܥܰܘܠܳܐ܀

ܫܽܘܚܠܳܦܳܐ

ܡܰܠܰܐܟ̣ܳܐ ܕܢܽܘܗܪܳܐ ܗܰܒܠܺܝ܇ ܕܢܶܛܰܪ ܠܟܽܠܗܽܘܢ ܗܰܕܳܡܰܝ̈. ܘܡܶܢ ܪܶܓ̣ܬ̣ܳܐ ܣܢܺܝܬ̣ܳܐ ܦܰܨܳܢܝ̱܇ ܒܝܰܕ ܦܰܓ̣ܪܳܟ ܚܰܝܳܐ ܕܶܐܟ̣ܠܶܬ̣܀

ܐܶܫܟܰܒ ܘܶܐܕܡܰܟ ܒܰܢܝܳܚܳܐ܇ ܢܳܛܽܘܪܳܐ ܕܡܳܟ ܢܶܗܘܶܐ ܠܺܝ. ܘܰܠܢܰܦܫܳܐ ܕܺܐܝܬ̣ܶܝܗ̇ ܨܰܠܡܳܟ܇ ܚܪ̈ܽܘܪܶܐ ܠܰܓ̣ܒܺܝܠܬܳܟ ܫܰܟܶܢ܀

ܘܰܠܦܰܓ̣ܪܳܐ ܕܰܓ̣ܒܰܠ̈ܝ̱ ܐܺܝܕܰܝ̈ܟ܇ ܬܰܓܶܢ ܥܠܰܘܗ̱ܝ ܝܰܡܺܝܢܳܟ. ܘܰܐܚܕܰܪ ܠܶܗ ܫܽܘܪܳܐ ܕܪ̈ܰܚܡܰܝܟ܇ ܐܰܝܟ ܣܰܟܪܳܐ ܡܩܰܒܠܳܢܺܝܬ̣ܳܐ܀

ܡܳܐ ܕܰܫܠܺܝ ܦܰܓ̣ܪܳܐ ܘܰܕܡܶܟ܇ ܚܰܝܠܳܟ ܢܶܗܘܶܐ ܡܢܰܛܪܳܢܶܗ. ܘܰܐܝܟ ܥܶܛܪܳܐ ܕܒܶܣ̈ܡܶܐ ܬܶܗܘܶܐ܇ ܫܶܢܰܬ̣ܝ̱ ܩܽܘܕܡܰܬ̣ ܪܰܒܽܘܬ̣ܳܟ܀

ܠܳܐ ܢܶܩܪܽܘܒ ܒܺܝܫܳܐ ܠܬܶܫܘܺܝܬ̣ܝ܇ ܒܰܦܝܳܣܳܐ ܕܗܳܝ ܕܺܝܠܶܕܬܳܟ. ܘܰܒܝܰܕ ܕܶܒܚܳܟ ܕܰܚܠܳܦܰܝ܇ ܟܠܺܝ ܠܣܳܛܳܢܳܐ ܕܠܳܐ ܢܰܟܶܝܢܝ̱܀

ܫܰܡܠܳܐ ܠܳܘܬܝ ܡܳܪܝ ܫܽܘܘܕܳܝܳܟ܇ ܘܢܰܛܰܪ ܚܰܝܰـܝ̈ ܒܰܨܠܺܝܒܳܟ. ܕܡܳܐ ܕܶܐܬ̣ܬܥܺܝܪܶܬ̣ ܐܰܘܕܶܐ ܠܳܟ܇ ܕܚܽܘܒܳܟ ܚܰܘܺܝܬ̣ ܨܶܝܕ ܫܰܦܠܽܘܬ̣ܝ܀

ܫܽܘܚܠܳܦܳܐ

ܫܰܟܶܢ ܠܺܝ ܡܳܪܝ ܒܰܚܢܳܢܳܟ܇ ܕܶܐܫܡܰܥ ܘܶܐܥܒܶܕ ܨܶܒܝܳܢܳܟ. ܪܰܡܫܳܐ ܡܳܪܝ ܕܰܡܠܶܐ ܫܰܝܢܳܐ܇ ܐܳܦ ܠܺܠܝܳܐ ܕܙܰܕܺܝܩܽܘܬ̣ܳܐ܀

ܗܰܒܠܰܢ ܡܫܺܝܚܳܐ ܦܳܪܽܘܩܰܢ܇ ܕܰܐܢ̱ܬ ܗܽܘ ܢܽܘܗܪܳܐ ܫܰܪܺܝܪܳܐ. ܘܰܒܢܽܘܗܪܳܐ ܫܪܶܐ ܐܺܝܩܳܪܳܟ܇ ܘܰܒܢܰܝ̈ ܢܽܘܗܪܳܐ ܠܳܟ ܣܳܓ̣ܕܺܝܢ܀

ܫܪܶܐ ܒܢܽܘܗܪܳܐ ܘܥܳܡܰܪ ܒܢܽܘܗܪܳܐ܇ ܝܶܫܽܘܥ ܦܳܪܽܘܩܶܗ ܕܥܳܠܡܳܐ. ܠܳܟ ܫܽܘ̣ܒܚܳܐ ܘܰܥܠܰܝܢ ܪ̈ܰܚܡܰܝܟ܇ ܒܗܳܢ ܥܳܠܡܳܐ ܘܰܒܗܰܘ ܕܰܥܬܺܝܕ܀

ܒܗܰܘܢܳܐ ܕܰܟܝܳܐ ܘܦܳܪܽܘܫܳܐ܇ ܢܰܣܶܩ ܫܽܘܒܚܳܐ ܘܬܰܘܕܺܝܬܳܐ. ܠܰܐܒܳܐ ܘܠܰܒܪܳܐ ܘܪܽܘܚܩܽܘܕܫܳܐ܇ ܚܰܕ ܐܰܠܳܗܳܐ ܫܰܪܺܝܪܳܐ܀

ܫܽܘܚܠܳܦܳܐ

ܫܽܘ̣ܒܚܳܐ ܠܳܟ ܡܳܪܝ ܫܽܘܒܚܳܐ ܠܳܟ܇ ܐܳܠܶܦ ܐܰܠܦܺܝ̈ܢ ܫܽܘܒܚܳܐ ܠܳܟ. ܘܪܶܒܽܘ ܪ̈ܶܒܳܘܢ ܫܽܘܒܚܳܐ ܠܳܟ܇ ܠܳܟ ܫܽܘܒܚܳܐ ܘܰܥܠܰܝܢ ܪ̈ܰܚܡܰܝܟ܀

ܫܽܘ̣ܒܚܳܐ ܠܳܟ ܡܳܪܝ ܫܽܘܒܚܳܐ ܠܳܟ܇ ܐܳܠܶܦ ܐܰܠܦܺܝ̈ܢ ܫܽܘܒܚܳܐ ܠܳܟ. ܒܪܺܝܟ ܐܺܝܩܳܪܳܟ ܡܶܢ ܐܰܬܪܳܟ܇ ܬܰܘܕܺܝ ܠܳܟ ܡܶܢ ܡܰܪܥܺܝܬܳܟ܀

ܫܽܘ̣ܒܚܳܐ ܠܳܟ ܡܶܢ ܥܰܦܪ̈ܳܢܶܐ܇ ܒܡܶܢܝܳܢ ܛܰܪ̈ܦܶܐ ܕܺܐܝ̈ܠܳܢܶܐ. ܡܳܪܳܐ ܕܥܺܝܪ̈ܶܐ ܡܫܰܡܫܺܝܢ ܠܶܗ܇ ܘܡܰܠܰܐܟ̣̈ܶܐ ܡܙܰܝܚܺܝܢ ܫܽܘܒܚܶܗ܀

ܫܽܘ̣ܒܚܳܐ ܠܶܗ ܠܰܡܩܰܒܠܳܢܳܐ܇ ܕܰܨܠܰܘ̈ܳܬ̣ܳܐ ܕܰܡܚܺܝ̈ܠܶܐ. ܘܰܐܝܟ ܪ̈ܺܝܫܝܳܬ̣ܳܐ ܘܩܽܘܪ̈ܒܳܢܶܐ܇ ܡܩܰܒܶܠ ܕܶܡ̈ܥܶܐ ܕܬܰܝ̈ܳܒܶܐ܀

ܫܽܘܚܠܳܦܳܐ

ܨܽܘܡ ܨܰܘܡܳܐ ܕܰܐܪܒܥܺܝܢ ܝܰܘܡܺܝ̈ܢ܇ ܘܗܰܒ ܠܰܚܡܳܟ ܠܰܐܝܢܳܐ ܕܟܰܦܺܝܢ. ܘܨܰܠܳܐ ܒܝܰܘܡܳܐ ܫܒܰܥ ܙܰܒܢܺܝ̈ܢ܇ ܐܰܝܟ ܕܺܝܠܶܦܬ ܡܶܢ ܒܰܪ ܐܺܝܫܰܝ܀

ܨܳܡ ܡܽܘܫܶܐ ܐܰܪܒܥܺܝܢ ܝܰܘܡܺܝ̈ܢ܇ ܘܶܐܠܺܝܳܐ ܐܰܪܒܥܺܝܢ ܝܰܘܡܺܝ̈ܢ. ܨܳܡ ܡܳܪܰܢ ܐܰܪܒܥܺܝܢ ܝܰܘܡܺܝ̈ܢ܇ ܘܰܙܟ̣ܳܐ ܠܒܺܝܫܳܐ ܒܥܶܠܕܰܪܳܐ܀

ܡܽܘܫܶܐ ܒܨܰܘܡܳܐ ܐܶܙܕܰܗܺܝ܇ ܘܶܐܠܺܝܳܐ ܒܶܗ ܐܶܬ̣ܥܰܠܺܝ̣. ܘܡܳܪܰܢ ܒܨܰܘܡܳܐ ܐܶܬ̣ܢܰܣܺܝ̣܇ ܘܰܙܟ̣ܳܐ ܠܒܺܝ̣ܫܳܐ ܒܥܶܠܕܰܪܳܐ܀

ܠܳܐ ܬܶܩܢܶܐ ܕܰܗܒܳܐ ܘܣܺܐܡܳܐ܇ ܣܰܡܳܐ ܕܡܰܘܬܳܐ ܒܗܽܘܢ ܣܺܝ̣ܡ ܗ̱ܽܘ. ܩܢܺܝ̣ ܠܳܟ ܝܽܘ̣ܠܦܳܢܳܐ ܚܠܺܝ̣ܡܳܐ: ܕܬܶܗܘܶܐ ܥܰܠ ܡܳܪܝܳܐ ܪܚܺܝ̣ܡܳܐ܀

ܗܳܢܰܘ ܬܰܪܥܳܐ ܡܠܶܐ ܪ̈ܰܚܡܶܐ܇ ܘܰܠܓܰܘ ܡܶܢܶܗ ܐܺܝ̣ܬ ܪ̈ܰܚܡܶܐ. ܥܽܘ̣ܠ ܚܰܛܳܝܳܐ ܒܥܺܝ̣ ܪ̈ܰܚܡܶܐ܇ ܡܶܢ ܡܳܪܳܐ ܕܰܡܠܶܐ ܪ̈ܰܚܡܶܐ܀

ܫܽܘ̣ܒܚܳܐ ܠܶܗ ܠܚܰܕ ܕܰܬܠܳܬ̣ܰܐ ܗܘ܇ ܘܰܬܠܳܬ̣ܳܐ ܚܰܕ ܐܺܝܬ̣ܰܝܗܽܘܢ. ܐܰܒܳܐ ܘܰܒܪܳܐ ܘܪܽܘܚܩܽܘܕܫܳܐ܇ ܚܰܕ ܐܰܠܳܗܳܐ ܫܰܪܺܝܪܳܐ܀

ܫܳܡܽܘܥܳܐ ܕܰܨܠܰܘ̈ܳܬ̣ܳܐ܇ ܘܰܡܦܰܢܝܳܢܳܐ ܕܫ̈ܶܐܠܳܬ̣ܳܐ܀

ܫܡܰܥ ܨܠܽܘܬ̣ܰܢ ܘܶܐܬ̣ܪܰܥܳܐ ܠܰܢ܇ ܘܦܰܢܳܐ ܒܪ̈ܰܚܡܰܝܟ ܫ̈ܶܐܠܳܬ̣ܰܢ܀

ܡܙܡܘܪܐ ܕܣܘܬܪܐ ܥܡ ܥܢܝܢܐ

ܝܳܬ̣ܶܒ ܒܣܶܬܳܪܶܗ ܕܰܡܪܰܝܡܳܐ ܗ̄ ܘܰܒܛܶܠܳܠܶܗ ܕܰܐܠܳܗܳܐ ܡܶܫܬܰܒܰܚ܀

ܒܛܶܠܳܠܳܟ ܝܶܬ̣ܒܶܬ̣ ܐܺܝܠܳܢܳܐ ܕܚܰܝ̈ܶܐ܇ ܘܡܶܢ ܦܺܐܪ̈ܰܝܟ ܐܶܟ̣ܠܶܬ̣ ܚܰܝ̈ܶܐ ܕܰܠܥܳܠܰܡ܀

ܐܶܡܰܪ ܠܡܳܪܝܳܐ ܬܽܘܟ̣ܠܳܢܝ̱ ܗ̄ ܒܶܝܬ̣ ܓܰܘܣܝ̱ ܐܰܠܳܗܳܐ ܕܰܬܟ̣ܺܝܠ ܐ̱ܢܳܐ ܥܠܰܘܗܝ̱܀

ܒܶܝܬ̣ ܓܰܘܣܰܢ ܪܳܡܳܐ ܘܥܽܘܫܢܰܢ ܬܰܩܺܝܦܳܐ܇ ܐܰܢ̱ܬ ܗܽܘ ܐܰܠܳܗܰܢ ܣܰܒܪܰܢ ܘܬܽܘܟ̣ܠܳܢܰܢ܀

ܕܗ̣ܽܘ ܢܦܰܨܶܝܟ ܡ̣ܶܢ ܦܰܚܳܐ ܕܬܽܘܩܰܠܬ̣ܳܐ ܗ̄ ܘܡ̣ܶܢ ܡܰܡܠ̱ܠܳܐ ܕܰܣܪܺܝܩܽܘܬ̣ܳܐ܀

ܦܰܨܳܐ ܠܰܢ ܡܳܪܰܢ ܡܶܢ ܟܽܠܗܽܘܢ ܦܰܚܰܘ̈ܗܝ̱܇ ܕܒܺܝܫܳܐ ܢܳܟ̣ܽܘܠܰܢ ܕܰܨܗܶܐ ܠܰܬܒܳܪܰܢ܀

ܒܶܐܒܪ̈ܰܘܗܝ ܢܦܰܨܶܝܟ ܘܰܬܚܶܝܬ ܟܶܢܦܰܘ̈ܗܝ ܬܶܣܬܰܬܰܪ ܗ̄ ܙܰܝܢܳܐ ܢܰܚܕܪܳܟ ܩܽܘܫܬܶܗ܀

ܙܰܝܢܳܐ ܚܰܣܺܝܢܳܐ ܗܘܺܝ ܠܰܢ ܒܰܚܢܳܢܳܟ܇ ܘܡܶܢ ܒܺܝܫܳܐ ܦܰܨܳܢ ܕܰܐܘܕܶܐ ܠܛܰܝܒܽܘܬܳܟ܀

ܠܳܐ ܬܶܕܚܰܠ ܡ̣ܶܢ ܕܶܚܠܬ̣ܶܗ ܕܠܺܠܝܳܐ ܗ̄ ܘܡ̣ܶܢ ܓܶܐܪܳܐ ܕܦܳܪܰܚ ܒܺܐܝܡܳܡܳܐ܀

♱ ܗܰܒܠܰܢ ܕܠܳܐ ܢܶܕܚܰܠ܇ ܡܶܢ ܕܶܚܠܬ̣ܶܗ ܕܠܺܠܝܳܐ܇ ܐܳܦܠܳܐ ܡܶܢ ܓܶܐܪ̈ܰܘܗ̱ܝ܇ ܝܳܩ̈ܕܶܐ ܕܣܳܛܳܢܳܐ܀

ܘܡ̣ܶܢ ܡܶܠܬ̣ܳܐ ܕܰܡܗܰܠܟ̣ܳܐ ܒܚܶܫܽܘܟܳܐ ܗ̄ ܘܡܶܢ ܪܽܘܚܳܐ ܕܫܳܝܕܳܐ ܒܛܰܗܪܳܐ܀

♱ ܡܶܢ ܡܶܠܬ̣ܶܐ ܕܚܶܫܟܶܐ܇ ܕܒܺܝܫܳܐ ܢܰܛܰܪ ܠܰܢ܇ ܘܡܶܢ ܪܽܘܚܳܐ ܕܫܳܝܕܳܐ܇ ܒܛܰܗܪܳܐ ܫܰܘܙܶܒ ܠܰܢ܀

ܢܶܦܠܽܘܢ ܡܶܢ ܣܶܛܪܳܟ ܐܰܠܦ̈ܶܐ ܗ̄ ܘܪ̈ܶܒܘܳܬ̣ܳܐ ܡ̣ܶܢ ܝܰܡܺܝܢܳܟ܀

ܐܰܠܦ̈ܶܐ ܕܣܳܛܳܢܳܐ ܒܚܰܝܠܳܟ ܬܒܽܘܪ ܐܶܢܽܘܢ܇ ܘܪ̈ܶܒܘܳܬ̣ܳܐ ܕܺܝܠܶܗ ܒܰܨܠܺܝܒܳܟ ܐܰܥܪܶܩ܀

ܘܰܠܘܳܬ̣ܳܟ ܠܳܐ ܢܶܬ̣ܩܰܪܒܽܘܢ ܗ̄ ܐܶܠܳܐ ܒܥܰܝ̈ܢܰܝܟ ܒܰܠܚܽܘܕ ܬܶܚܙܶܐ܀

ܐܰܢܗܰܪ ܡܳܪܝ ܠܥܰܝ̈ܢܶܐ ܕܺܝܠܰܢ ܟܰܣ̈ܝܳܬ̣ܳܐ܇ ܘܠܳܐ ܬܶܬܶܠ ܐܰܬ̣ܪܳܐ ܠܣܳܢܳܐܐ ܕܢܶܩܪܽܘܒ ܠܰܢ܀

ܘܦܽܘܪܥܳܢܗܽܘܢ ܕܪ̈ܰܫܺܝܥܶܐ ܬܶܚܙܶܐ ܗ̄ ܡܶܛܽܠ ܕܐܰܢ̱ܬ ܗ̱ܽܘ ܡܳܪܝܳܐ ܬܽܘܟ̣ܠܳܢܝ܀

ܦܪܽܘܥ ܡܳܪܝܳܐ ܠܣܳܢܰܐܝ̈ܢ ܒܺܝܫܳܐ ܘܡܰܫܪܺܝܬ̣ܶܗ܇ ܢܽܘܪܳܐ ܘܬܰܫܢܺܝܩܳܐ ܦܰܨܳܐ ܠܰܢ ܡܶܢܗܽܘܢ܀

ܕܒܰܡܪ̈ܰܘܡܶܐ ܣܳܡ̣ܬ ܡܥܰܡܪܳܟ ܗ̄ ܠܳܐ ܬܶܩܪܽܘܒ ܠܳܟ ܒܺܝܫܬܳܐ܀

ܪܳܡܳܐ ܕܐܶܬܬܰܚܬܺܝ ܕܢܶܣܥܽܘܪ ܠܰܓ̣ܒܺܝܠܬܶܗ܇ ܠܳܐ ܬܶܫܒܽܘܩ ܠܒܺܝܫܳܐ ܕܢܶܬ̣ܩܰܪܰܒ ܠܥܰܒܕܰܝ̈ܟ܀

ܘܰܡܚܽܘܬ̣ܳܐ ܠܳܐ ܬܶܬ̣ܩܰܪܰܒ ܠܡܰܫܟܢܳܟ ܗ̄ ܡܶܛܽܠ ܕܰܠܡܰܠܰܐܟ̣ܰܘ̈ܗܝ ܢܦܰܩܶܕ ܥܠܰܝܟ܀

♱ ܡܰܠܰܐܟ̣ܰܝ̈ܟ ܡܳܪܝܳܐ܇ ܢܶܗܘܽܘܢ ܢܳܛܽܘܪ̈ܶܐ܇ ܠܡܰܫܪܺܝܬ̣ܳܐ ܕܥܰܒܕܰܝ̈ܟ܇ ܕܒܳܟ ܗܽܘ ܡܶܬ̣ܓܰܘܣܺܝܢ܀

ܕܰܢܢܰܛܪܽܘܢܳܟ ܒܟܽܠܗܶܝܢ ܐܽܘܪ̈ܚܳܬ̣ܳܟ ܗ̄ ܘܥܰܠ ܕܪ̈ܳܥܰܝܗܽܘܢ ܢܶܫܩܠܽܘܢܳܟ܀

♱ ܐܽܘܪ̈ܚܳܬ̣ܳܟ ܚܰܘܳܢܝ̱܇ ܡܳܪܝܳܐ ܡܪܰܚܡܳܢܳܐ܇ ܘܒܰܕܪܳܥܳܟ ܪܳܡܳܐ܇ ܬܒܽܘܪ ܚܰܝܠܶܗ ܕܒܺܝܫܳܐ܀

ܕܠܳܐ ܬܶܬܩܶܠ ܒܪܶܓ̣ـܠܳܟ ܗ̄ ܥܰܠ ܓܳܪܣܳܐ ܘܥܰܠ ܚܰܪܡܳܢܳܐ ܬܶܕܪܽܘܟ܀

ܡܶܢܳܟ ܫܳܐܠܺܝܢܰܢ ܡܫܺܝܚܳܐ ܡܠܶܐ ܪ̈ܰܚܡܶܐ܇ ܕܗܶܠ̈ܟ̣ܳܬ̣ܳܐ ܕܥܰܒܕܰܝ̈ܟ ܒܚܰܝܠܳܟ ܢܶܬܬܰܪ̈ܨܳܢ܀

ܘܰܬܕܽܘܫ ܐܰܪܝܳܐ ܘܬܰܢܺܝܢܳܐ ܗ̄ ܡܶܛܽܠ ܕܠܺܝ ܒܥ̣ܳܐ ܐܶܦܰܨܶܝܘܗܝ ܘܶܐܥܰܫܢܺܝܘܗܝ܀

ܥܰܫܶܢ ܠܣܳܓ̣ܽܘܕܰܝ̈ܟ ܒܚܰܝܠܶܗ ܕܰܨܠܺܝܒܳܟ܇ ܕܰܢܕܽܘܫ ܥܰܠ ܪܺܝܫܶܗ ܕܒܺܝܫܳܐ ܢܳܟ̣ܽܘܠܰܢ܀

ܡܶܛܽܠ ܕܺܝ̣ܕܰܥ ܫܶܡܝ̱ ܢܶܩܪܶܝܢܝ̱ ܘܶܐܥܢܶܝܘܗܝ ܗ̄ ܥܰܡܶܗ ܐܶܢܳܐ ܒܽܐܘܠܨܳܢܳܐ܀

ܠܰܫܡܳܟ ܣܳܓܕܺܝܢܰܢ ܡܫܺܝܚܳܐ ܡܠܐܷ ܪ̈ܰܚܡܶܐ܇ ܥܢܺܝ ܠܰܢ ܒܰܚܢܳܢܳܟ ܘܶܐܬ̣ܪܰܚܰܡ ܥܠܰܝܢ܀

ܐܶܥܰܫܢܺܝܘܗܝ ܘܶܐܝܰܩܪܺܝܘܗܝ ܗ̄ ܢܽܘܓ̣ܪܳܐ ܕܝܰܘ̈ܡܳܬ̣ܳܐ ܐܶܣܰܒܥܺܝܘܗܝ܀

ܠܳܐ ܡܳܪܝ ܬܶܬܶܠ ܠܶܗ ܐܰܬ̣ܪܳܐ ܠܡܳܪܽܘܕܳܐ܇ ܕܰܢܢܰܣܶܐ ܠܥܰܒܕܰܝ̈ܟ܇ ܒܨܶܢ̈ܥܳܬ̣ܳܐ ܕܺܝܠܶܗ܀

ܘܐܶܚܰܘܶܝܘܗܝ ܦܽܘܪܩܳܢܝ̱ ܗ̄ ܐܰܪܺܝܡ ܥܰܝ̈ܢܰܝ ܠܛܽܘܪܳܐ܀

♱ ܠܘܳܬ̣ܳܟ ܡܪܺܝܡܺܝܢܰܢ܇ ܥܰܝ̈ܢܶܐ ܕܬܰܪ̈ܥܝܳܬ̣ܰܢ܇ ܡܫܺܝܚܳܐ ܦܳܪܽܘܩܰܢ܇ ܥܢܺܝ ܠܰܢ ܒܰܚܢܳܢܳܟ܀

ܐܰܝܡܶܟܳܐ ܢܺܐܬ̣ܶܐ ܡܥܰܕܪܳܢܝ̱ ܗ̄ ܥܽܘܕܪܳܢܝ̱ ܡ̣ܶܢ ܩܕܳܡ ܡܳܪܝܳܐ܀

♱ ܥܳܕܽܘܪܳܐ ܢܗܶܐ ܠܰܢ܇ ܚܰܝܠܶܗ ܕܰܨܠܺܝܒܳܐ܇ ܘܢܶܣܚܽܘܦ ܡܶܢ ܥܰܒܕܰܝ̈ܟ܇ ܚܰܝܠܶܗ ܕܣܳܛܳܢܳܐ܀

ܗܰܘ ܕܰܥܒܰܕ ܫܡܰܝܳܐ ܘܰܐܪܥܳܐ ܗ̄ ܠܳܐ ܢܶܬܶܠ ܪܶܓ̣ـܠܳܟ ܠܙܰܘܥܬ̣ܳܐ܀

ܡܳܪܳܐ ܕܰܫܡܰܝܳܐ ܘܥܳܒܽܘܕܳܐ ܕܰܐܪܥܳܐ܇ ܠܳܐ ܬܶܬܶܠ ܙܰܘܥܬܳܐ ܠܪ̈ܶܓ̣ܠܶܐ ܕܣܳܓ̣ܽܘܕܰܝ̈ܟ܀

ܘܠܳܐ ܢܢܽܘܡ ܢܳܛܽܘܪܳܟ ܗ̄ ܠܳܐ ܓܶܝܪ ܢܳܐܷܡ ܘܠܳܐ ܕܳܡܶܟ܀

ܢܳܛܽܘܪܰܢ ܡܳܪܰܢ ܡܫܺܝܚܳܐ ܦܳܪܽܘܩܰܢ܇ ܒܳܟ ܡܶܬ̣ܓܰܘܣܺܝܢܰܢ ܥܢܺܝ ܠܰܢ ܒܰܚܢܳܢܳܟ܀

ܢܳܛܽܘܪܶܗ ܕܺܝܣܪܳܐܝܠ ܗ̄ ܡܳܪܝܰܐ ܗ̱̇ܘ ܢܳܛܽܘܪܳܟ܀

ܢܳܛܽܘܪܶܗ ܪܰܒܳܐ ܕܺܝܣܪܳܐܝܠ ܒܕܰܒܪܳܐ܇ ܢܰܛܰܪ ܠܣܳܓ̣ܽܘܕܰܝ̈ܟ ܕܰܦܪܰܩܬ ܒܰܨܠܺܝܒܳܟ܀

ܡܳܪܝܳܐ ܢܰܛܶܠ ܠܳܟ ܒܺܐܝܕܶܗ ܕܝܰܡܺܝܢܳܐ ܗ̄ ܒܺܐܝܡܳܡܳܐ ܫܶܡܫܳܐ ܠܳܐ ܢܰܟܶܝܟ܀

ܝܰܡܺܝܢܳܟ ܡܳܪܰܢ ܬܢܰܛܰܪܝ̱ ܠܣܳܓ̣ܽܘܕܰܝ̈ܟ܇ ܕܠܳܐ ܢܰܟܶܐ ܐܶܢܽܘܢ ܒܺܝܫܳܐ ܒܥܶܠܕܰܪܳܐ܀

ܐܳܦܠܳܐ ܣܰܗܪܳܐ ܒܠܺܠܝܳܐ ܗ̄ ܡܳܪܝܳܐ ܢܢܰܛܪܳܟ ܡ̣ܶܢ ܟܽܠܗܶܝܢ ܒܺܝ̈ܫܳܬ̣ܳܐ܀

♱ ܢܰܛܰܪ ܡܳܪܝ ܠܥܰܒܕܰܝ̈ܟ܇ ܡܶܢ ܟܽܠ ܒܺܝ̈ܫܳܬ̣ܳܐ܇ ܕܢܰܘܕܽܘܢ ܠܛܰܝܒܽܘܬ̣ܳܟ܇ ܒܠܺܠܝܳܐ ܘܒܺܐܝܡܳܡܳܐ܀

ܢܶܛܰܪ ܢܰܦܫܳܟ ܡܳܪܝܳܐ ܗ̄ ܢܶܛܰܪ ܡܰܦܩܳܟ ܘܡܰܥܠܳܟ܀

♱ ܢܰܛܰܪ ܢܰܦ̈ܫܳܬ̣ܰܢ܇ ܕܒܳܟ ܗ̱ܘ ܡܶܬ̣ܓܰܘ̈ܣܳܢ܇ ܡܫܺܝܚܳܐ ܦܳܪܽܘܩܰܢ܇ ܚܽܘܢ ܠܰܢ ܒܛܰܝܒܽܘܬܳܟ܀

ܡܶܟܺܝܠ ܘܰܥܕܰܡܳܐ ܠܥܳܠܰܡ ܗ̄ ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܠܳܟ ܝܳܐܶܐ ܫܽܘܒܚܳܐ܇ ܡܳܪܝܳܐ ܒܟܽܠܥܶܕܳܢ܇ ܡܶܢ ܟܽܠ ܒܶܪ̈ܝܳܬ̣ܳܐ܇ ܕܰܒܪܳܬ̣ ܝܰܡܺܝܢܳܟ܀

ܫܽܘ̣ܒܚܳܐ ܠܗܰܘ ܕܶܐܡܰܪ܇ ܕܰܩܪܰܘ ܘܥܳܢܶܐ ܐ̱ܢܳܐ܇ ܘܩܽܘܫܽܘܢ ܘܦܳܬܰܚ ܐ̱ܢܳܐ܇ ܘܫܰܐܠܽܘܢ ܝܳܗܶܒ ܐ̱ܢܳܐ܀

ܡܳܪܳܐ ܕܥܶܠܳܝ̈ܶܐ܇ ܘܣܰܒܪܳܐ ܕܬܰܚ̈ܬܳܝܶܐ܀

ܩܰܒܶܠ ܬܶܫܡܶܫܬܰܢ܇ ܘܶܐܬ̣ܪܰܚܰܡܶܥܠܰܝܢ܀

ܡܰܥܢܺܝܬܳܐ ܕܡܳܪܝ ܣܶܘܶܪܝܽܘܣ

ܝܳܬ݂ܶܒ ܒܣܶܬܳܪܶܗ ܕܰܡܪܰܝܡܳܐ܉ ܬܚܶܝܬ݂ ܛܶܠܳܠܐ ܕܟܶܢ̈ܦܶܝܗ̇ ܕܰܡܪܰܚܡܳܢܽܘ̣ܬ݂ܳܟ܀

ܣܰܬܰܪܰܝܢ ܡܳܪܝܳܐ܉ ܪܰܚܶܡܥܠܰܝܢ ܫܳܡܰܥ ܟܽܠܳܐ ܫܡܰܥ ܒܳܥܽܘ̣ܬ݂ܳܐ ܕܥܰܒ̈ܕܰܝܟ ܒܰܡܪܰܚܡܳܢܽܘ̣ܬ݂ܳܟ܀

ܪܰܡܫܳܐ ܡܳܪܝ̱ ܕܰܡܠܶܐ ܫܰܝܢܳܐ ܐܳܦ ܠܺـܠܝܳܐ ܕܙܰܕܺܝܩܽܘ̣ܬ݂ܳܐ ܗܰܒܠܰܢ ܡܫܺܝ̣ܚܳܐ ܦܳܪܽܘܩܰܢ܉ ܕܰܐܢ̱ܬ ܗ̱ܽܘ ܡܰܠܟܳܐ ܡܫܰܒܚܳܐ܀

ܘܰܠܘܳܬ݂ܳܟ ܬܰܠܝ̈ܳܢ ܥܰܝ̈ܢܰܝܢ ܚܰܣܳܐ ܚܰܘ̈ܒܰܝܢ ܘܰܚܛܳܗ̈ܰܝܢ܉ ܒܗܳܢ ܥܳܠܡܳܐ ܘܰܒܗܰܘ ܕܰܥܬܺܝܕ ܒܰܬܪ̈ܰܝܗܽܘܢ ܪܰܚܶܡܥܠܰܝܢ܀

ܡܳܪܝܳܐ ܢܣܰܬܪܽܘܢܳܢ ܪ̈ܰܚܡܰܝܟ ܛܰܝܒܽܘ̣ܬ݂ܳܟ ܬܶܩܽܘܡ ܒܰܐܦܰܝ̈ܢ ܘܰܨܠܺܝ̣ܒܳܟ ܢܢܰܛܰܪ ܠܰܢ ܡ̣ܶܢ ܒܺܝ̣ܫܳܐ ܘܚܰܝܠ̈ܰܘܳܬ݂ܶܗ܀

ܝܰܡܺܝ̣ܢܳܟ ܬܰܓܶܢ ܥܠܰܝܢ ܒܟܽܠܗܽܘܢ ܝܰܘ̈ܡܳܬ݂ܳܐ ܕܚ̈ܰܝ݂ܰܝ݂ܢ ܘܫܰܝܢܳܟ ܢܰܡܠܶܟ ܒܰܝܢܳܬ݂ܰܢ ܘܰܥܒܶܕ ܣܰܒܪܳܐ ܘܦܽܘ̣ܪܩܳܢܳܐ ܠܢܰܦܫ̈ܳܬ݂ܳܐ ܕܰܡܦܺܝ̣ܣ̈ܳܢ ܠܳܟ܀

ܒܰܨܠܽܘܬ݂ ܡܰܪܝܰܡ ܕܺܝ̣ܠܶܕܬ݂ܳܟ ܘܰܕܟܽܠܗܽܘܢ ܩܰܕܺܝ̣ܫܰܝ̈ܟ ܚܰܣܳܐ ܠܺܝ̣ ܚܰܘܒܰܝ̈ ܘܪܰܚܶܡܥܠܰܝ ܐܰܠܳܗܳܐ܀

ܒܪܺܝ̣ܟ ܗ̣ܽܘ ܐܺܝ̣ܩܳܪܶܗ ܕܡܳܪܝܳܐ ܡ̣ܶܢ ܐܰܬ݂ܪܶܗ ܠܥܳܠܰܡ܀

ܒܪܺܝ̣ܟ ܗܽܘ ܐܺܝ̣ܩܳܪܶܗ ܕܡܳܪܝܳܐ ܡ̣ܶܢ ܐܰܬ݂ܪܶܗ ܠܥܳܠܰܡ܀

ܡܒܰܪܰܟ ܗܽܘ ܐܺܝ̣ܩܳܪܶܗ ܕܡܳܪܝܳܐ ܡ̣ܶܢ ܐܰܬ݂ܪܶܗ ܠܥܳܠܡܺܝ̣ܢ܀

ܬܠܺܝ̣ܬ݂ܳܝܽܘ̣ܬ݂ܳܐ ܩܰܕܺܝ̣ܫܬܳܐ ܘܰܡܫܰܒ̣ܰܚܬܳܐ ܐܶܬ݂ܪܰܚܰܡܶܥܠܰܝܢ܀

ܬܠܺܝ̣ܬ݂ܳܝܽܘ̣ܬ݂ܳܐ ܩܰܕܺܝ̣ܫܬܳܐ ܘܰܡܫܰܒ̣ܰܚܬܳܐ ܐܶܬ݂ܪܰܚܰܡܶܥܠܰܝܢ܀

ܬܠܺܝ̣ܬ݂ܳܝܽܘ݂ܬ݂ܳܐ ܩܰܕܺܝ̣ܫܬܳܐ ܘܰܡܫܰܒ̣ܰܚܬܳܐ ܚܽܘ̣ܣܝ ܘܶܐܬ݂ܪܰܚܰܡܶܥܠܰܝܢ܀

ܩܰܕܺܝ̣ܫܰܬ ܘܰܡܫܰܒܰܚ ܐܰܢ̱ܬ ܠܥܳܠܰܡ܀

ܩܰܕܺܝ̣ܫܰܬ ܘܰܡܫܰܒܰܚ ܐܰܢ̱ܬ ܠܥܳܠܰܡ܀

ܩܰܕܺܝ̣ܫܰܬ ܘܰܡܒܰܪܰܟ ܫܡܳܟ ܠܥܳܠܡܺܝ̣ܢ܉ ܫܽܘ̣ܒܚܳܐ ܠܳܟ ܡܳܪܰܢ܉ ܫܽܘ̣ܒܚܳܐ ܠܳܟ ܡܳܪܰܢ܉ ܫܽܘ̣ܒܚܳܐ ܠܳܟ ܣܰܒܪܰܢ ܠܥܳܠܰܡ܉ ܒܰܪܶܟ݂ܡܳܪܝ܀

ܩܢܘܢܐ ܕܗܝܡܢܘܬܐ

ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙܝ̈ܳܢ ܘܰܕܠܳܐ ܡܶܬܚܰܙܝ̈ܳܢ. ܘܰܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܝܺܚܝܕܳܝܳܐ ܒܪܳܐ ܕܰܐܠܗܳܐ. ܗܰܘ ܕܡܶܢ ܐܰܒܳܐ ܐܶܬ̣ܝܺܠܶܕ ܩܕܳܡ ܟܽܠܗܽܘܢ ܥܳܠܡ̈ܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰܠܗܳܐ ܫܰܪܺܝܪܳܐ ܕܡܶܢ ܐܰܠܗܳܐ ܫܰܪܺܝܪܳܐ. ܝܺܠܺܝܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬ̣ܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ.

ܢܚܶܬ̣ ܡܶܢ ܫܡܰܝܳܐ ܘܐܶܬ̣ܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬ̣ܽܘܠܬܳܐ ܝܳܠܕܰܬ̣ ܐܳܠܗܳܐ ܘܰܗܘܳܐ ܒܰܪܢܳܫܳܐ. ܘܐܶܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܘܳܣ ܦܺܝܠܰܛܳܘܣ. ܚܰܫ ܘܡܺܝܬ̣ ܘܐܶܬ̣ܩܒܰܪ ܘܩܳܡ ܠܰܬܠܳܬ̣ܳܐ ܝܰܘܡܺܝ̈ܢ ܐܰܝܟ ܕܰܨܒܳܐ.

ܘܰܣܠܶܩ ܠܰܫܡܰܝܳܐ ܘܝܺܬ̣ܶܒ ܡܶܢ ܝܰܡܺܝܢܳܐ ܕܐܰܒܽܘܗ̱ܝ. ܘܬܽܘܒ ܐܳܬ̣ܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬ̣ܶܐ. ܗܰܘ ܕܰܠܡܰܠܟܽܘܬ̣ܶܗ ܫܽܘܠܳܡܳܐ ܠܳܐ ܐܺܝܬ̣. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܐܺܝܬ̣ܰܘܗܝ̱ ܡܳܪܝܳܐ ܡܰܚܝܳܢܳܐ ܕܟܽܠ.

ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓ̣ܶܕ ܘܡܶܫܬܰܒܰܚ. ܗܰܘ ܕܡܰܠܶـܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝ̣ܚܳܝ̣ܬܳܐ. ܘܡܰܘܕܶܢܰܢ ܕܰܚܕܳܐ ܗܺܝ ܡܰܥܡܽܘܕܺܝܬ̣ܳܐ ܠܫܽܘܒܩܳܢܳܐ ܕܰܚܛܳܗ̈ܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬ̣ܶܐ ܘܰܠܚܰܝ̈ܶܐ ܚܰܕ̈ܬ̣ܶܐ ܕܰܒܥܳܠܡܳܐ ܕܰܥܬܺܝܕ. ܐܰܡܺܝܢ ܒܰܪܶܟ̣ܡܳܪܝ܀

ܫܠܶܡ ܛܟܣܐ ܕܨܘܡܐ ܕܐܪ̈ܒܥܝܢ܀