ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܝܺܚܝ̣ܕܳܝܳܐ ܡܶܠܬܳܐ ܡܬܘ̣ܡܳܝܳܐ: ܠܗܰܘ̇ ܩܰܕܝ̣ܫܳܐ ܘܰܡܩܰܕܫܳܢܳܐ ܘܠܳܐ ܡܶܣܬܰܝܟܳܢܳܐ: ܠܗܰܘ̇ ܛܳܒܳܐ ܕܶܐܬ̣ܬܰܚܬܝ̣ ܠܣܘ̣ܪܳܩܳܐ ܨܶܒܝܳܢܳܝܳܐ: ܠܗܰܘ̇ ܕܚܝ̣ܠܳܐ ܕܡ̣ܶܢ ܚܰܝ̈ܠܰܘܳܬܳܐ ܫܡܰܝܳܢ̈ܶܐ ܡܶܫܬܰܒܰܚ ܒܕܶܚܠܬܳܐ: ܘܡ̣ܶܢ ܛܠܳܝ̈ܶܐ ܘܫܰܒܪ̈ܶܐ ܡܶܬܩܰܠܰܣ ܒܪܶܚܡܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܩܰܘܡܳܐ ܩܰܕܡܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ܀

ܣܶܕܪܳܐ

ܐܰܠܳܗܳܐ ܡܗܰܕܪܳܐ ܘܰܡܥܰܠܰܝ ܒܬܶܫܒܘ̣ܚܬܳܐ ܡܪܰܚܡܳܢܳܐ ܕܰܡܥܰܛܰܦ ܛܳܒܘ̣ܬܳܐ: ܗܰܘ̇ ܕܰܡܫܰܒܰܚ ܒܦܰܐܝܘ̣ܬܳܐ ܣܓܝ̣ܕܳܐ ܕܡܶܬܪܰܡܪܰܡ ܒܕܶܚܠܬܳܐ ܪܳܡܳܐ ܕܠܳܐ ܫܘ̣ܪܳܝ ܕܰܡܟܰܬܰܪ ܒܰܡܬܘ̣ܡܳܝܘ̣ܬܳܐ: ܕܚܝ̣ܠܳܐ ܘܰܡܫܰܒܚܳܐ ܘܥܳܒܶܕ ܬܶܕܡܪ̈ܳܬܳܐ ܬܰܩܝ̣ܦܳܐ ܒܥܘ̣ܫܢܳܐ: ܘܓܰܢ̱ܒܳܪܳܐ ܒܚܰܝܠܬܳܢܘ̣ܬܳܐ: ܡܰܠܟܳܐ ܕܡܶܬܓܰܝܶܐ ܐܰܠܳܗܳܐܝ̣ܬ ܒܬܶܫܒܘ̣ܚܬܳܐ ܠܳܐ ܡܶܬܦܰܚܡܳܢܳܐ ܒܺܐܝܬܘ̣ܬܳܐ ܘܠܳܐ ܡܶܣܬܰܝܟܳܢܳܐ ܒܪܰܒܘ̣ܬܳܐ: ܘܠܳܐ ܡܶܬܕܰܪܟܳܢܳܐ ܠܝ̣ܕܰܥܬܳܐ ܡܰܠܰܐܟܳܝܬܳܐ: ܘܠܳܐ ܡܶܬܒܰܨܝܳܢܳܐ ܠܚܶܟܡܬܳܐ ܐ̱ܢܳܫܳܝܬܳܐ: ܐܰܢ̱ܬ ܗ̱ܘ̣ ܗܰܘ̇ ܕܒܰܫܦܝ̣ܥܘ̣ܬܳܐ ܕܰܚܢܳܢܳܟ ܐܶܬ̣ܰܝܬ ܠܰܒܪܝ̣ܬܳܐ ܘܰܒܡܰܚܬܬܳܟ ܕܠܰܐܪܥܳܐ ܦܪܰܩ̣ܬܳܗ̇ ܡ̣ܶܢ ܛܳܥܝܘ̣ܬܳܐ: ܟܰܕ ܠܛܘ̣ܦ̈ܣܶܐ ܘܛܶܠܳܢ̈ܝܳܬܳܐ ܕܰܪܫܰܡ̣ܘ̱ ܠܳܟ ܩܰܕ̈ܡܳܝܶܐ ܒ̈ܦܶܠܳܐܬܳܐ ܡܰܠܝ̣ܬ ܒܰܩܢܘ̣ܡܳܟ ܘܫܰܡ̣ܠܝ̣ܬ ܠܛܶܟ̈ܣܶܐ ܕܥܰܬܝ̣ܩܬܳܐ ܘܫ̣ܰܪܝ̣ܬ ܒܰܚܕܰܬܳܐ: ܘܰܐܩܝ̣ܡܬ ܠܰܐܝܠܶܝܢ ܕܰܪܡܶܝܢ ܗ̱ܘܰܘ ܒܡܰܦܘ̣ܠܬܳܐ ܕܰܚܛܝ̣ܬܳܐ: ܐܰܢ̱ܬ ܗ̱ܘ̣ ܗܰܘ̇ ܕܡ̣ܶܢ ܡܒܰܕ̈ܩܳܢܶܐ ܡܶܬܡܰܠܰܠ ܗ̱ܘܰܝܬ ܡ̣ܶܢ ܪܝ̣ܫܝ̣ܬܳܐ: ܘܡ̣ܶܢ ܚܰܙܳܝ̈ܶܐ ܡܶܬܒܰܕܰܩ ܗ̱ܘܰܝܬ ܒܐܘ̣ܡܳܢܘ̣ܬܳܐ: ܟܰܕ ܚܰܕ ܡܶܢܗܽܘܢ ܠܰܟܢܘ̣ܫܬܳܐ ܕܗܳܐ ܡܰܠܟܶܟܝ̱ ܐܳܬܶܐ ܠܶܟܝ̱ ܦܘ̣ܩܝ̱ ܠܐܘ̣ܪܥܶܗ ܐܳܡܰܪ ܗ̱ܘܳܐ ܠܳܗ̇ ܒܰܢܒܺܝܽܘ̣ܬܳܐ: ܘܰܐ̱ܚܪܺܢܳܐ ܐܶܬ̣ܬܥܝ̣ܪܝ̱ ܐܶܬ̣ܬܥܝ̣ܪܝ̱ ܐܘ̣ܪܫܠܶܡ ܡܰܙܥܶܩ ܗ̱ܘܳܐ ܠܳܗ̇ ܒܰܩܥܳܬܳܐ: ܚܰܕ ܕܗܳܐ ܦܳܪܘ̣ܩܶܟܝ̱ ܙܳܚ̣ ܕܢ̣ܶܥܘ̣ܠ ܠܶܟܝ̱ ܡܫܰܒܰܚܬܳܐ ܐܳܡܰܪ ܗ̱ܘܳܐ ܠܳܗ̇ ܒܰܪܗܝ̣ܒܘ̣ܬܳܐ: ܘܰܐ̱ܚܪܺܢܳܐ ܕܬܰܩܶܢܝ̱ ܠܶܟܝ̱ ܩ̈ܳܠܶܐ ܫܦܰܝ̈ܳܐ ܕܰܡܗܰܕܪܝ̣ܢ ܒܬܶܫܒܘ̣ܚܬܳܐ ܦܳܩܶܕ ܗ̱ܘܳܐ ܠܳܗ̇ ܒܰܚܦܝ̣ܛܘ̣ܬܳܐ: ܚܰܕ ܕܩܘ̣ܡܝ̱ ܐܰܢܗܰܪܝ̱ ܕܰܡ̣ܛܳܐ ܠܶܗ ܢܘ̣ܗܪܶܟܝ̱ ܝܳܬܒܰܬ݀ ܒܚܶܫܘ̣ܟܳܐ ܡܝܰܒܶܒ ܗ̱ܘܳܐ ܠܳܗ̇ ܒܰܦܨܝ̣ܚܘ̣ܬܳܐ: ܘܰܐ̱ܚܪܺܢܳܐ ܕܺܐܝܩܳܪܶܗ ܕܡܳܪܝܳܐ ܥܠܰܝܟܝ̱ ܢ̣ܶܕܢܰܚ ܐܰܒܝ̣ܠܬܳܐ ܡܣܰܒܰܪ ܗ̱ܘܳܐ: ܚܰܕ ܕܠܳܟ ܢ̣ܣܰܟܽܘܢ ܥܰܡ̱̈ܡܶܐ ܘܠܳܟ ܣܳܓ̈ܕܳܢ ܐܶܡ̈ܘܳܬܳܐ ܡܒܰܕܶܩ ܗ̱ܘܳܐ ܒܟܳܪܘ̣ܙܘ̣ܬܳܐ: ܚܰܕ ܕܡܰܠܟܘ̣ܬܳܟ ܡܰܠܟܘ̣ܬ ܟܽܠ ܥܳܠܡ̈ܝ̣ܢ ܘܠܳܟ ܡܣܰܘ̈ܚܳܢ ܓܳܙܪ̈ܳܬܳܐ: ܘܰܐ̱ܚܪܺܢܳܐ ܟܰܕ ܬܰܗܝ̣ܪ ܕܡܳܪܝܳܐ ܡܳܪܰܢ ܡܳܐ ܡܫܰܒܰܚ ܫܡܳܟ ܒܟܽܠܳܗ̇ ܐܰܪܥܳܐ ܘܡ̣ܶܢ ܦܘ̣ܡܳܐ ܕܰܥܠܰܝ̈ܡܶܐ ܘܕܰܛܠܳܝ̈ܶܐ ܬܰܩܶܢ̣ܬ ܠܳܟ ܬܶܫܒܘ̣ܚܬܳܐ ܡܙܰܡܰܪ ܗ̱ܘܳܐ: ܕܥܰܡܗܽܘܢ ܐܳܦ ܚܢܰܢ ܝܰܘܡܳܢܳܐ ܒܩ̈ܳܠܶܐ ܕܬܰܘܕܝ̣ܬܳܐ ܠܳܟ ܡܳܪܝܳܐ ܡܰܙܥܩܝ̣ܢܰܢ ܟܰܕ ܐܳܡܪܝ̣ܢܰܢ ܒܚܰܕܘ̣ܬܳܐ: ܫܘ̣ܒܚܳܐ ܠܳܟ ܕܰܫܦ̣ܰܪ ܠܳܟ ܘܝ̣ܬܶܒ̣ܬ ܥܰܠ ܚܰܝܘ̣ܬܳܐ ܠܳܐ ܡܠܝ̣ܠܬܳܐ ܒܡܰܟܝ̣ܟܘ̣ܬܳܐ ܟܰܕ ܠܥܶܠ ܒܰܬܪܽܘܢܘ̣ܣ ܡܶܬܓܰܝܶܐ ܐܰܢ̱ܬ ܒܬܶܫܒܘ̣ܚܬܳܐ: ܫܘ̣ܒܚܳܐ ܠܳܟ ܕܳܐܦ ܬܰܠܡܝ̣̈ܕܶܐ ܦܳܪܣܝ̣ܢ ܗ̱ܘܰܘ ܠܳܟ ܡܳܐܢܰܝ̈ܗܽܘܢ ܒܰܚܦܝ̣ܛܘ̣ܬܳܐ: ܟܰܕ ܐܰܢ̱ܬ ܡܬܰܚ̣ܬ ܫܡܰܝܳܐ ܐܰܝܟ ܝܳܪܝ̣ܥܬܳܐ ܘܰܐܠܒܶܫ̣ܬ ܐܶܢܽܘܢ ܦܰܐܝܘ̣ܬܳܐ: ܫܘ̣ܒܚܳܐ ܠܳܟ ܕܰܒܚܘ̣ܒܳܟ ܐܰܫܶܦ̣ܬ ܘܶܐܬܩܰܠܰܣ̣ܬ ܡ̣ܶܢ ܩܰܘܡܬܳܐ ܠܳܐ ܡܫܰܡܠܰܝܬܳܐ ܒܫܰܦܝ̣ܪܘ̣ܬ ܡܠܰܚܡܘ̣ܬܳܐ: ܟܰܕ ܡ̣ܶܢ ܣܪ̈ܳܦܶܐ ܕܢܘ̣ܪܳܐ ܘܰܕܪܘ̣ܚܳܐ ܡܶܬܩܰܠܰܣ ܐܰܢ̱ܬ ܒܕܶܚܠܬܳܐ: ܫܘ̣ܒܚܳܐ ܠܳܟ ܒܰܡܪ̈ܰܘܡܶܐ ܥܶܠܳܝ̈ܶܐ ܡܰܠܟܳܐ ܕܬܶܫܒܘ̣ܚܬܳܐ: ܐܘ̣ܫܰܥܢܳܐ ܒܥܘ̣ܡ̈ܩܶܐ ܬܰܚ̈ܬܳܝܶܐ ܠܳܟ ܡܳܪܳܗ̇ ܕܬܶܫܒܘ̣ܚܬܳܐ ܕܰܕܢܰܚ̣ܬ ܒܡܰܟܝ̣ܟܘ̣ܬܳܐ: ܒܪܝ̣ܟ ܐܝ̣ܩܳܪܳܟ ܡ̣ܶܢ ܐܰܬܪܳܟ ܕܶܐܬ̣ܰܝܬ ܘܫܰܡܠܝ̣ܬ ܐ̱ܪ̈ܳܙܶܐ ܕܰܢܒܺܝܽܘ̣ܬܳܐ ܒܪܝ̣ܟ ܫܡܳܟ ܡܳܪܳܐ ܕܡܰܠܟܘ̣ܬܳܐ: ܒܪܝ̣ܟܳܐ ܗ̱ܝ ܡܶܐܬܝ̣ܬܳܟ ܕܰܠܘܳܬܰܢ ܕܰܗ̣ܘܳܬ݀ ܒܰܡܪܰܚܡܳܢܘ̣ܬܳܐ: ܘܰܒܪܝ̣ܟܝ̣ܢ ܪ̈ܰܚܡܶܐ ܕܫܰܠ̣ܚܘ̣ܟ ܠܘܳܬܰܢ ܕܬ̣ܶܦܪܘ̣ܩ ܠܰܢ ܡ̣ܶܢ ܛܳܥܝܘ̣ܬܳܐ: ܘܠܰܢ ܡܳܪܝܳܐ ܒ̈ܩܳܠܶܐ ܚܰܕ̈ܬܶܐ ܕܥܰܕܥ̣ܶܕܢܰܢ ܝܰܘܡܳܢܳܐ ܒܚܰܕܘ̣ܬܳܐ ܫܰܕܰܪ ܠܰܢ ܡܰܘܗ̈ܒܳܬܳܟ ܐܰܠܳܗ̈ܳܝܳܬܳܐ: ܘܰܟܠܝ̣ ܡܶܢܰܢ ܠܙܰܒ̈ܢܶܐ ܥܰܣ̈ܩܶܐ ܕܒܝ̣̈ܫܳܬܳܐ: ܘܰܙܓܘ̣ܪ ܡܶܢܰܢ ܚܣܳܡܳܐ ܘܚܶܪܝܳܢܳܐ ܘܰܐܟܬܳܐ ܘܰܒܥܶܠܕܒܳܒܘ̣ܬܳܐ: ܘܣܰܬܶܬ ܒܰܢ ܚܘ̣ܒܳܐ ܕܰܟܝܳܐ ܘܫܰܦܝܘ̣ܬܳܐ: ܕܰܢ̇ܗܰܕܪܳܟ ܒ̈ܩܳܠܶܐ ܫܒܝ̣̈ܚܶܐ ܕܬܰܘܕܝ̣ܬܳܐ ܒܕܰܟܝܘ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀