ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܡܪܰܚܡܳܢܳܐ ܘܪܳܚܶܡ ܐ̱ܢܳܫ̈ܳܐ: ܕܰܢ̇ܩܘ̣ܡ ܩܕܳܡܰܝܟ ܠܳܐ ܡܶܨܛܰܠܝܳܢܳܐܝ̣ܬ: ܒܝܰܘ̈ܡܳܬܳܐ ܗܳܠܶܝܢ ܡܝܰܩܪ̈ܶܐ ܘܩܰܕܝ̣̈ܫܶܐ ܕܨܰܘܡܳܐ: ܘܗܰܒܠܰܢ ܚܰܝܠܳܐ ܘܥܘ̣ܕܪܳܢܳܐ ܕܰܒܗܽܘܢ ܢ̇ܶܬܟܰܬܰܫ ܠܘ̣ܩܒܰܠ ܐܳܟܶܠܩܰܪܨܳܐ ܒܥܶܠܕܰܪܰܢ ܗܰܘ̇ ܕܰܙܟܰܝܬܳܝܗ̱ܝ ܒܨܰܘܡܳܟ ܩܰܕܝ̣ܫܳܐ: ܘܠܳܐ ܬܘ̣ܒ ܢ̇ܶܙܕܟܶܐ ܚܢܰܢ ܡ̣ܶܢ ܦܰܚ̈ܰܘܗ̱ܝ ܘܰܡܨܝ̣̈ܕܳܬܶܗ ܡܰܘܒ̈ܕܳܢܝܳܬܳܐ ܘܠܳܟ ܐܰܠܳܗܳܐ ܢ̇ܫܰܒܰܚ ܥܰܠ ܐܰܦ̈ܰܝ ܨܰܘܡܳܟ ܕܰܚܠܳܦܰܝܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ ܠܗܰܘ̇ ܚܰܢܳܢܳܐ ܘܣܰܓܝ̣ ܪ̈ܰܚܡܶܐ ܠܗܰܘ̇ ܕܡܰܐܣܶܐ ܠܰܬܒܝ̣ܪ̈ܰܝ ܠܶܒܳܐ ܘܥܳܨܶܒ ܟܺܐܒ̈ܰܝܗܽܘܢ: ܘܰܡܚܰܣܶܐ ܠܚܰܛܳܝ̈ܶܐ ܘܫܳܒܶܩ ܚܰܘܒܰܝ̈ܗܽܘܢ ܠܗܰܘ̇ ܕܚܳܕܶܐ ܒܬܰܝܳܒ̈ܶܐ ܘܩܳܪܶܐ ܠܗܽܘܢ ܠܰܬܝܳܒܘ̣ܬܳܐ ܕܢ̣ܶܫܟܚܽܘܢ ܚܢܳܢܳܐ ܘܛܰܝܒܘ̣ܬܳܐ ܕܰܩܕܳܡܰܘܗ̱ܝ: ܕܠܶܗ ܡܦܝ̣ܣܝ̣ܢܰܢ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰ‌ܠܳܗܳܐ ܐܰܒܳܐ ܡܪܰܚܡܳܢܳܐ ܢܓܺܝ̣ܪ ܪܽܘ̣ܚܳܐ ܘܰܡܪܰܚܦܳܢܳܐ ܡܶܫܟܚܳܢܳܐ ܕܰܐܒܝ̣̈ܕܶܐ ܥܳܨܘ̣ܒܳܐ ܕܰܬܒܝ̣ܪ̈ܰܝ ܠܶܒܳܐ: ܕܰܝܳܢܳܐ ܬܪܝ̣ܨܳܐ ܘܰܡܪܰܚܡܳܢܳܐ ܟܺܐܢܳܐ ܘܡܶܛܽܠ ܕܠܳܐ ܣܳܦܩܳܐ ܬܝܳܒܘ̣ܬܳܐ ܒܨܝ̣ܪܬܳܐ ܕܝ̣ܠܰܢ ܡܚܺܝ̣̈ܠܶܐ ܘܚܰܛܳܝ̈ܶܐ ܕܰܠܘܳܬ ܚܢܳܢܳܐ ܘܪ̈ܰܚܡܶܐ ܬ̣ܰܪܟܢܳܟ ܠܘܳܬܰܢ: ܡܩܰܪܒܝ̣ܢܰܢ ܠܳܟ ܐܝ̣ܙ̈ܓܰܕܶܐ ܚܰܒܝ̣̈ܒܶܐ ܘܫܳܘ̈ܝܰـܝ ܠܡܶܬܩܰܒܳܠܘ̣ ܕܰܡܦܝ̣ܣܝ̣ܢܰܢ ܠܳܟ ܚܠܳܦܰܝܢ ܠܝܳܠܕܰܬ ܐܰ‌ܠܳܗܳܐ ܘܰܒܬܘ̣ܠܰܬ݀ ܒܟܽܠܙܒܰܢ ܛܘ̣ܒܳܢܝ̣ܬܳܐ ܡܰܪܝܰܡ ܘܰܠܓܘ̣ܕܐ ܕܰܢܒܺܝ̈ܶܐ ܘܕܰܫܠܝ̣̈ܚܶܐ ܘܰܕܣܳܗ̈ܕܶܐ ܘܰܕܡܰܘ̈ܕܝܳܢܶܐ ܕܟܺܐܢ̈ܶܐ ܘܥܳܢ̈ܘܳܝܶܐ ܘܰܠܟܽܠܗܽܘܢ ܐܰܝܠܶܝܢ ܕܡ̣ܶܢ ܥܳܠܰܡ ܫܦ̣ܰܪܘ̱ ܠܳܟ: ܟܶܢܫܳܐ ܕܚܰܝ̈ܠܰܘܳܬܳܐ ܫܡܰܝܳܢ̈ܶܐ ܘܪ̈ܘ̣ܚܳܬܳܐ ܕܠܳܐ ܓܫܘ̣ܡ: ܠܗܽܘܢ ܠܚܰܫ̈ܶܐ ܨܶܒ̈ܝܳܢܳܝܶܐ ܘܦܳܪ̈ܘ̣ܩܳܝܶܐ ܡܰܥ̈ܒܕܰܝ ܚܰܝ̈ܶܐ ܕܝ̣ܚܝ̣ܕܳܝܳܐ ܒܪܳܟ: ܗܳܠܶܝܢ ܕܚܠܳܦܰܝܢ ܟܰܕ ܐܬܒ̣ܰܪܢܫ ܩܰܒ̣ܶܠ ܒܰܒܣܰܪ ܘܰܒܫܰܦܽܝܪܘ̣ܬ ܨܶܒܝܳܢܳܐ ܕܝ̣ܠܳܟ: ܠܰܒ̈ܢܳܬ ܩ̈ܳܠܶܐ ܕܝ̣ܠܳܟ ܩܰܕܝ̣̈ܫܳܬܳܐ ܘܪܶܚܡܰܬ݀ ܐ̱ܢܳܫܳܐ: ܗܳܠܶܝܢ ܕܰܠܚܰܛܳܝ̈ܶܐ ܕܰܐܟܘܳܬܰ ܢ ܡ̣ܶܢ ܦܣܳܩܣܰܒܪܳܐ ܡܫܰܘ̈ܙܒܳܢ: ܣܰܒܪܳܐ ܛܳܒܳܐ ܡܰܠ̈ܝܳܢ: ܐܰܢ̱ܬ ܗ̱ܘ̣ ܓܶܝܪ ܗܰܘ̇ ܕܶܐܡ̣ܰܪܬ ܕܠܳܐ ܨܳܒܶܐ ܐ̱ܢܳܐ ܒܡܰܘܬܶܗ ܕܚܰܛܳܝܳܐ ܐܰܝܟ ܕܰܢ̣ܬܘ̣ܒ ܡ̣ܶܢ ܐܘ̣ܪܚܶܗ ܒܝ̣ܫܬܳܐ ܘܢ̣ܺܚܶܐ: ܐܰܢ̱ܬ ܗ̱ܘ̣ ܗܰܘ̇ ܕܶܐܡ̣ܰܪܬ ܕܶܐܢܗܘ̣ ܕܡܶܬܦܢܶܐ ܐܰܢ̱ܬ ܘܡܶܬܬܰܢܰܚ ܐܰܢ̱ܬ ܬ̣ܶܫܬܰܘܙܰܒ: ܘܟܰܕ ܥܕܰܟܝ̣ܠ ܡܡܰܠܶܠ ܐܰܢ̱ܬ ܐܳܡܰܪ ܕܗܳܐ ܩܰܪܝ̣ܒ ܐ̱ܢܳܐ: ܐܰܢ̱ܬ ܗ̱ܘ̣ ܗܰܘ̇ ܕܶܐܡ̣ܰܪܬ: ܕܶܐ̱ܡܰܪ ܐܰܢ̱ܬ ܚܛܳܗ̈ܰܝܟ ܠܘܽܩܒܰܠ ܐܰܝܟܰܢܳܐ ܕܬ̣ܶܙܕܰܕܰܩ: ܐܰܢ̱ܬ ܗ̱ܘ̣ ܗܰܘ̇ ܕܶܐܡ̣ܰܪܬ ܕܪ̈ܰܚܡܶܐ ܨܳܒܶܐ ܐ̱ܢܳܐ ܘܠܳܐ ܕܶܒܚܬܳܐ: ܘܡܶܫܬܰܘܕܥܳܢܘ̣ܬܳܐ ܕܰܐ‌ܠܳܗܳܐ ܘܠܳܐ ܝܰܩ̈ܕܶܐ ܫܰܠ̈ܡܶܐ: ܐܰܢ̱ܬ ܗ̱ܘ̣ ܗܰܘ̇ ܕܰܠܫܶܡܥܽܘܢ ܒܳܬܰܪ ܟܦܘ̣ܪܝܳܐ ܬܘ̣ܒ ܒܝܰܕ ܬܝܳܒܘ̣ܬܳܐ ܦܶܛܪܘ̣ܣ ܘܰܐܚܝ̣ܕ ܩܠܝ̣̈ܕܶܐ ܕܰܫܡܰܝܳܐ ܥܒ̣ܰܕܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܫܳܐܘܳܠ ܪܳܕܘ̣ܦܳܐ ܘܰܡܓܰܕܦܳܢܳܐ ܦܰܘܠܠܳܘܣ ܘܡܳܐܢܳܐ ܕܰܓܒܝ̣ܬܳܐ ܘܰܫܠܝ̣ܚܳܐ ܕܥܰܡ̱̈ܡܶܐ ܥܒ̣ܰܕܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܡܳܟܣܳܐ ܠܳܐ ܢܳܡܘ̣ܣܳܝܳܐ ܐܶܘܰܢܓܶܠܝ̣ܣܛܳܐ ܢܳܡܘ̣ܣܳܝܳܐ ܚܰܘܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܙܳܢܝ̣ܬܳܐ ܡܣܰܝܰܒܬܳܐ ܟܢܝ̣ܟܬܳܐ ܘܝܰܬܝ̣ܪ ܡ̣ܶܢ ܒܬܘ̣ܠܬܳܐ ܫܰܡܠܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܠܶܣܛܳܝܳܐ ܘܩܳܛܶܠ ܐ̱ܢܳܫܳܐ ܡܰܘܕܝܳܢܳܐ ܘܒܰܪ ܡܕܝ̣ܢ̱ܬܳܐ ܕܦܰܪܕܰܝܣܳܐ ܥܒ̣ܰܕܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܚܰܛܳܝ̈ܶܐ ܙܰܕܶܩ̣ܬ ܘܰܠܛܳܥܰܝ̈ܳܐ ܐܰܗ̣ܦܶܟܬ ܘܠܰܐܒܝ̣̈ܕܶܐ ܐܶܫܟܰܚ̣ܬ ܘܰܠܥܰܡ̱̈ܡܶܐ ܩܰܕܶܫ̣ܬ ܠܥܳܠܡܳܐ ܦܪܰܩ̣ܬ: ܘܠܰܐܝܠܶܝܢ ܕܪܰܚܝ̣ܩܝ̣ܢ ܚ̣ܰܝܶܕܬ ܠܰܐܪ̈ܥܳܢܶܐ ܥܰܡ ܫܡܰܝܳܢ̈ܶܐ ܐܰ‌ܠ̣ܘܶܬܬ: ܠܗܳܠܶܝܢ ܗܳܟܝ̣ܠ ܒܢ̈ܳܬ ܩ̈ܳܠܶܐ ܘܣܳܥܘ̣ܪ̈ܘܳܬܳܐ ܛܳܒ̈ܳܬܳܐ ܘܪܶܚܡܰܬ݀ ܐ̱ܢܳܫܳܐ ܕܝ̣ܠܳܟ ܘܟܰܕ ܒܰܕܡܘ̣ܬ ܡܰܫ̈ܟܢܶܐ ܡܰܚ̈ܝܳܢܶܐ ܘܦܳܪ̈ܘ̣ܩܳܝܶܐ ܙܗܝ̣ܪܳܐܝ̣ܬ ܐܰܚܝ̣ܕܝ̣ܢܰܢ: ܘܥܘ̣ܕܪ̈ܳܢܶܐ ܗܳܠܶܝܢ ܕܝ̣ܠܳܟ ܠܳܟ ܡܥ̱ܰܗܕܝ̣ܢܰܢ ܠܗܰܘ̇ ܕܡܶܡܬܘ̣ܡ ܗܳܠܶܝܢ ܡܶܢܳܟ ܬܳܒܥܝ̣ܢܰܢ ܡܦܝ̣ܣܝ̣ܢܰܢ ܠܳܟ ܡܳܪܝܳܐ ܐܰܢܝ̣ܚ ܐܰܪܦܳܐ ܫܒܘ̣ܩ ܐܰ‌ܠܳܗܳܐ ܠܫܳܪ̈ܥܳܬܳܐ ܕܝ̣ܠܰܢ: ܚܘ̣ܣܳܝܳܐ ܗܘܝ̣ ܐܳܦ ܠܰܢ ܚܰܛܳܝ̈ܶܐ ܦܪܘ̣ܩ ܘܫܰܘܙܶܒ ܕܰܟܳܐ ܘܩܰܕܶܫ ܠܡܰܣܟ̈ܠܳܢܶܐ ܘܡ̣ܶܢ ܟܽܠ ܛܘ̣ܠܫܳܐ ܕܦܰܓܪܳܐ ܘܰܕܪܘ̣ܚܳܐ ܚܰܪܰܪ: ܘܰܐܠܶܦ ܠܰܢ ܕܰܒܝܰܕ ܕܶܚܠܬܳܐ ܕܝ̣ܠܳܟ ܩܰܕܝ̣ܫܘ̣ܬܳܐ ܢ̇ܫܰܡܠܶܐ: ܘܒܰܡܢܳܬܳܐ ܕܰܐܝܠܶܝܢ ܕܡܶܬܦܰܪܩܝ̣ܢ ܛܰܟܶܣ ܠܰܢ: ܬܶܫܒ̈ܚܳܬܳܐ ܕܰܟ̈ܝܳܬܳܐ ܢ̇ܙܰܡܰܪ ܠܳܟ: ܘܒܰܟ̈ܠܝ̣ܠܶܐ ܕܙܰܕܝ̣ܩܘ̣ܬܳܐ ܢ̇ܶܬܟܰܠܰܠ ܘܒܺܐܝܩܳܪ̈ܶܐ ܠܳܐ ܡܳܝ̈ܘ̣ܬܶܐ ܒܛܳܒ̈ܳܬܳܐ ܠܳܐ ܡܶܬܚܰܒ̈ܠܳܢܝܳܬܳܐ ܐܰܫܘܳܐ ܠܰܢ ܕܢ̇ܶܬܒܰܣܰܡ ܒܛܰܝܒܘ̣ܬܳܟ ܘܰܒܪ̈ܰܚܡܳܐ ܘܰܒܪܶܚܡܰܬ݀ ܐ̱ܢܳܫܘܽܬܳܐ ܕܝ̣ܚܝ̣ܕܳܝܳܐ ܒܪܳܐ ܕܝ̣ܠܳܟ ܕܥܰܡܶܗ ܠܳܟ ܦ̇ܐܶܐ̣ ܫܘ̣ܒܚܳܐ ܘܺܐܝܩܳܪܳܐ ܘܐܘ̣ܚܕܳܢܳܐ ܥܰܡ ܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ ܗܳܫܳܐ ܒܟܽܠܙܒܰܢ ܠܥܳܠܡܝܺܢ܀

ܚܽܘ̣ܬܳܡܳܐ

ܝܳܗܘ̣ܒܳܐ ܕܚܰܝ̈ܶܐ ܠܳܐ ܡܳܝܘ̣ܬܳܐ ܘܡܰܥ̈ܒܕܰܝ ܡ̣ܶܢ ܚܰܫ̈ܶܐ ܗܘ̣ܠ̈ܳܢܳܝܶܐ: ܡܳܪܳܐ ܕܟܽܠ: ܦܪܘ̣ܩ ܠܟܽܠܰܢ ܡ̣ܶܢ ܫܘ̣ܥܒܳܕܳܐ ܒܝ̣ܫܳܐ ܕܰܚܛܝ̣ܬܳܐ: ܘܰܒܢܝ̣ܪܳܐ ܕܦܘ̣̈ܩܕܳܢܶܐ ܕܝ̣ܠܳܟ ܩܰܕܝ̣̈ܫܶܐ ܘܰܣܓܝ̣̈ܕܶܐ: ܐܰܪܟܶܢ ܘܰܟܕܽܘܢ ܠܨܰܘܪ̈ܶܐ ܕܝ̣ܠܰܢ: ܐܰܝܟܰܢܳܐ ܕܰܢ̇ܡܰܢܰܥ ܠܒܘ̣ܣܳܡܳܐ ܛܘ̣ܒܬܳܢܳܐ: ܗܰܘ̇ ܕܰܡܛܰܝܰܒ ܠܩܰܕܝ̣̈ܫܶܐ ܕܝ̣ܠܳܟ: ܐܰܢ̱ܬ ܓܶܝܪ ܐܝ̣ܬܰܝܟ ܗܰܘ̇ ܕܚܳܕܶܐ ܐܰܢ̱ܬ ܒܦܘ̣ܪܩܳܢܳܐ ܕܝ̣ܠܰܢ ܘܠܳܟ ܦ̇ܐܶܐ̣ ܫܘ̣ܒܚܳܐ ܘܢ̣ܶܣܰܩ ܠܳܟ ܡܳܪܝ̱ ܫܘ̣ܒܚܳܐ ܘܬܰܘܕܝ̣ܬܳܐ ܠܥܳܠܰܡ ܥܳܠܡܝ̣ܢ܀