ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܡܰܠܟܳܐ ܕܡܰܠ̈ܟܶܐ: ܘܡܳܪܶܐ ܡܳܪ̈ܰܘܳܬܳܐ: ܠܗܰܘ̇ ܪܝ̣ܚܳܐ ܗܰܢܺܝܳܐܐ ܕܦܰܐܝܘ̣ܬܳܐ ܡܬܘ̣ܡܳܝ̇ܬܳܐ ܘܰܐܠܳܗܳܝܬܳܐ: ܗܰܘ̇ ܕܐܝ̣ܬܰܘܗ̱ܝ ܡܕܰܟܝܳܢܳܐ ܕܨܳܐܝܽܘ̣ܬܳܐ ܐ̱ܢܳܫܳܝܬܳܐ: ܠܗܰܘ̇ ܡܗܰܕܝܳܢܳܐ ܕܨܶܝܕ ܛܳܒ̈ܳܬܳܐ: ܘܰܡܩܰܪܒܳܢܳܐ ܕܰܠܘܳܬ ܛܘ̣ܒܬܳܢܘ̣ܬܳܐ: ܠܗܰܘ̇ ܡܟܝ̣ܠܳܢܳܐ ܘܝܳܗܘ̣ܒܳܐ ܕܫܰܦܝ̣ܪ̈ܳܬܳܐ: ܠܗܰܘ̇ ܕܰܡܥܰܠܰܝ ܐܳܦ ܡ̣ܶܢ ܬܶܐܘܳܪܺܝܰܐ ܕܟܘ̣ܢܳܝ̈ܶܐ ܕܰܒܪ̈ܰܝܳܐ ܘܰܥܒܝ̣̈ܕܶܐ: ܘܰܠܡܶܨܛܰܒܝܳܢܘ̣ܬܳܐ ܕܗܘ̣ܠܳܢܳܝ̈ܶܐ: ܕܰܠܘܳܬ ܒܶܣ̈ܡܶܐ ܥܰܩܪ̈ܳܝܶܐ ܕܡܶܢܰܢ ܡܶܬܩܰܪܒܝ̣ܢ ܒܚܘ̣ܒܳܐ ܡܶܬܪܟܶܢ ܠܰܡܩܰܒܳܠܘ̣ ܡ̣ܶܢ ܐܝ̣̈ܕܰܝܳܐ ܕܝ̣ܠܰܢ ܚܰܛܳܝ̈ܶܐ: ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܗܰܘ̇ ܒܪܳܐ ܘܚܶܟܡܬܳܐ ܕܰܐܠܳܗܳܐ ܐܰܒܳܐ: ܗܰܘ̇ ܥܳܒܘ̣ܕܳܐ ܕܟܽܠܳܗܿ ܒܪܝ̣ܬܳܐ: ܐܰܚܝ̣ܕ ܟܽܠ ܗܰܘ̇ ܕܥܰܡ ܐܰܒܳܐ ܐܝ̣ܬ ܠܳܟ ܡܰܘܬܒܳܐ ܕܰܐܠܳܗܘ̣ܬܳܐ: ܘܡ̣ܶܢ ܦܳܠܚܘ̣ܬܳܐ ܡܰܠܰܐܟܳܝܬܳܐ ܡܶܣܬܓܶܕ ܐܰܢ̱ܬ ܘܡܶܫܬܰܒܰܚ: ܘܡܶܛܽܠ ܦܘ̣ܪܩܳܢܳܐ ܘܚܘ̣ܣܳܝܳܐ ܕܝ̣ܠܰܢ ܠܡܘ̣ܟܳܟܳܐ ܘܣܘ̣ܪܳܩܳܐ ܨܶܒܝܳܢܳܝܳܐ ܒܪ̈ܰܚܡܶܐ ܕܝ̣ܠܳܟ ܣܰܓܺܝ̈ܶܐܐ ܐܶܬܪܟܶܢ̣ܬ ܘܚܰܫܳܐ ܕܰܒܝܰܕ ܨܠܝ̣ܒܳܐ ܣܰܝܒ̣ܰܪܬ ܚܠܳܦܰܝܢ ܒܰܒܣܰܪ: ܐܰܝܟܰܢܳܐ ܕܠܰܢ ܠܳܐ ܚܳܫܘ̣ܫܘ̣ܬܳܐ ܬ̣ܙܰܡܶܢ ܠܰܢ: ܐܰܢ̱ܬ ܡܳܪܝܳܐ ܒܪ̈ܰܚܡܶܐ ܕܝ̣ܠܳܟ ܣܰܓܺܝ̈ܶܐܐ ܣܥܘ̣ܪ ܠܥܺܕܬܳܐ ܕܝ̣ܠܳܟ ܩܰܕܝ̣ܫܬܳܐ ܗܳܝ ܕܰܩܢ̣ܰܝܬ ܒܰܕܡܳܐ ܝܰܩܝ̣ܪܳܐ: ܘܰܦܪܘ̣ܩܶܝܗܿ ܡ̣ܶܢ ܣܶܕ̈ܩܶܐ ܘܚܶܪ̈ܝܳܢܶܐ ܘܚܺܐܦ̈ܶܐ ܕܰܒܥܶܠ̈ܕܒܳܒܶܐ: ܘܫܰܪܰܪ ܘܩܰܝܶܡܝ̣ܗܿ ܒܝܘ̣ܠܦܳܢܳܐ ܕܬܶܐܘܳܠܳܘܓܺܝܰܐ ܘܰܕܕܘ̣ܓ̈ܡܰܐܛܰܐ ܕܰܐܪܬܳܘܕܘ̣ܟܣܺܝܰܐ ܘܰܒܢܳܛܘ̣ܪܘ̣ܬ ܦܘ̣ܩ̈ܕܳܢܶܐ ܕܝ̣ܠܳܟ ܡܰܚ̈ܝܳܢܶܐ: ܘܗܰܒ ܠܳܗܿ ܫܰܝܢܳܐ ܐܰܡܝܢܳܐ ܘܰܫܠܳܡܳܐ ܟܰܗܝ̣ܢܳܐ ܘܥܺܐܕ̈ܶܐ ܣܰܓܺܝ̈ܶܐܐ ܕܚܰܕ̈ܘܳܬܳܐ: ܐܶܣܳܪܳܐ ܕܚܘ̣ܒܳܐ ܘܰܚܕܳܝܘ̣ܬܳܐ ܕܪܘ̣ܚܳܐ ܩܰܕܝ̣ܫܳܐ: ܕܰܟܝܘ̣ܬܳܐ ܘܩܰܕܝܫܘ̣ܬܳܐ: ܫܰܦܝܪܘ̣ܬ ܩܰܘܡܳܐ ܘܰܡܛܰܟܣܘ̣ܬܳܐ ܪܘ̣ܚܳܢܳܝܬܳܐ: ܘܠܰܐܒܳܗ̈ܰܝܢ ܘܪ̈ܳܥܰܘܳܬܰܢ ܫܰܪܝ̣ܪ̈ܶܐ: ܘܡܰܐ̱ܪ̈ܙܳܢܶܐ ܒܚܝ̣ܪ̈ܶܐ: ܐܰܫܘܳܐ ܐܶܢܽܘܢ ܕܰܐܝܟ ܨܶܒܝܳܢܳܟ ܢܩܘ̣ܡܽܘܢ ܒܪܝ̣ܫܳܐ ܕܥܺܕܬܳܟ: ܘܢܰܛܰܪ ܐܶܢܽܘܢ ܚܠܝ̣̈ܡܶܐ ܘܰܡܝܰܩܪ̈ܶܐ ܢܘ̣ܓܪܳܐ ܕܰܫ̈ܢܰܝܳܐ: ܟܰܕ ܦܳܣܩܝ̣ܢ ܬܪܝ̣ܨܳܐܝ̣ܬ ܡܶܠܬܳܐ ܕܰܫܪܳܪܳܐ ܘܣܳܬܪܝ̣ܢ ܫܟܳܚ̈ܳܬܳܐ ܕܒܝ̣ܫܳܐ: ܘܡܰܠ̈ܦܳܢܘܳܬܳܐ ܕܰܓ̈ܳܠܳܬܳܐ ܘܰܠܗܳܢܽܘܢ ܕܦܘ̣ܠܚܳܢܳܐ ܘܬܶܫܡܶܫܬܳܐ ܕܰܡܟܰܗܢܘ̣ܬܳܐ ܘܰܒܚܰܣܝܘ̣ܬܳܐ ܡܫܰܡܫܝ̣ܢ ܒܕܰܟܝܘ̣ܬܳܐ ܠܩܘ̣ܕ̈ܳܫܶܐ ܕܝ̣ܠܳܟ: ܡܠܝ̣ ܐܶܢܽܘܢ ܚܶܟܡܬܳܐ ܘܛܰܝܒܘ̣ܬܳܐ ܕܪܘ̣ܚܳܐ ܩܰܕܝ̣ܫܳܐ: ܨܰܒܶܬ ܐܶܢܽܘܢ ܒܡܰܘ̈ܗܒܳܬܳܐ ܕܝ̣ܠܳܟ ܐܰܠܳܗܳܝ̈ܳܬܳܐ: ܘܠܰܐܝܠܶܝܢ ܕܰܒܪܶܚܡܰܬ݀ ܥܰܡ̈ܠܶܐ ܕܰܡܚܰܡܣܢܳܢܘ̣ܬܳܐ ܐܰܓ̈ܘ̣ܢܶܐ ܫܰܦܝ̣ܪ̈ܶܐ ܥܳܒܕܝ̣ܢ: ܘܕܘ̣ܒܳܪ̈ܶܐ ܡܝܰܬܪ̈ܶܐ ܘܕܰܦܐܶܝܢ ܠܩܰܕܝ̣̈ܫܶܐ ܡܶܬܥܰܢܘܶܝܢ: ܐܰ‌ܠܒܶܫ ܐܶܢܽܘܢ ܙܰܝܢܳܐ ܠܳܐ ܡܶܙܕܰܟܝܳܢܳܐ ܘܰܡܣܰܝܒܪܳܢܘ̣ܬܳܐ ܘܬܰܪܥܝ̣ܬܳܐ ܚܰܝܠܬܳܢܝ̣ܬܳܐ: ܘܓܰܢ̱ܒܳܪܘ̣ܬܳܐ ܪܘ̣ܚܳܢܳܝܬܳܐ ܕܠܘ̣ܩܒܰܠ ܚܰܫ̈ܶܐ: ܘܰܠܗܳܢܽܘܢ ܕܡ̣ܶܢ ܚܰܝ̈ܶܐ ܕܗܳܪܟܳܐ ܠܘܳܬܳܟ ܚܙ̣ܰܩܘ̱: ܘܪܶܗܛܳܐ ܛܳܒܳܐ ܫܰܡܠܝ̣ܘ ܪ̈ܝ̣ܫܰܝ ܐܰܒܳܗ̈ܳܬܳܐ: ܘܰܐܒ̈ܗܳܬܳܐ: ܢܒܺܝ̈ܶܐ ܫܠܝ̣̈ܚܶܐ: ܟܳܪ̈ܘ̣ܙܶܐ ܘܰܡܣܰܒܪ̈ܳܢܶܐ: ܣܳܗ̈ܕܶܐ ܘܡܰܘ̈ܕܝܳܢܶܐ: ܥܰܡ ܫܰܪܟܳܐ ܕܩܰܕܝ̣̈ܫܶܐ ܗܳܢܽܘܢ ܕܡ̣ܶܢ ܥܳܠܰܡ ܫܦ̣ܰܪܘ̱ ܠܳܟ: ܐܰܢܝ̣ܚ ܢܰܦ̈ܫܳܬܗܽܘܢ ܒܰܐܘ̈ܘܳܢܶܐ ܕܢܘ̣ܗܪܳܐ: ܘܚܰܕܳܐ ܐܶܢܽܘܢ ܒܛܳܒ̈ܳܬܳܐ ܕܝ̣ܠܳܟ ܡܬܘ̣ܡܳܝ̈ܳܬܳܐ ܘܕܰܠܥܳܠܰܡ: ܘܰܒܝܰܕ ܬܰܟܫ̈ܦܳܬܗܽܘܢ ܩܰܕܝ̣̈ܫܳܬܳܐ ܫܰܟܶܢ ܫܰܝܢܳܐ ܘܰܫܠܳܡܳܐ ܘܫܰܦܝ̣ܪܘ̣ܬ ܩܘ̣ܝܳܡܳܐ ܠܟܽܠܶܗ ܥܳܠܡܳܐ: ܘܰܟܠܝ̣ ܘܰܐܥܒܰܪ ܡܶܢܰܢ ܟܽܠܗܶܝܢ ܡܰܚ̈ܘܳܬܳܐ ܩܰܫ̈ܝܳܬܳܐ: ܘܰܡܣܳܡ ܒܪ̈ܝ̣ܫܶܐ ܕܪܘ̣ܓܙܳܐ: ܠܡܰܠ̈ܟܶܐ ܘܫܰܠܝ̣̈ܛܳܢܶܐ ܫܰܝܶܢ ܘܕܰܒܰܪ ܒܕܶܚܠܬܳܐ ܕܝ̣ܠܳܟ: ܩܪ̈ܳܒܶܐ ܘܬܰܟ̈ܬܘ̣ܫܶܐ ܒܰܛܶܠ ܒܪܶܚܡܰܬ݀ ܐ̱ܢܳܫܘ̣ܬܳܐ ܕܝ̣ܠܳܟ: ܥܰܠ̈ܠܳܬܳܐ ܕܫܰܢ̱ܬܳܐ ܫܰܪܬܰܚ ܒܛܳܒܘ̣ܬܳܐ ܕܝ̣ܠܳܟ: ܠܥܰܬܝ̣ܪ̈ܶܐ ܐܰܥܬܰܪ ܒܡܰܘ̈ܗܒܳܬܳܟ ܘܒܰܪܶܟ ܠܡܰܪ̈ܗܳܛܶܐ ܕܝ̣ܠܗܽܘܢ: ܠܡܶܣ̈ܟܺܢܶܐ ܦܰܪܢܶܣ ܒܰܚܢܳܢܳܟ ܘܰܡܠܝ̣ ܒܰܣܝܡܘ̣ܬܳܐ ܠܠܶܒܰܘ̈ܳܬܳܐ ܕܝ̣ܠܗܽܘܢ: ܘܠܰܐܝܠܶܝܢ ܕܰܒܟܘ̣ܪ̈ܗܳܢܶܐ ܡܫܰܚ̈ܠܦܶܐ ܐܝ̣ܬܰܝܗܽܘܢ ܐܰܣܳܐ ܘܰܣܥܘ̣ܪ ܒܰܚܢܳܢܳܟ: ܘܰܠܗܳܢܽܘܢ ܕܒܐܘ̣ܠ̈ܨܳܢܶܐ ܘܰܒܢܶܣ̈ܝܘ̣ܢܶܐ ܡܶܫܬܰܢܩܝ̣ܢ ܦܪܘ̣ܩ ܘܫܰܘܙܶܒ: ܠܰܐܝܠܶܝܢ ܕܰܐܒܝ̣ܠܝ̣ܢ ܒܰܝܰܐ: ܠܰܙܥܘ̣ܪ̈ܰܝ ܢܰܦܫܳܐ ܠܰܒܶܒ: ܠܛܳܥܰܝ̈ܳܐ ܐܰܦܢܳܐ ܠܝ̣ܕܰܥܬܳܐ ܕܰܫܪܳܪܳܐ ܕܝ̣ܠܳܟ: ܠܡܰܒܰܕܪ̈ܶܐ ܟܰܢܶܫ ܠܘܳܬܳܟ: ܘܰܠܟܽܠ ܐܰܝܬܳܐ ܠܐܘ̣ܪܚܳܐ ܕܦܘ̣ܪܩܳܢܳܐ ܘܰܠܣܳܥܪ̈ܰܝ ܫܰܦܝ̣ܪ̈ܳܬܳܐ ܕܡܶܛܽܠܳܬܳܟ ܦܪܘ̣ܥ ܛܳܒ̈ܳܬܳܐ ܘܡܰܘܗ̈ܒܳܬܳܐ ܕܝ̣ܠܳܟ ܥܰܬܝ̣ܪ̈ܳܬܳܐ ܘܰܫܡܰܝܳܢ̈ܝܳܬܳܐ: ܘܠܰܐܝܠܶܝܢ ܕܫ̣ܶܐܠܘ̱ ܘܫܳܐܠܝ̣ܢ ܨܠܘ̣ܬܳܐ ܕܰܒܨܝ̣ܪܘ̣ܬܰܢ ܒܗܰܝܡܳܢܘ̣ܬܳܐ ܕܰܫܪܳܪܳܐ: ܗܳܝ̇ ܕܥܳܕܪܳܐ ܘܦܳܩܚܳܐ ܠܚܰܝ̈ܶܐ ܕܝ̣ܠܗܽܘܢ ܫܰܟܶܢ: ܘܰܠܟܽܠ ܦܪܘ̣ܩ ܘܫܰܘܙܶܒ: ܡ̣ܶܢ ܛܘ̣ܪ̈ܳܦܶܐ ܘܢܶܣ̈ܝܘ̣ܢܶܐ ܕܗܳܪܟܳܐ ܘܡ̣ܶܢ ܬܰܫܢܝ̣̈ܩܶܐ ܕܰܥܬܝ̣ܕܝ̣ܢ: ܘܰܐܫܘܳܐ ܠܟܽܠܰܢ ܠܡܰܠܟܘ̣ܬܳܐ ܕܝ̣ܠܳܟ ܫܡܰܝܳܢܝ̣ܬܳܐ ܥܰܡ ܟܽܠܗܽܘܢ ܩܰܕܝ̣̈ܫܶܐ ܕܝ̣ܠܳܟ: ܐܰܝܟܰܢܳܐ ܕܥܰܡܗܽܘܢ ܬܶܫܒܘ̣ܚܬܳܐ ܕܙܳܟܘ̣ܬܳܐ ܒܩ̈ܳܠܶܐ ܕܩܘ̣ܒܳܠܛܰܝܒܘ̣ܬܳܐ: ܢ̇ܰܣܶܩ ܠܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀