ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܠܪ̈ܰܚܡܰܝܟ: ܘܰܣܥܘ̣ܪ ܠܰܢ ܒܛܰܝܒܘ̣ܬܳܟ: ܘܚܰܣܳܐ ܠܰܢ ܒܰܚܢܳܢܳܟ: ܘܰܫܒܘ̣ܩ ܣܰܟܠ̈ܘܳܬܰܢ ܒܰܡܪܰܚܡܳܢܘ̣ܬܳܟ: ܘܩܰܒܶܠ ܨܰܘܡܰܢ ܒܪܶܚܡܰܬ݀ ܐ̱ܢܳܫܘ̣ܬܳܟ: ܘܰܫܡܰܥ ܨܠܰܘ̈ܳܬܰܢ ܒܚܰܝܽܘܣܬܳܢܘ̣ܬܳܟ: ܘܗܰܒܠܰܢ ܕܥܰܡ ܨܰܝ̈ܳܡܶܐ ܪ̈ܘ̣ܚܳܢܳܝܶܐ ܢ̇ܫܰܒܚܳܟ: ܘܠܰܐܒܘ̣ܟ ܘܰܠܪܘܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܰܚܕܳܐ ܐܘ̣ܣܺܝܰܐ ܡܪܰܝܰܡܬܳܐ: ܚܕܳܐ ܡܳܪܘ̣ܬܳܐ ܓܢܝ̣ܙܬܳܐ: ܚܕܳܐ ܐܰܠܳܗܘ̣ܬܳܐ ܡܫܰܒܰܚܬܳܐ: ܚܰܕ ܨܶܒܝܳܢܳܐ ܐܰܘܝܳܐ: ܚܰܕ ܫܘ̣ܠܛܳܢܳܐ ܫܰܘܝܳܐ: ܚܰܕ ܦܘ̣ܩܕܳܢܳܐ ܡܳܪܳܢܳܝܳܐ: ܕܠܶܗ ܣܳܓܕܝ̣ܢ ܘܰܡܫܰܒܚܝ̣ܢ ܘܰܡܪܰܡܪܡܝ̣ܢ ܥܶܠܳܝ̈ܶܐ ܘܬܰܚ̈ܬܳܝܶܐ: ܘܟܽܠ ܕܰܗ̣ܘܳܐ ܘܰܕܗܳܘܶܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܛܳܒܳܐ ܒܰܟܝܳܢܳܐ ܘܣܰܓܺܝܳܐܐ ܒܥܘ̣ܕܪ̈ܳܢܶܐ ܗܰܘ̇ ܕܳܐܣܝܽܘ̣ܬܳܐ ܕܢܰܦܫ̈ܳܬܳܐ ܘܰܕܦܰܓܪ̈ܶܐ ܫܰܟܶܢ ܠܥܺܕܬܶܗ ܨܰܘܡܳܐ ܩܰܕܝ̣ܫܳܐ: ܕܒܶܗ ܐܶܬ̣ܢܰܨܰܚܘ̱ ܩܰܕ̈ܡܳܝܶܐ: ܘܶܐܙܕܰܗܝ̣ܘ ܡܶܨܥܳܝ̈ܶܐ ܘܶܐܬܚܰܘܰܪ̈ܝ̱ ܟܘ̣ܬܡ̈ܳܬܳܐ ܕܰܐ̱ܚܪ̈ܳܝܶܐ: ܒܶܗ ܡܽܘ̣ܫܶܐ ܗܰܘ̇ ܪܝ̣ܫܳܐ ܕܰܢܒܺܝ̈ܶܐ ܐܶܫ̣ܬܘܺܝ̣ ܕܢ̣ܶܚܙܶܝܟ ܐܰܦܝ̣̈ܢ ܠܘ̣ܩܒܰܠ ܐܰܦܝ̣̈ܢ: ܟܡܳܐ ܡܰܨܝܳܐ ܠܒܰܪܢܳܫܳܐ ܕܢ̣ܶܚܙܶܐ ܠܰܐܠܳܗܳܐ ܠܳܐ ܡܶܬܚܰܙܝܳܢܳܐ: ܘܒܶܗ ܐܶܫ̣ܬܘܺܝ̣ ܕܰܢ̣ܩܰܒܶܠ ܠܘ̣̈ܚܶܐ ܕܢܳܡܘ̣ܣܳܐ: ܘܒܶܗ ܐܶܙܕܰܗܺܝ̣ ܦܰܪܨܘ̣ܦܶܗ ܐܰܝܟ ܫܶܡܫܳܐ: ܘܒܶܗ ܐܺܠܺܝܳܐ ܐܶܫ̣ܬܘܺܝ̣ ܕܢ̣ܶܣܰܩ ܠܰܫܡܰܝܳܐ: ܘܒܶܗ ܕܳܢܺܝ̣ܐܝܶܠ ܐܶܬܦܰܨܺܝ̣ ܡܶܢ ܓܘ̣ܒܳܐ ܘܰܥܫܘ̣ܩܝܳܐ ܕܟܰܠ̈ܕܳܝܶܐ: ܘܒܶܗ ܛܠܳܝ̈ܶܐ ܕܒܶܝܬ ܚܰܢܰܢܝܳܐ ܐܶܙܕܰܗܺܝ̣ܘ ܘܶܐܬܪܣܶܣ ܠܗܽܘܢ ܛܰܠܳܐ ܫܡܰܝܳܢܳܐ: ܘܒܰܕܓܽܘܢ ܟܰܕ ܒܗܳܢܳܐ ܝܰܘܡܳܐ ܡܰܦܪܓܝ̣ܢܰܢ: ܘܒܶܗ ܡܶܙܕܰܝܢܝ̣ܢܰܢ ܘܳܐܡܪܝ̣ܢܰܢ: ܒܨܰܘܡܳܐ ܐܶܬ̣ܢܰܨܰܚܘ̱ ܫܠܝ̣̈ܚܶܐ ܐܰܠܳܗ̈ܳܝܶܐ: ܘܒܶܗ ܐܶܙܕܰܗܺܝ̣ܘ ܢܒܺܝ̈ܶܐ ܩܰܕܝ̣̈ܫܶܐ: ܒܨܰܘܡܳܐ ܒܳܣܪܝ̣ܢܰܢ ܠܪܶܚܡܰܬ݀ ܟܰܪܣܳܐ ܐܶܡܳܐ ܕܰܫܪܝ̣ܚܘ̣ܬܳܐ: ܘܒܶܗ ܒܳܥܶܝܢܰܢ ܫܘ̣ܒܩܳܢܳܐ ܕܟܽܠܗܶܝܢ ܣܰܢܝ̈ܳܬܰܢ: ܒܨܰܘܡܳܐ ܓܡܝ̣ܪ̈ܶܐ ܣܳܠܩܝ̣ܢ ܠܪܰܘܡܳܐ ܕܰܫܡܰܝܳܐ: ܘܒܶܗ ܓܳܡܪܝ̣ܢܰܢ ܦܘ̣ܩ̈ܕܳܢܶܐ ܐܰܠܳܗ̈ܳܝܶܐ: ܒܨܰܘܡܳܐ ܕܳܢܰܚ ܥܠܰܝܢ ܢܘ̣ܗܪܳܐ ܡܶܢ ܪܰܘܡܳܐ ܘܒܶܗ ܕܘ̣ܟܳܝܳܐ ܕܰܚܛܳܗ̈ܶܐ ܩܳܢܶܝܢܰܢ: ܒܨܰܘܡܳܐ ܗܳܘܶܝܢܰܢ ܡܶܢ ܚܰܛܳܝ̈ܶܐ ܬܰܝ̈ܳܒܶܐ: ܘܒܶܗ ܗܰܝܟ̈ܠܶܐ ܕܪܘ̣ܚܳܐ ܩܰܕܝ̣ܫܳܐ ܗܳܘܶܝܢܰܢ: ܒܨܰܘܡܳܐ ܘܰܥܕܳܐ ܕܚܰܝ̈ܶܐ ܐܶܫ̣ܬܰܟܰܢ ܠܰܢ: ܘܒܶܗ ܐܳܦ ܡܘ̣ܠ̈ܟܳܢܶܐ ܕܰܡܠ̣ܰܟ ܐܰܠܳܗܳܐ ܠܰܐܝܠܶܝܢ ܕܡܰܚܒܝ̣ܢ ܠܶܗ ܡܶܬܝܰܗܒܝ̣ܢ ܠܰܢ: ܒܨܰܘܡܳܐ ܙܟܳܐ ܦܳܪܘ̣ܩܰܢ ܠܰܒܥܶܠܕܰܪܳܐ: ܘܒܶܗ ܙܳܟܶܝܢܰܢ ܠܟܽܠܗܶܝܢ ܨܶܢܥ̈ܳܬܶܗ ܡܰܘܒ̈ܕܳܢܝܳܬܳܐ: ܒܨܰܘܡܳܐ ܩܰܕܝ̣ܫܳܐ ܚܪ̈ܘ̣ܪܶܐ ܕܢܰܦܫ̈ܳܬܰܢ ܡܶܬܬܰܓܪܝ̣ܢܰܢ: ܒܨܰܘܡܳܐ ܩܰܕܝ̣ܫܳܐ ܛܰܠܳܐ ܐܶܬܪܣܶܣ ܠܰܛܠܳܝ̈ܶܐ ܒܰܐܬܘ̣ܢܳܐ ܕܢܘ̣ܪܳܐ: ܘܒܶܗ ܛܰܝܒܘ̣ܬܳܐ ܐܰܠܳܗܳܝܬܳܐ ܡܰܓ̇ܢܳܐ ܥܠܰܝܢ: ܒܨܰܘܡܳܐ ܩܰܕܝ̣ܫܳܐ ܝܳܪ̈ܘ̣ܬܶܐ ܗܳܘܶܝܢܰܢ ܕܡܰܫܟ̈ܢܶܐ ܫܡܰܝ̈ܳܢܶܐ: ܘܒܶܗ ܝܘ̣ܩܪܳܐ ܕܣܰܟܠ̈ܘܳܬܰܢ ܡܶܫܬܪܶܐ: ܒܨܰܘܡܳܐ ܟܽܠܗܽܘܢ ܚܰܛܳܝ̈ܶܐ ܕܬܳܝܒܝ̣ܢ ܡܶܬܚܰܠܠܝ̣ܢ: ܘܒܶܗ ܟܘ̣ܬܡ̈ܳܬܗܽܘܢ ܡܶܬܡܰܪ̈ܩܳܢ ܘܡܶܬܕܰܟ̈ܝܳܢ: ܒܨܰܘܡܳܐ ܠܰܫܪܳܪܳܗ̇ ܕܰܬܝܳܒܘ̣ܬܳܐ ܝ̣ܠܶܦ̣ܢܰܢ: ܘܒܶܗ ܠܕܶܚܠܰܬ݀ ܐܰܠܳܗܳܐ ܡܶܬܥܰܠܶܝܢܰܢ: ܒܨܰܘܡܳܐ ܡܶܙܕܰܗ̈ܝܳܢ ܢܰܦܫ̈ܳܬܳܐ ܕܨܰܝ̈ܳܡܶܐ ܦܳܪ̈ܘ̣ܫܶܐ: ܘܒܶܗ ܡܶܬܪܰܥܶܐ ܐܰܠܳܗܳܐ ܠܡܰܣܟ̈ܠܳܢܶܐ: ܒܨܰܘܡܳܐ ܢܳܗܪ̈ܳܢ ܢܰܦܫ̈ܳܬܳܐ ܕܬܰܝ̈ܳܒܶܐ: ܘܒܶܗ ܢ̇ܶܓܥܶܐ ܚܢܰܢ ܒܚܰܫܳܐ ܠܘܳܬ ܐܰܠܳܗܳܐ ܕܰܢ̣ܥܰܕܰܪ ܠܰܢ: ܒܨܰܘܡܳܐ ܣܳܛܳܢܳܐ ܘܚܰܝ̈ܠܰܘܳܬܶܗ ܚܳܝܒܝ̣ܢ: ܘܒܶܗ ܣܰܩܘ̣̈ܒܠܶܐ ܘܢܶܟܝ̈ܳܢܶܐ ܕܳܥܟܝ̣ܢ ܘܡܶܫܬܰܗܶܝܢ: ܒܨܰܘܡܳܐ ܥܳܐܠܝ̣ܢ ܨܰܝ̈ܳܡܶܐ ܠܰܐܬܪܳܐ ܕܡܶܬܬܰܘܝܳܢܘ̣ܬܳܐ: ܘܒܶܗ ܥܘ̣ܕܪ̈ܳܢܶܐ ܡܛܰܝ̈ܒܶܐ ܥܳܦܶܝܢ ܟܰܫܝ̣ܪ̈ܶܐ: ܒܨܰܘܡܳܐ ܦܰܓܪ̈ܳܢܶܐ ܗܳܘܶܝܢ ܪ̈ܘ̣ܚܳܢܶܐ: ܘܒܶܗ ܦܘ̈ܡܶܐ ܘܠܶܫ̈ܳܢܶܐ ܕܨܰܝ̈ܳܡܶܐ ܙܗܰܝ̈ܳܐ ܡܶܬܩܰܕܫܝ̣ܢ: ܒܨܰܘܡܳܐ ܨܰܝ̈ܳܡܶܐ ܦܳܪ̈ܘ̣ܫܶܐ ܡܩܰܒܠܝ̣ܢ ܟܠܝ̈ܠܶܐ ܕܙܳܟܘ̣ܬܳܐ: ܘܒܶܗ ܨܘ̣ܥܨ̈ܳܥܶܐ ܕܚܰܘ̈ܒܶܐ ܘܕܰܚܛܳܗ̈ܶܐ ܡܶܬܡܰܪܩܝ̣ܢ: ܒܨܰܘܡܳܐ ܩ̈ܳܠܶܐ ܕܬܰܘܕܝ̣ܬܳܐ ܠܰܐܠܳܗܳܐ ܡܩܰܪܒܝ̣ܢܰܢ: ܘܒܶܗ ܩܳܪܶܝܢܰܢ ܠܪ̈ܰܚܡܶܐ ܡܬܘ̣ܡ̈ܳܝܶܐ ܕܰܢ̣ܣܰܝܥܽܘܢ ܠܰܢ: ܒܨܰܘܡܳܐ ܪܳܕܶܝܢ ܩܰܕܝ̣̈ܫܶܐ ܒܐܘ̣ܪܚܳܐ ܗܳܝ ܫܡܰܝܳܢܝ̣ܬܳܐ: ܘܒܶܗ ܪ̈ܰܚܡܶܐ ܡܶܫܬܰܦܥܝ̣ܢ ܥܰܠ ܐܰܝܠܶܝܢ ܕܡܶܬܟܰܬܫܝ̣ܢ ܒܶܗ: ܒܨܰܘܡܳܐ ܫܳܡܰܥ ܒܳܥܘ̈ܳܬܰܢ ܘܦܳܪܶܩ ܠܰܢ ܐܰܠܳܗܳܐ: ܘܒܶܗ ܫܳܒܶܩ ܚܰܘ̈ܒܶܐ ܘܰܚܛܳܗ̈ܶܐ ܕܰܐܝܠܶܝ̣ܢ ܕܫܳܐܠܝ̣ܢ ܠܶܗ: ܒܨܰܘܡܳܐ ܩܰܕܝ̣ܫܳܐ ܬܶܫܒܘ̣ܚܬܶܗ ܕܰܡܫܰܒܚܳܐ ܡܶܫܬܰܒܚܳܐ ܡܶܢܰܢ ܡܚ̈ܝ̣ܠܶܐ: ܘܒܶܗ ܬܘ̣ܒ ܡܰܘܕܶܝܢܰܢ ܠܶܗ ܠܛܳܒܳܐ ܕܰܒܡܰܘܗܰܒܬܶܗ ܨܰܒܶܬ ܠܰܢ: ܕܠܶܗ ܟܰܕ ܒܥܘ̣ܕܪ̈ܳܢܶܐ ܕܡܶܢܳܟ ܡܫܰܡܠܶܝܢܰܢ ܡܫܝ̣ܚܳܐ ܐܰܠܳܗܰܢ: ܐܰܫܘܳܐ ܠܰܢ ܠܪ̈ܰܚܡܰܝܟ ܘܰܣܥܘ̣ܪ ܠܰܢ ܒܛܰܝܒܘ̣ܬܳܟ: ܘܚܰܣܳܐ ܠܰܢ ܒܰܚܢܳܢܳܟ: ܘܩܰܒܶܠ ܨܰܘܡܰܢ ܒܪܶܚܡܰܬ݀ ܐ̱ܢܳܫܘ̣ܬܳܟ: ܘܰܐܫܘܳܐ ܠܰܢ ܕܥܰܡ ܨܰܝܳܡ̈ܶܐ ܪ̈ܘ̣ܚܳܢܳܝܶܐ ܢ̇ܫܰܒܚܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܰܠܳܗܳܐ ܕܕܰܥ̣ܶܟ ܠܫܰܠܗܶܒܝ̣ܬܳܐ ܕܰܐܬܘ̣ܢܳܐ: ܘܓܰܘܙܰܠܬܳܐ ܕܢܘ̣ܪܳܐ ܡܶܢ ܛܠܳܝ̈ܶܐ ܕܒܶܝܬ ܚܰܢܰܢܝܳܐ: ܘܪܰܣ ܛܰܠܳܐ ܥܰܠ ܐܰܦܰܝ̈ܗܽܘܢ: ܘܫܰܠ̣ܗܶܒ ܐܶܢܽܘܢ ܒܪܶܚܡܬܶܗ: ܘܰܐܒ̣ܗܶܬ ܠܡܰܠܟܳܐ ܚܰܢܦܳܐ ܘܰܠܟܽܠܗܽܘܢ ܦܳܠ̈ܚܰܝ ܦܬܰܟܪ̈ܶܐ: ܫܰܠܗܶܒ ܠܰܢ ܒܪܶܚܡܬܳܟ ܐܰܠܳܗܳܝܬܳܐ: ܘܩܰܒܶܠ ܨܰܘܡܰܢ ܘܰܨܠܰܘ̈ܳܬܰܢ: ܘܦܝ̣ܪܡܳܐ ܕܩܰܪܶܒܢܰܢ ܗܳܫܳܐ ܩܕܳܡܰܝܟ ܒܥܶܕܳܢܳܐ ܗܳܢܳܐ: ܘܚܰܣܳܐ ܒܶܗ ܚܰܘܒ̈ܶܐ ܘܰܚܛܳܗ̈ܶܐ ܕܟܽܠܳܗ̇ ܡܰܪܥܝ̣ܬܳܟ: ܘܰܐܫܪܳܐ ܫܰܝܢܳܟ ܘܰܫܠܳܡܳܟ ܒܰܒܪܝ̣ܬܳܐ ܘܰܐܢܝ̣ܚ ܠܟܽܠܗܽܘܢ ܥܰܢܝ̣̈ܕܶܐ ܡܗܰܝܡ̈ܢܶܐ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀